Gyenesise 31
31
Yakob nwati fi Laban berɛ
1Yakob tele kyɛ Laban mma mmienzua nemɔ kekã kyɛ, “Yakob afa yɛ baba nningyein mukoraa; yɛ baba nwo yeɛ wafa wanya sɔ agyapadeɛ ye amu ɔ.” 2Onwuni kyɛ Laban olle ye nwo adwene paa kyɛ daa ne ko. 3Na AWURADE sele Yakob kyɛ, “Sá kɔ wɔ nana mɔ maen nu ne w’abusua nu, na ngogyina wɔ si.” 4Yiti Yakob somane maa bɛɛfrɛle Rahɛl ne Lea bɛbrɛle ye wɔ eburo dɔ nekaa bɔ né ye nyɛmmoa nemɔ wɔ ne, 5na osele bɛ kyɛ, “Manwu ye kyɛ ɛmɔ ase ɔne me y’asetena ne anu ɔnyɛ nyemene kyɛ daa ne ko, nakoso me nana mɔ Nyameɛ ne agyina me si. 6Ɛmɔse ye kyɛ mafia me kunu mafa m’anwoserɛ amu maso ɛmɔ ase. 7Nakoso ɛmɔ ase asisi me. Wasesã m’akatuaa sɔ alaa buru mumua, nakoso Nyameɛ amma ye ate maa wambura me. 8Sɛ ɔka kyɛ, ‘W’akatuaa kɔyɛ ngaka bɔ bɛ nwo te ndetaa ndetaa ne’ a, né ngaka ne amu bawo anwo ndetaa ndetaa. Yeɛ sɛ ɔka kyɛ w’akatuaa kɔyɛ ngaka bɛ nwo te kyerekyerɛɛ ne a, né ngaka ne amu bawo anwo kyerekyerɛɛ. 9Sɔ atee he aso yeɛ Nyameɛ nate wale ɛmɔ baba ngaka kure ne wafi ye sa nu na wafa wama me ye. 10Mmerɛ bɔ ngaka nemɔ sɔle ne, ngyene laleɛ. Laleɛ ne anu, mbagyale me ti, na nwuni kyɛ mbɔngye nyii bɔ bɛ́fo mmeleɛ nemɔ ne, bɛ nwo te kyerekyerɛɛ ne ndetaa ndetaa ne nworonworaen. 11Laleɛ ne anu, Nyameɛ abɔfo frɛle me kyɛ, ‘Yakob.’ Na nzurole kyɛ, ‘Me ɛhe!’ 12Osele me kyɛ, ‘Pagya wɔ ti na nea: ngaka nyii bɔ bɛ́fo mmeleɛ ne amukoraa bɛ nwo te kyerekyerɛɛ, ndetaa ndetaa ne nworonworaen; ofikyɛ me nye tua bɔ Laban ɔ́fa di wɔ ne amu. 13#Gye 28.18-22 Me ole Betel Nyameɛ, nekaa bɔ yeɛ ehwiele ngoo guale ngayeɛ nyɔboɛ so na ɛhyɛle me bɔ ne. Afei dwɔso na fi sɔ maen ye anu na sá kɔ aseɛ bɔ yeɛ bɛpɛle wɔ kotoa wɔ so ne aso.’ ” 14Yeɛ Rahɛl ne Lea buale ye kyɛ, “Aso nikyee anaa agyapadeɛ bie tɛ wɔ berɛ ma yɛ wɔ yɛ se awuro? 15Aso ommu yɛ amanvrafoɛ? Wayɛ yɛ atɔen, na ódi yɛ ti sikaa ne. 16Agyapadeɛ bɔ Nyameɛ ale afi yɛ baba sa nu ne amukoraa te yɛ ne yɛ mma deɛ. Yiti afei de, yɔ bɔ Nyameɛ aha ahyire wɔ biala.”
17Na Yakob dwɔsole fale ye mma mɔ ne ɔye mɔ tenatenane afupɔngɔ so. 18Ɔhane ye nyɛmmoa amukoraa lili ye nyunu, ɔsesale ye agyapadeɛ ne ye ngaka bɔ onyane ye wɔ Padan Aram amukoraati, na ɔfale ye nye hyirele Kanaan aseɛ so kyɛ ɔ́kɔ ɔse Yisake dɔ. 19Né Laban ahɔ kyɛ ɔkwaapepɛ ye mmoaen nwo nwiaa, na Rahɛl wuale ɔse awuro mmosoen. 20Na Yakob feale ye nwo nwatili fili Aramniɛ Laban berɛ, ofikyɛ wammɔ ye amaneɛ kyɛ ofi berɛ kɔ ye kuro. 21Ɔsesale ye bɔbɔ ye nwo nningyein amukoraa nwatili, ɔpɛle asue Yufreti, na ɔfale ye nye hyirele Gileade mmokaa aseɛ ne aso.
