Maatiusiup Aglangit 15
15
Sivuliviningita Ajuriqtuijjutiviningit
Maakusi 7:1-13
1Tavva Paarisit ilangit, piqujaniglu ilisaijit Jiruusalimminngaarlutik Jiisusimuaqput uqarlutik, 2“Sungmanikkua ilinniaqtitit sivulitta ajuriqtuutinginnik naalanngilat? Aggangmingnik uasaqattanngimmata nirinialiraangamik!”
3Jiisusiup kiuvait, “Sungmat Guutiup piqujanginnik nalaanngilasi sivulitsi ajuriqtuutinginnik malingaarlusi? 4Guuti piqujilaurmat, ‘Ataatangnik anaanangniglu ikpigusutsiarit,’ ammalu ‘Nalliat ataataminik anaanaminiglu uqarnirluutilik taanna tuqutaujuksauvuq.’ 5Ajuriqtuivakpusili qiturngarijaujuq ataataminut anaanaminutlu ikajutiksaminik pisimajuq. Uqarussi, taanna Guutimut pigijaujuq, 6tavva ataataminik anaanaminiglu upigusunngikkaluaqpat qanuigivanngitasi. Taimailiuqtillusi Guutiup maliktauqujanganik malinngilasi. Malingaarumallusi nangminiq ajuriqtutigivaktatssinnik. 7Takurmuuqtusi! Aisaiasi sulitsiarluni uqalauqpuq ilissi pijjutigillusi! Uqarluni:
8‘Ukua inuit uqausirmigut isumagitsiaqpaanga,
Uummatingitali ungasigivaanga.
9Sulinatik tuksiarvigivaanga,
Ajuriqtuijjutiqaramik inuit aqqiktavininginnik ukpirnirmut tunngaviuniraqtamingnik.’
Guutiup piqujangititut piniarutautillugit!’”
Makua Tamajja Inungmik Salumajunniiqtitsijut
Maakusi 7:14-23
10Tavva Jiisusiup inugasagjuat imminut qaiquvait, uqautillugit, “Naalatsiarissi tukisilusi! 11Inuup qaningagut itiqtut inungmik narrunaqtitsinngilat; inungmilli anijut uqausit taakkua inungmik narrunaqtitsivut.”
12Tavva ilinniaqtingita upaglugu uqautivaat, “Qaujimavit Paarisit uqausirijarnut iluarunniiqtitaungmata?”
13Jiisusiup kiuvait, “Piruqtut Ataatama qilangmiittuup kanngaqsuutigilaunngitangit amaangitigut nusuktaujumaaqput, 14ilissi isumaalutigijariaqanngitasi! Tasiuqtiungmata tautunngittuullutik, tautunngittuuqatimingnik tasiuqsinasuaqtut tautunngittuinnaugutiglu itiqsamut katakkajaqput.”
15Piitturuusi uqaliqpuq, “Ajjiujut uqausirijatit nalunailaukkit uvattinnut.”
16Tavva Jiisusiup uqautivait, “Suli qaujimaniqsaunngilasi asitsinnit? 17Tukisinngilasi sunatuinnaq inungmut qaningagut itiqtuq, aqiarunganuarmat, kinguningagullu timinganit anigilluni. 18Inuulli qaninganit anijut inuup uummatinganinngaaqput, tamakkua tavva inungmik narrunaqtitsijut. 19Inuup uummatinganit isumait piunngittut saqqipput, pijaariluni tuqutsiniq, nuliariingnirmik asinniarniq, katititausimaqatiginngitamik innangaqatiqarniq; tiglingniq, inuuqatimik saglutiqarniq, uqautiqarlungniq. 20Tamakkua tamajja inungmik narrunaqtitsivut; nirilunili aggait uasaqsimanngikkaluaqtillugit inungmik narrunaqtitsinngilat.”
