Luukasiup Aglangit 5
5
Jiisusiup Qaiqujininga Sivulliqpaanik Ilinniaqtiksaminik
Maatiusi 4:18-22; Maakusi 1:16-20
1Ulluit ilangannik Jiisusi tasiup Ginisariitiup sinaani nangiqtillugu, inuit iniqarunniiqtiliqpaat imaup kiglingani, tusarumallutik Guutiup uqausinginnik. 2Umiangnik marruungnik takugami nunamut tulaktuungnik, inungit iqaluksiuqtit nunamut niullutik nuluamingnik irruqtuiliqtunik. 3Jiisusi umiap aippanganut ikivuq, Saimuuniup umianganut, umiaq saavigiakkanniquvaa, qaanganut ingilluni inuit ajuriqtuqpait umiamit.
4Uqallagiirami Saimuuni uqautivaa, “Itijumuariakannirlusi iqaluksiuqatitillu nulualilaurissi iqalugasuglusi.”
5Saimuuniup kiuvaa, “Ajuriqtuiji, unnualimaaq iqalugasulauraluaqpugut iqalulauratalu! Uqausilli maliglugu nulujjirniaqpunga.” 6Nulujjiramik; unuqtualungnik iqalukput, nuluangit aglaat alingniusalirlutik, 7umianguqatitik nuluraqpait ikajuriaqtaujumallutik. Qaingmata umiak atunit usiliqsuqpaat usitturlugik umiangit kiviniusalirlutik. 8Saimuuni Piitturuusi tamatuminga takugami, Jiisusiup saanganut siiqquqpuq, uqarluni, “Qimalaunnga Ataniq piunngittualuugama.”
9Saimuuni ilagijalimaangillu kamajualuuvut, iqaluktatik unuqtualuuningit pijjutigillugit; 10taimailaurivut ilagijangit Jaimisi Juanasilu, Sipitiup irningik, Jiisusiup Saimuuni uqautivaa, “Kappiasungnak; maannamit pigiarlutit inungnik iqaluksiuqtiunialiqputit.”
11Umiatik tulaktinnamigit nunamut, sunalimaatik iparainnarlugit Jiisusi maliliqpaat.
Jiisusiup Aaqqiksininga Angummik
Maatiusi 8:1-4; Maakusi 1:40-45
12Nunalingniitillugu Jiisusi, angummik qaijuqaqpuq kappiagijaujumik paqtiqtumik; taassuma Jiisusi takugamiuk saanganut paammakpuq, qinuvigillugulu, “Ataniq pijumaguvit, salummarunnaraluaqparma.”
13Jiisusi isagluni aktuqpaa, uqautillugu, “Pijumavunga; salummalirit,” tavvainnaq paqtirunniiqpuq. 14Iniqtiqpaa, kinatuinnarmut uqaqunagu; uqautillugu, “Tunirrusiqtitsijimut ailirit qaujisarniarmatit, tunirrutiksamiglu aaqqiktaunirnut tunirrusilutit, Muusisiup piqujininga maliglugu, inungnut qaujijjutauqullugu aaqqiktaunirnik.”
15Anginiqsamigli tusaumajauliqpuq ungasiktumit aglaat; inugasagjuallu amisut qaivut tusarumallutik aaqqiktaujumallutiglu aanniamingnit. 16Jiisusili taakkunanngat qimaruutivuq inuqanngittumut tuksiarumalluni.
Jiisusiup Aaqqiksininga Nukiqanngittumik
Maatiusi 9:1-8; Maakusi 2:1-12
17Ulluit taakkua ilanganni, Jiisusi ajuriqtuitillugu, Paarisit piqujaniglu ilisaijit tavvaniiqataulaurivut, tavvunngaqsimallutik nunalingnit Galiliamiittulimaanit, Juutiamillu, Jiruusalimmillu; Ataniup pijunnarninga najuutingmat taassumani, qanimajut aaqqiktaulauqput. 18Inuillu tavvunngaujjivut angummik nukiqanngittumik iglirmiitillugu akiraqtaujumik, taanna iglumut itirumagaluaqpaat Jiisusimuarumallugu. 19Inugialuarninganulli itirunnannginnamik, igluup qaanganuarutivaat, iglu qulaagut angmarlugu ningitippaat inuit akurngannut, Jiisusiup saanganut. 20Qaujigami taakkua ukpirniqarmata, angut nalajuq uqautivaa, “Ilannaak, piunngittulinitit isumagijaujunnaiqput.”
