Maakusiup Aglangit 11
11
Jiisusi Jiruusalimmut Isiqtillugu Niqtuqtaummaringninga
Maatiusi 21:1-11; Luukasi 19:28-40; Juanasi 12:12-19
1Jiruusalimmut tikippallialiqtillugit, nunalit Pitpaigimiut Pitanimiullu qanigijaaniillutik, Qaqqamuaqput Napaaqtulingmut uqsuksaujunnaqtunik paurgaqasuunik, Jiisusiup ilinniaqtiingni marruk tilivaak sivulliuqullugik, 2uqautillugik, “Ikkununga nunalingnualaurissik, tavvunga tikikkussik takuniaqpusik siutiqquqtujuup nurranganik ipiqsimajumik, kinamulluunniit ikimaviulauqsimanngittumik; taanna ipiillugu tamaunga qaijjutiniaqpasik. 3Apirijaugussigli sungmat taimailiurmangaassik, uqautiniaqpasik, ‘Ataniup aturiaqarmagu utiqtittautiginiaqtanga aturiiruniuk.’”
4Taakkuak ilinniaqtiik nunalingnuaqpuuk, takullutik siutiqquqtujuup nurranganik igluup paangata saniani ipiqsimajumik; taassumingali ipiitsiliqtillugik. 5Tavvaniittunut apirijauvuuk, “Sungmanuna siutiqquqtujuup nurranga ipiippisikkuk?”
6Taakkuak kiuvuuk Jiisusimut uqausiuqujauqqaujunik; taakkuak qanuisarunniiqput kajusituinnaqujilirlutiglu. 7Taanna siutiqquqtujuup nurranga Jiisusimuarutivaak, uligjuamingnik qaanganuaqsillutik, Jiisusi qaanganut ikivuq. 8Unuqtullu uligjuamingnik aqqutimut isivitsivut, ilangilli napaaqtuit avalangajunginnik#11:8 Akirunginnik nakatsillutik tamaunga aqqutimuaqqaivut. 9Inuit Jiisusiup sivuninganiittut, maliktullu qaigalaasivut, “Huusaana! Niqtuqtauli Ataniup atingani tikittuq! 10Guutiup saimmarliuk Taivitiup sivulitta angajuqqauvingata tikititauninga, huusaana niqtuqtauli quttingniqpaangujuq!”
11Jiisusi Jiruusalimmut tikippuq, tuksiarvigjuamut itirluni; iluunnatsianganiglu qimirruaqpuq, unnukpallialirmat, Pitanimuaqpuq ilinniaqtini 12 ilagillugit.
Jiisusiup Napaaqtumik Pigilingnik Pirurviukkanniqujijunniirninga
Maatiusi 21:18-19
12Qautilluguli, Jiruusalimmut utilirlutik Pitanimit, Jiisusi kaaliqpuq. 13Napaaqtumik pigilingnik#11:13 Paurgait saunigalaaliit paurngaliksamik takugami ungasiktumiitillugu suli, uqaujangit piruqsimatsialiqtunik, upakpaa paurnganik pitaqarmangaat takujaqturlugu, upakkamiuk takuvaa, uqaujaqatuinnaqtuq, paurngaqarviksanga suli naammaksisimanngimmat. 14Jiisusi napaaqtumut uqaqpuq, “Ilingnit paurnganik niriviulauqsimaniarunniiqputit.”
Ilinniaqtingita tusaqpaat taimaak uqaqtillugu.
Jiisusiup Tuksiarvigjuamuarninga
Maatiusi 21:12-17; Luukasi 19:45-48; Juanasi 2:13-22
15Jiruusalimmulli tikinnamik, Jiisusi tuksiarvigjuamuaqpuq tavvanilu niuviqtut niurrutiqaqtullu aniuraqtippait, kiinaujaniglu tauqsiijut saangit urrutillugit tuuvinik niurrutilit iksivautangit urrutikkivait. 16Sunatuinnamik agjaqsiqujinngilaq tuksiarvigjuakkut. 17Inuit ajuriqtuqpait uqautillugit, “Guutiup uqausinginni titiraqsimangmat, ‘Igluqutiga taijaujariaqaqpuq tuksiariaqturvingmik inuuqatigiigjuanut tamainnut.’ Ilissili tigliktinut inigijautiliqpasi!”
