Gen 15
15
Isivumelwano sikaNkulunkulu loAbrama
1Emva kwalokhu ilizwi leNkosi lafika kuAbrama ngombono, lathi: Ungesabi wena Abrama, ngiyisihlangu sakho; umvuzo wakho uzakuba mkhulu kakhulu. 2UAbrama wathi: Nkosi Nkulunkulu, uzangiphani? Ngoba kangilamntwana; indlalifa yendlu yami inguEliyezeri waseDamaseko. 3UAbrama wathi futhi: Khangela, kawungiphanga nzalo; inceku yendlu yami izakuba yindlalifa yami. 4INkosi yasisithi kuye: Lo kayikudla ilifa lakho, kodwa ozakuphuma emibilinini yakho uzakudla ilifa lakho. 5Yamkhuphela phandle yathi: Khangela ngasezulwini ubale izinkanyezi uba ungazibala. Yathi kuye: Inzalo yakho izakuba ngako.#Roma 4:18; Heb 11:12 6Wakholwa iNkosi. Yambalela lokhu ukuthi kuyikulunga kwakhe.#Roma 4:3; Gal 3:6; Jak 2:23
7Yathi kuye: NgiyiNkosi eyakususa eUri elamaKaladiya ukuba ngikunike ilizwe leli libe yilifa lakho. 8Wathi: Nkosi Nkulunkulu, ngizakwazi ngani ukuthi lizakuba yilifa lami na? 9Yathi kuye: Ngilethela ithokazi elileminyaka emithathu, lesibhuzikazi esileminyaka emithathu, lenqama eleminyaka emithathu, lejuba, lenkwilimba. 10Wasethatha zonke lezizinto, wazidabula phakathi, wabeka leyo laleyongxenye yazo ikhangelene lenye; kodwa inyoni kazidabulanga. 11Amanqe ehlela phezu kwezidumbu, uAbrama wawaxotsha.
12Ilanga selitshona uAbrama wajunywa yibuthongo obukhulu; emnyameni omkhulu watshaywa luvalo. 13INkosi yathi kuAbrama: Yazi impela ukuthi inzalo yakho izazula elizweni elingesilo layo, isebenzele abantu abazakuyihlupha iminyaka engamakhulu amane.#Eks 1:1–14; Seb 7:6 14Kodwa ngizakusahlulela lesosizwe ezakusisebenzela; emva kwalokho izakuphuma ilempahla enengi.#Eks 12:40, 41; Seb 7:7 15Kodwa wena uzakuya kwabaphansi ngocuthula, umbelwe usuluphele kakhulu. 16Esizukulwaneni sesine izakubuya lapha; ngoba ububi bamaAmori kabukapheleli.
17Kwathi lapho ilanga selitshonile sekumnyama, kwabonakala imbawula ethunqayo lelangabi lomlilo kudabula phakathi kwalezozingxenye. 18Ngalolosuku iNkosi yenza isivumelwano loAbrama, yathi: Ngiyayinika inzalo yakho lelilizwe, kusukela emfuleni waseGibithe kuze kube semfuleni omkhulu othiwa liYufrathi,#Seb 7:5 19kanye lelizwe lamaKeni lamaKenizi lamaKadimoni 20lamaHethi lamaPerizi lamaRefa 21lamaAmori lamaKanani lamaGirigashi lamaJebusi.
Tällä hetkellä valittuna:
Gen 15: BE1978
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Bible Society of Zimbabwe 1978