Matius 13
13
Un aandéan tumoro si mengengeroz
(Mrk. 4:1-9; Luk. 8:4-8)
1In endo itii, mondolé si Yesus witu um walé itii a marumumez witi tembir u louz. 2#Luk. 5:1-3 A mahtotondongané sé tou lakez méyé limiklik wia ni Sia, a Sia masumaké witu u londéi a rumumezla witu. Sé tou lakez é rimendai witu un tembir u louz. 3A Sia kumua an tutuzu' lakez karia un aandéan wia ni séra, kuan-Na, “Wéwéhan si mengengeroz makimeroz am watuna tatanemen. 4Karegas sia i mahkeroz, wéwéhan am watuna tatanemen méikagogoma witu un tembir u lalan. A méyé sé tumétéwél mékimulat am watuna tatanemen itii makaz nimaapu. 5Wéwéhan kasii a méikagogoma witu un tana' watu-watun. Am watuna tatanemen itii é rengan in timoumé pahpaan un tana'na én toyo' uman. 6Taan i simeritomé si endo, an tinanem itii nimawelesa wo nimaperama pahpaan zéi'kan tahlous nimahmut. 7Am watuna tatanemen walina é méikagogoma witu un tana' tinouan zukut menulah. I mahtoumomé am watuna itii, an zukut menulah kangkasii éng kaselahna a sumé'sé'la an tinanem itii makaz i nimaté. 8Taan am watuna tatanemen walina é méikagogoma witu un tana' rembuz, am watuna itii én timoumé wo nimua'mé. An niupu' witu ém wéwéhan a makasana atusé, wéwéhan a maka- enemna pulu'mé wo wéwéhan kasii a makateluna pulu'mé.”
9Ang kuan kasii ni Yesus, “Séi si wéwéhan lunteng é mahtalingama lé'os!”
Kaa si Yesus mahtuzu' karia an aandéan
(Mrk. 4:10-12; Luk. 8:9-10)
10Kumawusa niitu, méyé sé pahtuzu'en-Na a meligau wia ni Sia, “Méster, kaa si Méster i mahtuzu' ni séra éng karia an aandéan?”
11A si Yesus mingkotla, “Im wia ni kamu én tinambéran ung kamang in toro makatulap u méikawunipé' tumoro ung Kakolanoan ni Opo Empung, taan im wia ni séra én zéi'kan. 12#Mat. 25:29; Mrk. 4:25; Luk. 8:18, 19:26 Pahpaan séi si makatulapo, ni sia én awesampé' makaz i malake-lakez, taan séi si zéi'kan makatulap, péléng am wia ni sia ém pakaéndon. 13Ni- itumo ni Aku i mahtuzu' ni séra éng karia an aandéan, pahpaan zozo' ni séra mahilek taan ni séra zéi'kan makana'u, wo zozo' ni séra mahtalinga taan ni séra zéi'kan makatalinga wo zéi'kan makatulap.
14 #
Yes. 6:9-10
Niitumo, malekepola wia ni séra u méikua ni nabi Yesaya in téntii,
‘Ni kamu é mahtalinga wo mahtalinga,
taan zéi'kan makatulap,
ni kamu é mahilek wo mahilek,
taan zéi'kan makatulap.
15Pahpaan an até né tahsasana wanua kenu éng kimetéhmo,
a lunteng néra ém wutezo in tumalinga,
wo am weren néra é méipezeng, wo ni séra zéi'kan milek karia am weren néra wo zéi'kan tumalinga karia a lunteng néra,
wo makatulap karia an até néra,
a séra méyé wia ni Aku wo séra lé'oseng-Ku.’
16 #
Luk. 10:23-24
Taan ni kamu é mahpaa-paazola pahpaan am weren niou én toro mahilek wo a lunteng niou én toro mahtalinga makaz ni kamu toro makatulap. 17Uli-ulit ikua-Kuma wia ni kamu, ‘Lakez sé nabi wo sé tou niéndo ulit ni Opo Empung paaz milek a niilek niou in tarékan, taan zéi'kan nimilek niitu wo kasii paaz tumalinga an tinalinga niou, taan zéi'kan timalinga niitu.’ ”
Ung kalakoan un aandéan tumoro si mengengeroz
(Mrk. 4:13-20; Luk. 8:11-15)
18Ang kuan kasii ni Yesus, “Niitumo, talingana ung kalakoan un aandéan tumoro si mengengeroz itii. 19Am watuna tatanemen méikagogo witi tembir u lalan é masuat wo sé tou timalingamo u Nuwu' tumoro ung Kakolanoan ni Opo Empung, taan ni séra én zéi'kan makatulap niitu, a méyé si tonaas né sétang kimahata u Nuwu' itii witu un até néra. 20Am watuna tatanemen méikagogo witu un tana' watu-watun é sé tou sé timalinga u Nuwu' itii a rengan i sumungkul niitu karia i mahpaa-paaz. 21Taan u Nuwu' itii én zéi'kan totoz nimahmut witu un até néra wo zéi'kan nimauréma. Sa méyé u susa wo un zéha pahpaan u Nuwu' itii, sé tou itii é rengan in timamburila im wia si Opo Empung. 22Am watuna tatanemen méikagogo wana an zukut menulah é sé tou sé timalinga u Nuwu' itii, taan tahlous maarét ung katou-touan néra wo tawi mapahléla'en im wana a sangkum. Niitumo u Nuwu' ni Opo Empung é méisé'sé' umanla a lelo wo ang genang wana ang kawa'ilanan wia ung kaayahan taka-takazan zéi'kan nimua'mé. 23A méikagogo witu un tana' rembuz é masuat wo sé tou mahtalinga u Nuwu' itii wo makatulap ung kalakoan niitu, wo pahpaano niitu am pahwangunen néra é mahwua'mé am wangun, wéwéhan a makasana atusé, wéwéhan a makaenemna pulu'mé wo wéwéhan a makateluna pulu'mé.”
