Ioane 1
1
1Pani va’au unu ea pani paku ai Voa uarokoanave, Voa Eloi kiripai uarokoanave, Voa Eloi uarokoanave.
2Pani va’au unu ea pani paku ai Eloi kiripai U uarokoanave.
3Awku uriria i U eiakei’inave; uku U e awku uriria rokona, rokoa awku uku e eria mi’ina.
4U laru ai Rokoa uakei’inave; kurua Rokoa a’a anu Pamea kei’inave.
5Pamea muru ai akuruli’ina; muru kurua Pamea awkoni‐awkavape.
6A’a Eloi mere okaiviriakei’inave nawi Ioane oroiakei’inave.
7U ione a’a anenave, uku ioneliai Pamea eiai, uku a’a uriria i U mere pirimaroakoane‐iai.
8Kurua Pamea u a‐kei’inavea, u okaiviriakei’inave ioneliai uku kurua Pamea eiai.
9Pamea miki U ane U a’a kavakava pani va’au ai aneliviai anelia pamea‐aw?-?kana.
10Pani va’au ai U uarokoanave, pani va’au i U eakei’inave, pani va’au a?-?ipa‐ulau’unavea.
11Una awku ai U anenave, Una a’a umu‐a‐ai’?-?inavea.
12A oro uriria umu‐aiane euna, oro ane oro Una nawi pirimaroakona, U evere’eiane euna Eloi inu ukua‐mere evere’eai:
13I Eloi inu umu mere oro Una ukua‐mere kiniakei’inave, i omo kiri a’a mere peo, i omo umu mere peo, i omo mekai inu umu mere peo.
14Voa a’a anenave, enei awkono avao ai pokoinave ane, (Una evao’evao enei inamu‐oinave, Mai inu naumuki Mere enu evao’evao), la’aruku, miki ane, U evopoakei’inave.
15Uku U eiai Ioane ioneli’inave, erau voa araro kurunave ane, Ei a’a U aku uku U eiai nai erau voa kurunave, U nai neko ai aneliviai anelia U nai paku ai aiakeia’ane euna: uku na pani paku ai U uarokoanave.
16Uku Una veruku mere enei uriria la’aruku, la’aruku, mo, miane euna.
17Uku i Mose Vupu awkuakei’inave, la’aruku, miki ane, i Iesu Keriso mere anenave.
18A’a anu inamu Eloi inamu‐oiape; naumuki Mere Mai inu ukari ai keina, U Eloi ipawkiane euna.
19Isaraela a’a omoro a’a, Levi a’a ane, Ioane ai ekaivirinave Ierusalema mere, erau voa veve’eai, Ni koana? Ioane enu ione voa eire.
20U voa iki‐e’enave, voa vaua‐a‐awkanavea, u erau voa kurunave, Nai Keriso peo.
21Oro erau voa veve’enave, Ni koana? Ni Elia ana? U kurunave, Ai, nai Elia peo. Ni kurua laikorava a’a ana? U kurunave, Ai, nai kurua laikorava a’a peo.
22Oro erau voa veve’enave, Ni koana? Akine, enei kavani voa ekuane‐iai oro ane oro akaivirinave. Ni oiamakuru’i ni nane eiai?
23U erau voa kuruenave, Nai kurua a’a anu voa kekepere ai erau voa araro laealimakina, Iehova anu kapea anana‐ene kekepere ai, nai orau Isaia laikorava a’a anu voa evere’emakina.
24Oro ane oro ekaiviriakeiaka Parisea a’a kei’inave.
25Oro moawku erau voa veve’enave, Ni Keriso peane, Elia peane, kurua laikorava a’a peane, uku oiana ni bapatiso‐li’ina?
26Ioane erau voa kuruenave, Ere bapatiso nai li’ina: noro awkono avao ai Monou oina, noro a‐ipa‐ulaunakea;
27U ane U nai neko ai aneliviai anelia, nai ima peo Una rawre are naw uniai.
28Ei voa kuruakei’inave Betania ai, Ioridana iou anelai, iou ai Ioane bapatiso‐limakei’inave.
29Namai lare Ioane Iesu inamu‐oinave u ai anemakei’inave, u erau voa araro kurunave, Akoi’i, Eloi inu Mamoe‐ukua ioure, U ane U pani va’au unu namea iou‐miakana.
