Genesis 33
33
1Yakob opo en ede luku, dan a si Esau e kon nanga fo hondro man. Ne Yakob prati den pikin gi Lea, Rachel nanga den tu umasrafu. 2A poti den umasrafu nanga den pikin na fes'sei. Baka dati yu ben e kisi Lea nanga den pikin fu en. Rachel nanga Yosef ben e kon te na baka. 3Yakob srefi ben e waka te na fesi. A boigi seibi leisi di a e waka miti en brada, te leki a doro en. 4Ma Esau lon miti en. A grabu en, a brasa en dan a bosi en. Ala tu ben e krei. 5Baka dati Esau opo en ede luku lontu. Di a si den frow nanga den pikin a aksi taki: “Suma na den sma di yu abi drape nanga yu?” Yakob piki taki: “Na den pikin di Gado gi mi fu sori en knekti en bun-ati.” 6Den umasrafu waka kon moro krosbei dan den boigi. 7Baka dati Lea nanga den pikin fu en kon moro krosbei dan den boigi tu. Na a kba Yosef nanga Rachel waka kon dan den boigi. 8Dan Esau aksi taki: “San yu wani du nanga ala den meti di mi miti na pasi?” Yakob piki taki: “Den ben de fu yu, fu yu kan abi prisiri nanga mi.” 9Esau piki taki: “Mi abi nofo, brada. Yu kan hori den sani fu yu.” 10Ma Yakob taigi en taki: “Kwet'kweti. Efu yu gi mi pardon trutru, dan yu mus teki a kado disi fu mi. Bika di mi si yu, a ben de leki mi tnapu ai na ai nanga Gado, ma mi no dede. 11Mi e begi yu, teki a kado di mi seni gi yu. Bika Gado sori mi en bun-ati. Mi abi ala sani.” Yakob tan aksi te leki Esau teki a kado.
12Dan Esau taki: “Meki wi hari go moro fara. Mi o go makandra nanga yu.” 13Yakob piki taki: “Masra, yu sabi taki den pikin yongu ete. Mi abi skapu nanga krabita na mi tu, nanga kaw di e gi pikinwan bobi ete. Efu mi meki den waka wan dei nomo tumsi esi, a heri grupu e dede. 14Yu kan go na fesi. Mi sa kon na baka te leki mi doro na yu na ini Seir. Mi o kon safrisafri, so esi leki den meti di e waka na mi fesi man waka èn so esi leki den pikin man go.” 15Dan Esau taigi en taki: “Meki mi libi wantu man di kon nanga mi na baka gi yu.” Yakob piki taki: “Fu sanede? Ala san mi ben wani, na fu yu gi mi pardon.”
16So Esau teki pasi a dei dati go baka na Seir. 17Yakob broko en kampu dan a hari go na Sukkot. Dan a bow wan oso drape gi ensrefi nanga kampu gi den meti. So a kari a presi: Sukkot.#33:17 Sukkot wani taki: kampu.
18Yakob hari kmoto fu Padan-Aram èn a doro sondro problema na a foto Sikem ini Kanaan. Dan a opo en kampu na oostsei fu a foto. 19A bai a gron pe a opo en kampu gi wan hondro pisi solfru moni fu den manpikin fu Hemor, a p'pa fu Sikem. 20Dan Yakob meki wan altari drape dan a kari en: A Gado fu Israel na Gado.#33:20 A Hebrewtongo taki: El Elohe-Israel.
Tällä hetkellä valittuna:
Genesis 33: SB16
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tekst © Surinaams Bijbelgenootschap 2016