Luukasiup Aglangit 10
10
Jiisusiup Tilisininga Angutinik 72-nik
1Tamatuma kinguningagut Ataniq nirualaurivuq 72-nik,#10:1 Ilangit uqaqsimavut 70-nik tilillugi marruunaaqtirlugit nunalilimaanut upalaarumajaminut. 2Uqautillugit, “Piruqsiivik angijuuvuq, katiqsijuksalli amigaqput; taimaimmat piruqsiiviup ataninga tuksiarvigisiuk tilisiqullugu katiqsiqatauniaqtunik piruqsiivingani. 3Aullalirissi; takugit, siipiup nurrangititut tilivassi amaqqut akurngannut. 4Kiinaujakkuvilijarniarasi, ikpiajulijarasilu, itigagutilijarasilu; aqqutissinni nilliujjiniarasiluunniit. 5Iglumut itiraigussi, sivullirmik uqaqattarissi, ‘Iglumi uvani saimanaqtuqarli!’ 6Tavvani iglumi saimmaqtitsinissinnik ilaliuqsijuqaqpat, tavva saimaniq tavvaniinniaqpuq; ilaliuqsinngippatali saimmaqtitsinisi ilissinnut utirniaqpuq. 7Iglumit tavvanngat nuunniarasi, nirivaglusi imiqpaglusilu manijaujunik ilissinnut, pinasuaqtuq akiliqtaujariaqarmat; siniktarvigijassi asianut nuktirniarasi. 8Nunalingnut tikituarussi tunngasuktitaugussilu, niqinik qaitanginnik niriqattarissi; 9qanimajut tavvani aaqqiqattarlugit uqautilugit, ‘Guutiup Ataniuvingata tikippaasi.’ 10Nunalingnulli tikivvigijassinnut tunngasuktitaunngikkussi, aturiamuarlusi uqaqtuksauvusi, 11‘Sanit nunassinnit pisimajut, itigattinnit piijaqpavut nammagijaunginnissinnik kaujijjutauqullugit, Guutiup Ataniuvingata qanigilirmasi.’ 12Uqautivassi, iqqaqtuivik nalliutikpat nunalit taakkua nikagijaunginniqsaujumaaqput Sutuumamiunit.”
Nunalit Ukpirusunngittut
Maatiusi 11:20-24
13“Kappiannamik Kurasin! Kappiannamiiglu Pitsaita! Ilissinni kamanaqtulinirijaulauqtut taimaalluaq kamanaqtulijuqaqpat Tairimi Saitunimilu, taakkua inungit qaqialiriiqsimalirajalauqput, guutsiup miqquvininganik annuraarlutik arjalinirniglu katagaatitsivigilutik immingnut iksivaarajalauqput qaqialirlutik. 14Iqqaqtuivigli nalliutikpat sugiaqtauniqsaujumaaqpusi Tairimit Saitunimillu. 15Ivvillu Kapiirniam, ilingnik quvvaqtittumavit qilangmut tikillutit? Kataktitaujumaaqputit kappianaqtuvingmut!
16“Ilissinnik naalaktut, naalakkivaanga; ilissinniglu narrujuup narrugivaanga; uvannigli narrujuup tilisilauqtuq uvannik narrugivaa.”
Tilijaulauqtut 72 Utirningat
17Angutit 72 utiqput quviasuktualuullutik uqarlutik, “Ataniq, anirnirluit aglaat naalaqattalauqpaatigut atirni!”
18Jiisusiup kiuvait, “Saataanasi takulauqpara qilangmit kataktuq qaummaallaktutitut. 19Takugit, pijunnaqtitaunirmik tunisivigilauqpassi, quglugiat sikuaqpiunillu#10:19 Sikuaqpiunit, qupirruit pamiumigut tuqunnaqtulit tullirarunnarlugit, akiraqtuqtiullu pijunnarnilimaanginnik saalaqarunnaqullusi; sunamulluunniit aanniqtaunianngilasi. 20Anirnirluit naalangmasi tamanna quviasuutiginasiuk, quviasugissili atiqsi titiraqsimangmata qilangmi.”
Jiisusiup Quviasuktitauninga
Maatiusi 11:25-27; 13:16-17
21Tavvani ikarrami Jiisusi Anirnikkut Ijjurnaittukkut quviasuktitauvuq uqarluni, “Ataataak, qujagivagit, Ataniujutit qilangmi nunamilu, tamakkua ilisimajunut silatujunullu ijiqsimagavigit, nutaraqtituuqtunulli tamakkua nalunarunnaiqtinnavigit; iilaak, Ataataak, taimaak piqusimagaviuk quviagigaviuglu.
