Zouao 1
1
Zesopa Deo Attiraha madirra torrarrari
1Zesopa arrirraro nami nauato-rreraccazama nazama madiporrari. Pouapa Deo Atti. Pouapa nazama Deoza madiporrari. Poua naco Deo. 2Nami nauato-rreraccazama Zesopa Deoza madirizaporrari. 3Nazama arri bazima torrarizarrarope Zesona inanarizarraro. Rridacca Zeso nouerazapa arra namicca uapima torrariza-rraranarra. 4Nazama Zeso pouapa camittehe rrinede. Narraricca camittehena madirraza ssiuarrani torrarizarraro. 5Narraro ssiuarranina ziziniuarri rrororo caneza tossiuarrabaqquirraro. Nazama zizinipe Zeso ssiuerrene inaziziniuarrinepe ssamo tani.
6-7Maqquiderre onipa Zouao. Pouaza: Batista, quequenanarrari. (Ettizape: Passo dopaniza niniquide, inarraro.) Pouana Deo icazosseza: —Zesona ssiuarrani rrinede −narizauiuarrine. Nama narizaza ssiuarrani rrinede Zesoza parrissa quenauiuarrine. 8Zouaopa ssiuarrani rrinede rraraui. Pouapa ssiuarrani rrinedecca uima cacomerade madirrari. 9Ssiuarrani parrissehepe arri namiuarri bacco naronarraro. Narraro ssiuarranina madirra bazimaza torrarizarraro.
10Ssiuarrani rrinedea arra namiza ccaronaza madirrariparra. Arra bazima carririzarraripa pouana inauatorizarrari. Naraha madirrapa pouaza noccodeni rrizaqquiri narrari. 11Pocca madirraza bacco naraha pouaza nacasseraqquiri narrari. 12Naraha madirra Zesoza parrissa naza: —Zeso ouaza torrana −nazapa narrarizana Deo uati uati tarrari: —Occa erredeni tirrarraro bica tani −nanarra narrari. 13Madirra Deocca erredeni toquerrenauiuarrinecca uimape pina madirra tossonarraricca uimassa nerrerani. Pina maqquiderre amonerre touini naza inarriueza erredeni tossonezaticca uimassa nerrerani. Naraha Deorrine pocca erredeni toquerrenarraripa Deo Pouarrinena bodideni zati totorra narraro.
14Deo Attiraha assire torrazapa Zeso iaza madirrariparra. Pocca nauatonirripe bicabote deni torrani qqui inade. Nazama pocca nauatouepe orrariana nauato tarrari. Abi Deo Bedina orrariui. Pouapa uati uana taza ia todinibaqquirrari. Pouapa parrissehe rrinede. 15Nazama arra Zouaopa Zeso tauimari ecomerarizarrarope: —Narrari tauimaria uati onaporrarode: Oua mari mari onaporaha arra zotode mari mari narrarina deni torrarrari. Pouapa nazama madiporrari, ohonanapode −nade Zouao Batista atti.
16Nazama pocca biquehepe pouarrine iaza uapi tehe torrerre zanaponi narraro. 17Nazama maittaccazama Moizepa Deocca zossenirri mari mari naporrari. Narraro pocca marinarra uarirronania arri iaza bacco narraroparri. Nazama rridapanapa Zeso Cristona Deocca touati uanehe, pocca parrissehe iaza auato inanarraroparri. 18Nazama madirra iape Deo qqui inarra canima-rraraui. Poua Bedi ohorrariderrinena Abi Deoza nauatoqquiri inarraro. Pouapa Deo bacco ccarra narrari.
Zouao Batista Zeso tauimari ecomeraporraro
19Nazapa oza panani Zerozarecca zodeodenicca taminedeni attipa: —Zouaopa arra toui imadirraro ia Idinide Cristo-Mesiaco? −quenaza Deoza dada toqquimade, pouadeni birri accode rebitadeni tezerre ua inabaqquimanarrari. Nazapa pouadeniza: —Zouao madiuiuarri rraui tirrarri, pouaza uati tiqueneza: “Tiape nerrecorrari tirrani?” tiquenana −quenaza zosse inabaqquimanarrari. 20Nazapa rraui torra, bacco toquenazapa poccadeni tamine attideni Zouaoza uati iqquimemanarraro. Naraha Zouao poua cacoma-rrararrari. Amazati poua cacomerade: —Ouape Cristo orrarrerani −nade.
21Naraha pouaza uati toquenapomade: —Nezape nerrecorrari tirrani? Maittaccazamacca Deo Atti cacomerabote Eria tirraqui? −quenade. Naraha Zouaopa: —Ouape Eria orrarrerani −nade.
