Maakusiup Aglangit 4
4
Ajjiujuq Kanngaqsuijuq
Maatiusi 13:1-9; Luukasi 8:4-8
1Kinguningagut Galiliap tasirjuangata saniani ajuriqtuilirivuq. Inugiakturjuat avataani unuluarninginnut umiamuaqpuq, tavvani iksivaliqpuq umiami imaaniittumi, inugiakturjuallu tasiup sinaaniipput. 2Ajjiujuni aturluni amisunik ajuriqtuqpait; imaak uqarvigillugit:
3“Naalagissi! Angutitaqalauqpuq kanngaqsuijaqtuqtumik piruqsiaksanik. 4Kanngaqsuitillugu, ilangit piruqsiaksait aqqummut katakput, tingmiat tamaunngaramik pukuliqpait. 5Ilangilli katakput ujaralaanut ijjukittumut,#4:5 Ijjuq- sirmiq ijjukittumiinamik piruqsiaksait pirukauqtuqput. 6Siqiniq nuingmat pirulisaaqtut uutauvut siqinirmut; piruqtut amaakiluaramik#4:6 Airakiluaramik akuniunngittuq paniqput. 7Ilangilli piruqsiaksait katakput uqpiit kakillarnaqtulit akurngannut, kakillarnaqtut piruramik piruqtut ipitippait, pirurviujunniiqtlutik. 8Ilangit piruqsiaksait katakput ijjuqatsiaqtumut, taakkua pirupalialiramik, ilangit pirurviullutik 30-nik, ilangillu 60-nik, ilangillu 100-nik.”
9Uqarivuq, “Tusaajunik siutilit tusarlit.”
Ajjiujut Taakkua Uqausirijaujjutingit
Maatiusi 13:10-17; Luukasi 8:9-10
10Inutuulirmat, ilangit uqallaktillugu tusaaqqaujut Jiisusimuaqput ilinniaqtingit 12 ilagillugit, apirillutik ajjiujumik taassuminga tukisinaqsititsiqullugu. 11Kiuvait, “Ilissi nalunaqtumik qaujititauvusi Guutiup Ataniuvinganik, asisili Guutiup Ataniuvingata silataaniittut tusaqtitauvut ajjiujutigut; 12taima,
‘Ijimingnut takugaluarlutik, ilitaqsiqunagit,
Siutimingnullu tusaagaluarlutik, tukisiqunagit;
Taimainngikkutik Guutimut saagiarajarmata,
Taassuma isumagijunnairvigigajarmagit ajurninginnit.’”
Jiisusiup Tukisinaqsititsininga Kanngaqsuijuup Ajjiutitauninganik
Maatiusi 13:18-23; Luukasi 8:11-15
13Jiisusiup uqautivait, “Tamatuminga ajjiujumik tukisinngilasi? Qanurli tavva ajjiujunik naliannituinnaq tukisijunnarniaqpisi? 14Kanngaqsuiji kanngaqsuivuq Guutiup uqausinginnik. 15Inuit ilangit piruqsiaksatitut aqqutimut kanngaqsuutigijaujutitut taimaipput, uqausirnik tusarmata, Saataanasiup tavva upattautigivait uqausit taakkununga kanngaqsuutigijaujut piijaqpait. 16Ilangit inuit piruqsiaksatitut ujaralaanut nunakittumut kanngaqsuutigijaujutitut taimaipput, uqausirnik tusaramik, tavvainnaq ilaliurivut quviasuglutik; 17uqausit amaaqtaannginnamik, kajusiniqaqput sivikittumik; uqumaittut akiraqtuqtauniillu pigialirmata uqausit pijjutigillugit, tavvainnaq sapilikautigivut.#4:17 Sapirriatsautigivut 18Ilangit inuit piruqsiaksatitut uqpingnut kakillarnaqtulingnut kanngaqsuutigijaujutitut taimaipput; taakkuanguvut uqausirnik tusaqtut, 19Inuusiup tamatuma isumajaarnarninganut, ajuqsanngittumanirmullu, asinginnullu pijumavigjuarnirnut tikivviuliramik uqausit ipititauvut tamakkununga, pirurviujunnaqsinatik. 20Ilangilli inuit piruqsiaksatitut ijjuqatsiaqtumut kanngaqsuutigijaujutitut taimaipput; taakkuanguvut uqausirnik tusaramik ilaliurijut pirurviulirlutik, ilangit 30-nik, ilangillu 60-nik, ilangillu 100-nik.”
Naniruaq Qattaujaup Ataaniittuq
Luukasi 8:16-18
21Jiisusiup uqautivait, “Naniruarmik itiqsijuqasuunguvaa ilillugu qattaujaup ataanut, uvvalu sinigviup ataanut naniruap ininganuaqtaugajanngilaq? 22Ijiqtausimajuq saqqititaujumaaqpuq ijirviqanngittumut; anngiarijaujuq saqqititaujumaaqpuq qaumajumut. 23Tusaajunik siutilik, tusarli.”
24Uqautivait, “Tusaqtassinnik ikpigusutsiarissi; asissinnut iqqaqtuinisi maliglugu Guutimut iqqaqtuqtaujumaarivusi, aglaat qaujisaqtaummaringniqsaulusi. 25Piqaqtuq tunisiviukkannirniaqpuq; piqanngitturli aqsaaqtauniaqpuq mikijumigluunniit piqaraluaqpat.”
Ajjiujuq Piruqsiaksaup Piruqpallianinga
26Uqarivuq, “Guutiup Ataniuvinga imaittuujaaqpuq angut piruqsiaksait kanngaqsuutiksanganik kanngaqsuijuq piruqsiiviqutimini. 27Unnuangulirmat siniliqpuq makillunilu ullaakkut, piruqsiaksait kanngaqsuutigisimajangit nuiliqput pirulirlutik, taanna qaujimanngilaq qanuq pingmangaata. 28Nunarjuap tamatuma nangminiq niritimmagit piruqtillunigillu, piruqtut pirurviuliqput, sivullirmik pirusigamik nuiliqput, kinguningagut niaquqtaasivut, kingulliqpaamik niaqungit piruqsiaksaqaliqput. 29Piruqtut piruriitsiarmata, angutiup nakatiliqpait nakatirijjutiminut, piruqtunik katiqsuivik nalliutingmat.”
Ajjiujuq Piruqsiap Kanngaqsuutiksaqtanga
Maatiusi 13:31-32,34; Luukasi 13:18-19
30Uqarivuq, “Qanurli Guutiup Ataniuvinga ajjiqarnirarunnaqpavut sunamiglu ajjiujumik aturunnaqpita? 31Imaittuujaqpuq; angut piruqsiaksaup kanngaqsuutiksaqtanganik masitartimik tigusigami nunamut kanngaqsuutigivaa, taanna nunarjuarmi piruqsiaksanit mikinniqpauvuq; 32kinguningagut taanna kanngaqsuutaugami piruqpalliasivuq piruqtulimaanit anginiqpaulirluni, avalangajungit angiglirmata, tingmiat tavvani ulluqarunnaliqput tarraliningani.”
33Inungnik ajuriqtuivuq ajjiujunik aturluni, ajjiujut taakkua asinginnik amisunik ajuriqtuijjutiqarivuq, uqallagvigivait tukisijunnaqtanngitigut. 34Ajjiujut asiagut uqallagviginngilait, ilinniaqtini ilatuariliraangamigit, uqausiriqqaujaminik ajjiujunik tamainnik nalunaiqsivigiqattaqpait.
Jiisusiup Ikullaqtitsininga Anurimik
Maatiusi 8:23-27; Luukasi 8:22-25
35Ullumi tavvani unnungmat, ilinniaqtini uqautivait, “Tasiup akianualauqta.” 36Inugiakturjuat qimaglugit, ilinniaqtingit umiamuaqput Jiisusiup iksivavigijanganut. Umianguqatingittauq malikkivut. 37Anurirjuarmut tikitauvut, malliliqtualuungmat umiaq qalliraqtaqtaulirmat, immakpallialirluni. 38Jiisusi umiap aquani sinikpuq, akisiqsimalluni; ilinniaqtingita tupaarlugu uqautivaat, “Ajuriqtuiji qanuiksanngilatit tuqutuinnaraluarutta?”
39Tupagami anuri iniqtiqpaa, imarmut uqaqpuq, “Ikullarlutit nuqqarit!” Anuri ikullaqpuq, imaq ikulliammarilirluni. 40Ilinniaqtini uqautivait, “Sungmat kappiasukpisi? Suli ukpirniqanngilasi?”
41Taakkua kamavut angijumik, immingnut uqaqattautillutik, “Qanuittuugamiuna, anuriup imaullu naalagunnaqtanga!”
Tällä hetkellä valittuna:
Maakusiup Aglangit 4: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.