Aposolo 8
8
1Gupuma Solome Sidipenina komisaya ei andisayandare, Ora ana pea, lisaya.
Solome Keriso wenaalinu para rendaa andaai alisaya ei
Go mendaa naarena ali mendanumi Diurusaleme ree anda Keriso kone rulaisimiya wenaalinu yanda andaai puma ma-koyaisimiya. Go einare Keriso para kone rulaisimiya wenaaliri Diudia Sameria andasu laapo para rangopeminyambisimiya. Mo Yesuna angele ma-puao-aeme alinu komeare Diurusaleme ree anda para pa aisimiya. 2-3Godena angele pangoaisimiya alinu menda parame ree waru lala ara Sidipeni ro ma-dapa pisimiyapare Solome Keriso wenaali raayo ma-koyalua, kone wisaya. Go kone suma Keriso wenaalinuna andayalo pamuala ara Keriso wenaali kama yola sore sore puma wenaali raayo dipula yolo lopa lopa pala pisaya.
Sameria andasu nane epe angele walisimiya ei
4Go eina monde rando rando pongola paisimiya Keriso para kone rulaisimiya wenaalimi mo Godena epe angele la eiri paisimiya. 5-6Pilipimi andaa ree anda mo Sameria andasu nane puma Kerisona angele mo wenaalinu para walisaya. Gupuma mo wenaalimi nipumi lisaya angele pangoma pange na-andoaisimiya einu wenaali nimumi andomare raayome kone komea kone siala ara Pilipimi lisaya angele waru pangisimiya.
7Wenaali raayona lo para pirisimiya koae remonu e wi lapale opalumbepe puma popisimiya ei pange lewa lewa puma pora pope-nae wenaali raayo pange angena pope ana na-pi wenaali raayo pange rekisimiya ei andisimiya. 8Go einu andoma go Sameria andasu para rana waru andaai komoaisimiya.
9Gupisimiyapare ali mendana bi Saimonore, mo anda nane ambala pua ara yaisa soko aunu pa eiri pamuala ara mo Sameria andasu wenaalina lee ma-opada arare nipumi gupisaya eimiri nipu ako liala ara andaa ali alua, kone wisaya. 10Mo bi wia wenaalinu raayome pange bi na-wia wenaalinu raayome pange mo yaisa soko ali nipuna angele pangoma nipuna pisaya ei andala ara lalore, Go alina biri Godena puri waru pale ei yana-ae, lisimiya. 11Mo alinumiri mo yaisa soko alimi naare raayo puaisimiya eimi nimuna lee opo waru andaai siala pula ara pange nipuna angele pangala pisimiya. 12Gupisimiyapare Pilipimi mo Wenaalinu para Godena Ki Rambuao-aya Eina pange Yesu Kerisome epe angele pua walisayandare gore Kerisona bina pumare wenaali raayome baparaisi au pisimiya.
13Saimono pange Godena angele misaya. Gupuma baparaisi au puma Saimono pange Pilipi lapo ara mo na-andoaisimiya einu pange pena aunu andomare lee opaminyambepe pisaya.
14Gupuma mo Diurusaleme ree anda para aisimiya Yesumi angele ma-puao-aeme alinumi Sameria andasu wenaalimi Godena angele mealeme angele pangomare Pida Dioni laapo nimu para Pulupa, loma rapaisimiya.
15Gupuma monde Pida Dioni laapo Sameria anda opapala pumare mo Keriso para kone rulaisimiya wenaalinu rambameala ara Epe Yaakopi Sipiridi minyayanda yainya waru pua pisipiya. 16Epe Yaakopi Sipiridiri mo wenaali para ambe na-ipisaya dinare mo baparaisi au pisimiya ei pange Reali Yesuna bi komeana baparaisi pisimiya. 17Go eina Pida Dioni laapome niipu laapona kimi mo wenaalina kaluna siamba ara yainya pisipiyandare mo wenaalimi Epe Yaakopi Sipiridi misimiya.
18-19Gupuma Saimonome mo Yesuna angele ma-puao-aeme alinumi mo Keriso para kone rulaisimiya wenaali para ki wisimiya eina Epe Yaakopi Sipiridi ipisayanda andisaya. Nipumi Pida Dioni laapo para muninu ma-puma sia ara lalore, Neme pange na ki ali mendana dona sulandare Epe Yaakopi Sipiridi minyadoa, lisaya. Go puri pale einu menda giae, lisaya.
20Go lisayapare Pidame nipuna angele yango liada ara lalore, Godeme pakama giala alere nena konemere kambola kone siale eimi nee pange nena muni pange mendame koyainyae, lisaya. 21Go pili eina nee naa rapu na-ae, nena pu para ana na-pi kone suma Gode para pereke pereke au piliae, lisaya. 22Go eina koae au pele eina nena pumi kone menda perekeyao sumare yainya pape. Realimi nena koae kone wili einu pa ma-epeainya yainya pape, lisaya. 23Neme nee andaloparere kundipa kone wi alenu ande nono pia, lisaya. Go pea eimi nena koae au pele eimi nee rongaoma wia, lisaya.