30U eiai nai erau voa kurunave, Nai neko ai Monou aneliviai anelia nai paku ai U aiakeia’ane euna: uku na pani paku ai U uarokoanave.
31Nai ipa‐ulauakape: a uku U ipawkiakeia’ane‐iai Isaraela a’a anu paku ai ere bapatiso‐limakina nai anea’ane euna.
32Ei ione voa awku Ioane erau voa kurunave, Avaea naku orau lilimakina pani muku mere nai inamu‐oiane euna, U upa mere kei’inave ane
33Nai ipa‐ulauakape: a U ikaivirinave ere bapatiso‐liai U erau voa kuruinave, U upa mere Avaea lilimakina, keimakina ane, ni inamu‐oiakana, U ane U Avaea Iaa bapatiso‐li’ina.
34Ei awku nai inamu‐oiane euna, nai ione a’a keina ane U Eloi inu Mere keina.
35Namai lare Ioane una aivara rere kiripai oimakei’inave;
36Iesu awpemakei’inave u inamu‐oiaka’ane, u erau voa kurunave, Akoi’i, Eloi inu Mamoe‐ukua ioure!
37Aivara rere una voa virinave, orere Iesu e’e’okanave ane.
38Iesu urukinave, U inamu‐eimakei’inave ane, e’e’okamakei’inave, U erau voa veve’einave, Norere oiamalaikora’i? Orere kurunave, Rabi e, (kurua nawi inu miki Amua) Ni eka’ama?-?pokoi’i?
39U erau voa kuruenave, Anene, norere inamu‐oiakana ane. Orere enanave, Una pokoia mako inamu‐oinave ane, U kiripai i?-?pokoinave kurua lare ai: lare upa mere pani ai orere U kiripai enanave.
40A’a rere Ioane enu voa viriaka, Iesu e’e’okavaka ane, a’a monou una nawi Anederea, u Simona Petero onu ovaki.
41Una airavaki Simona u pinai auinave, erau voa kurunave ane, Enei Mesia auiane euna, kurua nawi inu miki Keriso.
42Una airavaki Iesu ai u arekanave. Iesu inamu‐oiaka’ane, U erau voa kurunave, Ni Simona Iona anu mere: nawi Kepa niroiakeiakana, kurua nawi inu miki Petero, Rawre ane.
43Namai lare Betania ave’eai Iesu umuli’inave uku Galilaia eiei ai eleai, U Pilipo au‐awkunave, erau voa kurunave ane, E’e’ikane.
44Pilipo Betasaida a’a, Anederea, Petero ane, enu pai’iri ioure.
45Pilipo Natanaela au‐awkunave, erau voa kurunave ane, U eiai Vupu voa laru ai Mose kikirinave, laikorava a’a awku kikirinave, Iesu Nasareta a’a, Iosepa anu mere, enei auiane euna.
46Natanaela erau voa veve’enave, Ima awku Nasareta mere ama’ane’i? Pilipo erau voa kurunave, Anene, inamu‐oine ane.
47Natanaela U ai anemakei’inave Iesu inamu‐oinave, erau voa kurunave ane, Akoi’i, Isaraela a’a miki eire, u laru ai ewaea eria keina.
48Natanaela erau voa veve’enave, Eka’amali’i Ni ipa‐ilauna? Iesu erau voa kurunave, Pani paku ai Pilipo laea‐nilauaka’ane ni iri arau ai pokoiane, Nai inamu‐ni’inave.
49Natanaela kurunave, Rabi e, Ni Eloi inu Mere, Isaraela anu Amua.
50Iesu erau voa veve’enave, Uku Nai kuruninave, Nai inamu‐ni’inave iri arau ai ni amapirimaroakoa’i? awku mau’u eire, a awku ovara ni inamu‐oiakana.
51U erau voa kurunave, Nai kurunina kapoi, Neko mere ai pani muku auakeiakana, Eloi inu aivara‐avaea inamakina, lilimakina ane, A’a anu Mere upa mere, ni inamu‐oiakana.
Tällä hetkellä valittuna:
Ioane 1: IAR1920
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Published by the British and Foreign Bible Society in 1920.