Laban po Yakob so
22Ye ɛlɛsa ne aso, bɛbɔle Laban amaneɛ kyɛ Yakob anwati, 23yiti ɔfale ye awuro ama bokale ye nwo so, na ɔpole Yakob so alaa ɛlɛsoo, maa oodwuli kyɛ opingyele Yakob wɔ Gileade mmokaa aseɛ ne aso ɔ. 24Nakoso Nyameɛ yele ye nwo ali hyirele Aramniɛ Laban kɔngɔen ne wɔ laleɛ nu, na ɔkanzole ye kyɛ, “Nea yé né anga edwirɛ biala, paa anaakyɛ tɛɛ angyire Yakob.”
25Laban ɔɔtole Yakob. Né Yakob asi ye ɛtena sua wɔ mmokaa aseɛ ne aso. Na Laban ne ye mmenia koso sili bɛ deɛ wɔ Gileade mmokaa aseɛ ne aso. 26Na Laban bisale Yakob kyɛ, “Nzikyɛ nikye yeɛ ayɔ ye, bɔ alakalaka me na asesa me mma mmrasua mɔ anwati kyɛ mmenia bɔ bele ngrandɛ bahye bɛ nnure ye? 27Nzu ati yeɛ ɛyɛle kudɛɛ nwatili na ɛlakalakale me ɔ? Nzu ati yeɛ ammɔ me amaneɛ maa mamva anigye ne edwein ne akasaa ne sangoo mangua wɔ ate ɔ? 28Na nzu ati yeɛ amma mamve me nnomaa ne me mma mɔ noa, na me ne bɛ yanni ngraa ɔ? Ali ngwaseasɛm! 29Ahaa nne ye nwo ate kyɛ me ne ɛmɔ di ye weewee, nakoso wɔ baba ye Nyameɛ ɔne me dwudwole ɛnɛ kɔngɔen kyɛ, ‘Nea yé né anga edwirɛ biala, paa anaakyɛ tɛɛ angyire Yakob.’ 30Kekesaala ye de, wɔ wora adɔ ɛse awuro ti yeɛ ɛkɔ ɔ, na nzu ati yeɛ ewuale me mmosoen ɔ?” 31Na Yakob buale Laban kyɛ, “Né mesuro, ofikyɛ né medwene kyɛ ɛkɔhyɛ me kole wɔ mma mmrasua nemɔ kofi me sa nu. 32Wɔ mmosoen nemɔ de, ebiala bɔ ekonwu bɛ wɔ ye dɔ ne, odi kyɛ beku ye ɔ. Y’eliɛma ye mɔ anyunu wa ala, neanea me nningyein nu nea sɛ wɔ nikyee bie wɔ nu a, ye.” Né Yakob nze kyɛ Rahɛl awua mmosoen ne ɔ.
33Yiti Laban hɔle Yakob ɛtena sua nu, Lea ɛtena sua nu, ɔne afaneɛ nyɔ nemɔ deɛ nu (ɔɔpenane mmosoen nemɔ) nakoso wannwu bɛ. Na ofili Lea ɛtena sua ne anu oowurale Rahɛl deɛ nu. 34Né Rahɛl asesa awuro mmosoen ne wafea afupɔngɔ so atɛ ne anu watena so. Laban tuli ɛtena sua ne anu nningyein amu, nakoso wannwu bɛ. 35Na Rahɛl sele ɔse kyɛ, “Nnɛma me mene fɛ ɛyaa kyɛ mengɔhora dwɔso wɔ wɔ nyunu ɔ, ofikyɛ mabu me sa.” Yiti Laban hɔle so penane, nakoso wannwu ye awuro mmosoen nemɔ.
36Yiti Yakob fɛle ɛyaa, na ɔbɔle Laban kwaadu kyɛ, “Me mvomsoɛ ole sɛɛ? Ɛtɛɛ beni yeɛ mayɔ bɔ yeɛ egu me so anyeborolɛ so sɔa ye? 37Aso etuli me nningyein amukoraati ne, enwuni w’awuro nikyee bie wɔ nu? Sɛ anwu bie a, fa baato nniɛma mɔ ne eliɛma ye mɔ anyunu wa maa bebua yɛ munyɔ y’afia ndɛen. 38Afoɛ aburanyɔ ye bɔ me ne wɔ yɛtenane ye, wɔ mmoaen ne wɔ mbɔngye annwonzɛ maa wanye wandɔ le, na mangu wɔ mmoaen kure ne anu boaen nyii biala manni. 39Bɛ bɔ ngaka aboyaa huni bɛ ne po, mamva mammrɛ wɔ, na mmom mmaa ɔyɛle me kerɛ. Na bɛ bɔ bewuale bɛ eyia anaa kɔngɔen ne wora, ɛmaa nduale ye kerɛ. 40Tebea he yeɛ mvale nu ɔ: eyia yerale me, na ɛyerɛ koso huni me, na mannya nnaa kaala manna. 41Sɔ afoɛ aburanyɔ bɔ nnili wɔ w’awuro berɛ ye, wɔ mma mmrasua ne ati nzole wɔ afoɛ buru ne nna, yeɛ wɔ mmoaen ne ati nzole wɔ afoɛ nzia. Ɛsesane m’akatuaa sɔ alaa buru mumua. 42Me baba ye Nyameɛ bɔ yeɛ ɔte Abraham ye Nyameɛ, na osa te Nyameɛ bɔ Yisake suro ye ne, sɛ wangyina me si a, ahaa ɛmaa mvale nzanza ngɔle. Na Nyameɛ nwuni m’ateetee ne me fɛɛ, yiti yeɛ ɔmaa ɔhane wɔ nyunu anoma kɔngɔen ne.”