24Saimonome Pida Dioni laapo para lalore, Go angelenu ni para epapana Realimi ni rambaminya niipi laapome yainya pipape-ae, lisaya.
25Gupuma Realina angele Pida Dioni niipu laapome walala ara la alala pula arare mo Diurusaleme ree anda nane wala perekeya porana pula ara Sameria andanu para pange go epe angele wala eiri paisipiya.
Pilipimi Idiopia andasu nane aoma andaa ali para epe angele la alisaya ei
26Pilipimi gupisayapare Realina eindiolome nipu para lalore, Rekoma mo Diurusaleme ree anda para sia pea pora Gasa ree anda nane pea pora naneyame puae, lisaya. Go porare ora weambi pi su para pea porae. 27-28Gupuma Pilipi rekoma paisaya. Mo porana Idiopia ali nipuna malipu konapu ru meae ali komea andisaya. Mo Idiopia andasu andere-aisaya Kalu Wena nipuna bi Kandasi nipuna muni raayo andere-ao-aisaya ali porana nipuna andasu nane polame paisaya. Mo aliri kawere waruma kope andima osi menana angaa para andima yola penaloma mo Diurusaleme ree anda Gode repara alinau puaisimiya andaa anda Gode para yainya pula pupuma nipuna andaa pupula ara pisaya. Mo kawere para piru ara Godeme lea angele pangoma wenaali para la ma-aloaisaya Godena poropedi ali Aisayame wape pi ei yarepeala pirisaya. 29Gupuma mo Epe Yaakopi Sipiridimi Pilipi para lalore, Mo osi mename yola pupula kawere repara puae, lisaya. 30Go eina Pilipi alo puma mo ali para paisayapare mo alimi mo Godena poropedi ali Aisayame wape pi ei yarepeala piri ei pangoma lalore, Nena go yarepeale angelena reere kone sialepae, lisaya.
31Mo alimi lalore, Mendame na-wale-ainyare akipuma kone sianoya lalepae, lisaya. Gupuma mo alimi Pilipi para lalore, Go ni pi para lapuao pirapana ipuae, lisaya. 32Monde alimi mo Godena angele wia bukana wisaya angele yarepeala pirisaya.
Nipuri sipisipi mena duameya yola pupula ei
mandana, lisaya.
Gupuma mo sipisipi menasimi mo sipisipi mena
iri runguluaya alina lee wili nane epa arare
angele na-le, angaa rambula aisaya rupa
nipumi angele menda na-lisaya.
33Nipuri ande andaa ali aisaya eiri ma-lopomare
angele rando rando loma angele yokanali
epe rupa na-pisimiya.
Gupuma wenaalinumi nipuna mandu rangala pae
wenaali menda na-aisaya eimiyalore
wenaali menda para na-la deme.
Akepeandare nipuna endoaya eiri go suna
pa na-wi ora pereyaisaya, lea.
Monde alimi gurupa yarepeala pirisaya.
34Gupuma monde andaa alimi Pilipi para lalore, Go Godeme lea angele wenaali para Godena poropedi aliri api para dapae, lisaya. Nipu para le dapae o menda para dapae, lisaya. 35Go lisayanda Pilipimi nipuna angaame gonde yarepeande Godena angele wia buka angele para kini pu ma-lalore, Yesu Kerisona ora epe angele la alisaya. 36Ambiare mo pora pupula ara ipa para opapala pumare mo andaa alimi lalore, Ande ipa gondae, lisaya, Nina baparaisi pula pea eiri rudu apimi deapae, lisaya. 37Gupuma Pilipimi lalore, Neeme nena pumi kone rulalindare neme baparaisi au palua, lisaya. Gupuma mo alimi lalore, Nemere Yesu Kerisore Gode nipuna Naki ora aya kone rulayo, lisaya.
38Gupuma mo andaa alimi monde osi mename yola penaya kawere waruma yola pena lisayale andere-aisaya ali para lalore, Gopare ae, lisaya. Gupuma mo ali niipu laapo ipa para puma Pilipimi monde ali pua baparaisi paisaya. 39Go paisayandare mo ali laapo mo ipa minyapalaoma pupula-ainya Realina Sipiridimi Pilipiri epa wangepu ramba ma-paisaya. Gupisayanda monde baparaisi paisaya alimi Pilipi ora wala na-andisaya. Gupuma monde ali raname komapale nipuna anda paisaya. 40Gupisayapare Pilipi Asododi anda para aoma pua eiri pula ara ree anda raayo para go epe angele wala eiri Sisaria nane paisaya.
Tällä hetkellä valittuna:
Aposolo 8: POLENT23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.