Génesis 35
35
Dios la ya'be bendición Jacob ta Bet-el
1Dios hich la yalbe te Jacob: Hahchan, mohan bahel ta Bet-el, nahinan tey a. Pasbeya scajtajib ta chiq'uel smahtan te Dios te la stehc'an sba ta atojol te c'alal loc'at ta ahnel ta stojol te abanquil Esaú, xchi.
2Hich te Jacob la yalbe te mach'atic ay yu'un ta sna soc spisil te mach'atic sjoquinejic: Loq'uesahic te jyanlum diosetic te ay ta awohlilic, poca abahic soc jeltaya ac'u'ic. 3Ya xmohotic bahel ta Bet-el, tey ya xc'oht jpasbe scajtajib ta chiq'uel smahtan a te Dios te la scoltayon te c'alal ayon ta wocol a soc te la sjoquinon ta banti behenon, xchi.
4Hich la ya'beyic te Jacob spisil te yantic diosetic te yich'ojic soc te staq'uinal schiquinique. Te Jacob la smuc hilel ta lum ta ye'tal jihte' ta nopol Siquem. 5C'alal hahchic ta behel, tal tulan xiwel yu'un Dios ta stojol te pueblohetic ta sjoyobalic, hich ma ba la snutsic te snich'nab Jacob.
6Te Jacob soc spisil mach'atic sjoquinej, c'ohtic ta Luz, o te Bet-el te yan sbihil, te ay ta sq'uinal Canaán. 7Tey c'oht spas scajtajib ta chiq'uel mahtanil a, El-bet-el#35.7 El-bet-el: Dios yu'un Bet-el, xchi. sbihil c'oht yu'un te lugar, yu'un tey chicnaj Dios ta stojol a te c'alal loc' ta ahnel ta stojol te sbanquile. 8Tey cham a te Débora, te jcanan yu'un Rebeca, la yich' muquel ta ye'tal jihte' ta nopol Bet-el; a'bot sbihilin Alón-bacut.#35.8 Alón-bacut: jihte' scuenta oq'uel, xchi.
9Te Dios la yac' sba ta ilel yan buelta ta stojol te Jacob te c'alal suhtemix tal ta Padan-aram a, soc la ya'be bendición. 10Hich halbot yu'un te Diose:
Jacob te abihile,
ma hichuquix Jacob#35.10 Jacob: Ilawil nota ta 25.26. ya xhil,
ha Israel#35.10 Israel: Ilawil nota ta 32.28. ya xc'ohtix abihil, xchi.
Hich Israel c'oht te sbihile.
11Soc halbot xan yu'un Dios:
Ho'on Dioson te spisil ya xhu' cu'un:
nich'najanic soc p'ohla abahic.
Jun nación soc bayel ta chahp nacionetic ya xchicnaj ta acuenta,
soc bayel ta tuhl ajwaliletic ya xloc' tal ta abaq'uetal.
12Te q'uinal la jca'be te Abraham soc Isaac,
ha'at ya ca'bat soc ats'umbal ta patil bahel, xchi.
13Hich te Dios la yihquitay hilel tey ta banti la sc'opon. 14Te Jacob la stehc'an hilel ton ta banti c'oponot yu'un Dios. La smalbe hilel malbil mahtanil#35.14 malbil mahtanil: ha vino te la smal ta lum. ta sba soc la smalbe aceite. 15Te Jacob la ya'be sbihil Bet-el te lugar banti c'oponot yu'un Dios.
Cham Raquel
16Patil loq'uic bahel ta Bet-el. C'alal nopol xc'ohtic ta Efrata a ayin yal te Raquel, pero ay bayel swocol yu'un. 17Te c'alal bayel yac ta wocol a, halbot yu'un te jtam-alal: Ma xiwat, yu'un ayix yan querem awu'un, xchi. 18C'alal nopol ya xloc' sch'uhlel a te Raquel (como cham stuquel), la ya'be sbihilin Benoni.#35.18 Benoni: cal yu'un jmel-o'tan, xchi. Yan te stat la ya'be sbihilin Benjamín.#35.18 Benjamín: jnich'an yu'un jwa'el-c'ab, xchi.
19Hich cham te Raquel, la yich' muquel ta sbehlal Efrata, ha te Belén. 20Te Jacob la stehc'ambe hilel ton ta smuquenal, ha seña smuquenal te Raquel c'alal ora.
21Loc' bahel tey a te Israel, c'oht spas snahilpac' ta sjehchelul bahel te Migdal-edar. 22C'alal tey nahinem a te Israel, te Rubén way soc te Bilha te yan ants yic'oj te state. La ya'iy te Israel.
Te snich'nab Jacob
Ay lahchaytuhl snich'nab te Jacob. 23Te yalatac te Lea: ha Rubén te sba snich'an te Jacob, soc Simeón, Leví, Judá, Isacar soc Zabulón. 24Te yalatac te Raquel: ha José soc Benjamín. 25Te yalatac te Bilha te scriada Raquel: ha Dan soc Neftalí. 26Te yalatac te Zilpa te scriada Lea: ha Gad soc Aser. Ha te snich'nab Jacob te ayinic ta Padan-aram.
Cham Isaac
27Te Jacob baht yil te Isaac te stat te ay ta Mamre, ta Quiriat-Arba, (ha te Hebrón), te banti nahinic te Abraham soc Isaac. 28Te Isaac cuxaj balunwinic (180) ha'bil. 29Hich quehchaj yich'bel ic' te Isaac, cham, la sjoquin ta muquenal te sme'stat, mamalix, bayel c'ahc'al cuxaj. Mucot yu'un Esaú soc Jacob te snich'nabe.
Tällä hetkellä valittuna:
Génesis 35: TZH
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Biblia Tzeltal Bachajon © Sociedad Bíblica de México, A.C., 2006.