यहुन्ना 15
15
यीशु सौच़्च़ी अंगुरा री लाऊ
1सौच़्च़ी अंगुरा री लाऊ हाऊं ऊ, और मैरौ बाब ज़िमदार आ। 2ज़ेज़ी डाल़ी मुंदी ज़ुड़ी ऐन्दी आ और नाईं फौल़दी, तिऐं सेऊ पोरु काटा सा। और ज़ो फौल़ दिआ, तिऐं सेऊ छ़ांटा सा ताकी सै औज़ौ फौल़ा। 3तुमै ता तिऊं वचना री वज़ाह कु ज़ेज़ौ मुंइऐ तुमुकै बोलौ आ साफ ई। 4तुमै मुंदी बौणी रौ और हाऊं तुमु दी। ज़िणी डाल़ी अगर अंगुरा री लाई दी बौणी नाईं रौआ ली ता सै आपु कु नाईं फौल़ी सौकदी। तिणी ई तुमै भी अगर मुंदी बौणी ना रौआ लै ता नाईं फौल़ी सौकदै। 5हाऊं अंगुरा री लाऊ ऊ: तुमैं ई डाल़ी। ज़ुण मुंदी बौणी रौआ लौ और हाऊं तेसदी, ता सेऊ भौरी फौल़ फौल़ा आ, कैलैकि तुमैं मुकु अलग हुइयौ कुछ़ भी ना कौरी सौकदै। 6अगर कुण मुंदी बौणी नाईं रौआ लौ, ता तेस तिऐं डाल़ी बाशीऐ काटीऔ पोरु शोटाई, और सै पोरु शुका आ। और लोग तिऊं कौट्ठै कौरीयौ आगी दी ज़ाल़ा ई, और सै पोरु ज़ौल़ाई। 7अगर तुमै मुंदी बौणी रौआ लै और मैरौ वचन तुमु दी बौणी रौआ लौ, ता ज़ो तुमै च़ाहा लै तेसी मांगा लै ता सेज़ौ तुमुलै हुआ सा। 8मैरै बाबा री बौड़ाई इणै कौरीऐ हुआ आ कि तुमै भौरी फौल़ा, तैबै ऐ तुमै मैरै च़ेलै बौणा ई। 9ज़िणौ बाबै मुं आइलै प्यार छ़ाड़ौ, तिणी ई मुंइऐ तुमु आइलै प्यार छ़ाड़ौ आ। मैरै प्यारा दी बौणी रौ। 10अगर तुमै मैरौ हुकम माना लै, ता मैरै प्यारा दी बौणी रौआ लै। ज़िणौ मुंइऐ आपणै बाबा रौ हुकम मानौ आ, और तेसरै प्यारा दी बौणी रौआऊ। 11मुंइऐ तुमुकै एज़ी बुशै एथलै बोली ई गोई ताकी सेज़ी भौरी खुशी तुमु दी बौणी रौआ, ज़ो मुकै आ, और तुमारी भौरी खुशी पुरी हुआ।
12मैरौ हुकम एज़ौ आ, कि ज़िणौ मुंइऐ तुमु आइलै प्यार किऔ आ, तिणी ई तुमै भी एकी दुजै आइलै प्यार कौरौ। 13एथकु बौड़ौ प्यार कासी रौ नाईं कि आपणै गोश्टणा री तांई आपणै प्राण दिआ। 14ज़ेज़ौ हुकम हाऊं तुमुलै दिआऊ, अगर तिऐं माना लै ता तुमै मैरै गोश्टण ई। 15आबै हाऊं तुमुलै दास नाईं बोलदौ, कैलैकि दास नाईं ज़ाणदौ कि मालिक का कौरा सा। पर मुंइऐ तुमुलै गोश्टण बोलौ आ, कैलैकि ज़ेज़ी बुशै मुंइऐ आपणै बाबा कु शुणी, सै सारी तुमुकै बोली गोई आ। 16तुमुऐ हाऊं नाईं च़ुनौ पर मुंइऐ तुमै च़ुनै ई और तुमै मुंइऐ छ़ांटेई कि डेइऔ फल़ आणा और तुमारौ फल़ सौदा बौणी रौआ, कि तुमै मैरै नावां कौरीऐ बाबा कु ज़ो भी मांगा लै सेऊ तुमुलै दिआ। 17एज़ी बुशु रौ हुकम हाऊं तुमुलै एथीलै दिआऊ कि तुमै एकी दुजै कु प्यार कौरा।
धौतरी आइलै दुश्मनी
18“अगर दुनिया रै लोग तुमु कु नफरत कौरा आ, ता तुमै ज़ाणाई कि तिणीऐ तुमु कु पैहलै मुं आइलै नफरत की आ। 19अगर तुमै दुनिया रै लोग रै हुआ थै, ता सण्सारा रै लोग आपणेऊ कु प्यार कौरा थै। पर एज़ी वज़ाह कु कि तुमै दुनिया रै नाईं, बल्कि मुंइऐ तुमै दुनिया कु छ़ांटी गौऐ ई, एथीलै दुनिया तुमु कु नफरत कौरा। 20ज़ेज़ी बुशै मुंइऐ तुमुकै बोली थी, कि नुकुर आपणै स्वामी कु बौड़ौ नाईं औन्दौ, तिऊं याद छ़ाड़ौ। अगर तिंउऐ हाऊं सताओ ऊ, ता तुमु भी सौतावा ई। अगर तिंउऐ मेरी बुशै मानी ई, ता सै तुमारी भी माना ई। 21पर एऊ सब कुछ़, लोग मैरै नावां री वज़ाह कु तुमु आइलै कौरा ई कैलैकि सै मैरौ भेज़णै वाल़ै परमेश्वर नाईं ज़ाणदै। 22अगर हाऊं नाईं आशा थौ और तिऊं आइलै बुशै नाईं लाआ थौ, ता सै पापी नाईं बौणा थै। पर आबै तिउंलै तिंउरै पापा लै कोई बाहनौ नाईं। 23ज़ुण मुकु नफरत कौरालौ, सेऊ मैरै बाबा कु भी नफरत कौरा सा। 24अगर हाऊं तिऊं मांझ़िऐ सेज़ै हैरानी वाल़ै काम नाईं कौरा थौ, ज़ेज़ै कोई ओरी ऐ नाईं किऐ। ता सै पापी नाईं बौणा थै। पर आबै ता तिंउऐ हाऊं और मैरौ बाबा दुइया देखी गौऐ ई और दुइया कु नफरत कौरा ई। 25एऊ एथीलै हुऔ कि सेऊ वचन पुरौ हुआ, ज़ो तिंउरै पवित्रशास्त्रा दी थौ लिखौ औन्दौ, ‘तिंउऐ मुं आइलै बिण मतलबा री नफरत की आ।’ 26पर ज़ैबै सेऊ मज़दगार आशा लौ, ज़ास हाऊं तुमु काऐ बाबा री तौरफा कु भेज़ाऊ, मतलब पवित्र आत्मा ज़ो लोगु सौच़्च़ाई भिलै निंया आ ज़ो बाबा री तौरफा कु निकल़ा सा, ता सेऊ मेरी गवाही दिआ सा। 27और तुमै भी मैरै गवाह ई कैलैकि पैहलै कु तुमै भी मुं आइलै साथाई रौऐ ई।”
Tällä hetkellä valittuna:
यहुन्ना 15: BFZ-NT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
This work is licensed under Creative Commons Attribution-ShareAlike 4.0 License.
