Maatiusiup Aglangit 19
19
Ajuriqtuiniq Katititausimalutik Avitsijumajunik
Maakusi 10:1-12
1Jiisusi tamakkuninga uqausiqariirami, Galiliamit aullaqpuq Juutiap nunanganuarluni Kuup Juartaniup akianut. 2Inugasagjuanillu maliktauvuq, tavvani qanimmasilit aaqqikpait.
3Paarisilli ilangit Jiisusimuaqput uukturlugu apirivaat, “Piqujavut angummik avitsillarigunnaqtitsivaat nuliamingnik, sunatuinnarmik pijutiksaqaraluarutiik?”
4Jiisusiup kiuvait, “Guutiup uqausinginnik atuaqsilaunngilasi? Uqaqtuqarmat, ‘Pigiarnirmi pinnguqtitsijuq pinnguqtitsilaurmat angummik arnamiglu.’
5“Guuti uqaqsimavuq, ‘Taimaimmat angutiup ataatani anaananilu qimangniaqpaak nuliani katimaangarumalugu, taakkuaglu marruuk timikkut atausiulirniaqpuuk.’ 6Taimaimmat taakkuak marruujunniiqpuuk timikkulli atausiuliqpuuk. Taimaimmat Guutiup katititangik, inuup avititaksarinngilaak.”
7Tavva Paarisit uqautivaat, “Sungmalli taima Muusisi piqujamik aaqqiksilauqpa angut avitsillarikkuni titiqqanik avitsijjutiminik nalunaiqsijunik nuliani tunisivigijaksarivaa, aullaqtillugulu?”
8Jiisusiup kiuvait, “Muusisiup piqujamik taimaittumik aaqqiksivigilauqpaasi avitsillarigunnaqsititsinirmik nuliassinnik, ajuriqtuqtaujariaksaq sitijualuunisi pillugu, kisiani tamanna taimailingalaunngilaq pinnguqtitauliqtillugit. 9Taimaimmat uqautivassi; nalliat nuliaminik avitsillarikpat, asinniarnirmik pijjutiqanngilluni, asianiglu nulianigluni taanna nuliarilauqtaminik asinniaqpuq.”
10Tavva ilinniaqtingita uqautivaat, “Tavvali taimailingaliqpat angutit arnaillu nulianiqattanngillutik piuniqsauvuq!”
11Jiisusiup kiuvait, “Tamanna uqausirijara tamainnut ilinganngilaq, tunisiviusimajunulli kisiani turaangavuq. 12Ajjigiinngittunik pijjutiksalingnik angutinik nulianijuittuqtaqarmat: ilangit irniangunirmingnit taimaittuujut: ilangilli inuuqatimingnit nulianigunnaillititausimajut; ilangilli nuliaqanngilat immingnik taimaitittunik Guutiup Ataniuvinga pillugu. Tamatuminga uqausirijannik ilaliuqsijunnaqtuq, ilaliuqsilirli.”
Jiisusiup Surusikulungnik Saimmaqtitsininga
Maakusi 10:13-16; Luukasi 18:15-17
13Ilangilli surusikulungnik Jiisusimuarujjivut patimminiarmagit tuksiutilunigillu. Ilinniaqtingitali tavvunngaujjijut iniqtiqpait. 14Jiisusi uqaqpuq, “Surusikuluit uvannut qaititaulit, agvianngillusiuk; taimaittunut Guutiup Ataniuvinga pigijaungmat.”
15Jiisusiu patimmivait, kinguningagullu tavvanngat aullaqpuq.
Inuusuktuq Angut Ajuqsanngittuq
Maakusi 10:17-31; Luukasi 18:18-30
16Taissumani angummik Jiisusimuaqtuqaqpuq uqarluni, “Ajuriqtuiji, qanuq piujumik piniaqtuksauvungaa, inuusirmik nungusuittumik pijunnaqullunga?”
17Jiisusiup kiuvaa, “Sungmat apirivinga suna piungmangaat? Atausiq kisimi piujutuuvuq. Inuusirmut nungusuittumut itirumaguvit piqujanik malitsialirit.”
18Taassuma uqautivaa, “Nalliannik?” Jiisusiup uqautivaa, “Inuaqtuksaunngilatit; asinniaqtuksaunngilatit; tigliktuksaunngilatit; inuuqatingnik sulinngittumik uqausiqaqtuksaunngilatit; 19ataatangnik anaanangniglu upingusutsiaqtuksauvutit; inuuqatisilu nagligijaksarivat nangminiq nagliginiqtut.”
20Inuusuktuup uqautivaa, “Tamakkua piqujalimaat malilauqpakka, sunamik suli pinasuariaqaqpunga?”
21Jiisusiup uqautivaa, “Naammatsiarumaguvit, piqutilimaatit niurrutigijaqtukkit, kiinaujaqtaatillu ajuqsaqtunut tunirrutigilugit, tavva piqutiqatsiarniaqputit qilangmi; atii qailirit, maliglunga.”
22Inuusuktuup tamanna tusaramiuk tavvanngat qimaruutiliqpuq qiksaalirluni, ajuqsanngittualuugami.
23Jiisusi ilinniaqtiminut uqaqpuq, “Sulijumik uqautivassi: inungnut ajuqsanngittunut Guutiup Ataniuvinganut itiriaksaq ajurnakasangniaqpuq. 24Suli uqautikkanniqpassi; aglaat ajurnannginniqsauvuq kaamili miqqutiup ijingaguurianga, ajuqsanngittuup isirajarninganit Guutiup Ataniuvinganut.”
25Ilinniaqtit tamatuminga tusaramik angijumik kamaliqput, uqarlutik, “Kinali taima piulijaujunnarniaqpa?”
26Jiisusiup takusarlugit uqautivait, “Tamanna inungnut ajurnaqpuq; Guutimulli sunalimaanik ajurnaqtuqanngilat.”
27Piitturuusi nilliqpuq uqarluni, “Takugit, sunalimaattinnik qimailauqpugut ilingnik maligluta. Sunamik piqarumaaliqpita?”
28Jiisusiup uqautivait, “Sulijumik uqautivassi: Inuup Irninga iksivautarjuarminut piviarnaqtumut ingilluni nutaamik pigiakkanniliqpat, tavva ilissi maliktiujusi uvannut, iksivaqataujumaaqpusi iksivautarjuani 12-ni, Isarialimiut kinguvaariit 12 angajuqqauvigilugit. 29Kikkulimaat iglumingnik qimaisimajut qatanngutimingnigluunniit najamingnigluunniit ataatamingnigluunniit anaanamingnigluunniit qiturngamingnigluunniit nunamingnigluunniit, uvanga pijjutigilunga, taakkua pititaukkannirumaaqput 100-iqtulluaqtunik, tunisiviulutiglu inuusirmik nungusuittumik. 30Amisut sivulliujut kingulliujumaaqput, unuqtullu kingulliujut sivulliujumaaqput.”
Tällä hetkellä valittuna:
Maatiusiup Aglangit 19: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.