मत्ती 6
6
दान
1“सावधान रीवू! तुमु आपणा धार्मिकतान काम माणहाह देखाडनेकेरता केरूह मा, नाह ते आपणो स्वर्गामाय वाला आबाक फायरीन तुमु कायीच नेय जुडी” 2“केरीन जेवी तू दान केरणे, तेवी आपणे ओगांण वाजो वाजाडी मा, जीही कोपटी माणहे आराधनालय माय एने गल्ली माय केरणू, काहाकाय माणहे तान बोडाई केरणे जुवी, मी तुमूह खेरीज केथु, का ताह तान फोल ताहारूच जुड गीयो. 3पुण जेवी तू दान केरही, तेवी तारो जेवड्या आथा केरीन केरही ते तारा दाखर्या आथाह भी होमजणे मां मा दीही 4ज्याकेरता तारो दान लिकाडील रेहू एने तारो आबुक जो गुप्तमाय दिखेह तो तुवाह फोल आपी.”
प्रार्थना
(लूका 11:2-4)
5“एने जेवी तुमु प्रार्थना केरणू, तेवी कोपटीन होस देखावू मा केरू, काहाकाय माणहे देखाडणे केरीन प्रार्थना आराधनालय माय एने सेडक्यून चार रस्ता पोर उबरीन प केरणे हाजो लागणे. मी तुमूह हाचीच केथु, ताह तान फोल जुड जाईल हि. 6पुण तू प्रार्थना केरही, तेवी आपणी बंद खोलीम जा, एने बायणो बंद केरीन आपणो आबाकहेर्यो जो गुप्तमाय हि, प्रार्थना केर. एने तारो आबुक जो गुप्तपणे दिखेह तुवाह तान मोबदलु आपी. 7एने तू प्रार्थना केरही तेवी अविश्वासीन गेत काय भी बोल हि मां, काहाकाय ता इही विचार केरणू कि तान जादा बोलणे से तान प्रार्थना एय जाय.” 8जानकेरता तानहोस बोनुमा, काहाकाय तुमरो आबुक तुमरे मागणेन पेलूच तुमरी गरजा जाणीह.
9“एने तुमु इह्केरीन प्रार्थना केरू, हे आमरा आबाक, तू जो स्वर्गाम हि, तारो नाव पवित्र मानाय जाय.”
10“तारो राज्य आवी, तारी ईच्छा जीही स्वर्गाम पुरी एती, तोहीचल पृथ्वीपोर पुरी एय.”
11आमरा दिह बोरान रूटू आज आमूह आप.
12एने जोहलो आमु आमरा दुश्मनाह क्षमा केरतेह, तोहोलोच तू भी आमरा पापान क्षमा केर.
13एने आमूह परिक्षाम लावही मां, ते बुराई से वोचाड, कारण राज्य, पराक्रम एने महिमा तारीच हि, आमेन.
14“काहाकाय जेवी आपु माणहान पापान क्षमा केरहू, तेवी तो तुमरो स्वर्गामाय वालो आबुक भी तुमूह क्षमा केरी. 15पुण जेवी तुमु माणहान पापान क्षमा केरहू, नेय ते तुमरो स्वर्गीय आबुक भी तुमरा पापान क्षमा नाय केरी.”
उपवास
16“जेवी तुमु उपास केरहू, ते कोपटीन होस उदासने गेत नाय जुवी, काहाकाय ता आपणो मूय उतार रेणू, काहाकाय ताह माणहे उपास केरीह केरीन ओल्खी. मी तुमूह खेरीच केथु, का ताह तान फोल जुड जाईल हि. 17पुण तू उपास केरही तेवी आपणा मुंडाह तेल लागाड एने मूय धोव, 18तान केरता तू माणहाह उपास देखाडी मां, पुण आपणो आबुक जो गुप्तमाय हि, तुवाह दिखेन तुवाह फोल आपी.”
स्वर्गावालो धेन
(लूका 11:33-34)
19“आपणे केरता पृथ्वीपोर धेन हेन्गालू मा जाहारी किडा एने जेंग नाश केरणे, एने जाहारी चोर चोरी केरणू 20पुण आपणे केरता स्वर्गाम धेन टुलू केरू, जाहारी किडा, एने जंग नाश नाय, केरी एने चोर चोरी केरते नाहं.” 21काहाकाय जाहारी तारो धेन हि ताच तारो मोन लागिन रेंय.
शरीरान उजालो
(लूका 11:34-36)
22“शरीरान दिवू डोलो हि, केरीन जर तारो डोलो साफ हि, तर तारो आखा डील उजाला माय हि. 23पुण जर तारो डोलो खराब रेंय, तर तारो आखा डील भी आंधारामाय रेय, तान केरता जो उजालो तारेमाय हि तो आंधारो एय जाय ते तो आंधारो कोलोक मोठो रेय”
बोगवान एने धेन
(लूका 16:13; 12:22-31)
24“काल्लोच माणुह भी दुय मालीकान चाकरी केर सकीत नाह. कारण तो एकापुर प्रेम केरी एने दिहरापुर रोग मेली, एने एका हेरी मिलिन रेय एने दिहरा दिहराह नाकारी. तुमु भी बोगवान एने धेन ज्या दुयुन सेवा नाह केर शकते. 25तान केरता मी तुमूह किथु, आपणा जीवान केरीन भी चिन्ता केरूह मा का, काय खाहू एने काय पिहु, एने आपणा डीलाकेरिन काय पांघरहु, काय जीव खाणा एने फाडका से होवटो महत्वान हि का? 26आकाशामाय वाला चिडाह देखू! ता पेरणु नाहं एने काटणु भी नाहं एने खोलामाय जमा भी नाहं केरणू तेभी तुमरो स्वर्गामाय वालो आबुक ताह खाणेन आपणे. काय तुमरी किमुत ताहरीन जादा हि कि नाहं? 27तुमरे माय कूण ओहलो हि का, जो चिंता केरीन जीवाय वोडाव एने गेटाळ लेय”
28फाडकान केरीन तुमु चिंता काहा केरणू? सोसनान फुलाह देखू तो केहिक वोदणु, मेहनत केरते नाहं, काटणी केरणू. 29मी तुमूह किथु का सुलेमान राजू भी, आपणा आखा वैभवाम एक होस भी फाडका पेरील नाह एतो. 30तान केरता बोगवान मोयदानान खेडाह, जो आज हि हेकाले भाड टाकील जाय भट्टीम टाकाय, जाणे ताह जर बोगवान ओहला फाडका पिरिह ते, हे अल्पविश्वासी, तो तुमूह तो काहा नाहं पेरावणार?
31केरीन काय खाहू, काय पिहु, एने काय पांघरहु केरीन चिंता केरूह मा. 32काहाकाय अविश्वासी माणहा जी वोस्तून होदमाय रेत्यूह, पुण तुमरो स्वर्गामाय वालो आबाकाहा मालूम हि का तुमूह ज्यू आखी वस्तून जोविह. 33केरीन तुमु पोयले बोगवानान राज्य एने धार्मिकता होदमा रीवू. का जी ज्यू आखी वस्तु भी तुमूह जुडी. जाती 34तामुळे हेकालेन चिंता केरूह मा काहाकाय हाकालेन चिंता हाकाले; आजेन दिह्यान केरता आजेन दुखच जुलुम हि.
Tällä hetkellä valittuna:
मत्ती 6: NLXNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.