Aposolo 13
13
Epe Yaakopi Sipiridimi Banabasi Solo laapo muma rapaisaya ei
1Mo Andioko Keriso wenaali rapu Godeme angele waloaisimiya alinu menda para pange Godena poropedi alinu pange aisimiya. Nimuna binuri pange Simioni bi menda Naigera (go Naigera da eiri Busupi Ali loma lea) pange Sairini andasu nane aya ali Lusiasi pange ande gapamani kalu ali Erodina anda rupara andere-aisaya ali komea Manaene pange Solo pange aisimiya. 2Gupuma Keriso wenaalinumi Reali para kone sulameya enda na-ne ara panda punyada-ainya mo Epe Yaakopi Sipiridimi lalore, Banabasi Solo laapore niipu laapona nape pupudengi go ei nena lo ambala la siawale niipu laapo pena dapae, lisaya.
3Go lisayandare Keriso wenaalinumi enda ambe na-ne ara yainya ambala pumare mo ali laapona kaluna ki siala ara monde pupudengi nainyaya pulupae, loma rapaisimiya.
Niipu laapome Saiparusi andasu nane angele walisipiya ei
4Go eina ande ali laapore mo Epe Yaakopi Sipiridimi rapada-ainya no Selusia ree anda nane paisipiya. Go para opapala pumare Saiparusi ipa piru kopaliaoma rupara su pa wi para andaa kawasona pira pale go para paisipiya. 5Gupuma Solo Banabasi laapo Salamisi ree anda nane opapala pumare Isaraelimi mandu rangala pae alinuna Godena angele kuruaeme andanu para Godena angele wada puala puaisipiya. Dioni, nipuna bi menda Maka pange niipu laapo rambameala puaisaya.
6Niipu laapo mo ipa piru kopali ae andasu raayo paranu puama puama pu mo Paposi ree anda nane pumare yaisa soko ali komea nipuna bi Bayesu mandaisipiya. Nipuri Isaraelimi mandu rangala pae ali aisayapare nipumi lalore, Niri Godena poropedi ali ayo, lisaya. 7Mo yaisa soko aliri ande Saiparusi andasu rupara gapamani andaa ali rapu mendaa para aisipiya. Mo gapamani alina biri Sesiasi Polusi nipuri kone waru suae ali. Ande gapamani alimi Godena angele pangolameya Solo laapo nipu para epenaya wi la misaya. 8Gupisayapare ande yaisa soko ali Bayesu nipumiri nipuna Giriki angeleme bi menda Elimasi ali laapona pora sese pulameya rapisaya. Gupuma mo gapamani alimi Godena angele pangapanayanda nipuna kone perekeyaluame rapisaya. 9-10Solore nipuna bi menda Polo, nipumi Epe Yaakopi Sipiridimi rumbia pirinya ande yaisa soko ali lee puri paleme andala ara lalore, Neere Sadanina naki. Neemere epe au pi ei raayo para yanda liiale ali. Koae remona makirada aunu raayo nee para rumbia wia, lisaya. Neemere Realina ora angelenuri giaoma ma-koyada ara pereke pereke angelenu doameya rapo ale aliyale waru panga, lisaya. 11Ambiare Realimi nipuna puri pale eimi nena lee rumbu palia. Gupuma neere naare mendana gurupa neere naare paa pi ei na-ande pa lee rumbu pa pidi, loma la lisaya. Go dina go gole koame rimbalada rupa Elimasina lee rumbu paisaya. Gupuma ali mendame nipuna ki muma karu penaya ali aisapuma paisaya. 12Monde gapamani andaa alimi go ei andomare angele muma pangisaya. Ande Realina einu wale ei pangomare lee opoma andae wisaya.
