Yohan 1
1
Kristu nø Gvray í we
1Mòngkà nø nv̀mlat nv̀mpv́ngø àv́lshaq íe. Vrá, Mòngkà nø Gvray nv̀ng tiqdø àv́lshaq í nø̀, Mòngkà nø Gvray ni íe. #1Yh. 1:1-2; Yoh. 17:5; Dtn. 19:13 2Mòngkà nø nv̀mlat nv̀mpv́ngø Gvray nv̀ng tiqdø àv́lshaq íe. #Ksh. 8:22 3Vl dv́ngte shvngbe nø Àng taqkèní pv́n yàngà. Pá:nò dv́ngte nø Àng taqkèní mø̀í dø pá:nò we tiqpv̀n gø màvl. #1Kr. 8:6; Kol. 1:16-17; Heb. 1:2 4Àng vdòng taq nø gø̀nshaq vle. Vrá, gø̀nshaq yalòng nø vsv̀ng shvngbe dvpvt gálòng íe. #Yoh. 5:26 5Gálòng nø dø vdòngø svr daqì. Dø lù:ngí gálòng sv̀ng mvdv́ngkéò.#1:5 “Vto mvsháò” mø̀íni “maq mvdá:ngò” gø rø daqe. #Yoh. 3:1
6Gvrayí dvzv́r daqà we vsv̀ng tiqpè vle. Àng bø̀ng nø Yohan íe. #Luk. 1:13-17,57-80; Mat. 3:1; Mak. 1:4 7Vsv̀ng shvngbe nø àng taqkèní lvkv́m ra dø gálòng dvpvt shvkse wáshìlv́m dì daqì. #Luk. 3:3 8Àng vdè nø gálòng mø̀í. Gálòng dvpvt shvkse wáshìlv́m rvt wa dì daqì we íe. #Yoh. 1:20
9Vsv̀ng í dv́ngte sv̀ng vwanalv́m gálòng mvdø̀ng nø rvgaq tø̀m sv̀ng dì daqì. 10Àng nø rvgaq taq v̀l daqì. Rvgaq nø Àng taqkèní Gvrayí pv́n yà:ngà we ínìgø rvgaqí Àng sv̀ng màmvshá:lò. #Yoh. 1:3-5 11Àng nø Àng rvgaq sv̀ng di daqì nìgø, Àng vsv̀ngrìí Àng kaq màtoò. 12Íwe Àng bø̀ng kaq kv́m nø̀, Àng kaq vtoò dv́ngte sv̀ng nø Gvray àngcè ílv́m vko vkv́ng À:ngí zíòe. #Gal. 3:26 13Gvray àngcè ílv́m nø, vsà:ngí gà:lò yv́ngkèní mø̀í. Vsv̀ng shvrúngnøt nv̀ng gvcvtnøt kèní gø mø̀í, Gvrayí gà:lò yv́ngkèní wa íe. #Yoh. 3:5,6
Mòngkà nø shagóng í daqì we
14Mòngkà nø shagóng í daqì nø̀, nøngmaq nv̀ng tiqdø v̀l daqì. Àng ngø̀rdvgùng sv̀ng gø nøngmaqí yv̀ng yv̀ngshà. Welòng nø jejú nv̀ng dìnglòng dv̀nzø̀ng we Vpè Gvray Àngcè Lòngzàpèò ngø̀rdvgùng íe. #Esa. 7:14; 60:1; Luk. 9:32; 2Pt. 1:16,17
15Yohan nø Àng dangø shvkse wáshì nø̀ yadø vkiqe. “‘Ngà mèpvng di daq pè Àng nø, ngà mvdv̀m té ring pè íe, kadø íe wani ngà shini màvl dvgvp kèní Àng nø àv́lshaq íe,’ wvng nø̀ vzv̀ng kèní shø̀nò pè nø yapè íe,” wae. #Mat. 3:11; Yoh. 1:27,30 16Àng dv̀nshóng we jejú taqkèní nøngmaq shvngbeí nø, jejú mvdv̀m jejú lún bǿshà. #Yoh. 3:34; Kol. 1:19 17Kadø íe wani Dvrá lèga nø Moshi taqkèní èzí yv̀ngshà. Íwe, jejú nv̀ng dìnglòng nø Yesu Kristu taqkèní tuq daqì. #Bng. 34:1-28; Rom. 6:14; 10:4 18Gvray kaq yv̀ng dá:rò vsv̀ng nø kagǿ gø màvl. Vpè pøtpúmø vl nø̀ Gvray gø í pè, Gvray Lòngzàpèí mv̀ng Gvray sv̀ng chaqdvp dètan daqshà. #Mat. 11:27; Luk. 10:22; Yoh. 6:46; 1Tm. 6:16; 1Yh. 4:12
Yohaní Yesu dang shvkse wàò we
19Yerusalem kèní Yuda vsv̀ng shølshúrìí shvrúngshúrì nv̀ng Lewirì sv̀ng Yohan yv́ng dvzá:rò nø̀, “Nà nø kagǿ èíe?” wa røt bǿà kvt, Yohan nø yadø shvkse wáshìe. #Luk. 3:15,16 20Àng nø mvmashì, dèdè shǿnshì nø̀, “Ngà nø Kristu mvǿngà,” wae. #Dzr. 13:25
21Wekvt àngmaqí, “Íni, kagǿ èíe? Eliya èí má?” wa rø:tnò kvt, à:ngí, “Mvǿngà,” a:lòe.