Arnaup Ukpirninga
Maakusi 7:24-30
21Jiisusi tavvanngat aullarami nunalit Tairiup Saituniullu qanigijaanuaqpuq. 22Takugit, arnaq Kainanimiuq tamaani qanigijaani nunaqaqtuq Jiisusimuaqpuq nipiqquqtulluni uqaqpuq, “Ataniq, Taivitiup Irninga nikaginnga; paniga anirnirlungmut itiqtausimangmat aksuruqtitaullunilu.”
23Jiisusi arnamut kiunngilarluunniit. Tavva ilinniaqtingita Jiisusi upaglugu qinuvigivaat, uqarlutik, “Una arnaq aullaqtilauruk, uvattinnik malikatagluni nipilialutuinnaungmat!”
24Tavva kiuvaa, “Tilijausimatuinnaqpunga siipinut asiusimajunut Isarialimiunut.”
25Arnaq Jiisusiup itiganginnut siiqqurluni, uqaqpuq, “Ataniq ikajulaunnga!”
26Jiisusiup kiuvaa, “Naammanngimmat qiturgarijaujut niriniaqtanginnit tigusiluni qimminullu igillugit.”
27Arnaup kiuvaa, “Sulivutit Ataniq, qimmilli niriqattaqput nirinirlukunit angajuqqaangita saanganit katagaqtaunikunik.”
28Tavva Jiisusiup kiuvaa, “Arnaaq ukpirniit angijuuvuq! Pijumajarnik tunisiviunialiqputit.” Tavvainnaq arnaup paninga aaqqikpuq.
Jiisusiup Aaqqiksininga Inungnik Amisunik
29Jiisusi tavvanngat aullarami Galiliap tasingata sinaagut pisuliqpuq. Qaqqamut majurarluni, qaanganuarami ingippuq. 30Inugasagjuallu amisut Jiisusimuaqput, tusiattunik pisugunnatsianngittunik naksarlutik, tautunngittuniglu, naukkutuinnarlu itigangmigut aggangmigullu aanniqsimajunik, uqarunnanngittuniglu, asinginniglu inuit qanimmasilit amisut Jiisusiup saanganuarujjauvut; Jiisusiup aaqqikpait. 31Inuillu kamavut takuliramik uqarunnanngittut uqallalirmata, naukkutuinnarlu iliqqusirluktut qanuinngitsialirmata, tusiattut pisutsialirmata, tautunngittullu tautulirmata; Isarialimiut Guutinga niqtuqpaat.
Jiisusiup Inungnik 4,000-nik Nirititsininga
Maakusi 8:1-10
32Tavva Jiisusiup ilinniaqtini imminut qaiqullugit uqautivait, “Ukua inugasagjuat ilatsugivakka, ullunik pingasunik uvanniimmata nirilauratik; kaaktillugit aullaqtituinnarumanngilakka, angirrarasualirlutik aqqutimingni nukiirutituinnariaqarmata.”
33Tavva ilinniaqtingita uqautivaat, “Nakilli taakkununga naammaktunik niqiksaqtaarniaqpita? Tamaani sunaqajuittumi inugasagjuat nirititauqullugit?”
34Jiisusiup uqautivait, “Qatsinik niaquujaqaqpisi?” Taakkua uqaqput, “7-nik niaquujaqaqpugut, iqalukulungniglu mikijunik ununngittunik.”
35Tavva Jiisusiup inugasagjuat nunamut iksivaquvait. 36Niakuujait 7 iqaluillu tiguvait, qujaliqqaarlunilu agguqpait ilinniaqtiminut tunillugit, ilinniaqtingitalu tuniuqautigivait inugasangnut. 37Tamarmik nirivut naammaksillutik; tavva 7-nik iviujanik tigusillutik amiakkunginik agguqsimajunik taakkualu tatapput. 38Nirijut angutainnait unurniqaqput 4,000-nik, arnait surusiillu naasaqasiutinagit.
39Jiisusiup inugasagjuat aullaquliqpait, umiamulli ikilluni nunamut Maagatanimik atilingmut ikaaliqpuq.
Tällä hetkellä valittuna:
Maatiusiup Aglangit 15: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.