Matt. 25
25
Ilimi Chighí Pesü Kimghi pìye
1“Tipau ghuloki lo kungugha kükaphu ye ilimi chighí no panonguw akulu pesü külapuu sholu niye wu keu toi ke. 2Pano pungu ye nikhanighami eno pano pungu ye alokütsümi. 3Nikhanighamiqo ye akulu pesü wu ikemu panongu gholo thazü pesü wumoe. 4Ikemu alokütsümiqo ye panongu kulu gholo thazü ghí abohuqo lono pesü wue. 5Külapuu ighi nikeu ado kushuwa luve ikehu pano chighí kümtsü ingufufuive eno zühuve.
6“Zübumta lo asütsa igha ipeghi: ‘Külapuu hi cheae! Khalau ipeghino pa sasü kusho lo!’
7“Ikehu ilimiqo kümtsü ithughi no panongu kuluqo tsüghǜ pukuve. 8Nikhanighamiqo no alokütsümiqo vilo pi, ‘Nonguw thazü hami ningu tsülo; ninguw akulu ye inheu cheae.’ ”
9Panongu no khochile, “ ‘Moe, nongu ke kumo no hilau ningu ghenguno ghí lukümkha shi amoe. Tighenguno nongu ye thazü je chekemi lau wu püzü nolikhi nongu sala hami qhüluve lo.’
10“Ikemu kughou panongu no thazü qhü niye alà lo wuche keno, külapuu ighive. Ilimi kutò pe khe akemiqo ye külapuu gholo no külakupu ghulhu lo ilove. Eno ahukikha khathasüluve.
11“Ado hami thiu, kütamiqo ghí ighi. Panongu no pi, ‘Ampeu, Ampeu, ningu ghenguno ahukikha khaqhi tsülo!’
12“Ikemu pa no khochile, ‘Kuchou no I no nongu vilo piani, ni ye nongu mthae.’
13“Tighenguno jukuto alo, kughengu nongu ye atsala momu ayì kihedo vehu mtha ke.
Ameshoyi Jolabo Holetsa
14“Itaghi, kungugha kükaphu ye timi lakhi no kicheghüzü lo wuve niye pa qemiqo ku püzü pa mheghiqo pichebeve keu toi ke. 15Pütüta no shitsa shi akeu kiqi lono, pa no lakhi vilo ameshoyi jolabo pungu tsü, lakhiu vilo ameshoyi jolabo kini tsü eno lakhiu vilo ameshoyi jolabo lakhi#25:15 Ameshoyi jolabo lakhi ye timi lakhi no ampe muku atsala jume qelu keu me qhemi ke tsü. Tisheno pa ye kicheghüzü shiwuve. 16Timi khuu ameshoyi jolabo pungu ithulupüa keno pa ye paikhavi wu püzü pesü pisa kimje keu vechewo ameshoyi jolabo pungu alá shiluve. 17Titoi, ameshoyi jolabo kini ithulu keu ghí ameshoyi jolabo kini alá shiluve. 18Ikemu timi khuu no ameshoyi jolabo lakhi ithulu keno, pesü wu püzü ayeghi chhu no tilehi pa mpeu’w ameshoyi küsüve.
19“Ado kushuwa thiu aqemi hipaqo mpeu ideghive eno panongu sasü kihikülai pekithi keu shi. 20Aqeu khuu ameshoyi jolabo pungu ithulu keno pa no pungu alá süghi. Eno pa no pi, ‘Ampeu, nono ameshoyi jolabo pungu I pichetsüke ni ye pungu alá shilue.’
21“Pa mpeu no khochile, ‘Aghile shivea, pichebekulu eno I qeu kiviu, no ye thime aghulo lomu pichebekulu shike, I no O pelo thime kutomo shou pichempiu shipeni. Ighilo eno O mpeu lokivi lo küsaje lo.’
22“Aqeu khuu ameshoyi jolabo kini akeno pa ghí ighi. Pa no pi, ‘Ampeu, nono ameshoyi jolabo kini I pichetsüke; julo ni ye kini alá shilue.’
23“Pa mpeu no khochile, ‘Aghile shivea, pichebekulu eno I qeu kiviu! No ye thime aghulo lomu pichebekulu shike; I no O pelo thime kutomo shou pichempiu shipeni. Ighilo eno O mpeu lokivi lo küsaje lo!’