“Nøngmaqí caì pè Kàdvtutshú èí má?” wa rø:tnò kvt à:ngí, “Mvǿngà,” a:lòe. #Mat. 17:10; Drd. 18:15; Yoh. 6:14; 7:40
22Wekvt àngmaqí, “Nøngmaq kaq dèzv́rvtshà rì sv̀ng kà vwv́ngalv́m dvpvt, nà nø kagǿ èí má? Nà vdè nø kadø èvlshìe má?” wa rø:tnòe.
23Yohaní, “Kàdvtutshú Esayaí shø̀n yà:ngà dø, ‘Kàngpè dvpvt tvrà mèdónganø̀ng,’ wa nø̀, rvgaq mvgung yv́ngø vkiq we kàshaq nø ngà ǿngàe,” a:lòe. #Esa. 40:3; Mat. 3:3; Mak. 1:3; Luk. 3:4
24Vrá, Parisi mvdò kèní dvzv́rshaq tiqmaqí, 25àng sv̀ng, “Wedø íni, nà nø Kristu wepè gø mèí, Eliya gø mèí, Kàdvtutshú wepè gø mèí nìnø, nàí pàwálv́m tì èløpmaòe?” wa rø:tnòe. #Mat. 21:25
26Yohaní, “Ngàí nø tì taq løpmangòe. Nàmaqí mèshánø̀ng we tiqgǿ nø nàmaq dvhø̀ø ripme. #Mat. 3:11; Mak. 1:7,8 27Àng nø ngà mèpvng dì daq pè í nø̀, ngà nø Àng híshvnam svnhǿng pǿna we vshuq wáshìlv́m gø màpǿng,” wa vtá:nòe. #Yoh. 3:26; Dzr. 13:25 28Yadv́ng pv̀n nø Yordan tì kupa nv̀msvr lap Betani rvwá Yohaní tìløpmaò yv́ng í yà:ngì.#Mat. 3:6,13
Gvray Vyv̀ngcè
29Mèpvng ni taq, Yesu nø àng yv́ngsv̀ng di ráì we Yohaní yv̀ng bǿà nø̀, “Èyv̀ngnø̀ng, rvgaq tø̀m mvrà lúashú pè Gvray Vyv̀ngcè nø yapè íe! #Yoh. 1:36; Esa. 53:7 30‘Ngà mèpvng di daq pè nø ngà mvdv̀m té ringe, kadø íe wani Àng nø ngà màvl vzv̀ng kèní àv́lshaq í yà:ngì,’ wvng shø̀nò pè nø yapè ni íe. #Yoh. 15:27 31Àng kagǿ í we ngàí gø mvshángò. Íwe, ngà dø̀ng rángà nø̀ tì taq løpmangò lòng nø Àng sv̀ng Israel dvcì kaq dvtanlv́m dvpvt íe,” wae.
32Vrá, Yohan yadø shvkse wáshìe. “Gvray Pvlàcè nø kaø dø muqlàng kèní lashì nø̀ Àng mvdv̀m narshì daqì we ngàí yv̀ngòe. #Mat. 3:16; Mak. 1:10; Luk. 3:22 33Vzv̀ng nø Àng sv̀ng ngàí mvshángò we, ngà sv̀ng tì taq tìløp dèzv́r pèí yadø èvle. ‘Vsv̀ng tiqgǿ mvdv̀mø Pvlàcè lashì nø̀ narshì daq we nàí èyv̀ng bǿò nìnø, wegǿ nø Shànshér Pvlàcè taq løpmashúpè íe,’ èvle. #Luk. 3:2; Mat. 3:16 34Yalòng sv̀ng ngàí yv̀ngò rvtnø̀ yapè nø Gvray Àngcèpè íe,#1:34 Shànshér Kàru tiqmaq taq “Gvrayí Rvcv́ngshaq Pè” gø wae. wvng shvkse wv́ngshø̀nge,” a:lòe.#Mat. 3:17
Yesuí coqcv́n nv̀mlat goò we
35Mèpvng ni taq rá Yohan nø àng coqcv́n vnípè nv̀ng rip la:ngí, 36Yesu divm we sv̀ng yv̀ng bǿà nø̀, “Èyv̀ngshò, Gvray Vyv̀ngcè!” a:lòe. #Yoh. 1:29; Esa. 53:7
37Coqcv́n wepèníí Yohan shø̀nkà tá bǿà kvt, àngníí Yesu mèpvng cv̀n bǿà. 38Yesu wv́l poshì nìnø, àngní lvngàí cv̀na:tnà we sv̀ng yv̀ng bǿà kvt, “Nàníí pà èláshòe?” a:lòe.
