Joh. 2
2
Putalimogat ka laggai Kana
1Ka gogoi sikatelunia, ai punen putalimogat ka laggai Kana, tobbou Galilea, ai leu sedda inan Jesus. 2Jesus leu samba sipasiuluinia arasogai ka punen putalimogat. 3Kele aisappuru anggur ka sia, kuanangan inan Jesus ka matat Jesus, “Taan anai anggur ka sia.”
4Kuanangan ka matania Jesus, “Aponia kiddietnu kugalai, ina? Tapei aiaili tetereku.”
5Kuanangan inania ka matada sapagugulet, “Apa apa ikua ka matamui reddet kam.”
6Sedda ai enem tappaiat kudduat oinan pasibuiat siripot aratda tai Jahudi. Senen tappaiat mememen rua ele telu ngalalaisu. 7Kuanangan Jesus ka matada sapagugulet, “Kau kam oinan nene ka bagat tappaiat.” Kaurangan nia pat tim. 8Lepa kuanangan ka matada Jesus, “Seilu kam, kau kam ka siuteake punen.” Kaurangan leu nia. 9Kele ainanam siuteake punen oinan sibailiu anggur – ta poi iagai kabaraiatnia, sarat sia sapagugulet sipaneneilu le siagai nia – sogainangan siputatalimou, 10kuanangan ka matania, “Simareirei, anggur simaeru le boiki raake sirimanua, teret aipuinengan sia geti, ia pei raake anggur simagulai nanam. Tapoi anukoiri le anggur simaeru teret kise.”
11Ia te kerek Jesus siboiki, sigalainia ka Kana, tobbou Galilea, masipatoila pulatsanannia. Matonemnangan bagada ka tubunia sipasiuluinia.
12 #
Mat. 4:13
Pasat nene, ei Jesus, inania, sasarainania samba sipasiuluinia ka Kapernaum, pukuddurangan sedda piga ngagogoi pa.
Ipalina Uman Taikamanua Jesus
(Mat. 21:12-13; Mrk. 11:15-17; Luk. 19:45-46)
13 #
2Mos. 12:1-27
Kele aimalegere Punen Paska ka tai Jahudi, panataranangan Jesus ka Jerusalem. 14Ailinangan sia ka Uman Taikamanua, airasasakiake jaui, biribiri samba ngorut; samba sipasisili bulagat ai sia muuddet sedda. 15Galainangan tali lilippat, usiakenangan sangamberi tarimeu ka Uman Taikamanua, biribiri samba jaui; pakaritnangan bulagatda sipasisili bulagat, luggaakenangan mejada. 16Kuanangan ka matada sipasisasakiake ngorut, “Ambit kam sangamberinia nene, ba babailiuake kam Uman Ukkuiku lalep pasakiat.” 17#Psalm. 69:10 Repdeprangan leu sitususurat ka Surat Sipunenan sipasiuluinia, “Tuturut ka umam le aikom aku.”
18Alegirangan nia tai Jahudi kuarangan ka matania, “Aponia katuaggaiat nupatoila ka matamai kababarat gegem masigalai kele nene?”
19 #
Mat. 26:61, 27:40; Mrk. 14:58, 15:29 Aleginangan nia Jesus, “Ragatnan kam Uman Taikamanua, ai leu kurioake nia minca ka bagat telu ngagogoi.”
20Kuarangan tai Jahudi ka matania, “Epat pulu enem ngarura ujunia aragalai Uman Taikamanua nene, momoi nugalai nia kekeu ka bagat telu ngagogoi?”
21Tapoi tubunia le sikuania Uman Taikamanua. 22Teret aitusurungan le Jesus ka simamatei, ia pei repdeprangan nia sipasiuluinia, aitiboian nene ka matada. Matonemnangan bagada ka Surat Sipunenan samba ka tiboiet siniboi Jesus.
Iagai Jesus sangamberi sirimanua
23Ka teteret ai Jesus ka Jerusalem ka Punen Paska, maigi simatonem baga ka oninia kalulut araitco poi kerek sigalainia. 24Jesus geti ta ikatonemi sia, iagai poi sia sangamberida. 25Ta besiakenen ramunengake sirimanua ka matania pagalaiat sirimanua, iagai le poi apa sibabara ka paatuatda sirimanua.
Tällä hetkellä valittuna:
Joh. 2: MWV
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
