Chhòng-sè-kì 19

Só͘-to-má ê Chōe-ok

1Hông-hun ê sî, hit nn̄g ê sù-chiá lâi kàu Só͘-to-má; Lô-tek chē tī Só͘-to-má ê siâⁿ-mn̂g-kháu. Lô-tek khòaⁿ-tio̍h in, chiū khí-lâi gêng-chiap, phak tī thô͘-kha, 2kóng, “Góa ê chú, chhiáⁿ oat lâi po̍k-jîn ê chhù hioh-mî, sóe-kha; bîn-á-chài khah chá khí--lâi, chiah koh kè-sio̍k kiâⁿ.”

In kóng, “M̄-bián. Goán beh tiàm siâⁿ-mn̂g-kháu ê kóng-tiûⁿ kè-mî.”

3 Lô-tek kian-koat kā in iau-chhiáⁿ, in chiah oa̍t-tńg-sin ji̍p-khì i ê chhù. Lô-tek ūi-tio̍h in chún-pī chhe-chhau, hang bô-kàⁿ-piáⁿ, in chiū chia̍h.

4In iáu-bē khì khùn, siâⁿ-lāi só͘-ū ê Só͘-to-má-lâng, tùi lāu kàu siàu-liân, lâi ûi Lô-tek ê chhù, 5kā i hoah kóng, “Ē-hng-àm lâi lín chia ê lâng tī tó-ūi? Kiò in chhut--lâi, goán beh kap in kau-ha̍p.”

6 Lô-tek chhut-lâi mn̂g-gōa, chiong mn̂g koaiⁿ--teh, khì chèng-lâng hia, 7tùi in kóng, “Pêng-iú ah, chhiáⁿ lín mài chòe chit-khoán pháiⁿ tāi-chì. 8Góa ū nn̄g ê cha-bó͘-kiáⁿ, iáu-sī chāi-sek-lú; góa chhōa in chhut--lâi, chhut-chāi lín tùi-thāi in. M̄-kú chit nn̄g ê lâng, in sī góa ê lâng-kheh, chhiáⁿ lín m̄-thang tùi in chòe chit-khoán tāi-chì.”

9Hiah-ê lâng kóng, “Lí siám-khui.” Koh kóng, “Lí chit-ê gōa-cho̍k-lâng lâi tòa goán chia, soah beh chòe goán ê sím-phòaⁿ-koaⁿ! Taⁿ goán beh hāi lí pí hāi in koh-khah chhám.” In chiū ǹg Lô-tek chhiong--khì, beh lòng-khui mn̂g. 10M̄-kú hit nn̄g ê lâng kā Lô-tek khiú--ji̍p-khì, chiong mn̂g koaiⁿ--khí-lâi; 11koh hō͘ mn̂g-gōa ê lâng, tùi tōa kàu sòe, ba̍k-chiu bū, khòaⁿ bōe tio̍h, chhē bô mn̂g.

Lô-tek Lī-khui Só͘-to-má

12Hit nn̄g ê lâng tùi Lô-tek kóng, “Lí tī chia iáu ū sím-mi̍h-lâng? Bô-lūn sī hāu-siⁿ, cha-bó͘-kiáⁿ, kiáⁿ-sài, í-ki̍p siâⁿ-lāi só͘-ū ê chhin-cho̍k, lí tio̍h chhōa in lī-khui chit-ê só͘-chāi. 13Goán beh châu-bia̍t chit-ê siâⁿ, in-ūi khòng-kò in ê siaⁿ chin tōa, Siōng Chú ū thiaⁿ--tio̍h; I chhe goán lâi châu-bia̍t chit-ê siâⁿ.”

14 Lô-tek chhut--khì, tùi i ê kiáⁿ-sài kóng, “Lín kóaⁿ-kín lī-khui chia, in-ūi Siōng Chú beh châu-bia̍t chit-ê siâⁿ.” I ê kiáⁿ-sài lia̍h-chòe i sī teh kóng-chhiò.

15Thiⁿ-kng-chá, Siōng Chú ê sù-chiá chhui-pek Lô-tek, kóng, “Khí--lâi, kóaⁿ-kín chhōa lí ê bó͘ kap nn̄g ê cha-bó͘-kiáⁿ chhut--khì, chiah bián in-ūi chit-ê siâⁿ ê chōe-ok siū châu-bia̍t.” 16Lô-tek tiû-tû; hit nn̄g ê lâng in-ūi Siōng Chú lîn-bín Lô-tek, chiū khan i, i ê bó͘, kap i nn̄g ê cha-bó͘-kiáⁿ ê chhiú, chiong in chhōa chhut-khì siâⁿ-gōa. 17Chhōa in chhut-khì liáu, kî-tiong chi̍t ê sù-chiá kā Lô-tek kóng, “Kóaⁿ-kín tô-miā! M̄-thang oa̍t-thâu, mā m̄-thang tòa tī pêng-goân; tio̍h cháu-khì soaⁿ--ni̍h, chiah bián siū siau-bia̍t.”

18 Lô-tek kóng, “Góa ê chú, m̄-thang án-ni. 19Lí ê po̍k-jîn í-keng tùi lí tit-tio̍h un-tián, lí mā tùi góa hián-chhut ke̍k-tōa ê jîn-chû, kiù góa ê sìⁿ-miā; góa cháu bōe kàu soaⁿ--ni̍h, kiaⁿ-liáu iáu-bē cháu kàu hia, chai-hō chiū lîm-kàu góa, góa chiū bô-miā. 20Khòaⁿ leh, bô jōa hn̄g ê só͘-chāi ū chi̍t ê sió-siâⁿ, góa cháu ōe kàu; chhiáⁿ hō͘ góa cháu-khì hit-ê sió só͘-chāi, pó-choân góa ê sìⁿ-miā.”