Nazapa: —Moizecca dozonirriza arra Deo Atti cacomerabote zotode ccarronauitoui quequenanarrari tirraqui? −quenade. Naraha Zouaopa: —Ouape narrari orrarrerani −nade.
22Naraha denima Zouaoza uati toquenapomade: —Nezape nerrecorrari tirrani? −quenapomade. —Rrari, iaza ticca uima tecomerarri. Tetti imittezape ia zosse narronadedeniza uati inaniniuarrine −quenade Zouaoza.
23Naraha Zouaopa poua cacomerade: —Ouape zama uamoni ssono carri, siba carri taniuarri ouatti moui teza madirra uaua uaua ohonarronabaqqui narrari. “Ia Zozossede tezerrema rraui tirrinedeni tobicaporri! Narraroa arri tibodideni pouatoui tinarroremanarri” ohonanarraro. Narraro uimape maittaccazama Deo Atti cacomerabote Izaia uati taporrari −nade Zouao atti.
24Arra Zouaoza uati toquenarrarideni zosse narronadedenipa Izarraeo potemaui zodeodeni mota marinarra onini parizeoza rrehe quenarrari. Nazapa poccadeni zozosse tabaqqui Zouaoza uati toquenapomarrari. 25Pouadeni attipa: —Tettipe: “Cristo orrarrerani. Eria orrarrerani. Deo Atti cacomeraqquiri narrarideni orraria orrarrerani” tezape nerrecotoui passo dopaniza madirra niqui niqui titizanabaqqui narraritta? −quenade.
26Naraha Zouao poua cacomerade: —Ouape passo dopanizara niqui niqui ohozanabaqqui narrari. Naraha madirra ouaha tiadeniza madiraha pouaza tinoccodeni rrizaqquiri naccani. 27Narrarina deni torrarrari. Ouape taide mari mari onaporaha pouapa zotode mari mari narronauitoui. Ouape arrimani orrani. Pina pocca zozossessa onaniuarrinepe oparrire-rrerani. Poua amoricca sadaria diccade naqui oparrire-rrerani −nade Zouao atti.
28Arrirraro uimape oza capamema narraro onini Betaniaza qqui inapode. Betaniape ueni Zorodao marri ccarronauiuarri anirraro. Nauiuarri Zouao Batista madirra passo dopaniza niquide torrazana pouaza uatide rrauirronarrari.
Zesopa Deocca danirri pina Eueue bedissa narrari
29Nani Betaniaza imadiccazape narraro uada ssiuarraza Zouao Zeso ccarronaui qqui taza iaza uati tarraride: —Qqui tiquenarro! Arrarraripa Deocca danirri madirra bazimaza! Pouapa Deocca Eueue Bedi bicabote Deoza da da inarrarissa narrari. Niza zoqquezapa pouana madirra bazimacca uimasiri inanamossinitoui −nade. 30—Naza poua tauimaripe tiadeniza uati uati onapode: Ouape taide mari mari onaporaha arra madirra zotode mari mari narronarrarina deni torrarrari. Ouape arrimani orrani. Pouapa nazama taide madiporrari, ohonanade. 31Ouape pouaza ssamo onade. Naraha Izarraeo potemauideni tiadenipe pouaza nauatoqquiri tiquenaniuarrinepe Deo oua cazosseza madirra passo dopaniza niqui niqui onarraroparri −nade Zouao.
32Zouaopa taide Zeso passo dopaniza niqui izanaza Deo Corime Zesoza ccaronaui qqui taza iaza uati tarraride: —Ouape Deo Corime qqui onade. Pina ococossa naha ccaronaza Zesoza uari naui qqui onade. 33Ouape pouaza nauato onapo-rrerade. Naraha passo dopaniza niqui ozanabaqquiuiuarrinepa Deo oua cazosseza ouaza uati taporraride: “Ocorime ccaroneza madirraza uari naui qqui tinauitoui. Narrarina Ocorime madirraza inanarizauitoui” napode Deo ouaza. 34Rrehe, narraripa parrissa oua qqui oneza uati onarraro: Arrarraripa Deo Bedi, onarraro −nade Zouao atti.
Zesocca mamari tabaqqui taidecca
35Uada ssiuarraza Zouao Batista poua uatimade pamaha tezerre domo uapomade. 36Nauizana Zesoza toqqueqquimaui Zouao qqui taza pouadeniza uati tarraride: —Qqui tiquenarro! Arrarraripa Deocca danirri madirra bazimaza! Pouapa Deocca Eueue Bedi Deoza da da inarrarissa naraha icca uimasiri manaconi torrauiuarrine Deo iaza eccorarrari −nade Zouao iaza.
