Maatiusiup Aglangit 17
17
Jiisusiup Takuksakut Asinnguqtitauninga
1Ulluit pingasuujuqtut kinguningagut Jiisusiup Piitturuusi Jaimisikkuglu Juanasikkuk nukariik, ilagillugit qaqqamut puqtujumut majuarutivait, ilatuarillugit. 2Ilinniaqtit takunnaaqtillugit Jiisusiup takuksauninga asinguqtitauvuq, kiinanga qaummakpuq siqiniup qaumaningatut, annuraangillu qaumajurjuangulirlutik. 3Takugit, taakkununga saqqittuqaqpuq Muusisimik Ilaijjamiglu Jiisusimik uqaqatiqaqtuungnik. 4Piitturuusi uqaqpuq Jiisusimut, “Ataniq, tavvani quvianalualirmat; pijumaguvit, tavvani siniktarviliurumavunga pingasunik, ilingnut, Muusisimullu, Ilaijjamullu.”
5Uqallaktillugu suli, takugit, nuvujamut qaumajumut tikitauvut, nipi nuvujamit uqaqpuq, “Taanna tavva Irnira nagligijara, quviagitsiaqtara; taanna naalaksiuk!”
6Ilinniaqtit tamatuminga tusaramik, nunamut punngaliqput, kappiasuluarnirmut. 7Jiisusiulli upaglugit aktuqpait, uqarluni, “Makigissi, kappiasungillusi.” 8Ilinniaqtilli takusaramik, inungmik takunngilat Jiisusiup asianik.
9Qaqqamit aqqalirlutik, Jiisusiup iniqtiqpait, uqarluni, “Tamatuminga takutitaunissinnik kinatuinnarmut uqaqtailigissi; Inuup Irninga makilauqqaaqtinnagu tuqungajunit.”
10Ilinniaqtit apirivaat, “Sungmanikkua piqujanik ilisaijit uqaqattaqpat Ilaijja sivulliuluni tikittariaqarnirarlugu?”
11Jiisusiup kiuvait, “Ilaak Ilaijja sivulliulluni tikisimavuq, taassuma tamarmik upalungaijarniaqpait, 12uqautivassili, Ilaijja tikittariiqsimavuq, inuillu ilitarinngilaat, piniarvigilauqpaallu isumaqsuutigillugu. Taimaaktauq Inuup Irninga taakkunanngat aanniatitaujumaarivuq.”
13Tavva ilinniaqtit tukisivut Juanasi Paaptitsirijimik uqausiqarninganik.
Jiisusiup Nukappiamik Anirnirlungmut Itiqtausimajumik Aaqqiksininga
Maakusi 9:14-29; Luukasi 9:37-43a
14Inugasagjuanut utirmata, angut Jiisusimuaqpuq, saanganullu siiqqurluni, 15uqaqpuq, “Ataniq, irnira nikagilauruk, qiiqsuqattarmat, qiiqsuliraangami urruqattarmat ikumamut imarmulluunniit. 16Ilinniaqtingnulli aaqqaugaluaqpara, taakkuali aaqqigunnanngilaat.”
17Jiisusiup kiuvaa, “Ukpirniqanngittusi tammaqsimajualuujusilu, qanuq akuniutigijuq najuriaqaqpassi? Qanurlu akuniutigijuq qinuisaarvigijariaqaqpassi? Nukappiaq uvannut maunga qaitilauruk.” 18Jiisusiup anirnirluk iniqtirlugu tavvanngat aniquvaa, anirnirluk nukappiamit anivuq, tavvatsainnaq nukappiaq aaqqikpuq.
19Tavva ilinniaqtit Jiisusimuaqput inutuulirmat apirivaat, “Sungmalli anirnirluk anitittunnanngilavut?”
20Jiisusiup kiuvait, “Ukpirnikiluarassi, sulijumik uqautivassi, ukpirniqarussi piruqsiaksaup kanngaqsuutiksaqtangatut mikijukuluktitut mastarttut, uumunga qaqqamut uqarunnaqpusi, ‘Uvanngat nuugit avunga,’ tavvanngallu nuunniaqpuq; sunalimaanik ajuqtaqarnianngilasi.” [ 21Tamakkuali anirnirluit tuksiarnirmut nirittailinirmullu kisiani anititaujunnaqput; asiagulli anititaujunnanngilat.]#17:21 Ijjujutuqait ilanginni pitaqanngilluni ilanginni ilijausimalluni. Takulugu Maakusi 9:29
Jiisusiup Uqausiqakkannirninga Tuqutauniksaminik
Maakusi 9:30-32; Luukasi 9:43b-45
22Ilinniaqtit katinngalirmata Galiliami, Jiisusiup uqautivait, “Inuup Irninga inungnut pijaukkaqtaujariaqaqpuq. 23Taakkunanngallu tuqutaujumaaqpuq; ulluilli pingajuanni makittumaarivuq.”
Ilinniaqtillu qiksaammariliqput.
Tuksiarvigjuarmi Akiliujjiniq Taaksitigut
24Jiisusi ilinniaqtingillu Kapiirniamut tikimmata, tuksiarvigjuarmi taaksitigut akiliqsuititsiji, Piitturuusimuaqpuq apirillugu, “Una ilisaijisi tuksiarvigjuap taaksinginnik akiliivanngittuq?”
25Piitturuusiup kiuvaa, “Akiliisuungungmijuq.” Piitturuusi iglumut itirmat, Jiisusiup nilliriaqqaalluni uqautivaa, “Saimuunii, qanurli isumaqaqpit? Nalliat akiliijariaqaqpa aturutimingnik taaksinigluunniit nunarjuarmi angajuqqaarjuangujunut? Taakkualuunniit tamaani nunatuqalit angajuqqauvigijangit, uvvaluunniit niurrusimajut?”
26Piitturuusiup kiuvaa, “Taakkua niurrusimajut.”
Jiisusiup kiuvaa, “Taimaimmat, nunatuqalit akiliijariaqanngilat, 27taakkuali agviarutiksaliurniannginnattigu; taimaimmat, tasirmut iqallialaurit; sivulliqpaarlu iqaluktait, qaninga aittaqtinniaqpat, qaninganillu kiinaujanik nanisiniaqputit akiliutilluaqtattinnik tuksiarvigjuarmut; taakkua kiinaujat pilugit akiliutiginiaqpatit akiliutigijariaqaqtattinnut taaksinut.”
Tällä hetkellä valittuna:
Maatiusiup Aglangit 17: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.