21Sù-chiá tùi i kóng, “Góa tah-èng lí; hit-ê siâⁿ góa bōe kā i húi-bia̍t. 22Kín cháu! Lí iáu-bē kàu hia, góa bōe-tàng tāng-chhiú.”

In-ūi án-ni, hit-ê siâⁿ kiò-chòe Só-ní#19.22 “Só-ní” ì-sù sī “sió”..

Só͘-to-má kap Gô-mô͘-la Siū Húi-bia̍t

23 Lô-tek cháu kàu Só-ní ê sî, ji̍t-thâu í-keng chhut. 24Hit-sî, Siōng Chú chiong liû-hông kap hé, tùi thiⁿ-téng Siōng Chú hia kàng-lo̍h tī Só͘-to-má kap Gô-mô͘-la, 25chiong hiah-ê siâⁿ, kui-ê pêng-goân, siâⁿ-lāi só͘-ū ê chū-bîn, í-ki̍p tōe-chiūⁿ seng-tióng ê mi̍h lóng húi-bia̍t. 26Lô-tek ê bó͘ tī āu-bīn, chi̍t-ē oa̍t-thâu khòaⁿ, chiū pìⁿ-chòe chi̍t ki iâm-thiāu.

27 A-pek-la-hán keh-ji̍t thàu-chá khí--lâi, kàu i í-chêng khiā tī Siōng Chú bīn-chêng ê só͘-chāi, 28ǹg Só͘-to-má, Gô-mô͘-la, kap pêng-goân ê hong-hiòng khòaⁿ, khòaⁿ-tio̍h hit só͘-chāi hé-ian chhèng-koân, chhin-chhiūⁿ hé-lô͘ ê ian. 29Siōng-tè siau-bia̍t pêng-goân chiah-ê siâⁿ, húi-bia̍t Lô-tek khiā-khí ê siâⁿ ê sî, I tài-liām A-pek-la-hán, kiù Lô-tek thoat-lī sí-bông.

Mô͘-ap-lâng kap A-bûn-lâng ê Khí-goân

30 Lô-tek m̄-káⁿ tòa tī Só-ní, chiū kap i nn̄g ê cha-bó͘-kiáⁿ sóa-khì soaⁿ--ni̍h, tòa tī soaⁿ-tōng. 31Tōa cha-bó͘-kiáⁿ tùi sió-bē kóng, “Lán lāu-pē lāu lah, chit só͘-chāi koh bô ta-po͘-lâng thang chiàu lé-sio̍k kap lán kiat-ha̍p. 32Lán tio̍h hō͘ lāu-pē lim-chiú, kap i chòe-hé khùn, thang tùi i tit-tio̍h gín-á.” 33Hit-mî in hō͘ in ê lāu-pē lim-chiú; tōa cha-bó͘-kiáⁿ chiū ji̍p-khì kap i chòe-hé khùn; tōa cha-bó͘-kiáⁿ sím-mi̍h sî khì khùn, sím-mi̍h sî khí--lâi, lāu-pē lóng m̄ chai.

34Keh-ji̍t, tōa cha-bó͘-kiáⁿ kā sió-bē kóng, “Góa chā-mî kap lāu-pē chòe-hé khùn; kim-mî lán koh hō͘ i lim-chiú, lí thang ji̍p-khì kap i chòe-hé khùn. Án-ni, lán thang tùi lāu-pē tit-tio̍h hō͘-tāi.” 35Hit-mî, in koh hō͘ lāu-pē lim-chiú, sòe-hàn cha-bó͘-kiáⁿ ji̍p-khì kap lāu-pē khùn; cha-bó͘-kiáⁿ sím-mi̍h sî khì khùn, sím-mi̍h sî khí--lâi, lāu-pē mā lóng m̄ chai. 36Án-ni, Lô-tek nn̄g ê cha-bó͘-kiáⁿ lóng tùi in ê lāu-pē hoâi-īn. 37Tōa--ê siⁿ-kiáⁿ, kā i hō-miâ Mô͘-ap#19.37 “Mô͘-ap” ì-sù sī “tùi góa ê lāu-pē”., chiū-sī hiān-kim Mô͘-ap-lâng ê chó͘-sian. 38Sòe--ê mā siⁿ-kiáⁿ, kā i hō-miâ Piān A-bí#19.38 “Piān A-bí” ì-sù sī “góa chhin-lâng ê kiáⁿ”, kap Hi-pek-lâi-gú “A-bûn-lâng” hoat-im chiap-kūn., chiū-sī hiān-kim A-bûn-lâng ê chó͘-sian.

Tällä hetkellä valittuna:

Chhòng-sè-kì 19: TTVR

Korostus

Jaa

Kopioi

Haluatko, että korostuksesi tallennetaan kaikille laitteillesi? Rekisteröidy tai kirjaudu sisään

The Bible Society in Taiwan

Lisätietoja käännöksestä 現代台語譯本羅馬字版

Chhòng-sè-kì 19

Suosittuja jakeita Raamatun kirjasta
Chhòng-sè-kì 19

Raamattu:

Chinese, Min Nan

Käännös: 現代台語譯本羅馬字版 - TTVR

Chhòng-sè-kì 19

Chhòng-sè-kì 19

Suosittuja jakeita Raamatun kirjasta Chhòng-sè-kì 19

Raamattu:

Chinese, Min Nan

Käännös: 現代台語譯本羅馬字版 - TTVR

Chhòng-sè-kì 19

Suosittuja jakeita Raamatun kirjasta
Chhòng-sè-kì 19