yuhanna 1
1
aza 1
ŋeḏi kwɔnkwɔnŋw
1kwɔnkwɔn eṯi ŋiɽaŋal ŋir yilim nanni, na eṯi ŋiɽaŋal ŋir yilim nanni nani gwu Allah, ner eni Allah. 2na ŋundu-ŋa Allah yi ner orɔ linani duŋw kwɔnkwɔn. 3nuŋw orɔ kwuruwa kwɔmne tatap, na kwɔmne ere kwere kwuruḏelu oɽeny mac, kwiira ŋunduŋwu-na. 4eṯi kwɔmne tatap kwuruḏelu miiḏi ŋimiiḏa ŋi ŋuŋun, na ŋimiiḏa ŋu orɔ fori kweḏi lizigwunaŋ. 5eṯi fori ṯiŋana lu kirim-na, na eṯi kirim ere rii too.
6na kwor kwete ruwene lu kwuza Allah, kweni yuhanna. 7kwunderṯa kwumila eḏi ŋi unḏi ki, eḏi zi ŋi unḏizi ki ŋeni fori, mindaŋ eŋgir ma orɔ tatap leḏi ṯəmna ŋundu ŋgi. 8kwiti kwiri ŋundu fori ŋgwu mac, lakin nuŋw ila eḏi zi ŋi unḏizi ki ŋeni fori. 9fori kwir rerem, kweṯizuɽi lizi ndendeṯ, ŋgwa kwinḏi ki ṯurmun-na ki lomur ṯa kla. 10kweṯinanni ki ṯurmun-na, lakin na ṯurmun, ṯiketine ŋundu ŋgi, ṯime ŋunduŋwu. 11nuŋw ila ki duənu kwuŋwun, na leni luŋwun ner ta ere enji kiloɽu-na mac. 12lakin kla tatap limenji ŋunduŋwu kiloɽu-na eḏ inyizi ŋunduŋwu nana, linderṯa limɔŋw zi inḏeḏa zulṯa eḏorɔ nyor nyeḏi Allah, 13nyeḏi ṯa ŋelŋe ŋiti ŋir ŋeḏi ŋin mac, ŋiti ŋir ŋeḏi zurum kweḏi aŋna mac, ŋiti ŋir ŋeḏi ṯugwor ṯeḏi kwor kwere mac, lakin ŋeḏi Allah ṯuɽuk.
14na ŋiɽaŋal ruwene lu ŋir aŋna, nuŋw ila eḏi nanni deŋgeri-na, ner ecice, nyiŋa, ŋiniṯi ŋuŋun, ŋir kaka ŋiniṯ ŋeḏi Tor tutuput tinḏi nani gwu Papa, teḏi ṯimeca-na ṯeḏi ŋimɽi ŋir minmin, na ŋirlalu ŋir minmin tɔk. 15eṯi ŋi yuhanna unḏi ki ŋeni ŋundu, nuŋw ofna, nuŋw aru ŋwu: kwunderṯa kwari nyi gi ŋwu, ŋgwu kwinḏi kwukwaḏaḏinyi, kwunderṯa kwuṯemḏinyi la, kaka nannuŋw gwu kwizatuk, iti ilŋiiḏir nyi gwu kinna mac. 16na ŋeḏi ṯimeca ṯuŋwun ṯeḏi ŋimɽi ŋir minmin, timer afi nyiŋa tatap, kḏa ṯeṯikindeḏi dɔk dɔk. 17kaka mer zi gwu inḏeḏa kuruu muuza ŋgi, lakin na ṯimeca ṯeḏi ŋimɽi ruweḏe lu ŋirlalu ŋi, Yecu ŋgi kweni Kwruztu. 18kwizi kwende kwere kwiza Allah lamin lere eḏelŋece ŋunduŋwu. lakin, na Tor teḏi Allah tutuput tukwazuŋw lu, teṯinanni Papaŋw ki ṯugwor, tinderṯa timɔ ruwezi ŋunduŋwu lu.
