Gyenesise 38
38
Yuda ne Tamar
1Na sɔ mmerɛ ne, Yuda fili oliɛma mɔ anwo, na ɔhɔle ɔne Adulamniɛ bie bɔ bɛfrɛ ye Hira bɛɛtenane. 2Berɛ yeɛ Yuda nwuni Kanaanniɛ bie bɔ bɛfrɛ ye Suwa ɔwa brasua ɔ. Ogyale ye, na ɔne ye bɛlale. 3Braa ne nwonzɛle, ɔwole bienzua, na ɔtole ye dumaa Ɛre. 4Osa nwonzɛle, ɔwole bienzua, na ɔtole ye dumaa Onan. 5Braa ne sá wole bienzua bieku, na ɔtole ye dumaa Hyela. Ɔwole ye ne, né ɔwɔ kuro bie bɔ bɛfrɛ ye Kesibo so. 6Yuda gyale braa bie bɔ bɛfrɛ ye Tamar mane ye bamuɛbaa Ɛre. 7Nakoso Ɛre, bɔ ɔte Yuda bamuɛbaa ne yɔle AWURADE nyunu amumuyɛɛ, na AWURADE huni ye.
8Yeɛ Yuda sele Onan kyɛ, “Kɔ eliɛma n’aye ne nekaa, yɔ w’asɛdeɛ ma ye kyɛ ohu aliɛma, na wo mmaa ma eliɛma ne. 9Nakoso né Onan se kyɛ mmaa nemɔ ngɔyɛ ye deɛ. Yiti ɔne oliɛma n’aye ne lale ne, ɔmane ye nwo nzue guale ase, kyɛbɔ ɔkɔyɛ na ɔngɔwo ngɔma oliɛma ne ɔ. 10Na AWURADE anguro bɔ Onan yɔle ne, yiti ohuni ye koso. 11Yiti Yuda sele ye sia brasua Tamar kyɛ, “Kɔtena wɔ kuna nu wɔ ɛse awuro kɔpem kyɛ mma Hyela konyi ɔ.” Ofikyɛ né osuro kyɛ annea a, ye koso okowu kyɛbɔ oliɛma nemɔ wuli ne. Yiti Tamar hɔle ɔɔtenane ɔse awuro.
12Ngyẽa kãa pɛle nu ne, Suwa awa brasua bɔ ɔte Yuda aye ne wuli. Na Yuda lili ye kuna yiele ne, ɔhɔle ye mmenia bɔ bɛpepɛ ye mmoaen nwo nwiaa ne berɛ wɔ Timina. Ɔne obiɛngo Adulamniɛ Hira yeɛ bɛhɔle ɔ. 13Na bɛbɔle Tamar amaneɛ kyɛ, “Wɔ sia ɔ́kɔ Timina ɔkɔpepɛ ye mmoaen nwo nwiaa” nen, 14ɔyele ye kuna ɛtena ne guale berɛ, na ɔfale ngatanyunu katale ye nyunu, na ɔfale ɛtena kuruli ye nwo ɔɔtenane Enaim tiwaa wɔ Timina atee so. Né wanwu kyɛ Hyela anyi, nakoso bamva Hyela bamma wangya ye. 15Ɔnate kyɛ né Tamar afa ɛtena akuru ye ti ne ati, Yuda nwuni ye ne, obuli ye kyɛ ɔte gyanderaniɛ. 16Yiti ɔhɔle ye nwo berɛ wɔ atee ne anoa, na osele ye kyɛ, “Maa me ne wɔ yɛɛla,” ofikyɛ né ɔnze kyɛ ye sia ne ahɔ ɔ. Tamar bisale ye kyɛ “Sɛ ɛne me da a, nzikyɛ yeɛ ɛkɔfa kɔma me ɔ?” 17Yuda buale kyɛ, “Ngɔbrɛ wɔ nyɛmmoa ne anu abɔngye akrɔngrɔma ko.” Na obisale Yuda kyɛ, “Ɛkɔfa nikyee bie kosi awowaa koraka né afa abrɛ me anaa?” 18Na Yuda koso bisale ye kyɛ, “Nzikyɛ yeɛ mva nzi wɔ berɛ awowaa ɔ?” Na obuale kyɛ, “Wɔ nzɔanoɛ pɛteaa, ɔne nyamaa bɔ osinze so ne, yeɛ pɔmaa bɔ otira wɔ ne.” Yiti Yuda fa mane ye. Ɔne ye lale, na ɔne ye nwonzɛle. 19Tamar dwɔsole hɔle. Ɔyele ye ngatanyunu ne, na osa fale ye kuna ɛtena ne herale.
20Yuda fale abɔngye akrɔngrɔma ne somane ye damvo Adulamniɛ ne kyɛ ɔfa ɔɔpɔ awowaa nningyein ne ofi braa ne berɛ ɔbrɛ ye. Nakoso ɔhɔle ne, wannwu ye. 21Na obisale kuro berɛ ama ne kyɛ, “Gyanderaniɛ bie bɔ né ɔte Enaim atee noa ne, ɔwɔ ni?” Na bebuale kyɛ, “Gyanderaniɛ biala ɔwwale wa.” 22Yiti osa wale Yuda berɛ oosele ye kyɛ, “Mannwu ye, na berɛ ama nemɔ po nwa: ‘Gyanderaniɛ biala ɔwwale wa.’ ” 23Yeɛ Yuda sele obiɛngo ne kyɛ, “Maa ɔ́fa nningyein ne na banzere yɛ. Anwu ye oo, mmaa ɛfale abɔngye ne hɔle, nakoso annwu ye.”
24Kɔyɛ ɛsraen nza asi ne, bɛbɔle Yuda amaneɛ kyɛ, “Wɔ sia Tamar wabɔ adwaman, na ɔnate so po ɔnwonzɛ.” Na Yuda hyɛle kyɛ, “Ɛmɔhwe ye befite ma bɛyera ye.” 25Na bɛ́fa Tamar befite bɛ́ba ne, ɔsomane maa beesele ye sia ne kyɛ, “Biaa bɔ ole sɔ nningyein hemɔ nen, ye yeɛ me ne ye yɛnwonzɛ ɔ.” Na ɔtoale so sele ye kyɛ, “Mesrɛ wɔ, nea nningyein hemɔ: pɛteaa ye, nyamaa ye, ɔne pɔmaa ye, nwa deɛ ɔ?” 26Yuda lele tole nu kyɛ ye deɛ ɔ, na osele kyɛ, “Ɔtengyɛ tra ne, ofikyɛ mamva ye mamma mma bienzua Hyela maa wangya ye.” Na Yuda ne ye anna ko.
27Na odwuli ye aworɛ so ne, né ndaa yeɛ bɛwɔ ye kunu ɔ. 28Na ɔ́wo ne, bɛ nu ko yele ye sa fitele. Braa bɔ ode ye aworɛ ne sɔle nu, ɔfale adaabene kyekyele ye sa kɔm, na ɔhane kyɛ, “Ɛhe yeɛ olili moa wale ɔ.” 29Na osa twe ye sa ne kɔ nu nen, oliɛma ne koso wale. Braa bɔ ode aworɛ ne sele kyɛ, “Nea kyɛbɔ asi afɛ nu na afite awa ɔ.” Yiti ɔfrɛle ye Pɛrɛse.#38.29: PƐRƐSE: Ye bo ole: Bɔ wapere wafa nu ɔ. 30Ye si ye, oliɛma ne koso wale, né adaabene ne kyekye ye sa, na bɛfrɛle ye Sera.
Tällä hetkellä valittuna:
Gyenesise 38: EBP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.