Mateo 3
3
Zouao Batistapa zama uamoniuarri madirra mari icanabaqquirrari
Maraco 1.1-8; Roca 3.1-9,15-17; Zouao 1.19-28
1Uarrano toccaui uapi taza madirra oni Zouaopa zama arobeni onini Zodeacca uamoni ssono carri, siba carri taniuarri madirra maride torrarrari. Pouaza: Batista, quequenanarrari. (Ettizape: Passo dopaniza niniquide, inarraro.) 2Mari mari ihicanabaqquiriza nazapa arrama nanariza narrari: —Ticcadeni uimasiri tineborizemanarri! Deotouira tizanapomanarri! Deocca cacauehepe iaza bacco narronabote nani −nanarra narrari Zouao.
3Arri Zouaocca uimape maittaccazama Deo Atti cacomerabote Izaia dozo inaporraro. Poua atti arrama naporrari:
—Niza zama uamoni ssono carri, siba carri taniuarri madirraripa atti moui taza madirra uaua uaua ihinarronabaqqui nauitoui.
Poua attipa: “Ia Zozossede ccarronabote naui! Tinarroremanarri!
Poua tezerrema rraui tirrinedeni tobicaporri!
Narraroa arri tibodideni pouatoui tinarroremanarri”
nanarra nauitoui zama uamoniuarri madirraripa
−napoui nade Deo Atti Izaiarrine dozo naniza.
4Nazama Zouaopa zama uamoniuarri madizapa pocca eterope camero cone ba nani ssequi neza uezarrari. Pocca ssoquepe bani etero. Poua taparipa abissa, zamacca rrizi oquine narrari.
5Madirra bazima Zouao atti mittemanauiuarrine rrauirronana canarraridenipa oza panani Zerozarecca, Zodeacca zamaza madirizemanarrarideni, ueni Zorodaouarri madirizemanarrarideni naco bacco bacco quenarrari. 6Poccadeni uimasiri Deoza ecomeremanezape Zouaopa ueni Zorodaoza madirra passo dopaniza niqui niqui ihizanabaqqui narrari.
7Naraha zotode madirra uapi taha rrauirronaui Zouao qqui tarrari. Pouadenipa Izarraeo potemaui zodeodeni mota marinarra onini parizeoza rrehe quenarrarideni, mota marinarra onini sadoseoza rrehe quenarrarideni passo dopaniza niquide toui quenaza Zouaouarri rrauirronarrari. Naraha Zouaopa pouadeniza uati tarrari: —Tiadenipe pina maccassa tiquenani. Ticcadeni uimape uaidira tarraro! Tiadenipe tibodideni cacarriqquimera-rrereraha: “Zouao ia passo dopaniza niqui tozanabaqquizapa Deocca narrizoueza zori icanirenitoui” tiquenarraroqui? Neraha tibodideni cacarriqquimera-rrerezape zori ticanire-rreranitoui. 8Neraha tettideni arrima tiquenezana bica tani: “Uimasiri onebona. Deotouira obodi uauatoma naniuarrine” tiquenezape tibodideni cacarriqquimeranicca uima auato taniuarrine uima bicanira tinanemanarri, onarraro −narrari Zouao. 9—Neraha tibodideniza arrima tiquenanitide: “Icca idipa Abarahaorra narrari, Deopa ia touattarrobaqqui-rrarauitoui” titiquena neraha tiadeni ticamaizanimanarraro. Deopa madirrassa narraraui. Poua nacassa tazapa arri siba uiuitteri narizarraroza naco Deopa Abarahao potemauissa naha inauatorizauiuarrine parrirerrari. Parri tiadenipe: “Abarahao potemaui iquerrenani” tiqueneraha Deoza iboraqquiri tiquenerrerezape tiadeni touattarro-baqquiuitoui. 10Nezape Deoza iboraqquiri tiquenerrereza, uima bicani tinanemana-rrereza naqui ticcadeni uima pina aua uaidira tarraricca uimassa narraro. Parri, narrari aua cacauarrine baripa narroraui. Aua bono bica tarrarazapa ca tariza taui. Ca tacarizazapa bobottauarri ua ua totozima narrari, dirri tauiuarrine −naui nade Zouao.
11—Ouape passo dopaniza tiadeni niqui ozanabaqquirraro, uimasiri tinebomaneza Deotouira tiquenanicca uima auato taniuarrine. Naraha madirra dacorarrari ccarronabote naui. Ouape taide mari mari onaporaha arra zotodecca mamaride ccarronarrarina deni torrarrari. Narrarina Deo Corime tibodideniza madiuiuarrine tiadeniza inanarizauitoui. Pouapa pouaza toquerrena-rrararraridenipa rrororoni rriquerreraniuarri ua izimabaqquiuiuarrine parrirerrari. Ouape arrimani orrani. Pina pocca zozossessa onaniuarrinepe oparrire-rrerani. Poua amoricca sadaria zorrode naqui oparrire-rrerani −naui nade Zouao.
12—Rrehe, ccarronabote narraripa madirra icatterriza-baqquiuiuarrine. Pina madirra arroi rrizaza tirico uisso tauiuarrine qquero quissa, qquero quissa, qquero quissa inamacossarrari. Naui tirico etero, eppe, ede narraripa rrorrodeza toccauiuarrine. Nazapa noccona ecauarrari pocca ozauarri. Naraha tirico etero, eppe, ede narraripa dirri tauiuarrine bobottauarri ua izimauitoui. Narraria arra Deoza iboraqquiri narrararraridenipa rrororoni rriquerreraniuarri ua izimabaqquiuitoui. Narraro rrororonipe ouiuira tani −naui nade Zouao.
Zeso passo dopaniza niniqui carrirraricca uima
Maraco 1.9-11; Roca 3.21,22
13Nazapa Zeso zama arobeni onini Carireaza madiraha ueni Zorodaouarri qquezipparrari. Zouao madiuiuarri bacco zippazapa Zouaoza: —Oua passo dopaniza niqui tizanarri −narrari Zeso. 14Naraha Zouao attipa: —Ouape arrimani orrani. Tiana oua passo dopaniza niqui tizanani bica tani −narrari.
15Naraha Zesopa: —Peperri, nema nehe oua passo dopaniza niqui tizanarri. Arrirrarope Deo pocca zossenirri nema inaniuarrine −narrari Zeso. Nazapa Zouao rrehe narrari. 16Nazapa Zeso passo dopaniza niqui izanarrari. Zeso passoza totemaza tocattamacossa nanarra meme touaba narraro. Deo Corime auato taha pina ococossa naha ccaronarrari. Ccaronaza Zesoza uarirraro. 17Nazapa memeuarri atti mittaronarrari: —Arrarraripa occa Erredeni. Pouaza ouati uana tarraro. Pocca uima bica tarrarorrine ouatizerraro −narrari Deo.
Tällä hetkellä valittuna:
Mateo 3: KBNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
2020 Impresso na Graafica da Biblia