22“Ataatama sunalimaanik tunisivigivaanga, nalliattalu Irniq kinaungmangaat qaujimanngilaa, Ataata kisimi qaujimavuq, Ataatalu kinaungmangat qaujimajuqannginnivut, Irniq kisimi qaujimavuq, Irniullu niruarlugit qaujitittumajangita kisimi qaujimavaat.”
23Tavva Jiisusiup ilinniaqtini saavvigillugit taakkuatuutillugit uqautivait, “Tusunnaqtumiippusi takunnaqtasi tamakkua pillugit! 24Uqautivassi nalauttaijut amisut, angajuqqaarjuallu takujumalauraluaqput maanna takuqattaqtassinnik, takulaunngilallu, tusaqtassinniglu tusarumalauraluaqput, tusalaunngilallu.”
Jiisusiup Ajjiujuutitanga Samiariarmiutatsiaq
25Takugit, piqujanik ilisimajuq qaigivuq Jiisusimut uukturlugu, uqarluni, “Ajuriqtuiji, qanuq pijuksauvunga inuusirmik nungusuittumik pitaaqullunga?”
26Jiisusiup kiuvaa, “Qanuq piqujait uqaqsimavaat? Qanurli tukisisimavigit?”
27Taassuma kiuvaa, “Ataniq, Guutisi nagligijaksarivasi uummatissinnut tamainnut, tarnissinnullu tamainnut, pijunnarnissinnullu tamainnut, isumaillu tamaat aturlugu; inuuqatingnik iliktut nagligusuktuksauvutit.”
28Jiisusiup kiuvaa, “Taimaatsiaq kiuvutit; taimailiurit tavva inuuniaqputit.”
29Piqujanik ilisaiji naammattiaqtumiinnirmingnik qaujimajaujumalirami Jiisusi apirivaa, “Kinali taima inuuqatigivara?”
30Jiisusiup kiuvaa, “Angummik Jiruusalimmit ammuaktuqalauqpuq Jirikuumunngaujumik, tigliktinit taanna upaktauvuq, katujjaulluni annuraijaqtauvuq aanniqsiqtaulluni, anauliqtauvuq, tuquligaaliqtuq qimakpaat. 31Taissumani pisuktuqalauqpuq tunirrusiqtitsijimik tamauna aturiakkut; taanna tuquligaajuq takugamiuk qaangiinnaqpaa aturiap akiagut. 32Ammattauq#10:32 Livaitit tunirrusiqtitsijit ikajuqtingit tuksiarvigjuarmilu ikajuqtit Livaiti tamaunaalaurivuq, tuquligaajuq takugamiuk qaagiinnarivaa aturiap akiagut. 33Samiariarmiutaup tamauna ingirrajuup tikinnamiuk tuquligaajuq; takugamiuk, nagligiliqpaa. 34Upaglugu killingit uqsumik uainimiglu quvvirillugit mattusiqtuqpait, uumajuqutiminut ikitillugu siniktarvingmuarutivaa, tavvanilu kamagilirlugu. 35Qautillugu kiinaujaangnik marruungnik siniktarviup inua tunisivigivaa, uqautillugu, ‘Una kamagitsiaruk; anginiqsamik kiinaujairutigiguviuk utilirmiguma tamauna akilikkannilaaqpagit.’
36“Nalliat taima angutit pingasut inuuqatigijauniqpaanguvaa taassumunga tuqutaukasalauqtumut?”
37Piqujanik ilisaijiup kiuvaa, “Taanna pitsialauqtuq taassumunga tuqutaukasaktumut.”
Jiisusiup uqautivaa, “Ivvittauq taimailiuriaqtulirit.”
Jiisusiup Pulaariarninga Maatamik Miarimiglu
38Jiisusi ilinniaqtini ilagillugit ingirrallutik, nunalingnut tikipput; tavvani arnaup Maatamik atiliup tunngasuktippaa angirraminut. 39Maata qatanngutiqaqpuq Miarimik atilingmik, Miari iksivaalauqpuq Ataniup saattiangani ajuriqtuusinginnik naalagluni. 40Maatali isumajaarutiqaliqpuq pijaksaqaluarnirminut; Jiisusi upaglugu uqautivaa, “Ataniq, qanuiksanngilatit Miariup pilirijutuutigaluaqpanga? Uvannik ikajuqulauruk.”
41Ataniup kiuvaa, “Maataa, Maataa, isumajaarutiqaluaravit pinasuagaksavit unurninginnik; 42atausirli pijariaqaluaqtutuuvuq. Miari piuniqsamik pijumangmat, taanna aqsaaqtaunianngilaq tamatuminga.”
Tällä hetkellä valittuna:
Luukasiup Aglangit 10: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.