Polo Banabasi laapo mo Andioko ree anda Pisidia andasu rupara paisipiya ei
13Polo Banabasi laapo pange niipuna rambamea alinu pange mendaa dina Paposi gioma andaa kawasona piruma mo Peka ree anda Pambilia andasu nane paisimiya. Paisimiyapare Dioni Makame mo alinu minyapalaoma wala perekeya Diurusaleme ree anda nane paisaya. 14Gupisayapare Polo Banabasi laapome Peka ree anda minyapalaoma Andioko ree anda nane Pisidia andasu rupara opapala paisipiya. Gupuma Isaraelimi mandu rangala pae wenaalinuna koro piruaisimiya naarena mo Isaraelimi mandu rangala pae alinuna Godena angele kuruaeme anda rupara konda pamboma pirisipiya. 15Mo Godena angele kuruaeme anda andere-aisimiya kalu alinumi Mosesimi Rudule Angele Wape Pi Einu pange Godena poropedi alinumi wape pi angelenu pange ambala yarepeaisimiya. Go ei pereyaomare mo alinumi Polo laapo para angele rapada ara lalore, Ame laapoae, naana rana pi eiri niipimi wenaali para puri ma-palao angele menda wada pinya, lisimiya. 16Go eina Polome rekoma nipuna ki minyasiaoma ara lalore, Nimi Isaraelimi mandu rangala pae alinu pange Isaraelimi na-mandu rangala pae wenaalinuo. Nimimi Gode para panda punyaoma aeme wenaalinu, nina angele pangalepape, lisaya. 17Go Isaraelimi mandu rangala pae wenaali Godeme naana kasuanu kone suma ambala mea, lisaya. Go dinare nimuri Idiapi andasu nane pape wenaali aisimiya wenaalinumi Godeme wenaali waru andapu mandu ma-rangala paya, lisaya. Gupisayapare werepe nanere Gode nipuna puri andenaya go Idiapi andasu gioma nimuna ora andasu nane ora yoka epenaya, pulupa, lisaya. 18Gonde wenaali na-ao-pali weambi pi su para ara monde wenaalinumi kuni gipa ali ria laapo rupara ara Godena angele na-pange gipia lisimiya ei Godeme andoma kenda andaai waru komisayapare nipumi nimu na-ma-koyaisaya, lisaya. 19-20Go dina Kaenani andasu para palisimiya anda ruru wenaali warapu ma-koyaoma komena liisaya. Gupuma nimuna andasu Isaraelimi mandu rangala pae wenaali para ma-alisaya. Go wenaali go andasu para ainya kuni gipa 450 perelisaya. Go au puma werepe nanere Godeme mo Isaraelimi mandu rangala pae wenaali andere-ainyaya kalu alinu alala pisaya. Go au pu eiri puma mo Godena poropedi ali Samuele epa aisaya. 21Go dinare mo Isaraelimi mandu rangala pae wenaalimi kini ali menda meaminya, lisimiya. Go eina Godeme ali Kisina si Solo kuni gipa ali ria laapo rupara nimuna kini ali ainyayanda ma-alisaya. Go aliri Benisamenena anda ruru ali. 22Gupisayapare Godeme Kini Solo yokoma pane ainyaloma Deipidi Isaraelimi mandu rangala pae wenaalina kini ma-ainya, lisaya. Godeme wenaali para Deipidina au la alala ara lalore,
Neme Diesina naki Deipidi andasiawande, lisaya.
Na koneme pange Deipidi rana pea pange
nipumi na rana pi einu raayo palia,
kone sialo, lisaya.
23Ambala ririna Godeme go au puma nipumi lalore, Go au ora pumare go ali Deipidina mandu rangala pisaya repaa para ipisaya ali Yesu nipumi lisaya rupa Isaraelimi mandu rangala pae wenaali rambamuma ma-epeainyayanda la wisaya ei ora pinyaya alisaya, lisaya. 24Ambala ririna Yesu pupudengi ambe na-ne-ainya Dioni nipumi mo Isaraelimi mandu rangala pae wenaali para angele walala ara lalore, Nimimi koae einu para yalame komoma kone menda perekeyao wilimindare baparaisi au pala pilimi, lisaya. 25Dionimi nipuna pupudengi pi ei repara pereyaluame ara mo wenaali para lalore, Nimimiri ni para ale kone sialemepae, loma lalore, Nimimi ma-siambao-aeme aliri ni dia, lisaya. Go peale nimimi waru pangalepa. Ni koae ali ayondare ali komea werepe na kou nane epelea alina ange anda neme koyadore ana na-pea, lisaya.