Un aandéan tumoro un tatanemen tanu ang gandum timoumé witu un unez ang gandum
24A si Yesus kumua un aandéan walina kasii wia ni séra, kuan-Na, “Ung Kakolanoan ni Opo Empung én tanu si tou kimeroz am watuna tatanemen wangun witi umana. 25Taan i sana wengi, im péléng sé tou nimatekel, a méyé si kakoro' ni mengengeroz itii, ang kumeroza an tatanemen tanu ang gandum#13:25 Un tatanemen kenu witu u nunuwu'en Yunani é ‘Zizania’. Un tatanemen kenu é mahsua-suatan wo ung gandum taan um wua'na é melangu. witu ung kinerozan am watuna ang gandum, a sia mangé. 26I mahtoumomé ang gandum wo mengondolo, an tatanemen tanu ang gandum kasii é mahtoumé. 27A méyé sé ata ni makauma ang kumuama, ‘Tuang, zéi'kankuaa watuna tatanemen wangun a méikeroz witu un uma ni Tuang? Wisa kahuman a méyé an tatanemen tanu ang gandum itii?’
28A mingkotla si makauma itii, ‘Si kakoro'ku si nimualima ni- itu.’
A sé ata meligau kasii wia ni sia, ‘Sa téntu, apa si Tuang paaz kai mangé wo masumawut an tatanemen tanu ang gandum itii?’
29Taan si makauma é nimingkotla, ‘Tia'mo, pahpaan sa an tatanemen tanu ang gandum itii sawuten nioué, ang gandum kangkasii én ikakiité i masawuté. 30Iwayamola ang gandum wo an tatanemen tanu ang gandum itii in tumoumé mahwali-wali makaz i maupu'en. Sa orasnamo i mupu', ni aku éng kumua in téntii wia sé mahupu': Réwokempé'mé an tatanemen tanu ang gandum wo pemule-mulesala in ziketan. Tumondong, réwokené ang gandum itii wo maitu'tula witi penunu'tulan ang gandum.’ ”
Un aandéan tumoro am watuna totoz rintek wo u ragi
(Mrk. 4:30-32; Luk. 13:18-21)
31An isirita kasiila ni Yesus un aandéan walina wia ni séra. Kuan-Na, “Ung Kakolanoan ni Opo Empung én tanu am watuna tatanemen totoz rintek#13:31 Un tatanemen tanu ang kenu, sa witu nunuwu'en Yunani é ‘sinapeos’. Um watuna én totoz rintek, taan sa tumoumé ung karakékna én toro makaz teluna meter., a niéndoma ni tou a maikerozé witi umana. 32Am watuna itii én totoz rintek im wana péléng am watuna an tinanem, taan sa tumoumé, niitu é matua'na lumousé an tinanem witi uma tinaneman a séndé'en. Niitu é maéndo tanu ang kai, taka-takazan sé tumétéwél é mahéyé i mésumalah wana am pangana.”
33An isirita-Na kasiila un aandéan kenu wia ni séra. Kuan-Na, “Ung Kakolanoan ni Opo Empung én tanu u ragi niéndoma ni wéwéné an isembora witu un topong epatna pulu' liter makaz péléng niitu riméisé.”
34Péléng niana én ipahtuzu' ni Yesus wia sé tou lakez karia an aandéan. Ni Sia én zéi'kan mahtuzu' wia sé tou sa zéi'kan karia un aandéan. 35#Mzm. 78:2 Karia in téntu, nimalekepola u Nuwu' ni Opo Empung mengiité si nabi in téntii,
“Ni Aku i mahnuwu' wia sé tou lakez éng karia un aandéan.
Ni Aku éng kumua a méikawunipé' rengané ung kaayahan kenu im winangun-Ku.”
Ung kalakoan un aandéan tumoro an tatanemen tanu ang gandum witu un unez ang gandum
36Kumawusa niitu, an itula'umé ni Yesus sé tou lakez itii a mawurima witi walé. A méyé sé pahtuzu'en-Na ang kumuama, “Méster, ikuamé wia ni kai ung kalakoan un aandéan tumoro un tatanemen tanu ang gandum witi uma itii.”