24“Ikelo aqeu khuu ameshoyi jolabo lakhi ithulupüa keno ighi. Pa no pi, ‘Ampeu, I no ithi akeu no, no ye mükamihi kemi lakhi ke, nono shosümo keu-a lo ghile huluve cheni, eno apitì vesümo keu-a lo ghí pekütsüluve acheni. 25Ikehu ni ye msàve ke eno nono tsü keu ameshoyi pesü wu no ayeghi lo chhuqhove ke. Julo, ow kiu keno hi anike.’
26“Pa mpeu no khochile, ‘No küsakügha, akipichi qeu! Ike no ye I no shosümo keu lo ghile hu eno I no apitì vesümo keu lo pekütsüluve chekeu ithi ani kena lai? 27Tishiaye, no ye iw pisa pesü kighishe kepu-a lo sǘve kepu shi ake, tishianguno niye ideighi kelo akighishe sǘ no ithulu chileveni cheke.
28“ ‘Ike pa lau no ameshoyi jolabo ikhiluve lo eno tipau pesü khuu no jolabo chighí ani keno pa tsüvelo. 29Kughengu khuno no ani keno alau tsü nani, eno panongu ye kupukuno shi anani. Khuno no küha keno, pano no kiu aghíni keno, ti ghí pano lau no ikhipe wuve tsü nani. 30Eno ti ameküha keu qeu khalau vephe pesü àküzǘ lo vesüve lo, tilehi ye ahu tsüghü-bubushi qa anani.’
Ashekha Küghakütha
31“Kughou Timi nu no pa juküvü lono ighini eno kungumi kümtsü pa gholo ighini keno, pa ye pa juküvü küká lakhü lo iqa nani. 32Shiye kümtsü pa zülo kumqo nani, eno ambe kheu no aneqo lau no ambe küta shive ketoi, pa no timiqo lakhi no lakhi lau no kütüta shive tsü nani. 33Pa no ambeqo pesü pa u ajeu qhi nani eno aneqo pesü pa u piyiu qhi nani.
34“Tile no Akükau no pa u ajeu iqa akeqo vilo pi nani, ‘Ighilo, nongu I pù no kümghave tsü keqo; O mheghi lu lo, ayeghiqha pulhosü ake ghuloki lono kükaphu O ghenguno kutò pe püakeu ke. 35Kughengu I no müzüthi akelo nono chu kepu hami I tsüke, I no tüghüthi akelo nono shokepu hami I tsüke, I no inami shiche kelo nono I sasǘ tsüke. 36I no tiphimini avehupu shi akelo nono tiphimini I tsüke, I no sǜ akelo nono I jukuto tsüe, I no akughu shi akelo nono ighino I xuju ke.’
37“Tile no amikuchomiqo no pa khochile nani, ‘Ampeu, kughou no ningu ye nono müzüthi cheghi keu ithulu no O loji, momu tüghüthi cheghi no kiuala ye kepu O tsülu kea? 38Kughou no ningu ye nono inami shi chekeu ithulu no O sasǘ, momu tiphimini avehupu shi aghí no O pipelu kea? 39Kughou no ningu ye nono sǜ akeu ithulu momu akughuki lo ngo akelo O xuju niye wu kea?’
40“Akükau no khochile nani, ‘Kuchou no I no nongu vilo pìní, nongu no I thiküzümi eno I chelimi hipaqo gholo akitilau lau kiu shitsü keno tiye I lau mülà ke.’
41“Tishi no pa no pa u piyiu akeqo vilo pi nani, ‘I lau no wuvelo, nongu ghushove no alhomi lo tüghami eno paw kungumiqo ghenguno kutò pe qhive kemiqo. 42Kughengu I no müzüthi che kelo nongu ye kiumu chu kepu I tsümoe, I no tüghüthi che kelo nongu ye kiumu I piyémoe. 43I no inami shiche kelo nongu ye I sasümoe, I no tiphimini avehupu shi akelo nongu ye I pipemoe, I no sǜ akelo eno I no akughuki lo akelo nongu ye I jukutomoe.’
44“Panongu ghí ishi khochile nani, ‘Ampeu, kughou no ningu ye nono müzüthi momu tüghüthi cheghi, inami shi cheghi momu tiphimini avehupu shi aghí, sǜ aghí momu akughuki lo ngo aghí keu ithulu no O kuphumove kea?’
45“Pa no khochile nani, ‘Kuchou no I no nongu vilo pìní, nongu no akitilau hipaqo lau kiu mülàmove keno, tiye I lau mülàmo keu ke.’
46“Tishi püzü panongu ye lhokta ghime-a lo wuve nani, ikemu amikuchomiqo ye lhokta küxü-a lo wuve nani.”
Tällä hetkellä valittuna:
Matt. 25: STB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.