Mateo 5
5
Diidza be'e Jesús lu gia'a'du
(5:1—7:29)
1Kati Jesús ble'i'de bunach zian nakua'ke'a, greene tu gia'a'du len na' grë'e. Bënni useed kie' gulabiige'e ga zue', 2len Le' gzulau'e rseed'de leke, rne':
Le nak lzaka' lau'e Dios
(Lc 6:20-23)
3«Bixhgaba'ke bënni'a tak'be'i'de ki nayaadzji'kde Dios,
koma kieke naki yëla rnabe' ki yewayuba.
4»Bixhgaba'ke bënni'a tutzaage,
koma uluwi'xhën'ke leke.
5»Bixhgaba'ke bënni nëxhj'laadxi,
koma uluzi'ke xhbei yu le'a nuxëne'laadxi'ke.
6»Bixhgaba'ke bënni tazelaadxi'i'tzke yëla rë'xhbei dxia'a,
koma ulazi'ke ley.
7»Bixhgaba'ke bënni tuwechilaadxi'i'ke bunach,
koma Dios wechilaadxe'e leke.
8»Bixhgaba'ke bënni nak dxia'a laadxi'dau'ke
koma ulale'i'de Dios.
9»Bixhgaba'ke bënni tugiilje yëla rë'dxi,
koma ulazi' lake xi'ine Dios.
10»Bixhgaba'ke bënni'a tulaag'ke leke le tun'ke le nak dxia'a,
koma kieke naki Yëla Rnabe' ki yewayuba.
11»Bixhgaba'li lbi'ili, kati bunach lutzag'yuudxe lbi'ili diidza len lusaka'dë'ke lbi'ili, len kati nia'a kia' labia'laadxi'ke lbi'ili len zian'k diidza le ku nak. 12Guludziiji'tzki koma xhën'te nak le uzi'li xhbei yewayuba; koma lekz'ka' ka' gulusaka'ke bënni'a glui'ke diidza ulaaz kie' Dios, bënni'a gulakua'ke zia'al ka lbi'ili.
Zëdi' len yeni ki yëdz'lyu
(Mr 9:50; Lc 14:34-35)
13»Lbi'ili nak'li zëdi' ki yëdz'lyu ni. San xhki zëdi' gnit yëla sna'a ki, ¿nakxh gunn ueak sna'a? Gat'ga zua ga gun, chi taru'un'ze len bunach tuliibe ley.
14»Lbi'ili nak'li yeni ki yëdz'lyu ni. Tu yëdz zua lau'it gia'a ti gunn jka'chi' lau'i. 15Lekz'ka' ti rkie'la'li tu gi' na' rgu'u'li ley xhani gi'in; rzuaali ley ga nak xhtza' na'ar gunn gzeni yugute'ke bënni nakua'ke nu'yu'a. 16Lekz'ka' lbi'ili gulgun bayuudx ki yeni kieeli gzeni lau'i bunach, naar kati bunach lale'i'de ki run'li le dxia'a lagu'e ba Xuuz'ru zue' yewayuba.
Jesús rseed'de ki xhba kie' Dios
17»Ti gaki'li ki za'a zduzua' tzala'al xhba kie' Dios u zduzua' tzala'al le guluzooje bënni'a glui'ke diidza ulaaz kie' Dios; ti za'a zdulu'a lu'uudx ki, za'a ki gak ka rala gak. 18Le nak'te rea' lbi'ili, ki tzal ni nakua'k xhba len yëdz'lyu, ti tëëd ka'az tu la'an'z diidza ki xhba kie' Dios, nakati gdxin'r gak ka rala gak. 19Lena'a, bënni ti rzenaage zala tuuz xhba kie' Dios le ti nak zi blou, len ti rseed'de bunach luzenaag'ke xhba'a, bënni ni ti gake xhën lu yëla rnabe' ki yewayuba. San bënni rzenaage len rseed'de bunach ki luzenaag'ke, wak're xhën lu yëla rnabe' ki yewayuba.
Jesús rseed'de ki le nak'r dxia'a
20»Koma rea' lbi'ili ki xhki ti kxua'laur'li gun'li le nak dxia'a lau'e Dios ka bënni fariseo len ka bënni useed xhba kie' Dios, ti tzaaz'kz'li lu yëla rnabe' ki yewayuba.
1. Le rak ki yëla rdëëdi bunach
(Lc 12:57-59)
21»Chi nayëëni'li ka gle'ke xuuz'xhtau'li guul: “Ti gdëëdi'li bunach, koma bënni gdëëd'de bunach ubaage'e xhgia'.” 22San neda rea' lbi'ili ki nu'ti'teez bënni gdze'e bënni bë'che'e, nake bach gbaage'e xhgia'. Bënni gdxie' dë' bënni bë'che'e ulabeki'xhbei'de kie' lu dxin'lau'i blou; ati bënni ti ryaazlaadxe'e bënni bë'che'e nake bach tziije lu gi'gabil.
23»Lena'a, xhki kati tzaju'u gun kiu' lu pkuugu la'ay ati tzajnei'du ki bënni bë'chu'u ti rle'i'de li dxia'a, 24pka'an lu pkuugu'a gun kiu' len yajyue zia'a bënni bë'chu'a ki yudzaag'li dxia'a. Na'ar gunn wëëdu lu pkuugu la'ay len gnëëdzju gun kiu'a.
