Матвей 8
8
Проказасо сэредицянть шумбралгавтомась
1Зярдо Иисус валгсь пандонть лангсто, мельганзо тусть пек ламо ломанть. 2Вана мольсь ваксозонзо проказа ормасо сэредиця, пульзясь икелензэ ды мерсь: «Азоро, улиндеряй мелеть, мон Тонеть ванськавтован».* 3Иисус венстизе кедензэ, токизе сонзэ ды мерсь: «Ули мелем, ванськадт!» Сэредицясь сеске ванськадсь орманзо эйстэ. 4Иисус мерсь тензэ: «Вант, киненьгак теде иля ёвтне. Азё попнэнь ды ванкшновтык прят. Теде мейле кандт Пазонтень казне. Истя эряви теемс Моисеень Коень коряс. Теньсэ тон невтьсак ломантненень эсь шумбралгадомат».
Римень сядонь прявтонть важонзо шумбралгавтомась
5Зярдо Иисус совась Капернаум ошс, мольсь ваксозонзо Римень сядонь прявт ды энялдозь Тензэ 6мерсь: «Азоро! Кудосо монь важом* токазь катар ормасо#8:6 важо – слуга; катар орма – паралич, мадезь ашти, вельть пек майси-пишти». 7Иисус мерсь тензэ: «Мон сан, шумбралгавтса сонзэ». 8Сядонь прявтось каршонзо мерсь: «Арась, Азоро, мон Тонь коряс истямо вишкине ломанян, виздян натой совавтомс Тонь эсень кудос. Ансяк ёвтак вал, ды важом нейке пички. 9Мон монськак прявтонь кедь ало аштиця ломанян, ды монь кедь алояк аштить ушмант. Зярдо кармавтан вейкентень: “Азё!” – сон моли. Омбоцентень кортан: “Сак тей!” – сон сы, ды зярдо эсь важонтень мерян: “Теик сень!” – сон тейсы». 10Неть валтнэнь марязь, Иисус пек дивазевсь ды мерсь мартонзо молицятненень: «Видестэ кортан тенк: истямо кемема зярс Мон эзинь вастне Израилень эрицятнень юткстояк. 11Кортан тенк: ламот сыть чилисема ёндо ды чивалгома ёндо ды ойсить Менельсэнть Инязорксчисэнзэ каванямонь столь экшс Авраам, Исак ды Яков покштятнень марто. 12А вана сеть, конатне ульнесть аравтозь Инязорксчинтень, ёртозь улить ушов, чопода таркас, косо сынь кармить авардеме ды пейсэст чикордомо». 13Мейле Иисус мерсь сядонь прявтонтень: «Азё кудов, улезэ теть кемемат коряс». Важозо секе часстонть пичкась.
Шумбралгавтнемат
14Зярдо Иисус сась Петрань кудос, неизе: сонзэ низанязо мадезель, теке палсь толсо. 15Иисус токизе аванть кедензэ, ды ормась кадызе сонзэ. Авась стясь ды кармась сынст каванямо. 16Кода чизэ чопотетсь, ветясть Иисуснэнь идемевсень колавт ламо ломанть. Сон апаро оймеялтнэнь валсонзо панинзе, ды весе сэредицятнень шумбралгавтынзе. 17Истя топавтовсть Исайя пазмарицянть икелев ёвтавт валонзо:
«Сон саинзе минек орманок Эсь лангозонзо
ды менстимизь минек сэредьксэнек эйстэ».
Адя мартон!
18Зярдо Иисус неинзе перьканзо промозь ламо ломантнень, кармавтсь Эсь тонавтницянстэнь печтямс эрькенть омбоце пелев. 19Сестэ сась ваксозонзо Койс вейке тонавтыця ды мерсь Тензэ: «Тонавтыця! Мон туян Тонь мельга, ков Тон илязат моле». 20Иисус каршонзо ёвтась: «Ривезтнень ды менель нармунтнень улить пизэст, Ломантнень Цёранть жо арась тарказо, козонь чиремтевлизе прянзо». 21Лиясь, кона ульнесь Сонзэ тонавтницякс, пшкадсь тензэ: «Азоро, нолдамак монь васняяк кудов тетянь калмамо». 22Иисус каршонзо мерсь: «Адя Монь марто; кадык кулозтне эсь кулозест сынсь калмасызь».
Иисус лоткавты давол
23Иисус озась венчентень, мартонзо озасть тонавтницянзояк. 24Апак учо эрькенть лангсо кепететсь пек виев давол. Венчесь саевиль ведьвелявкстнэнь алов, ансяк Иисус яла удось. 25Сестэ тонавтницятне мольсть ваксозонзо, стявтызь Сонзэ ды мерсть: «Азоро, идимизь минек, – эль ваятано!» 26Иисус каршост мерсь: «Мекс тынь истят пелицят? Вай, кодамо аламо тынк кемеманк!» Мейле Сон стясь, лоткавтынзе варматненьгак, ведьвелявкстнэньгак, ды теевсь пек сэтьме. 27Тонавтницятне абунгадозь кортасть: «Кие Те истямось, конань эйсэ варматнеяк, ведьвелявкстнэяк кунсолыть?»
Идемевсень колавтонь шумбралгавтомась
28Зярдо Иисус сась эрькенть омбоце пелев, Гергесань масторс, вастызь Сонзэ идемевсень колавт кавто ломанть, конат лиссть калмосто*. Сынь вельть азаргадозельть, секс се кияванть яксемс киньгак а сатыль смелчизэ. 29Сеске сынь серьгедсть: «Иисус, Пазонь Цёра, мезе Тонеть эряви минек пельде? Аравтозь шкадо икеле Тон сыть тезэ минек пиштевтеме?» 30Сынст эйстэ а васоло вановсь тувонь покш стада. 31Идемевстне энялдсть Иисуснэнь: «Минь содатано: минек Тон паньсамизь. Кучомизь сестэ тувонь стадантень!» 32Сон мерсь тенст: «Азёдо». Сынь лиссть неть ломантнестэ ды совасть стаданть потс. Сеске весе тувонь стадась сэрей чирестэнть кирнявтнесь эрькес ды ваясь. 33Стада ваныцятне ношкстасть. Сынь чийсть ошов, косо ёвтнизь весементь, мезе ульнесь ды мезе теевсь идемевсень колавтнэнь мартояк. 34Сестэ ошонь весе эрицятне лиссть Иисусонь каршо. Зярдо сынь неизь Сонзэ, пек энялдсть Тензэ туемс сынст ёнкссто.
Tällä hetkellä valittuna:
Матвей 8: ОВ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Библиянь ютавтомань институтось,
Хельсинки 2006