26Nina Isaraelimi mandu rangala pae amenuo. Nimiri Eparameme mandu rangala paya anda repaa alinu pange nimi Isaraelimi na-mandu rangala pae alinumiri Gode para paalame komala ara panda puaeme ei Godeme go endoma ape angele naa para ambala rapaya, lisaya. 27Mo Diurusaleme ree anda aisimiya wenaalinumi pange nimuna kalu alinumi pange nimumiri go naa Rambamea ali kone ora na-wisimiya. Gupuma pange mo Isaraelimi mandu rangala pae wenaalina koro piri naarena Godena poropedi alinumi wape pi ei yarepeaisimiya eiri ora kone na-wisimiya. Ambala ririna mo Godena poropedi alinumi angele wape pu wisimiya rupa ora pula ara Yesu angele yokanali pi eina ree nee para epelea pange nee ora komele lisimiya ei ora pisimiya. 28Nipu para koae au menda na-andala ara go eina nipu ora luma komena duame Pailadimi pakama lu komainyayanda konge lisimiya. 29Ambala ririna Godena poropedi alinumi nipu para wape pisaya rupa au raayo nipu para ora pisimiyandare werepe nane ekeraisa wape pi repanana konda muma ma-rongaoma dapa pisimiya.
30Gupisimiyapare Godeme mo dapa para Yesu wala ma-rekaisaya.
31Mo alinumi Galili andasu minyapalaoma mo Diurusaleme ree anda nane opasiala polame Yesu nipu rapu mendaa paisimiya alinu para nipumi nimu para naare raayo waloaisaya. Go eina ambia gore nipuna pisaya einu andoma kone suma mo Isaraelimi mandu rangala pae wenaalinu para go nipuna pisaya ei la aloaeme. 32Naame Godena epe angele nimi para la gulame ambiare go epa aemanda, lisaya. Godeme naana aya kasuanu para epe au palua, la wisaya angele loma Gode nipumi Yesu wala ma-rekaya eimi go naana aya kasuanu para la wisaya angele naa nimuna mandu rangala pi wenaalinu para pande, lisaya. 33Go eiri Godena Yainya Pi Yaisa wape pi ei buka runguluma wi ei laapo rupara la wisaya ei mea. Gurupa la siala ara lalore,
Ambiare neere nina Nakiae, lisaya.
Gupuma niri nena Apa ayo lisaya.
34Yesu komenaloma Gode nipuna wala ma-rekaya eina nipuna ro dapa para ora ramuape-na-ya angele lala ara lalore, gurupa lea, lisaya.
Godeme Deipidi para ora epe yaakopi aunu
la wisaya einu go mendaa pi epe aunu ambia ora
nee para gualua, lama la sialo lea, lisaya.
35Nipumi Godena angele wia buka rupara runguluma wi ei menda para la siala ara lalore,
Nena Yaakopi Pupudengi Nao-ae Ali kome ei
ro dapa para wilianda pange ora na-raminyadoa,
lea, lisaya.
36Deipidi nipu na-kome-ainya pa ao-palisaya dinare Godena pupudengi nao-aisaya. Gupumare werepe nane komisayanda nipuna aya kasuanu dapa para pua dapa puma nipuna do yongalere ramu pungu puma su au la paisaya, lisaya. 37Deipidi nipuna do yongalere ramua paisayapare Godeme wala ma-rekaripaya ali Yesuri nipuna rore na-ramu pange pungu na-pea, lisaya. 38Go einare na amenuo, nimi para go angele ladema aliri Yesu nipuna pisaya einumi nimina koae koae einu kunaisaya alina angele la gialema, lisaya. 39Godena ambaisena Rudule Angelenu Mosesi para alisaya einumi naana koae koae einuna puri rungulape-na-yapare ambiare Yesu para kone rulaoma aeme wenaalinuna koae koae einuna puri Godeme mandana rungulaluale go lalo ei kone waru sialepape, lisaya. 40-41Go einare monde Godena poropedi alinumi wape pula ara lalore,
Godena angele na-pange giri lala puma
ero lao-aeme alinuo, rungula mealo pambala ara
andoma kone andapu suma komalepape, lea.
