Gyenesise 46
46
Yakob ne ye awuro ama kɔ Misraim
1Yiti Yisrael, bɛ besa bɛfrɛ ye Yakob ne sesale ye nwo nningyein amu, na ɔpene atee so. Oodwuli Beɛ Hyeba, na ɔbɔle afɔleɛ mane ye baba Yisake Nyameɛ. 2Na Nyameɛ dwudwo hyirele Yisrael kɔngɔen ne wɔ nyekyire nu. Ɔfrɛle ye: “Yakob, Yakob,” na osurole kyɛ, “Me ɛhe.” 3Na osele kyɛ, “Me ole Nyameɛ, wɔ baba ye Nyameɛ, nnɛsuro kyɛ ɛkɔhɔ Misraim, ofikyɛ ngɔma wɔ bosofoɛ kɔyɛ maen kandinga wɔ dɔ.” 4Me bɔbɔ me ne wɔ kɔhɔ Misraim, na ngosa ngɔfa wɔ bosofoɛ ngɔwa sɔ aseɛ ye aso; na Yosef yeɛ okogua wɔ noa nu nzue ɔ.” 5Yakob sili nu fili Beɛ Hyeba. Na Yisrael mma nemɔ fale bɛ baba, bɛ mma mɔ, ɔne bɛ ye mɔ tenatenane teaseɛnam mɔ bɔ Faro fa somane kyɛ bɛfa bɛɛfa ye nemɔ anu. 6#Aso 7.14, 15 Yakob ne ye sasofoɛ amu fale bɛ nyɛmmoa ne bɛ nningyein bɔ benyane ye wɔ Kanaan aseɛ so ne, na bɛwale Misraim. 7Ɔne ye mma mmienzua mɔ, yeɛ afei ye mma mmienzua nemɔ bɛ mma mmienzua ne mmrasua, ye mma mmrasua mɔ, ɔne ye sasofoɛ amukoraa yeɛ bɛwale Misraim ɔ.
8 #
Ɛks 1.1-4; Num 26.4-50 Yisrael sasofoɛ bɔ bɛwale Misraim nemɔ ɛhe: Yakob ne ye mma mɔ. Yakob bamuɛbaa Ruben, 9yeɛ afei Ruben mma mɔ: Hanoke, Palu, Hesron ne Karemi. 10Simeon mma mmienzua mɔ: Yemuel, Yamin, Ohade, Yakin, Soha yeɛ Sɔɔlo bɔ oni te Kanaanniɛ ne. 11Lewi mma mmienzua mɔ: Gɛsɔn, Kohate ne Merari. 12Yuda mma mɔ: Ɛre, Onan, Hyela, Pɛrɛse ɔne Sera (nakoso Ɛre ne Onan bewuli wɔ Kanaan aseɛ so). Pɛrɛse mma mɔ ole Hesron ne Hamul. 13Yisaka mma mmienzua mɔ: Tola, Puwa, Yob ne Simron. 14Sebulɔn mma mmienzua mɔ: Serede, Elon ne Yaleel. 15(Lea mma mmienzua bɔ Yakob ne ye wole wɔ Padan Aram mɔ ɛhe. Ɔwa brasua ole Dina. Ye mma ne ye nnomaa mɔ bɛ somaa te aburasa ne nza.) 16Gade mma mmienzua mɔ ɛhe: Sifion, Hagyi, Suni, Esebon, Ɛri, Arode ne Areli. 17Asɛ mma mmienzua mɔ ɛhe: Yimina, Yisua, Yisuwi, Beria, ɔne b’eliɛma brasua Sera. Beria mma mmienzua mɔ ɛhe: Heberi ne Malkiɛl. 18(Silpa, bɔ Laban fale ye mane ɔwa brasua Lea maa ɔɔyɛle ye afaneɛ ne, ɔne Yakob bɛ mma ne bɛ nnomaa buru ne nzia nemɔ ɛne). 19Yakob aye Rahɛl, ye mma mmienzua mɔ ɛhe: Yosef ne Benyamin. 20#Gye 41.50-52 Yosef ne Asenate bɔ ɔte On sɔfo Pɔtifɛra awa brasua ne, bɛwole Manase ne Efraim wɔ Misraim maen nu. 21Benyamin mma mmienzua mɔ ɛhe: Bela, Bekya, Asebel, Gera, Naaman, Ehi, Rohye, Mupim, Hupim ne Ade 22(Rahɛl ne Yakob bɛ mma ne bɛ nnomaa, bɛ mukoraati bɛte buru ne nna). 23Dan awa bienzua ɛhe: Husim. 24Nafetali mma mɔ ɛhe: Yaseel, Guni, Yesare, ɔne Silem. 25(Bilha bɔ Laban fale ye mane ɔwa brasua Rahɛl kyɛ ɔɔyɛ ye afaneɛ ne, ɔne Yakob bɛ mma ne bɛ nnomaa mukoraa te nzoo). 26Yakob ye bɔbɔ ye sasofoɛ mukoraa bɔ ɔne bɛ wale Misraim ne, sɛ ɛye ye mma mmienzua nemɔ bɛ ye mɔ esie ahameɛ a, bɛ mukoraa bɛte aburasia ne nzia. 27#Aso 7.14 Yosef mma bɔ ɔwole bɛ wɔ Misraim nemɔ te nyɔ; Yakob ne ye awuro ama bɔ bɛwale Misraim ne amukoraa bɛte aburasoo.#46.27: ABURASOO: Yakob awuro ama aburasoo ne, Yosef ne ye mma nyɔ ne boka so.
Yakob ne ye awuro ama kofite Misraim
28Yakob somane Yuda maa olili ye nyunu moa hɔle Yosef berɛ kyɛ Yosef ohyire ye Gosen atee, na bɛwale Gosen mbɔtam. 29Yosef siesiele ye teaseɛnam na ɔfole ooyiale ye baba Yisrael wɔ Gosen. Ɔfale ye nwo hyirele ɔse; ɔtɔle ye nu, na ɔfale ye ti tole ye kɔme anwo suni hyɛle paa. 30Na Yisrael sele Yosef kyɛ, “Afei de mewu po a, mekuro, ɔnate kyɛ manwu wɔ nyunu, na manwu kyɛ ɛte ase.” 31Na Yosef sele oliɛma mɔ ne ɔse awuro ama nemɔ kyɛ, “Ngɔhɔ Faro berɛ ngɔɔbɔ ye amaneɛ kyɛ, ‘Nniɛma mɔ ne me baba awuro ama bɔ né bɛwɔ Kanaan aseɛ so ne, bawa me wa. 32Bɛte mmoaenneafoɛ, ofikyɛ besie ngaka; na bafa bɛ mmoaen ne bɛ nandwie mɔ ne bɛ nwo nningyein mukoraa bawa wa.’ 33Sɛ Faro frɛ ɛmɔ na obisa kyɛ, ‘Nzikyɛ adwuma yeɛ ɛmɔyɔ ɔ?’ a, 34ɛ́mɔbua ye kyɛ, ‘Ofi yɛ ngwadaa nu bɔ ɔbaadwu ɛnɛ ye, wɔ ngoaa mɔ de, yɛte mmoaenneafoɛ kyɛ yɛ nana mɔ ala.’ Sɛ ɔba ye sɔ a, ɔkɔmaa ɛmɔkɔtena Gosen mbɔtam, ofikyɛ Misraimfoɛ kyi mmoaenneafoɛ kɔkɔkɔkɔ.”
Tällä hetkellä valittuna:
Gyenesise 46: EBP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.