मत्ती 2
2
यीशु जोई मीण जे ज्योतिष एण
1हेरोदेस राजा राज करणे टेम यहूदिया राज्ये बैतलहम ग्रां अन्तर जपल यीशु जमा त पूर्व देशे कोई ज्योतिषि यरुशलेम शेहर ए। 2से बोलुण लगे, “यहूदी मेह्णु के राजा जे जमो असा से कोठि असा? किस कि अस पूर्व दिशा अन्तर थिए। तठि असी तसे तारा काआ त अस तेसे खुर बिनुण जे ओ असे।” 3ईं शुण कइ राजा हेरोदेस परेशान भोई गा त तसे जोई सम्हाई यरुशलेम शेहरे मेह्णु बि परेशान भोई गे। 4त तेन सोब मुख्य पुजारे त धर्मशास्त्री भिए त तेन्हि केआं पुछु, “मसीहे जनम कोठि भुओ लौता?” 5तेन्हि तेस जे बोलु, “यहूदिया राज्ये बैतलहम ग्रां अन्तर। किस कि भविष्य वक्ते अपु अपु कताबी अन्तर ई लिखो असु कि
6‘ए बैतलहम, तु जे यहूदिया राज्य अन्तर असा।
तु केसे कनारा बि यहूदिये बोडे बोडे शेहर केआं मठुड़ नेईं,
किस कि तोउ अन्तरा यक बोडा राजा निस्ता,
जे में इस्राएले पूरे प्रजाई रखवाली कता।’”#मीका 5:2
7तोउं हेरोदेसे मठे ज्योतिषि भिए त तेन्हि केआं पुछु कि तारा सुसुर केस टेम काओ थिआ। 8फिर तेन्हि जे बोलु, “बैतलहम ग्रां घिए त तेस कोईया बारे पता करे। जपल से मेई घियाल त मोउं जे बोले। तोउं अउं बि तसे खुर बिनुण जे घेन्ता।” 9से राजे बोक शुण कइ घेई गे। तोउं जे तारा तेन्हि पेहले काओ थिआ, से तेन्के अगर अगर हंटा, त जेठि से कुआ थिआ, तसे पुठे रुक गा। 10जपल तेन्हि से काआ त सुआ खुश भोई गे। 11त तेस गी पूज कइ तेन्हि से कुआ अपु ईये कल्हाई काआ त उटेऊ तसे खुरी पुठ बिश गे। तोउं अपु अपु झोड़ा खोल कइ तोफा, सुन्ना, मुश्कदार तेल त खुशबुदार गुगुल तसे अगर भेट चढ़ि। 12पता तेन्हि सुपने अन्तर चेतावनी मेई कि राजा हेरोदेस केईं वापस ना घेण। त से होरे बते बइ अपु राज्य जे घेई गे।
मिस्र देश जे नश घेण
13तेन्हि घेण केआं पता, परमेश्वरे दूते सुपने यूसुफ जे बोलु, “खड़ भो! एस कुआ त एसे ईया घिन कइ मिस्र देश जे नश गा, त जपल तकर अउं न बोलुण तपल तकर तठि बिश, किस कि हेरोदेस राजा अस कुआ मारण जे तोपुण लगो असा।” 14त से राति खड़ी कइ कुआ त तसे ईया घिन कइ मिस्र देश जे घेई गा। 15त हेरोदेसे मरण तकर से तठि बिशा, जेसे बेलि परमेश्वर जे बोक अपु भविष्य वक्ते होशै बेलि पेहलाई बोलो थिउ, से पूरी भुई। तेन बोलो थिउ कि
“मेईं अपु कुआ मिस्र देश केआं भिआ।”#होशै 11:1
16तोउं जपल हेरोदेस राजा ई पता लगा कि ज्योतिषि तेस जोई धोखा किआ त तेस सुआ लेहेर एई गई। त तेन मेह्णु लंघाई कइ बैतलहम त तसे औत-कोत बइ जेठि जेठि ज्योतिषि के बोलो टेम पुठ गभुरु जमो थिए त जे दुई साले या तढ़िया मठुड़ थिए, सोब मरवाई छड़े। 17तपल जे भविष्य वाणि यिर्मयाह भविष्य वक्ते पेहलाई किओ थी, से पूरी भुई। 18तेन बोलो थिउ
“रामाह शेहर अन्तर यक लियार निसो असी, रोलणे।
राहेल#2:18 “राहेल” जेस इस्राएली मेह्णु अपु “ई” मानते। अपु गभुर जे रोलुण लगो असी।
से चुप भुण लगोरी नेईं,
किस कि तसे गभुर मर गो असे।”#यिर्मयाह 31:15
मिस्र देश केआं वापस एण
19हेरोदेस राजा मरण केआं पता, मिस्र देश अन्तर परमेश्वरे दूते यूसुफे सुपने अन्तर बोलु, 20“खड़ भो! कुआ त तसे ईया घिन कइ इस्राएल देश जे गा, किस कि जे कुआ मारण चहन्तेथ, से मर गे।” 21तोउं से खड़ भुआ, कुआ त तसे ईया घिन कइ इस्राएल देश वापिस एई गा। 22पर यूसुफ ईं शुण कइ कि हेरोदेसे कुआ, अरखिलुस अपु बोउए जगाई यहूदिया राज्य पुठ राज करुण लगो असा, तठि घेण केआं डरा। पर सुपने परमेश्वर तेस जे गलील राज्य जे घेण जे बोलु त से ता जे घेई गा। 23त नासरत ग्रां घेई कइ बसा, ताकि से बोक पूरी भोल जे भविष्य वक्ते बोलो थी। तेन बोलो थिउ “मेह्णु तस जे ‘नासरी’ बोते।”#मरकुस 1:24; लूका 2:39; यूहन्ना 1:45
Tällä hetkellä valittuna:
मत्ती 2: pgg
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023 (Active) Wycliffe Bible Translators, Inc. All rights reserved.