25»Xhki nu bënni re'en'de tzajzue' li' yulau'i ki luchuug'be'e kiu', gulkueki'xhbei lbi'ili zia'a tzal ni de latj, naar ti gzue' li' lu ne'e bënni rchuug'be', koma xhki na'a, bënni ni udëëde li' lu naa'ke bënni tun'chi'ke liidx'gia, len na' lagu'u'ke li'. 26Le nak'te rea' li' ki ti yurooju xhki ti kiixhju zura dumi'a tzka rala gdxiu'.
27»Chi nayëëni'li ki gulanake: “Ti kitzju' xhba ki utzag'na'.” 28San neda rea' lbi'ili ki xhki nu bënni ryue'nu tuunu nguul len rzelaadxe'nu, chik'z gditzje' xhba ki utzag'na' lu laadxi'dau'e.
29»Lena'a, xhki lau'u yubeel run ga guunu dula, gliaj len gru'un, koma nakr'ru dxia'a gnitiu' tu yaj lau'u ka gdu ka naku tzajtzu'u lu gi'gabil. 30Len xhki no'u yubeel run ga guunu dula, pchuug len gru'un, nakr'ru dxia'a gnitiu' no'u'a ka gdu ka naku tzajtzu'u lu gi'gabil.
(Mt 19:9; Mr 10:11-12; Lc 16:18)
31»Lekz'ka' gulane': “Nu'ti'teez bënni rsanlaadxe'nu nguul kie', rala gnëëdzje kieenu gich ki chi nusanlaadxe'nu.” 32Xhki tuunu nguul tzajtzu'u'leen'nu'ne bënni yubl run'nu ga bënni kieenu rzi'e latj ksanlaadxe'nu, san xhki ti nak ka' bënni ksanlaadxe'nu nguul kie' bil wen run'ze ga nguul kie' kitzj'nu xhba ki utzag'na'. Ati bënni'a rzua'leene'nu nguul nusanlaadxi'ke'nu, rgitzje' xhba ki utzag'na'.
33»Lekz'ka' byëëni'li ka gle'ke xuuz'xhtau'li guul: “ti jka'anu kaaz le gxi'luno'u len xhtiidzu'u lau'e Xan'ru kati gnou' blikz'da'ne Dios.” 34San neda rea' lbi'ili: Ti gnakz'li: blikz'da'ne Dios. Ti gnaali blikz'da yewayuba, koma na' rnabe'e Dios; 35Ti gnaali blikz'da yëdz'lyu ni, koma na' nak xhliibi ni'e; len ti gnaali blikz'da Jerusalén, koma nak yëdz kie' Bënni Rnabe' xhën'te. 36Ti gnaali blikz'da ikja ni, koma ti gak'li gun'li ki tu gitza'ikj'li gak gasj u gak xhkich. 37Xhtiidza'li rala gak, “ën” u “ën'ën'”. Koma xhki bil'l gnaali, kie' bënni xëwi za' diidza'a.
(Lc 6:29-30)
38»Lbi'ili chi byëëni'li ki gulanake: “tu lau'ru saki'i tu lau'ru len tu la'ya'ru saki'i tu la'ya'ru.” 39San neda rea' lbi'ili: ti uzi'laali'ne bënni bi ksake'e lbi'ili, san xhki nu ka'pa tzala'a xagu'u yubeel, bze lekz'ka' le ye tzala'a. 40Xhki nu bënni tzajzue' li' yulau'i len re'en'de kue' xhou', be'e latj we'e lekz'ka' laari rxu' kuudzu'u. 41Xhki nu bënni gdayë'li'de li' gu'u sue'e gatzj ur nëëz, bia' ley tu ur. 42Nu'ti'teez nu bi gnaabi li' bnëëdzj, len ti jka'anu'ne ka'az bënni bi gnaab'giir'de li'.
(Lc 6:27-28,32-36)
43»Lekz'ka' chi byëëni'li ki gulanake: “Bdxi'i'de bënni bë'chi' lzo'u len glei'de bënni'a ti rdzaage li' dxia'a.” 44San neda rea' lbi'ili: guladxi'i'de bënni'a ti tale'i'de lbi'ili dxia'a, len kati rliidzu'ne Dios bnaab kieke bënni'a tulaag'ke li'. 45Naar gdxin'li gak'li xi'ine Xuuz'li zue' yewayuba, koma Le' ruune ga r'roj gbiidz kieke bënni tzawi len lekz'ka' kieke bënni xhe'e, len rsë'le'e giaj kieke bënni tuune le nak dxia'a, len lekz'ka' kieke bënni ti tuune le nak dxia'a. 46Xhki nadxi'iz'li nu nadxi'i lbi'ili, ¿bixh uzi'li xhbei? La lez ka'az'a tabëëze bënni'a tukiixhje laaz'sua'ke ki Roma. 47Len xhki rliidz'z'li'ne bënni bë'chi' lza'a'li ¿bixh nadëëdi be'i run'li? La lekz'ka' tabëëze bënni ti tayajle'ke. 48Gulgak gdu'te dxia'a, ka nake Xuuz'li zue' yewayuba.
Tällä hetkellä valittuna:
Mateo 5: PZD
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Sociedad Biblica de México AC