Génesis 29
29
Jacob la yac' sba ta a'batinel yu'un Labán ta scuenta Raquel soc Lea
1Behen xan bahel te Jacob, c'oht ta slumal te mach'atic ayic ta stojol banti ya xloc' tal c'ahc'al. 2La yil te ay pozo ta aquiltic soc ay oxchahp tuminchijetic tey pacajtic a, yu'un tey ya yuch'ic ha' a. Macal ta muc'ul ton te sti'ile. 3C'alal ya stsob sbahic tey a te jujuchahp tuminchijetic, te jcanan-tuminchijetic ya sloq'uesic te ton macal a, ya ya'beyic yuch' ha' te tuminchijetic, patil ya smaquic xan hilel. 4Te Jacob la sjoc'oy: Quermanotac, ¿ban talemex? xchi.
Talemotcotic ta Harán, xchihic.
5La sjoc'obe xan: ¿Ya bal ana'beyic sba te Labán te snich'an Nacor? xchi.
Yac, ya jna'becotic sba, xchihic.
6¿Lec bal ay? xchi.
Lec ay. Ilawil, yac ta talel Raquel te yantsil-nich'an soc te stuminchij, xchi.
7La yal te Jacob: J'ohlil to nax c'ahc'al, ma to yorahiluc a te ya yich' tsobel te tuminchijetique; a'beyahic yuch'ic ha' te tuminchijetic, ic'ahic bahel ta we'el ta aquiltic, xchi.
8Pero la yalic: Ma xhu', ha to teme ya stsob sbahic spisil te jchahp tuminchijetic soc teme ya yich' loq'uesel te ton ay ta sti'il te pozo, ha to ya ca'becotic yuch' ha' a te tuminchijetic abi, xchihic.
9Yac to ta c'op soc a, c'oht te Raquel soc te tuminchijetic yu'un te stat, yu'un ha jcanan-tuminchij. 10Te Jacob c'alal la yil te Raquel yantsil-nich'an Labán, te sbanquil snan, soc te tuminchijetic yu'un te Labán, nohpoj tal te Jacob, la sloq'ues te ton te macbil sti'il a te pozo, la ya'be yuch' ha' te tuminchijetic yu'un Labán. 11Te Jacob la yuhts'uy te Raquel, tulan hahch ta oq'uel. 12La yalbe te Raquel te ha yichan te stat soc te ha yal te Rebeca. Ha yu'un te Raquel ahnimal baht yalbe ya'iy te state.
13Te Labán c'alal la ya'iybe sc'oblal Jacob te yal te yihts'ine, ahnimal baht sta tal, la smech', la yuhts'uy, soc la yic' bahel ta sna. Hich te Jacob la yalbe ya'iy spisil. 14La yal te Labán: Melel nix a, jbaquelat soc jbaq'uetalat, xchi.
Te Jacob halaj jun u tey a.
15Te Labán la yalbe te Jacob: Te bin ut'il quichanat ¿hich nax bal ya ca'batinat? Halbon ca'iy bin ya jtojat, xchi.
16Te Labán ay cheb yantsil-nich'nab: Lea sbihil te wixil, Raquel sbihil te ihts'inale. 17Te Lea mayuc lec yip te site, yan te Raquel mero t'ujbil ta ilel stuquel. 18Te Jacob la smulan te Raquel, hich la yal: Ya cac' jba ta a'batinel awu'un huqueb ha'bil ta scuenta Raquel te ihts'inal, xchi.
19Hich la sjac' te Labán: Ha lec te ha'at ya ca'bat awic', te ma ha'uc ya ca'be yan winic. Ya me ajoquinon hilel li'i, xchi.
20Ha yu'un te Jacob huqueb ha'bil la yac' sba ta a'batinel ta scuenta Raquel. Cheb oxeb nax c'ahc'al c'oht la ya'iy ta scaj te c'ux ta yo'tan.
21Ay jun c'ahc'al te Jacob hich la yalbe te Labán: A'bonix te quihname, como ts'acayix yorahil te ya quic', xchi.
22Hich te Labán la yic' tal spisil te winiquetic tey ayic a, la spas q'uin. 23C'alal ihc'ub q'uinal, la yic' tal te Lea te yantsil-nich'an, la ya'be te Jacob, hich way soc. 24Te Labán la ya'be jtuhl scriada te Lea, Zilpa sbihil. 25Sacub q'uinal, te Jacob la yil te ha Lea, hich la yalbe te Labán: ¿Bin a te la apasbon? ¿Ma bal ha'uc la jcac' jba ta a'batinel awu'un ta scuenta Raquel? ¿Bin yu'un la alo'loyon? xchi.
26La yal te Labán: Ma hichuc ta pasel li'i te ha nahil ya xnuhpun te ihts'inal yu'un te wixile. 27Ts'acaytesa ha semana ini, hich ya ca'bat te yane, teme yac awac' aba ta a'batinel cu'un huqueb xan ha'bil yu'un, xchi.
28Hich la spas te Jacob, la sts'acaytes te semana yu'un te Lea; hich te Labán la ya'be yic' yihnamin Raquel te yantsil-nich'an. 29Te Labán la ya'be jtuhl scriada te Raquel, Bilha sbihil. 30Ha nix hich way soc te Raquel; c'ax hich c'ux ta yo'tan a te bin ut'il te Lea. La yac' sba ta a'batinel huqueb xan ha'bil yu'un te Labán.
Snich'nab Jacob
31Te Jehová la yil te mayuc stuc ta o'tanil te Lea, hich la yac' alajuc; yan te Raquel ma x'alaj stuquel. 32Hahch yal te Lea, ayin squerem-al, Rubén#29.32 Rubén: ilawilic, jtuhl querem la jta, xchi; soc jteb ma pajaluc ta a'iyel soc: la yilbon te jmel-o'tan, xchi. sbihil, yu'un la yal: Te Jehová la yil te jwocole. Yo'tic, c'ux ya me ya'iyon ta yo'tan te jmamalal, xchi.
33Cha'hahch xan yal, ayin squerem-al, hich la yal: Te bin ut'il Jehová la ya'iy te mayuc jtuc ta o'tanil, la ya'bon xan cal, xchi. La ya'be sbihilin Simeón.#29.33 Simeón: te mach'a ya ya'iy, xchi.
34Hahch yan yal, ayin squerem-al, hich la yal: Tey jun ya xc'ohon soc a te jmamalal, como la jcalataybeyix oxeb snich'nab, xchi. Ha yu'un la ya'be sbihilin Leví.#29.34 Leví: jteb ma pajaluc ta a'iyel soc: jun ya xc'oht soc, xchi.
35Hahch yan yal, ayin squerem-al, hich la yal: Ta ora ini ya calbe yutsilal te Jehová, xchi. Ha yu'un la ya'be sbihilin Judá.#29.35 Judá: jteb ma pajaluc ta a'iyel soc: halbeyel yutsilal, xchi. Quehchaj ta al.
Tällä hetkellä valittuna:
Génesis 29: TZH
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Biblia Tzeltal Bachajon © Sociedad Bíblica de México, A.C., 2006.