Mark 5
5
Jisü no Tüghaküsa no Tsüghape Akemi Shipivi tsü
1Panongu no ayizükucho vechesü Gerasenes#5:1 Kaku khami lo ye Gadarenes; eno khami lo ye Gergesenes ipi püani ko-aqha lo wue. 2Kughou Jisü no ashuka lono ipeghi keno, alolo mithekumo ghungu akemi lakhi no Jisü sasü kusho niye akumoki lono ipeghi. 3Timi hipau ye akumokiqo lo ngo ache. Timi khunomu pa küghape qhimla eno ayikichhemu pesü pa tshüpe qhimla no ache. 4Kughengu ayikichhe pesü ghuthu kutomo pa pukhu-au tshüpe qhi kemu pa no ayikichhe süthave eno pa pukhu müzá lo ayikhada ghí süthave tsü cheke. Akumto shi pa qhasü luni kemi khumu küha no ache. 5Putho-pucho pa ye akumoki dolo eno atoghiqo lono vekipighi igha qa che eno atu pesü pa likhi pa hepungoqhi che.
6Kughou pa no putou no Jisü ithulu keno, pa ye posüsü Jisü zülo ikiqi qhoqhünheluve. 7Pa no asütsa kuloghi lono ishi igha ghi pi, “Shishe Akiqheu Lhou Nu Jisü, no ye I lau no kiu avehupu shi ani kea? Alhou je lono I shikighime tsü kevilo!” 8Kughengu Jisü no pa vilo ishi pike, “Mithekumo ghungu, timi hipau lau no ipeghivelo!”
9Tisheno Jisü no pa vilo iniju, “O je khuu kea?”
Pa no ishi khochile, “I je ye Legion#5:9 Legion kiqi ye tüghaqu zatsümi aqokitikhi pa lolo akeu piani ke, kughengu ningu ye kutomo ke.” 10Eno pa no Jisü vilo tipau qha lono panongu puwuve tsü pemo nike anguno-anguno qhüiniju.
11Tipau phivilo awo aloji kijè lakhi atoghi küdau nguchu ae. 12Tüghaküsaqo no ishi Jisü qhüiniju, “Awoqo gholo ningu puwuve tsülo; ningu pelo panongu phi lo ilove pelo.” 13Jisü no azah panongu tsüve eno mithekumo ghunguqo no ipeghive püzü awoqo phi lo ilove. Awo loji kikihi qhethonhe kini qhalo ake tipaqo ye atuxu lo kohakive iqive no ayizükucho lo ilove püzü pütsüqhi khave.
14Awo khemiqo ye pove püzü hipau ghili pesü mishiphu ngò mishiphughi hokümxaqo lo pikülhave tsü. Ikelo chikulumiqo no kiu shive keno ju niye wue. 15Kughou panongu no Jisü lau ighi keno, tüghaküsa legion no tsüghape achekeu timi hu ye aphimini pepuve no akükümsü achipi shive püzü iqa aghí keu ithulu no msàve. 16Ti ithulu kemiqo no tüghaküsa no tsüghape achekeu timi eno awoqo ye kiu shive keno tipau ghili pesü kütamiqo vilo pi. 17Ikelo ache-axü lo xüküami no Jisü vilo pano ko-aqha qhive no wuve tsülo pi qhüiniju thuve.
18Jisü no ashuka lo ilo niye che kelo, tüghaküsa no tsüghape achekeu timi hu no Jisü gholo wuni ipi qhüiniju. 19Jisü no pa milive, ikemu ishi pi, “Aki lo now timiqo lau wolo eno Ampeu no O ghenguno khijehi mülà tsü eno kíshi O kimiye tsü keno pesü panoqo vilo pilo.” 20Ike timi hu no wuve eno Jisü no pa ghenguno khijehi mülà tsü keno pesü Decapolis#5:20 Decapolis ye Mishighüna Chighí akeu ako-aqha pesü piani lo pithuve kelo chikulumi kümtsü no akümzaqhiyive.