18Tunirrusiqtitsijit angajuqqaangit piqujaniglu ilisaijit tamatuminga tusaramik pijjutiksaqsiuliqput tuqutsijumallutik; kisianili kappiagivaat, inugasagjuat ajuriqtuutigijanginnik kamaniaqattarmata.
19Unnulirmalli tavvanngat iglugasangnit aullaqput.
Napaaqtumik Pigilingnik Paurngalingmik Ilinniarutiqarniq
Maatiusi 21:20-22
20Qautillugu ullaakkut saniqquliramijjuk napaaqtuq pigilingnik paurngaliksaq takuvaat, panimmariliqtuq aglaat amaaminut. 21Piitturuusi iqqaumagami qanuililaurmangaat Jiisusi taassumunga napaaqtumut, uqautivaa, “Raapai, takugit! Napaaqtuq pigilingnik paurngaliksaq pirurviuniarunniirniralauqtait panirniqpuq.”
22Jiisusiup kiuvait, “Guutimut ukpirissi. 23Sulijumik uqautivassi, nalliat qaqqamut uumunga uqaqpat, tavvanngat qangattarit tariurmullu kataglutik, uummatimigut qulangilluni, ukpirlunilu uqausirijami taimainniarninganik, tavva taimailirniaqpuq. 24Taimaimmat uqautivassi, tuksiarussi sunatuinnarmik pijumajaqarlusi, ukpirissi pijumajasi pigassiuk, tavva tunisiviuniaqpusi. 25Nangirlusili tuksiarussi, isumagijunnairviqarissi inuuqatissi akauksanngigjutiksaqarussi; Ataatassinnuttauq qilangmiittumut isumagijunnairviuqullusi ajuqtulinissinnit. [ 26Inuuqatissinnik isumagijunnairviqanianngikkussi Ataatasittauq qilangmiittuup isumagijunnairviginianginnivaasi ajuqtulinisinit.]”#11:26 Ijjujutuqait ilanginni pitaqangilluni ilanginni ilijausimalluni. Takulugu Maatiusi 6:15
Jiisusiup Pijunnaqtitauninganut Apiqquti
Maatiusi 21:23-27; Luukasi 20:1-8
27Jiruusalimmut utikkannirivut. Tuksiarvigjuakkut pisuliqtillugu, tunirrusiqtitsijit angajuqqaangit piqujaniglu ilisaijit, angajuqqaallu upakpaat. 28Apirillugu, “Nakit pijunnarniqaqtitaullutit tamakkuninga pinasuarunnaqpit? Kialu tamatuminga pijunnarnirmik tunisivigisimavaatit?”
29Jiisusiup uqautivait, “Apirijumagivunga ilissinnik apiqsuutigijannik; kiujunnarussinnga, tavva nakit pijunnarniqaqtitaullunga tamakkuninga pinasuaqattarmangaarma uqautiniaqpassi. 30Uqautilauqsinnga, Juanasiup paaptijjutinga Guutimit piva, uvvalu inungnit?”
31Taakkuali immingnut uqaqatigiiliqput, “Uqarutta, ‘Guutimit pivuq,’ tavva uqautiniaqpaatigut, ‘Sungmalli Juanasi ukpirilaunngippisiuk?’ 32Uqaruttali, ‘Inungnit pinirarlugu—’” inungnik sivuuravut, inulimaat Juanasimik nalauttaijullariusuriksimata. 33Taimaimmat Jiisusi kiuvaat, “Nakit pingmangaat qaujimanngilavut.”
Tavva Jiisusiup uqautivait, “Uvangattauq uqautiniannginnivassi, nakit pijunnarniqaqtitaullunga pinasuaqattarmangaarma.”
Tällä hetkellä valittuna:
Maakusiup Aglangit 11: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.