मेथा 11
11
येशु धाङ ठी़सो़खेन योहान्ना
(लुका ७:१८-३५)
1येशुगी राङगी ङेने च्युङङीला ॱलोप्तो़न जेसारती, खोङबा होदेने होदे युगी ग्याजाक्याला, क्षो़ तो़न्ये धाङ का स्येयेला फेप्पालाक।
2धा योहान्नागी मास्यीकागी क्षाक्लेक्याई कोरला चो़न्खाङदु घोरती, खी़ खोरी ङेनेक्याला येशुचारु लो़न श्युरु झावालाक। 3धेनी खुङक्याई खोङबाला श्यी़वालाक, “फेप्ये हीन्गीनगो खेराङ राङ हीने, याङमेना हेक्या श्येम्माला घुक्कुले?”
4येशुगी कालेन ॱनावालाक, “सोङला खेक्याई घोरकीन धाङ थोङगीन देक्या, योहान्नाला स्यो़क। 5श्याराक्याई थोङी, श्याक्योकक्या घोबा चुई, जेनेक्या दाक्यी, आमच्योक मेघोरकीनक्या घोरी, स्यीगीनक्या लाङी धेनी उटेक्याला ताम्शाङगो स्येदी। 6ङाला तेरी धेपाने मेलोक्कीनक्या, झ्यीलाप क्षे हीन।”
7धा योहान्नागी ङेनेक्या लोक्ती, येशुगी मीछोकक्याला योहान्ना कोरला कामो़न ॱनावालाक, “खेक्या रीतोङदु घी तारु सोवा? ॱलुङबुगी घुगीन चाला तारु सोवे? 8हाना खेक्या घी तारु सोवा? घो़ ज्याम्बु घो़न्गा मी च्यीकला तारु सोवे? घो़ ज्याम्बु घो़न्गा मीक्या ग्यावुगी ग्याखाङक्याला धेतालाक। 9धा हाना खेक्या घी तारु सोवा? ॱङो़नस्येखेन च्यीकला तारु? देरे हीन्ना, ङा खेक्याला ॱनाहीन, ॱङो़नस्येखेनने ल्हाकगोला तारु सोवालाक। 10देरे ढीक्टा दे खी़ कोरला राङ लाक,
‘तो़दाङ, ख्यो़ने एन्ला, ख्यी़ फेप्लाम डाढीक झ्यीयेला,
ङा ङी भाङछेन ख्यी़ दोङदु ताङाहीन।’#मालाकी ३:१
11“ङा खेक्याला धेन्पाराङ ॱनाहीन, केमीक्याला केक्या क्याई नाङने, ठी़सो़खेन योहान्नाने क्षे सु च्यीया मेक। हीना नाम्खे ग्यासीगी नाङला च्युङस्योक दे, खोने क्षे हीन। 12ठी़सो़खेन योहान्नागी धी़चो़ने, धान्दा थुक्पे नाम्खे ग्यासीगी दुक्पु ङ्याङ हो़तालाक धेनी देला दुक्पु ताङगीनक्याई रुप्ती ठोक्पालाक। 13घीझ्येरी ॱनाना योहान्नागी धी़चो़ थुक्पे, ॱङो़नस्येखेन घीरी धाङ क्षो़ठीमगी देगी कोरला ॱङो़न तो़न्बालाक। 14खेक्या खेलेन्ङी दो़ना, एलीया फेप्ये हीन्गीनगो खोराङ लाक।#मालाकी ४:५,६ 15ङेन्ये आमच्योक हो़गीनक्याई ङेन्दास्योक।
16“धा दे मीराप देला ङा घीमुला दुरये? देक्या नी, ठोमक्याला धेती राङगी रोवाक्याला देरे भो़गीन टुवाक्या च्योक्रे लाक,
17‘हीकी खेक्याई क्षीला ॱलीङबु तावी, हीना खेक्या घार चेगी मीदुक,
हेक्याई दुक ॱलु तावी, हीना खेक्या दुक ॱरुङगी मीदुक।’
18“घीझ्येरी ॱनाना योहान्ना शेरी धाङ थुरी#११:१८ खो ॱङ्युङने ॱरुङालाक धेनी घुन्क्षाङ ॱमीथुङालाक। मायोवालाक धेनी खुङक्याई, ‘खोला डे श्युक दुक।’ ॱनेवालाक। 19मी-भु नी शा-थुङ झ्येरी होवालाक धेनी खुङक्याई, ‘खोला तो़दाङ, शान्डे धाङ क्षाङदुवा धेनी ठा धुगीन धाङ धीक्चेनक्याई रोवा।’ ॱनेरी ॱनालाक। हीना स्येराप दे होदेगी लेगागी थोक्ने, याङदाक्पा हीन्गीनगो खुङ केलालाक।”
ग्यो़पा मीझ्यीगीन ढोङखेरक्या
(लुका १०:१३-१५)
20येशुगी याम्क्षेनगी क्षाक्ले माङक्षे जेजा, ढोङखेरगी मीक्याई सेम माग्युरकीन झ्येरी, खोङबागी खुङक्याला काको़न सुवालाक, 21“ख्ये कोराजीनक्या ॱङ्याली, ख्ये बेथसेदाक्या ॱङ्याली। खेक्याई दोङदु झ्युङगीन ॱहाङसागीन क्षाक्लेक्या, ताएर धाङ सीदोनदु झ्युहो़ना, खुङक्या एम्मानेराङ चाफे घो़न्दी, घोक्था ढी़री खोरी धीक्पा पारी सेम ग्युरहो़टु। 22हीना ङा खेक्याला ॱनाहीन, ठीम चेगीन ङीमाला खेक्याले ल्हाक, ताएर धाङ सीदोनगी ॱनेछुला शो़पा श्येगीलाक।
23“धेनी खे काफारनाहुमगी मीक्या राङ-राङला नाम्खे श्यीङखामदु ताक्टु ॱनेरी, सामी हो़ती? खेक्या ॱङ्यावागी तीङला पाप्कीलाक। घीझ्येरी ॱनाना खेक्याई खोक्दु झ्येजा ॱहाङसागीन क्षाक्लेक्या सादोमदु झ्युङहो़ना, धीरीङ थुक्पे होदे ग्याजागो ॱनेहो़टु। 24हीना ङा खेक्याला ॱनाहीन, ठीम चेगीन ङीमाला, खेक्याले ल्हाक सादोमला शो़पा श्येगीलाक।”
थाङ क्षेगीनक्याला ङासु
(लुका १०:२१-२२)
25होदे घाङला येशुगी सुवालाक, “के याप, नाम्खा धाङ सा ॱङीगी चोवो, खेकी दो़न दे खेपाक्या धाङ ॱहाघोगीनक्याने ॱयीप जेदी, टुवा च्योक्रेक्याला ॱङो़न्दा जेदी, खेराङला ङा तो़पा पुलाहीन। 26लाक याप, खेराङगी थुकोङ देरेलाराङ ग्येवालाक।
27“ङी यापगी ङाला घीरी ॱनाङा हो़तालाक। यापगी माना सेला सी़या ङो ॱमेस्येलालाक धेनी से धाङ सेगी यापला तो़न्ये दो़पा हो़गीन मीक्याई माना, खोङला सी़या ङो ॱमेस्येलालाक।
28“ख्ये थाङ क्षेछा धाङ खु क्षेगी ॱनेम्दी धेता घीरी ङीचारु स्योक, ङी खेक्याला ङासु तेरु। 29ङी ॱङ्यास्यीङ खुर धेनी ङाने झ्योङ घीझ्येरी ॱनाना ङा सेमला शाङा धाङ ॱङ्यामच्युङ हो़क धेनी खेक्याई सेमक्याला ङासु थोप्कीलाक। 30घीझ्येरी ॱनाना ङी ॱङ्यास्यीङ लेल्हा धाङ ङी खु याङा हो़क।”
Tällä hetkellä valittuna:
मेथा 11: LOY
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Wycliffe Bible Translators, Inc. and Nepal Bible Society