Genesis 10
10
Den bakapikin fu Noa
1Sem, Ham nanga Yafet, den manpikin fu Noa, ben kisi pikin baka a bigi frudu. Disi na den bakapikin fu den.
2Yafet ben de p'pa fu Gomer, Magog, Madai, Yawan, Tubal, Mesek nanga Tiras. 3Gomer ben de p'pa fu Askenas, Rifat nanga Togarma. 4Yawan ben de a p'pa fu Elisa nanga Tarsis. Den sma fu Kitim nanga den di fu Dodan ben de bakapikin fu Yawan tu. 5Den na den afo fu den folku di e libi na sekanti. Den folku ben prati ini difrenti kondre nanga ini difrenti famiri nanga den eigi tongo.
6Ham ben de a p'pa fu Kus, Misraim, Put nanga Kanaan. 7Kus ben de a p'pa fu Seba, Hawila, Sabta, Rama nanga Sabteka. Rama ben de a p'pa fu Seba nanga Dedan. 8Kus ben de a p'pa tu fu Nimrod. Nimrod ben de a fosi bigi fetiman na grontapu. 9MASRA srefi ben e si en leki wan bigi ontiman. Fu dat'ede sma e taki: “Yu na wan bigi ontiman leki fa MASRA srefi ben e si Nimrod.” 10Den fosi foto pe a ben de na makti leki kownu ben de Babel, Erek, Akad nanga Kalne ini a kondre Sinear. 11Dan a hari kmoto fu drape go na Asur. Drape a bow Nineve, Rekobot-ir, Kalak 12nanga a bigi foto Resen di ben didon mindri Nineve nanga Kalak. 13Den bakapikin fu Misraim ben de sma fu Lud, nanga den di fu Anam, Lehab, Naftuk, 14Patros, Kasluk nanga Kreta. Na fu drape den Filistijnsma kmoto. 15Kanaan ben de a p'pa fu Sidon nanga Het. Sidon ben de en fosi manpikin. 16Ma ala den Yebusitisma, den Amoritisma, den Girgasitisma, 17den Hiwitisma, den Arkitisma, den Sinitisma, 18den Arwaditisma, den Semaritisma nanga den Hamatitisma ben de bakapikin fu Kanaan tu. Bakaten den difrenti Kananitisma disi ben panya go moro fara. 19A kondre fu den Kananitisma ben e waka fu Sidon te go miti Gerar nanga Gasa. Moro fara a ben e waka go na Sodom, Gomora, Adma nanga Seboim te kon miti Lasa. 20Disi ben de den manpikin fu Ham. Den ben e libi leki folku na ini difrenti kondre nanga ini difrenti famiri nanga den eigi tongo.
21Sem, a bigi brada fu Yafet, ben abi manpikin tu. Ala den pikin fu Eber ben de bakapikin fu en. 22Den manpikin fu Sem ben de Elam, Asur, Arpaksad, Lud nanga Aram. 23Den manpikin fu Aram ben de Us, Gul, Geter nanga Mas. 24Arpaksad ben de p'pa fu Sela. Sela ben de p'pa fu Eber. 25Eber ben abi tu manpikin. A wan ben nen Peleg.#10:25 Peleg wani taki: prati. Bika na ini a ten dati den sma ben e prati densrefi abra grontapu. A trawan ben nen Yoktan. 26Yoktan ben de p'pa fu Almodad, Selef, Hasarmawet, Yerak, 27Hadoram, Usal, Dikla 28Obal, Abimael, Seba, 29Ofir, Hawila nanga Yobab. Den alamala ben de bakapikin fu Yoktan. 30Den ben e tan ini a kontren di ben e waka fu Mesa go te na a bergi Sefar, di de na a oostsei. 31Disi na den bakapikin fu Sem. Den ben e libi leki folku na ini difrenti kondre nanga ini difrenti famiri nanga den eigi tongo.
32Disi ben de den folku di ben abi den rutu na ini den famiri fu den manpikin fu Noa. Na den ben prati densrefi abra heri grontapu baka a bigi frudu.
Tällä hetkellä valittuna:
Genesis 10: SB16
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tekst © Surinaams Bijbelgenootschap 2016