ṯunḏiza ki teḏi yuhanna kweni baptizt ŋeni Yecu
19ŋinderṯa ŋir ṯunḏiza ki ṯeḏi yuhanna, ma gwu yahuuḏ yeḏi urzaliimŋw uza yiziiza lizi li lir laawi nanuŋw gwu eḏuṯizelu, eḏeca ŋwu: ŋa, a kwiri ṯaŋ? 20nuŋw andazi, nuŋw ere nyindini mac, nuŋw zi eca ŋwu: nyi kwiti kwiri Kwruztu mac. 21ner uṯizelu kwokwony: ta na ma orɔ pa aḏa? a kweni iliiya? nuŋw aru ŋwu: nyiti kwiri tɔk mac. a kwiri kwiɽi a? nuŋw zi eŋnici, nuŋw zi eca ŋwu: beri. 22ner eca: na ma eni piza eya? mindaŋ enyi ŋi ma aɽi ŋete, enyji andaci kla luzanyji. ta na ma ari ḏa pa ki rɔgwɽɔ rɔŋwa? 23nuŋw zi eca ŋwu:
nyi kwiri ṯɔgwɽɔ ṯeḏi kwete kwari kwuḏer-na ŋwu:
rillizer Kwelenyi ṯay lu,
kaka andiza gwu kwiɽi kweni izaya. 24na lɔkwɔ lir lifarzi limerzuza, 25ner uṯizelu, ner eca ŋwu: na a kwɔḏɔ kweti baptazi pa, iti ur ŋa gwu Kwruztu mac, ya iliiya, ya kwiɽi tɔk mac? 26nezi yuhanna eŋnici, nuŋw zi eca ŋwu: nyi kweti baptazi ŋaw ŋi. kwete kwirilli daŋgal-na, kwiti kwilŋiiḏi ŋa mac, 27ŋgwu kwukwaḏaḏinyi. nyi kwende kwofḏana edi kedici ŋunduŋwu nyamin nyeḏi yiḏwan. 28na kwomne ŋgwu errini beyṯanya, urdunŋw ṯoɽu ṯi la, weṯi gwu yuhanna baptazi.
29ma ŋurpu ŋgwa orɔ, nuŋw eze Yecuŋw kwilaḏa nana, nuŋw ari: izarṯi, Ṯirany teḏi Allah ca kra la, tidimica ṯurmuna ŋikyaŋi kiṯay. 30kwunderṯa kwari nyi gi ŋwu: ŋgwu kwukwaḏaḏinyi kwete kwuṯemḏinyi la, kaka nannuŋw gwu kwizatuk, iti ilŋiiḏir nyi gwu kinna mac. 31nenyi ta, nenyi ere elŋece ŋunduŋwu mac, lakin ne nyi ta ila eḏi baptazi ŋaw ŋi, eḏi zi ruwenizi izrayiila lu ŋeni ŋundu. 32na yuhanna unḏi ki, nuŋw aru ŋwa: nyi kwumeze Ṯigɽima ṯidapḏalu kilerena kaka kwurru, nuŋw gwu omi-na. 33nenyi ere elŋece ŋunduŋwu mac, lakin ŋgwa kwuzanyi eḏi baptazi ŋaw ŋi eca nyuŋwu ŋwu: ŋgwa kweze kwoɽaḏi gwu Ṯigɽim la, muŋw omi ŋunduŋwu-na, kwunderṯa kweṯibaptazi Ṯigɽim ṯi tirlinelu ter. 34kwumenyi eze, nenyi ŋi ma unḏi ki, nenyi ari: Tor teḏi Allah tiri.
limeḏgen leḏi yuhanna-ŋa Yecu ŋali
35na kwokwony, ma ŋurpu ŋgwa orɔ, na yuhanna-ŋa rilli limeḏgen li nden, 36nuŋw ece Yecuŋw kwillalu, nuŋw aru ŋwu: izarṯi, Ṯirany teḏi Allah. 37na limeḏgen luŋwun nden niŋnaci, andizaŋw, ner kwaḏiḏa Yecuŋw. 38na Yecu orlalu, na muŋw zi eze likwaḏaḏi ŋunduŋwu, nuŋw zi eca ŋwu: aḏa kwiri kwunaŋnaŋa? ner eca ŋwu: rabbi, (ŋeni ŋwu, muallim,) a kwunani kinna ṯaka? 39nuŋw zi eca ŋwu: ilar mba, ta ma eze. ŋwu ṯaŋwu, ner ele, ner eze ezir wunanuŋw gwu, ner li nani ki lamin ṯa kla. na zaa orɔ kezni kaka kwaɽŋan kirakalu. 40andaraawuz, kwirir zimaan buṯruz gi ŋiaŋga, kwir kwete kweḏi kla lir nden limɔniŋnaci yuhannaŋw, ner kwaḏiḏa Yecuŋw. 41nuŋw inḏa eŋgen kweni zimaan kerreny, nuŋw eca ŋwu: nyiŋa limɔ ma inḏa maziyyaŋw, (ŋeni Kwruztu). 42nuŋw mulḏaḏa Yecuŋw nana. na Yecu ece tɔktɔk, nuŋw eca ŋwu: a kweni zimaan, tor teḏi yuuna; la ŋa eca, zafa, (ŋeni buṯruz).
43ma ŋurpu ŋgwa orɔ, na Yecu naŋni eḏele jaliil, nuŋw inḏa fiilibbuzŋw, nuŋw eca ŋwu: kwaḏiḏanyi. 44na fiilibbuz orɔ kweḏi beyṯzayḏaŋw, kwir balaḏ kweḏi andaraawuz-ŋa buṯruz gi. 45na fiilibbuz inḏa naṯanayiilŋw, nuŋw eca ŋwu: kwumenyi inḏa ŋgwa kwari gi muuza kuruu-na, na ŋuluḏizi liɽi tɔk, Yecu kweḏi nazraŋw, kwir tor teḏi yuzif-ŋa. 46na naṯanayiil eca gwu: na kwɔ pa, ŋgwa manja kwere kwizaw kweŋgi ruda nazra-na? na fiilibbuz eca ŋwu: ilamba, eze. 47na Yecu eze naṯanayiilŋw kwilaḏi nana, nuŋw gi aru ŋwu: izarti, kwizrayiil kwir ŋgwu rerem, kwiti kwedi tejmeti-na tere mac. 48na naṯanayiil andaci Yecuŋw, nuŋw eca ŋwu: a kwilŋiicanyi aŋgwuru? na Yecu eŋnici, nuŋw eca ŋwu: kinaŋw, iti ornutiŋa fiilibbuz kinna mac, nani ŋa kwoḏa kuṯu, na ŋa ta eze. 49na naṯanayiil eŋnici, nuŋw eca ŋwu: rabbi, a kwiri Tor teḏi Allah, a kwiri Kweleny kweḏi izrayiil. 50na Yecu eŋnici, nuŋw eca ŋwu, kaka andicaŋa gwu, ecaŋa gwu ŋwu: nyi kwizaŋa kwoḏa kuṯu, ta eḏi ṯəmna? a kweze ŋilima ŋiṯemḏizila ŋu. 51nuŋw eca ŋwu: nyi kwecaŋazi ma ŋwa rerem, a leze lerya lidiŋelna kworo, na limaleyka leḏi Allah lanḏaḏi la, lundaḏa lu, ki Tor la teḏi kwizigwunaŋ.
Tällä hetkellä valittuna:
yuhanna 1: KIB1967
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Nuba, Koalib Ngirere New Testament © First published by the British and Foreign Bible Society in Khartoum in 1967.