37Ang kuan ni Yesus wia ni séra, “Si tou kimeroz am watuna tatanemen wangun é si Oki' ni Tou. 38Un uma itii éng kaayahan. Am watuna tatanemen wangun é sé tou witi Kakolanoan ni Opo Empung. Taan an tatanemen tanu ang gandum é sé tou ni tonaas né sétang. 39Si kakoro' si kimeroza am watuna an tatanemen tanu ang gandum é si tonaas né sétang. Un oras i mupu' én endo ka- akazan ung kaayahan. Wo sé tou mengungupu' itii é sé malaekat.
40Niitumo, kuramo an tatanemen tanu ang gandum i rinéwoké an ilombo'ma witu un api, téntumo kangkasii u mamuali witu un endo kaakazan ung kaayahan. 41Si Oki' ni Tou é matu sé malaekat-Na i maruméwok sé tou witi Kakolanoan-Na sé nimangun sé tou walina i mahsingkéla' wo péléng sé tou zéi'kan mahkiit um paaz ni Opo Empung. 42Péléng sé tou léwo' itii é mailombo' né malaekat witu un tampa mahlayas, wo im witu ni séra é mamé' makaz am waang néra karékétokan. 43In toro niitumo, sé tou niéndo ulit ni Opo Empung é sumena' tanu si endo witi Kakolanoan ni Ama' néra. Séi si wéwéhan lunteng é mahtalingama lé'os!”
Un aandéan tumoro u sangkum méikawuni
44Ang kuan kasii ni Yesus, “Ung Kakolanoan ni Opo Empung én tanu a sangkum u méiwuni witi uma, ung kinailekané ni tou a maiwuninamé sumaup. Pahpaan u mahpaa-paazna, a maipakawangkérnamé a sangkumna, a sia tumelesla un uma itii. 45Téntu kangkasii ung Kakolanoan ni Opo Empung, niitu én tanu si memamangkér si mahpenéro u mutiara totoz wangun in telesenna. 46Ing kinailekannamola u mutiara totoz wangun wo mahal itii, am pakawangkérnamé péléng a sangkumna an itelesla u mutiara itii.”
Un aandéan tumoro u lolombo' tua'na
47Ang kuan kasii ni Yesus wia sé pahtuzu'en-Na, “Téntu kangkasii ung Kakolanoan ni Opo Empung én tanu u lolombo' tua'na méilombo'ma né melolombo' witi tasik, an ikaéndomé sé seza' nimahwali-walinaan. 48Im wutamo né seza' u lolombo' itii, ang kéhongené né tou méitembiré. Rumumezla séra am pahtampas néramé sé seza' wangun witu un tampayang wo sé seza' zéi'kan wangun ém pahtia'ma. 49Téntumo kangkasii u mamuali witu un endo kaakazan ung kaayahan. Sé malaekat é méyé wia ung ka- ayahan wo métumampas sé tou léwo' im wia sé tou niéndo ulit ni Opo Empung. 50Sé tou léwo' é mailombo' witu un tampa mahlayas. Im witu ni séra é mamé' makaz am waang néra karékétokan.”
51A si Yesus meligau wia sé pahtuzu'en-Na, “Katulapan nioukan péléng an aandéan méipahtuzu'-Kuma wia ni kamu?” A sé pahtuzu'en-Na mingkotla, “Éné Méster, katulapan naimo.” 52Ang kuan ni Yesus wia ni séra, “Niitumo, péléng sé tou tulap un Torat sé timalingamo an tutuzu' tumoro ung Kakolanoan ni Opo Empung én tanu si makawalé si nimondolé péléng a sangkum werupé' wo an urémo im wana am pahtu'tulan a sangkumna.”
Si Yesus zéi'kan pa'émanen né tou Nazaret
(Mrk. 6:1-6; Luk. 4:16-30)
53Makasiritala an aandéan itii, a si Yesus tumula'umé un tampa itii. 54I méikaayomola witi wanua-Na, a Sia mahtuzu' sé tou witi walé peraragésan né tou Yahudi. Sé tou mahtalinga ni Sia é mengusi-ngusingsing wo mahkua, “Wisa ung kinailekan-Namé ang katulapan itii? Wo séi si niméhé ung kawasa wia ni Sia i mahwangun a makakompo'en itii? 55Zéi'kankuaa ni Sia én oki' ni bas kai? Zéi'kankuaa si ina'-Na é makangaran Maria, wo sé katuarina é si Yakobus, si Yusuf, si Yudas wo si Simon? 56Wo zéi'kankuaa sé katuari-Na wéwéné é memali-mali kariata? Wisa ang kinailekan-Namé péléng niitu?” 57#Yoh. 4:44 Niitumo ni Sia én zéi'kan pa'émanen néra. A Sia kumuala wia ni séra, “Si nabi ém pahsigi'en wisa uman un angéannamé, akaz uman im witu um wanuana wo im witi waléna in esa ni sia zéi'kan pahsigi'en.” 58Pahpaan ni séra zéi'kan ma'éman, zéi'kan lakez a makakompo'en winangun-Namé im witu.
Tällä hetkellä valittuna:
Matius 13: LAITOM
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään