Maakusiup Aglangit 7
7
Jiisusiup Ajuriqtuininga Inuit Sivulivininginnik
Maatiusi 15:1-9
1Tavva Paarisit kativvigimajjuk piqujaniglu ilisaijit ilangit Jiruusalimminngaaqsimajut. 2Takugamik ilinniaqtingita ilangit niringmata aggangmingnik uasaqsimanatik.
3Paarisit, Juutilimaallu, nirivanngimmata aggangmingnik uasalauratik kisiani uasalaurlutik sivuliviningita ajuriqtuusinginnik maliglutik; 4niuvirvingniittuviniugutiglu immingnik uasalaunngillutik nirisituinnaqpanngimmata; asinginnik amisunik piusiqarivut sivulirmingnit ajuriqtuqtaujjutigisimajamingnik, uasaqsijariaqarlutik tiituutinik, niqiliurutinik, savirajangniglu puugutaujingajunik.
5Taimaimmat Paarisit piqujaniglu ilisaijit apirivaat, “Sungmanukua ilinniaqtitit malinngilat sivulitta piusinginnik, aggangmingnik salummaisimanatik niringmata?”
6Jiisusiup kiuvait, “Aisaiasi nalauttailluni uqausiqalauqpuq takkurmuuqtunik ilissinnik, titiraqsimangmat,
‘Ukua inuit qanirmingnut niqtuqpaanga,
Uummatingitali ungasigivaanga;
7Sulinatik tuksiarvigivaanga,
Ajuriqtuijjutiqaramik inuit aqqiktavininginnik ukpirnirmut tunngaviuniraqtamingnik.’
8“Guutiup piqujangit qimakpasi, inuit iliqqusituinnangit naalangaarlugit.”
9Uqautikkanniqpait, “Silatuaqisimajumik malinngijjutiksaqaqpakpusi Guutiup piqujanginnik, nangminiq piusisi naalaktautingaarumallugit. 10Muusisi uqalaurmat, ‘Ataatait anaanaillu upigitsiakkik, nalliallu ataataminik anaanaminiglu uqarnirluutilik taanna tuqutaujuksauvuq.’ 11Ilissili uqaqpusi, ‘Inuk sunatuinnarmik ataataminut anaanaminullu ikajurutigijunnaqtaminik pitaqarluni, uqaqpat, kuuqpan’ (imaak tukiqaqtuq, unali Guutimut tunijaksaq), 12taanna tavva ataataminut anaanaminullu ikajurunniiqtiqattaqpasi. 13Tavva taimailiurlusi piusisi malingaarlugit Guutiup uqausinginnik aturunniiqtitsivakpusi. Ammattauq asinginnik amisunik taimailiuqpakpusi.”
Inungmik Salumajunniiqtitsijut
Maatiusi 15:10-20
14Tavva Jiisusi inugiakturjuanik qaiqujikkanniqpuq, uqautillugit, “Tamassi naalaksinnga, tukisilusilu: 15inuup silataanit pijuq inuup iluanik salumajunniiqtitsijunnanngilaq; inuulli iluanit anijut tamakkua inungmik piujunniiqtitsivut. [ 16Tusaajunik siutilik atii tusarli.]”#7:16 Ijjujutuqait ilanginni pitaqangilluni ilanginni ilijausimalluni. Takulugu Maakusi 4:23
17Jiisusi iglumut itirmat, inuit qimaglugit, ilinniaqtingita apiqsuqpaat ajjiujut tukinginnik tukisinaqsititsiqullugu. 18Uqautivait, “Ilissittauq tukisijunnanngilasi? Inuup silataanit pijuq inuup iluanik piujunniiqtitsijunnanngilaq, 19upinnarani inuup isumanganuannginnami, aqiarunganuaqpulli, anilirillutik piusirmitut.” Tamatuminga Jiisusi nalunaiqsivuq niqit nirijauttailijariaqannginninginnik.
20Uqarivuq, “Inuulli iluaninngaaqtut kisimi inungmik piujunniititsivaktutuvuq. 21Inuup iluaninngaaqtut, inuup uummatinganit, piunngittut anivakput, nuliarumanit, tigligumanit, tuqutsijumanit, asinniarnit, 22pijumavigjuarnit, piunngittulinit, sagluqitsijumanit, kanngunaqtuliqatiqarnit, mingnigujjinit, Guutimik mitautiqarnit, piujurinit, silaittuunit, 23tamakkua tamajja tamarmik piunngittut inuup iluanit anijut inungmik piujunniiqtitsivaktutuuvut.”
Arnaup Sairupinisiamiutaup Ukpirninga
Maatiusi 15:21-28
24Tavvanngat aullarami iglugasait Tairiup Saituniullu qanigijaanuaqpuq. Iglumut itirami, qaujimajaujumanngilaq tavvaniinnirminik; kisianili ijiqsimajunnalaunngilaq. 25Arnaq paniqaqtuq anirnirlungmik ilummiqtausimajumik, tusarami, itiqpuq itiganginnut paammagluni. 26Arnaq Guriikiuvuq, Sairupiniisiamit pisimajuq Siriamiittumi. Arnaq qinuliqpuq anirnirluk paningminit anititauqullugu. 27Jiisusiup uqautivaa, “Sivullirmik qiturngait nirititauqqaariaqaqput, naammanngimmat qiturngait niriniaqtanginnik aqsaarlugit qimminullu igillugit.”
28Arnaup kiuvaa, “Ataniq sulivutit; kisianili qimmit saap ataanit katagarnikunik nirivakput, qiturngait katagaqtanginnik.”
29Arnaq uqautivaa, “Tamanna kiggusirijait pillugu iglungnut angirralirit; anirnirluk paningnit anisimalirmat.”
30Arnaq angirraqpuq, panini takuvaa iglirmi nalajuq, anirnirluk taassumangat anisimaliqtuq.
Jiisusiup Tusaanngittumik Tusaaliqtitsininga
31Tavva nunaup Tairiup qanigijanganit aullaqpuq, Saituni aqqusaarlugu tasirjuamuaqput Galiliap miksaaniittumut, nunalit Tikapuliisit qulinik iglugasagjualingnik taijaujut nunanganut. 32Aatsiviuvuq tusaanani uqarunnanngittumik; Jiisusi qinuvigivaat patimmisiqullugu taassuminga. 33Inugasagjuanit qimaruutitillugu inutuuqatigiliqpaa, aggani siutinganuaqpait, aggangminut tivualaurluni, uqanga aktuqpaa; 34qilangmut aarluqpuq, aniqsaumilluni, angummut uqaqpuq, “Ipapata,” imaak tukilik, “Angmarit.”
35Siutingik tavvainnaq tusaajunnaliqpuuk, uqangata uqarunnanngijjutinga piiqpuq, uqarunnasialirluni. 36Jiisusiup inuit iniqtiqpait kinatuinnamut uqausiqaqunagit; iniqtiraluarmagit katsungaillutik uqausiqalikkannituinnaqput. 37Tamatuminga tusaqtut kamammarikput uqarunnaqtangita ungataanut, uqarlutik, “Qanualunginna sunatuinnarnik ajunngilaq; aglaat tusaanngittut tusaliqtippait uqarunnanngittullu uqarunnaqsitittlugit.”
Tällä hetkellä valittuna:
Maakusiup Aglangit 7: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.