21Tavva piqujanik ilisaijit Paarisillu, apiriliqput, uqarlutik, “Sungmanuna Guutimik uqarnirluutiqaqpaa? Guuti kisimi piunngittulinirnik isumagijunnaiqsijunnaqtutuuvuq.”
22Jiisusiup apiqsuutigijangit qaujigamigit uqautivait, “Sungmat taimaak uummatissinni apiqsuutiqaqpisi? 23Nalliat pijariakinniqsauvaa uqaruma, ‘Piunngittulinitit isumagijaujunnaiqput,’ uvvaluunniit uqaruma, ‘Makillutit pisulirit?’ 24Qaujiqullusi Inuup Irninga pijunnarniqarmat nunarjuarmi piunngittulinit isumagijunnairlugit.” Nukiqanngittumut uqaqpuq, “Uqautivagit makittit, nallangaviit tigulugu, angirralirit.”
25Tavvainnaq makippuq inuit takkuani, nalavigijani tigullugu angirraliqpuq, Guuti niqturlugu. 26Tavvaniittulimaat kamammariliqput, kappiasuglutik, Guuti niqturlugu uqaqput, “Ullumi takulauqsimanngitattinnik takuvugut.”
Jiisusiup Qaiqujininga Livaimik
Maatiusi 9:9-13; Maakusi 2:13-17
27Tamatuma kingurngagut Jiisusi anivuq, takullunilu Ruumamiut kiinaujaiqtitsijiqutinganik, Livaimik atilingmik, kiinaujaiqtitsivingmi iksivajumik; Jiisusiup uqautivaa, “Malinnga.” 28Livai nikuvippuq, sunalimaat qimaglugit, Jiisusi maliksaqpaa.
29Livai iglumini nirivigjuaqtitsivuq Jiisusi nirijaqtuqullugu; Ruumamiullu kiinaujaiqtitsijiqutingit amisut, inuillu asingit tavvani nirijaqtuqsimavut. 30Paarisit piqujaniglu ilisaijit tavvaniittut Jiisusiup ilinniaqtinginnut naammaksaratik uqaqput, “Sungmat Ruumamiut kiinaujaiqtitsijiqutingit piunngittulijullu niriqatigivisiuk?”
31Jiisusiup kiuvait, “Inuit aannianngittut aanniasiutimit kamagijaujariaqanngilat, qanimajulli kisimi; 32iluaqtut qaiqujaqtuqsimanngilakka, piunngittulijulli qaiqujaqtuqpakka saagiaqullugit.”
Jiisusiup Ajuriqtuininga Nirittailinirmik
Maatiusi 9:14-17; Maakusi 2:18-22
33Taakkua Jiisusimut uqaqput, “Juanasiup ilinniaqtingit nirittailivakput akulaittumik tuksiarlutik, Paarisillu ilinniaqtingit taimaippakkivut, ilinniaqtitilli nirivut imirlutiglu.”
34Jiisusiup uqautivait, “Katititaujunut nirijaqtuqsimajut nirittailitittunnaqpisiuk? Uiksaq tavvaniittillugu? 35Ulluit nalliutijumaaqput uiksamik aqsaaqtauvingat, tavva tamanna nalliutikpat nirittaililirumaaqput.”
36Ajjiujumik uqautivait: “Aliksijuqaqpanngilaq annuraamik nutaamik, annuraatuqarmullu ilaliutilugu; taimaikkuni, annuraaq nutaaq suratuinnarniaqpaa, taanna annuraap nutaap ilanga annuraatuqaup ajjigilirunnanngimmagu. 37Uainimik nutaamik immiqsuijuqaqpanngilaq umajuviniup aminganut uainiqautituqarnut; taimaikkuni, amiq uainiqautituqaq qaarniaqpuq, uaini kuviluni, uainiqautilu asiruqtaugajaqpuq. 38Uainili nutaaq amirmut nutaamut immiqsuutijaujuksauvuq. 39Uainituqarmik pivaktut nutaamik uainimik pijumavanngilat; uqaqpaglutik, ‘Pituqaq mamarniqsauvuq.’”
Tällä hetkellä valittuna:
Luukasiup Aglangit 5: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.