Génesis 45
45
José la yac' sba ta na'beyel sba yu'un sbanquiltac
1Te José ma hu'ix yu'un te ya scom sba ta stojol spisil mach'atic ay ta sts'ehl, hich tulan la yal: Ac'a loc'uc bahel ta jtojol spisilic, xchi. Hich mayuc mach'a tey ay a te c'alal José la yac' sba ta na'beyel sba yu'un te sbanquiltac.
2Ha yu'un tulan oc'; la ya'iyic te egipciohetic, soc la ya'iyic te mach'atic ayic ta sna faraón. 3Te José hich la yalbe te sbanquiltac: Ho'on te José. ¿Cuxul to bal te jtate? xchi ta stojolic. Te sbanquiltac ma ba hu' yu'unic sjaq'uel, yu'un bayel xiwic ta stojol. 4Ha yu'un te José la yalbe te sbanquiltac: Nohpojanic tal ta jtojol, xchi. Hich nohpojic tal ta stojol; hich halbotic yu'un: Ho'on te José te awihts'inonic te la achononic tal ta Egipto. 5Ma me xamel awo'tanic soc ma me xawilintay abahic yu'un te la achononic tal li'i, como scuenta scoltayel scuxlejal ants-winiquetic te nahil la sticonon tal awu'unic te Diose. 6Ha schebalix ha'bil shahchel a te wi'nal ta q'uinal, ho'eb xan ha'bil ya sc'an te mayuc top' lum soc c'ajoj. 7Dios la snahilteson tal awu'unic scuenta yu'un ya xchicnaj ats'umbalic soc yu'un ya xcuxajex ta scuenta muc'ul coltayel ta libre. 8Ha yu'un ma ha'uquex la awac'onic tal li'i, ha te Dios te la yac'on tal, la yac'on ta stat faraón, la yac' te ajwalilon c'ohon yu'un spisil sna soc la ya'bon jcuentahin spisil te sq'uinal Egipto. 9Bahanic ta ora hiche, hich xawalbe te jtat: Hich ya yal te anich'an José: Dios la ya'bon ca'tel ta ajwalil ta spisil Egipto; la' me ta ora, ma me xhalajat. 10Ya xnahinat ta sq'uinal Gosén soc ta nopol banti ayon, ha'at soc anich'nab soc amamatac, te chambahlametic, wacaxetic soc spisil bintic ay awu'unic. 11Tey ya jmac'linex a, como ay ho'eb xan ha'bil wi'nal, scuenta yu'un ma ba pobre ya xc'ohat soc te mach'atic ay awu'un ta ana soc spisil bintic ay awu'un, xchihex me. 12Yo'tic la awilix ta asitic, soc te quihts'in Benjamín la yilix ta sit, te ho'on yacon ta c'op. 13A'beyahic sna' te jtat spisil te cutsilal ta Egipto soc spisil te bin awilojic. ¡Bahanic ta ora, ic'ahic tal li'i te jtate! xchi.
14La spet smey te Benjamín te yihts'in soc la yoq'uetay. Ha nix hich oc' te Benjamín c'alal la spet smey te sbanquile. 15Te José la yuhts'uy spisil te sbanquiltac soc la yoq'uetay. Patil c'oponot yu'un te sbanquiltac.
16C'alal la ya'iyic ta sna te faraón te bin c'oht ta pasel, te hich la yich' halel: Talemic te sbanquiltac José, te xchihe, lec yo'tan yu'un te faraón soc te a'batetic yu'une. 17Hich te faraón la yalbe te José: Halbeya te abanquiltac: Hich me xapasic: mohtesbeya yihcats te aburrohic, bahanic, suhtanic bahel ta sq'uinal Canaán; 18ic'ahic tal ta jtojol te atatic soc te mach'atic jayeb ay awu'unic, yu'un ya ca'beyex te mero lequil q'uinal te ay ta Egipto, yac amac'lin abahic ta spisil te bintic ya yac'ticlan te q'uinal, xchihat me. 19Soc hich xapas ta mandar: Hich me xapasic: ich'ahic bahel carretahetic yu'un Egipto yu'un te awal-anich'anic soc awihnamic, soc ic'ahic tal te atatic, la'ic li'i. 20Ma xamel awo'tanic yu'un te bin ay awu'unic, como te c'ulejalil ta sq'uinal Egipto ha awu'uniquix ya xc'oht, xchi.
21Hich la spasic te snich'nab Israel. Te José la ya'be bahel carretahetic hich te bin ut'il la yal te faraón, soc la yac'ticlambe bahel we'elil te ya swe'ic ta be. 22Ta tuhlultuhl la ya'be yach'il sc'u'ic, yan te Benjamín la ya'be ho'lajunwinic (300) ta sehp plata soc ho'chahp sc'u' stuquel. 23Soc la sticombe bahel te stat lajuncoht burro te scuchojic bahel te bintic c'ax lequic ta Egipto, soc lajuncoht sme' burrahetic te scuchojic bahel trigo, pan soc we'eliletic te ya swe' tal ta be te state. 24Hich la yac' bahel te sbanquiltac, c'alal bahtic hich la yalbe bahel: Ma me xawut abahic ta be, xchi.
25Hich loq'uic bahel ta Egipto, c'ohtic ta sq'uinal Canaán ta banti ay Jacob te statique. 26Hich c'oht yalbeyic: ¡Cuxul te José! Ha ochem ta ajwalil yu'un spisil sq'uinal Egipto, xchihic. Xcham yo'tan yu'un te Jacob yu'un ma ba la sch'uhun. 27La smelbeyic ya'iy spisil te sc'op José te halbotic tal yu'un. C'alal la yil te Jacob te carretahetic ticombilic tal yu'un te José scuenta yu'un ha ya xmo bahel a, hich lecub xan q'uinal la ya'iy yu'un. 28Ha yu'un hich la yal te Israel: ¡Tic' abi, cuxul to te jnich'an José! Ya xbohon, ya xbaht quilbe xan sit te c'alal ma to xchamon a, xchi.
Tällä hetkellä valittuna:
Génesis 45: TZH
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Biblia Tzeltal Bachajon © Sociedad Bíblica de México, A.C., 2006.