Jisü no Angá Lakhi Thive keu Xüputhu eno Totimi Lakhi Sǜ akeu Shipivi
21Kughou Jisü no itaghi ashuka lono ayizükucho kathasü hukuku küdau ighi keno, pa no ayizükucho phivilo aphi lono timi kutomo no pa homüxa pe kumqoluve. 22Tishi akelo synagog lo sakiphemi lakhi Jairus ipikeu ighi, eno kughou pa no Jisü ithulu keno, pa ye Jisü pukhu phivilo iluikiqive. 23Eno Jisü vilo pulopiniyi qhüiniju ghi ishi pi, “I ngá itimi lakhi anike li ye thive niye shivea. Li pelo viluve no xülu penike kimiye no ighi püzü O u pesü li shou be tsülo.” 24Ike Jisü no pa gholo wu.
Timi kutomo no kibikhoi pa sühope eno papesü che. 25Ikelo totimi lakhi ampe chighikini ajì poache keu tilehi ae. 26Li ye shikipivimi kutomo lau shikipivi laju ake lono shishe imeve eno li u lo akeu kümtsü puwokhave, tishimu li ye vilu ke kumo no alomokithe auve. 27Kughou li no Jisü ghili chilu keno, li no Jisü thiu no ighi püzü paw ubephi lo bue, 28kughengu li no ishi kümsüe, “I no pa phì likhimu bulu aye, ni ye viluve nani.” 29Paikhavi lono li no ajì poache keu tave eno li ye li phi lo aküsǜ achekeu lono viluve keu ithive.
30Paikhavi Jisü ye pa lau no aküka ipeve keu ithive. Pa no aqokitikhi küdau kugho ighino ishi iniju, “Khuu no I phiküzü bu kea?”
31Pa khopemiqo no khochile, “Timi hijejehi no O sühope chekeu nono ithulu ani keghi no ye kíshi no, ‘khuu no I bu kea,’ ipi iniju cheni kea?”
32Ikemu Jisü ye khuu no hi shi keno homüxa ghi jukuto ae. 33Ikelo atotiu hu ye li lau kiu shive keno ithi akehu li no ighi püzü Jisü pukhu phivilo ikiqi no msà khokhoshi Jisü vilo amikucho lono kümtsü lhepe pive. 34Jisü no li vilo pi, “Angá, O küpülü no O shipivivae. Aloino wolo, no ye O küsü lono viluvae.”
35Jisü no atsa piaphi lono synagog lo sakipheu Jairus ki lono timi khami no ighi püzü Jairus vilo ishi pi, “O ngá ye thiva ke kushiye akükütsüu shipüna ani kea?”
36Panongu no küptsa akeu Jisü no chilu-kümghalei ghi Jarius vilo ishi pi, “Msàkevi no pülülo.”
37Peter, James eno James thiküzüu John nguno alau ye Jisü no khumu pa pape pemoe. 38Panongu no synagog lo sakipheu ki lo ighi kelo timiqo no mubumghui igha qa eno anhezü-piji aghí keu Jisü no ithulu. 39Pa no aki alou ilo no panongu vilo ishi pi, “Kushiye ishi mubumghui eno ighamuku ani kea? Angá ye zü anike thono thimphie.” 40Jisü no ishi pi kelo panongu no Jisü junuqhie.
Jisü no panongu kümtsü khalau pipeve kethiu, pa no angá papù ngò azá eno pa gholo chekemi akhopemiqo ishi sasü angá no akeu chebo lo ilo. 41Pa no li u tsüqüpe no li vilo ishi pi, “Talitha koum!” (hipau kiqi ye “Angá itimio, I no O vilo piani, ithuvelo!”). 42Paikhavi no angá hu ye ithuve eno homüxa alà che thuve (li ye ampe chighikini shi ake). Hi ithulu no panongu kümtsü shishe akümzave. 43Jisü no panongu vilo khuu pelomu hipau ithi pe kevilo pi tsatsái azah shive, eno panongu vilo kiuala chu kepu pesü li tsülo pive.
Tällä hetkellä valittuna:
Mark 5: STB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.