Maatiusiup Aglangit 28
28
Jiisusiup Makinninga
Maakusi 16:1-10; Luukasi 24:1-12; Juanasi 20:1-10
1Sapati anigurmat, pinasuarusiup sivulliqpaangata ullaangani qaummalisaaqtillugu, Miari Maaktaliini taassumalu asia Miari iluvirmik takujaqtuqpuuk. 2Takugit, nuna sajukpillaktualuuvuq; Ataniup aingilinga qilangmit aqqaqpuq, iluviup matunga ujaragjuaq aksakaqtippaa, qanganut ingilluni. 3Taassuma saqqinninga qaummalaktitut tauttuqalauqpuq, annuraangit aputitut qakuqtigillutik. 4Unataqtuksait qaujimanasuaqtitaujut kappiasungnirmut nukingirutivut tuqungajutitut taimailirlutik.
5Aingilik arnaangnut uqaqpuq, “Kappiasunngillusik; qaujimavunga Jiisusimik qiniriarassik kikiaktuqtaulauqtumik. 6Tavvaniittunniiqpuq; makisimalirmat, suurlu ilissinnut uqalaurami. Atii qailusik takuqsiuk nallangavigilauqtanga. 7Maanna tuavirlusik ilinniaqtingit uqautijaqtuliqsikkuk tuqungajunit makisimalirmat, takugit, sivunissinni Galiliamuarniaqpuq; taikani takuniaqpasi! Iqqaumagissi tamakkuninga uqausirijannik.”
8Tavva tuavirlutik iluvirmit qimaruutivuuk, kappiasuglutik quviasummariglutiglu, ullaksivuuk ilinniaqtinginnut uqariaqturlutik.
9Takugit, Jiisusiup kativait uqautillugik, “Saimaniup najurlisik.” Taakkuak upagutivuuk, itigangit akturlugit, tuksiarvigivaak, 10tavva Jiisusiup uqautivaak, “Kappiasunngillusik; qatanngutikka uqautijaqtuqsikkuk Galiliamuaqulugit, tavvani takuniaqpaanga.”
Iluvirmi Qaujisaqtuvinit Uqariaqturningit
11Arnaak ilamingnualiqtillugik, takugit, unataqtuksait ilangit qaujimanasuaqtiulauqtut iluvirmik iglugasangnut utiqput tunirrusiqtitsijit angajuqqaanginnut unikkaarlutik tamainnik piniarniulauqtunik. 12Tunirrusiqtitsijilli angajuqqaangit, Juutilu angajuqqaangit katimallutik angiqatigiikkamik, unataqtuksait kiinaujanik amisunik akiliqpait, 13uqarlutik, “Uqaqattarniaqpusi unnuakkut siniktillusi Jiisusiup timinga ilinniaqtinginnut tigligiaqtuqtaulaurnirarlugu. 14Aulatsijiujuq nunattinnik tamatuminga tusaqtitaukpat, uqautiniaqpavut pasijaksaunnginnissinnik tamatumunga, tamatuminga isumajaarutiqariaqarnianngilasi.”
15Tavva iluvirmi qaujisalauqtut kiinaujait tiguvait piniaqujaunirijamitut pinasualirlutik; tamanna uqausiulauqtuq suli Juutinit uqausiuqattaqpuq, ullumimut tikillugu.
Jiisusiup Saqqinninga Ilinniaqtiminut
Maakusi 16:14-18; Luukasi 24:36-49; Juanasi 20:19-23; Aapuusitaliit 1:6-8
16Tavva ilinniaqtit 11 Galiliamuaqput, qaqqamualutik Jiisusiup upaktauqulauqtanganut. 17Jiisusi takugamijjut paammaktirvigivaat; ilangilli qulaqput. 18Jiisusiup upaglugit uqautivait, “Pijunnarnirnik tamainnik tunisiviuvunga qilangmi nunarjuamilu. 19Taimaimmat inuuqatigiigjuanut ailirissi, ilinniaqtinnguqtitsigiaqturlusi: paaptillugillu Ataataup Irniullu Anirniullu Ijjurnaittuup atingani, 20ajuriqturlugillu maliqullugit ilissinnut piqujinirilauqtannik tamainnik; takugit taimanngalimaaq ilaginiaqpassi, silarjuap naggataa tikillugu.”
Tällä hetkellä valittuna:
Maatiusiup Aglangit 28: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.