37Nazapa Zouao uatimade pamaha uima mittemanazapa Zesoza touedamissade. 38Zeso natti touedamissaraha Zeso poua natti qqui naninarra pouadeni uedarronaui qqui inabaqquirraride. Nazapa Zeso pouadeniza uati tade: —Nerrecotoui ticadarronarraro? −nade. Naraha: —Ia Maride nerrecouarri timadirraro? −quenade. 39Naraha Zeso: —Rrina, qqui tiquenarri −nade pouadeniza. Nazapa rraui torrarrari. Marri toccazana poua madiuiuarri bacco toquenazapa qqui toquenade. Naui pouaza rrassi tozazapa zomerrarode.
40Rrehe, Zouao uati taui mittemanazapa Zesozana toquerrenarraride. Orrariapa Simao-Pedoro imecote Adere. 41Nazapa Adere Zesocca ozauarri qquenazapa poua imecote Simaotoui toccarraride. Poua imecote Simaouarri bacco tazapa uati tarrari: —Simao, iape arra toui imadirraro Mesia bacco inaui! −narrari. (Zodeo attidenizapa: Mesia, quenaraha zama Cresiacca madirra attidenizapa: Cristo, quenarrari. Madirra ettizapa: Madirra Tonassiuauade torrauiuarrine Deo poua icatterrizaporrari, inarraro.)
42Nazapa Adere poua imecote Zesouarri eccanirrari. Zeso Simao qqui tazapa pouaza uati tade: —Tiape Zouaocca erredeni Simao tirrani. Simao tirreraha rridapanape tia oni onihira ua onana −narrari. Nazapa poua oni ua inazapa: —Sepa −nade. (Zodeo attidenizapa: Sepa, quenaraha zama Cresiacca madirra attidenizapa: Pedoro, quenarrari. Madirra ettizape: Siba, inarraro.)
Natanaeo Piripi tezerre Zeso uatimade toquerrenarrari
43Uada ssiuarrape Zeso: —Zama arobeni onini Carireauarri occana onarraroua −nade. Nauiuarri toccazana Zeso Piripi bacco inaza pouaza uati tarrari: —Rrina, ouaza ticcarizarri, ouatimade tirrezape tia onauattaniuarrine −nade.
44Nazama Piripipa Besaida oza pananicca. Pedoro, Adere naco narraro oza pananicca. 45Piripipa poua tesse Natanaeotoui toccarrari. Bacco inaza pouaza uati tarrari: —Iape Moizecca dozonirriza tauimari ihimitta narrari bacco inaui −narrari. —Deo Atti cacomeraqquiri narrarideni poua tauimari dozo iquenarrari. Poua onipa Zeso, Zozecca erredeni. Pouapa oza panani Nazaretiuarricca −narrari Piripi. 46Naraha Natanaeo attipa: —A Nazaretiuarricca madirrapa bica tarrari carri taco? −narrari. Nazapa Piripi Natanaeoza: —Rrina, niza qqui tinauitoui −nade.
47Nazapa Natanaeo Zesouarri toccazapa Zeso Natanaeo ccarronaui qqui irrizazapa pocca uima naqui pouaza auato tarraro. Nazapa Zeso Natanaeo tauimari uati tade: —Qqui, arra maqquiderre ccarronarraripa parrissa Izarraeo potemaui. Icca ididenicca marinarra ecauanissa tarraro. Pouapa maizera taui −nade Zeso. 48Naraha Natanaeo atti Zesoza: —Nerrecoma neza oua qqui tineza oua nauato tinarraro? −nade. Naraha Zeso Natanaeoza uati tade: —Naza Piripi tiaza uati tarraraccaza aua piquera dopeza teni tia qqui onapa −nade Zeso. 49Naraha Natanaeopa: —Ia Maride, tiape Deo Bedi tirrani! Tiape Izarraeo potemauidenicca tamine tirrani! −nade. 50Naraha manaco Zeso pouaza uati tade: —Piquera dopeza teni tia qqui onapa onarraroza ouaza parrissa tarraroqui? −nade. —Niza, nauatonarra deni torranicca uapi tani qqui tinanitoui −nade Zeso Natanaeoza.
51Nazama Zesopa uima denima uati uati tade iaza: —Parrissehera tiadeniza uati onarraro: Niza meme touabani naqui qqui tiquenanitoui. Arri oua Madirra Bedi orrarraro ouaza Deocca zozosse tabaqqui memeuarricca rrauirona rraui torramacossani, rrauirona rraui torramacossani naui naco qqui tiquenanitoui −nade Zeso.
Tällä hetkellä valittuna:
Zouao 1: KBNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
2020 Impresso na Graafica da Biblia