Yakob ne Laban yɛ apam
43Na Laban buale Yakob kyɛ, “Ndaluwa ye mɔ, me bɔbɔ me mma ɔ, ngwadaa ye mɔ koso, me bɔbɔ me nnomaa ɔ, na ngaka kure ne ɔne bɔ wɔ nye tua ye amu, me deɛ ɔ. Nakoso me mma mmrasua anaakyɛ bɛ mma bɔ bawo bɛ ye, nzikyɛ yeɛ ngɔhora ngɔyɔ ngɔfa bɛ nwo ɛnɛ ɔ? 44Afei bra maa yɛyɛ apam, na ɔyɛ adanzeɛ la me ne wɔ y’afia.” 45Yiti Yakob fale nyɔboɛ penane berɛ yɛle ngayeɛ nyɔboɛ wɔ berɛ. 46Yakob sele ye mmenia ne kyɛ, “Ɛ́mɔboaboa nyɔboɛ noa.” Yiti bɛboale nyɔboɛ noa maa ɔyɛle kure, ne bɛtenane nyɔboɛ kure ne anwo berɛ bedidili. 47Laban frɛle nyɔboɛ kure ne Yega Sahaduta,#31.47: YEGA SAHADUTA: Aramaeke dwudwolɛ nu, ye bo kyire Adanzeɛ kure. yeɛ Yakob wora ɔfrɛle ye Galeede.#31.47: GALEEDE: Hebri dwudwolɛ nu, ye bo kyire Adanzeɛ kure. 48Na Laban hane kyɛ, “Sɔ nyɔboɛ kure ye te me ne wɔ afia adanzeɛ ɛnɛ.” Yiti yeɛ ɔmaa bɛfrɛle berɛ Galeede ɔ. 49Na osa frɛle berɛ Misepa,#31.49: MISEPA: Ye bo kyire: Ɛwaen bɔ bɛtena so bɛwɛne ɔ. ofikyɛ ɔhane kyɛ, “Sɛ yɛpakyepakye nu a, AWURADE osisa yɛ munyɔ. 50Sɛ ɛteetee me mma mmrasua nemɔ, anaa sɛ egya braa foforɛ boka me mma nemɔ aso a, ɔwɔ nu kyɛ sona biala ɔbboka yɛ so wɔ ɛwa de, nakoso kaye kyɛ Nyameɛ yeɛ ɔte yɛ munyɔ y’afia danzeniɛ ɔ.”
51Na Laban sá sele Yakob kyɛ, “Nea nyɔboɛ kure he ne ngayeɛ nyɔboɛ he bɔ mafa magyina me ne wɔ y’afia ye. 52Nyɔboɛ kure he te adanzeɛ, yeɛ ngayeɛ nyɔboɛ ye koso te adanzeɛ kyɛ mengɔtra sɔ nyɔboɛ kure he mengɔwa wɔ so mengɔyɔ wɔ hwee, na wɔ koso ɛngɔtra sɔ nyɔboɛ kure ye ne ngayeɛ nyɔboɛ ye ɛngɔwa me so na ɛngɔyɔ me hwee. 53Abraham Nyameɛ bɔ ɔte Nahɔ Nyameɛ na osa te bɛ baba Nyameɛ ne, óbua me ne wɔ y’afia ndɛen.” Yiti Yakob fale Nyameɛ bɔ ɔse Yisake suro ye ne tale ndaen. 54Na Yakob bɔle afɔleɛ wɔ bokaa ne aso, na ɔfrɛle ye mmenia kyɛ beedidi; bedidili na bɛbɔle asiripɛ wɔ mmokaa aseɛ ne aso.
55Laban dwɔsole ngyerɛmɔ tutututu, ɔfele ye nnomaa mɔ ne ye mma mmrasua nemɔ noa, na oyirale bɛ. Na osili nu hɔle ye kuro.
Tällä hetkellä valittuna:
Gyenesise 31: EBP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.