Gen 17
17
Ukusoka kuyisibonakaliso sesivumelwano
1Kwathi uAbrama eseleminyaka engamatshumi aficamunwemunye lesificamunwemunye iNkosi yabonakala kuye, yathi kuye: NginguNkulunkulu uSomandla; hamba phambi kwami, ungasoleki. 2Ngizakwenza isivumelwano sami phakathi kwami lawe, ngikwandise kakhulu. 3UAbrama wawa ngobuso, uNkulunkulu wakhuluma laye, 4esithi: Nansi isivumelwano sami lawe; uzakuba ngukhokho wezizwe ezinengi. 5Ibizo lakho kalisayikuba nguAbrama, kodwa ibizo lakho selizakuba nguAbrahama, ngoba ngikwenzile ukuba ube ngukhokho wezizwe ezinengi.#Roma 4:17 6Ngizakukwandisa kakhulu ukuba kuvele kuwe izizwe lamakhosi. 7Ngizamisa isivumelwano sami phakathi kwami lawe, lenzalo yakho emva kwakho ezizukulwaneni zayo, isivumelwano esingapheliyo sokuba ngibe nguNkulunkulu wakho lowenzalo yakho emva kwakho.#Luka 1:55 8Ngizakunika wena lenzalo yakho emva kwakho ilizwe ohlala kilo, lonke ilizwe laseKanani libe yilifa elingapheliyo; ngizakuba nguNkulunkulu wabo.#Seb 7:5
9UNkulunkulu wasesithi kuAbrahama: Wenake uzagcina isivumelwano sami kanye lenzalo yakho emva kwakho ezizukulwaneni zayo. 10Lesi yisivumelwano sami phakathi kwami lawe ozakusigcina wena lenzalo yakho emva kwakho; bonke abesilisa bakini bazakusokwa.#Seb 7:8; Roma 4:11 11Lizakusoka kube yisibonakaliso sesivumelwano phakathi kwami lani. 12Ezizukulwaneni zenu yilowo lalowo owesilisa olensuku ezificaminwembili uzakusokwa, kanye lenceku ezizelwe endlini yakho lezithengiweyo ngemali kowezizwe ezingesizo zenzalo yakho. 13Ozelwe endlini yakho lothengiweyo ngemali bamele basokwe. Isivumelwano sami sizakuba senyameni yenu, sibe yisivumelwano esingapheliyo. 14Owesilisa ongasokwanga uzakukhutshwa ebantwini bakibo, ngoba weqile isivumelwano sami.
15UNkulunkulu wathi kuAbrahama: Mayelana loSarayi umkakho, ibizo lakhe kalisayikuba nguSarayi, kodwa selizakuba nguSara. 16Ngizakumbusisa, ngikunike indodana ngaye; yebo ngizambusisa abe ngunina wezizwe, kuvele kuye amakhosi abantu. 17UAbrahama wasesiwa ngobuso, wahleka, wathi enhliziyweni yakhe: Oleminyaka elikhulu uzazalelwa umntwana na? LoSara oleminyaka engamatshumi aficamunwemunye uzakuzala na? 18UAbrahama wasesithi kuNkulunkulu: Kungathi uIshmayeli angaphila phambi kwakho! 19UNkulunkulu wathi: Atshi, uSara umkakho uzakukuzalela indodana; uzakuyitha ibizo uthi nguIsaka; ngizakumisa isivumelwano sami laye kanye lenzalo yakhe emva kwakhe sibe yisivumelwano esingapheliyo. 20Mayelana loIshmayeli ngikuzwile; khangela, ngimbusisile, ngizakumnika inzalo ngimandise kakhulu; uzakuzala izikhulu ezilitshumi lambili, ngimenze isizwe esikhulu. 21Kodwa isivumelwano sami ngizakusimisa loIsaka, uSara azakukuzalela yena ngalesisikhathi nyakenye.
22Esekhulumile lamazwi uNkulunkulu wenyuka esuka uAbrahama. 23UAbrahama wasethatha uIshmayeli indodana yakhe labo bonke ababezelwe endlini yakhe labo bonke ababethengiwe ngemali yakhe, bonke abesilisa abendlu yakhe, wabasoka ngalona lolosuku, njengokutsho kukaNkulunkulu kuye. 24UAbrahama wayeleminyaka engamatshumi aficamunwemunye lesificamunwemunye mhla esokwayo. 25UIshmayeli indodana yakhe wayeleminyaka elitshumi lantathu mhla esokwayo. 26UAbrahama loIshmayeli indodana yakhe basokwa ngalolosuku. 27Amadoda wonke omuzi wakhe ayezelwe endlini layethengwe ngemali kowezizwe, asokwa kanye laye.
Tällä hetkellä valittuna:
Gen 17: BE1978
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Bible Society of Zimbabwe 1978