Àngní lvngàí, “Rabiá, Nà kayv́ng èvle má?” wa rø:tnòe. (“Rabi” wa kà nø “Svra” wa kà íe).
39À:ngí àngní lvngà sv̀ng, “Èdi ráshì nø̀ èyv̀ngvtshò,” a:lòe. Wervt àngní lvngàí cv̀na:tnà nø̀, Àng kayv́ng vl we yv̀ng bǿà. Wervtø̀ nø tvné nv̀mtan vbì nari#1:39 Heleni kàí nø, tvné tiqcé rvtø̀, wae. íá:mì rvtnø̀, weni dø ráì høq Àng nv̀ng tiqdø v́ldv̀ng wae.
40Yohan kà táò nø̀ Yesu sv̀ng cv̀n bǿà pèní kèní tiqpè nø, Simon Piter àngnvm Anderu íe. #Mat. 4:18-22 41À:ngí àngnvmpè Simon sv̀ng vzv̀ng lá lún bǿà nø̀ àng sv̀ng, “Ngàní lvngàí Meshia sv̀ng yv̀ng bǿshà,” a:lòe. (“Meshia” nø “Kristu” wa kà íe). #1:41 “Kristu” wa bø̀ng nø, Yøtìí vdø:rò weí rvcà:ngò we sv̀ng wae.#1Sm. 2:10; Shz. 2:2 42À:ngí Simon sv̀ng Yesu yv́ng shøla:tnà.
Yesuí àng sv̀ng dvjaqò sórí, “Nà nø Yohan àngcè Simon èíe. Íwe, nà sv̀ng nø Kepa tǿlv́m èí longe,” a:lòe. (“Kepa” nø “Piter” wa kà í nø̀ “lóng” wa kà íe). #Mat. 16:18
43Mèpvng ni taq Yesu nø Galili móng sv̀ng búnglv́m dvdushì bǿì. Wekvt Pilip sv̀ng À:ngí yv̀ng bǿà nø̀, “Ngà mèpvng ècv̀n ra,” a:lòe.#1:43 Mat. 8:22; Mak. 2:14
44Pilip nø, Anderu nv̀ng Piter vl we Betseda mvrìng kèní íe. 45Pilipmí Nataniel sv̀ng lá lún bǿà nø̀ àng sv̀ng, “Moshií gø Dvrá lèga taq vruò nø̀, Kàdvtutshúrií gø vru yà:ngà pè sv̀ng nøngmaqí yv̀ng bǿshà. Àng nø Yosep àngcè, Nazaretpè Yesu íe,” a:lòe.#Drd. 18:18; Esa. 7:14; 53:2; Yer. 23:5; Ezk. 34:23
46Wekvt Natanielí àng sv̀ng, “Nazaret mvrìng kèní nø shvla we kapv̀n bunge má?” a:lòe.
Pilipmí, “Có, yv̀ngv́mshò lè,” a:lòe. #Yoh. 7:41,52
47Àng yv́ng Nataniel di ráì we Yesuí yv̀ng bǿà kvt àng nv̀ng sing dø, “Ku, dvgoqnøt mvzvng we Israel vjø̀ng tiqpè,” wae. #Shz. 32:2; 73:1; Nnp. 25:27
48Natanielí Àng sv̀ng, “Nàí ngà sv̀ng kadø èshángà má?” wa rø:tnòe.
“Pilipmí nà sv̀ng shini mègo dvgvp, nv̀mgwè tø̀ng lv̀ngpvngø nà èvl dvgvp ni, Ngàí nà sv̀ng yv̀ng bǿngà,” wa Yesuí vtá:nòe.
49Wekvt Natanielí Àng sv̀ng, “Rabiá, Nà nø Gvray Àngcèpè, Israel Koqkv́mpè èíe,” a:lòe. #2Sm. 7:14; Yoh. 6:69; Shz. 2:7; Mat. 14:33; 16:16 50Yesuí àng sv̀ng, “Nv̀mgwè tø̀ng lv̀ngpvngø Ngàí nà sv̀ng yv̀ng bǿngà wvng kà rvtnø̀ èkv́me ó? Ya mvdv̀mø té ring pv̀nrì nàí èyv̀ng lú:ngòe,” a:lòe. 51Vrá Yesuí, “Ngàí kàdøng vla:tnìni, muqlàng vtánvm nø̀, Gvrayò muqlàng dvzv́rrì nø, Vsv̀ng Àngcèpè taqkèní rvlv́ng mvnshì yøt mvnshì we sv̀ng nàmaqí èyv̀ng lóngnø̀nge,” a:lòe.#Nnp. 28:12; Mat. 4:11; Mak. 1:17
Tällä hetkellä valittuna:
Yohan 1: GSM
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2024, Rvcv́ngcè Kàru Gomidi Kristu Shvngø̀mré. All Rights Reserved.