Wenaali mendame nimi para neme ambia go
naarena pi ei waru la gilimindare pangomale
kone na-wilimi, lea, lisaya.
Go eina Godena poropedi alinumi wape pi angelenu nimi para epapana waru andere-alepape, lisaya.
42Polo Banabasi laapore mo Isaraelimi mandu rangala pae wenaalina Godena angele kuruaeme anda kama nane pula-ainya wenaalimi niipu laapo para lalore, Ande lapende angele mo Isaraelimi mandu rangala pae wenaalinuna koro piri naare mendana naa para wala da pinya, loma konge lisimiya. 43Gupuma mo Godena angele kuruaeme anda para yainya puma perelisayandare Isaraelimi mandu rangala pae alinu andapumi pange Isaraelimi na-mandu rangala pae wenaali mendame nimuna koae gode para yainya pi ei minyapalaoma Isaraelimi mandu rangala pae wenaalina yainya puae ora Gode para yainya epa puma Polo Banabasi laapo raluma paisimiya. Go einare mo Yesuna angele ma-puao-aepe ali laapome mo alinu para angele lomare Godeme wenaali para pakama epe ei aloaya ei kone rulaoma ao-pali ei puri paloma angele walisipiya.
44Gupuma monde Godena koro piri naare mendana mo ree anda nane wenaali raayome Realina angele pangolame mombelisimiya. 45Gupisimiyapare mo Isaraelimi mandu rangala pae kalu alinumi mo wenaali raayo andomare kundipa pula ara Polome lisaya angele pangoma ape lo angele yokanali pula ara Polo para lalore, Nee ana na-pea neeyana, loma ero laisimiya.
46Gupuma Polo Banabasi laapome puri paloma paalame na-kome ara angele lala ara lalore, Nimi para ambala Godena angelenu walapeyapare nimimi go angele giada ara naare koae alinu aema loma endoaya ei meape-na-ya damendare saame nimi minyapaloma mo Isaraelimi na-mandu rangala pae wenaali menda para wada pelepa, lisipiya. 47Realimi naa para rudule angele loma lalore,
Neme neere mo Isaraelimi na-mandu rangala pae
wenaali mendana paa pi ei ainyadoa, lea, lisaya.
Gupulandare neere mo su kuni raayo paranu
wenaali rambameape endoaya ei
ma-puainyadoa, lea, lisaya.
48Gupuma mo Isaraelimi na-mandu rangala pae wenaali mendame go angele pangoma raname komala ara Realina angele ma-minyasiaisimiya. Gupuma mo Godeme yarepe misaya wenaaliri pereyape-nae endoaya ei muma Gode para kone rulaisimiya.
49Gupuma Realina angelere go andasu raayo para bi andaai wisaya. 50Gupisayapare mo Isaraelimi mandu rangala pae alinumi mo Isaraelimi na-mandu rangala pae Gode para panda punyaisimiya bi wi kalu wenanu menda para pange mo ree anda nane aisimiya kalu alinu pange Polo Banabasi laapo para yanda linyayanda rimbu lisimiya. Gupuma Isaraelimi mandu rangala pae alinumi Polo Banabasi laapo go anda gioma penaya ralu liisimiya. 51Go au pisimiyanda mo ali laapome nimuna koae koae einu pisimi ei andomare niipumi pare au menda pula arare nipuna angena ralisaya do randalo rumbumare Aikoniame ree anda nane paisipiya. #13:51 Mo Yesuna kou nane raluae alinumi go au pisimiya eiri gore go anda para aeme repaame koae au go piminda loa walalo pisimiya.
52Gupuma mo Andioko ree anda nane aeme Kerisona angele pange wenaaliri Epe Yaakopi Sipiridimi rumbia piri raname komariada-ainya aisimiya.
Tällä hetkellä valittuna:
Aposolo 13: POLENT23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.