Gen 30
30
1URaheli esebonile ukuthi wayengamzaleli abantwana uJakobe, waba lomona ngodadewabo, wathi kuJakobe: Nginika abantwana funa ngife. 2UJakobe wamthukuthela uRaheli, wathi: Ngisesikhundleni sikaNkulunkulu onqabele inzalo yesisu sakho na? 3Wathi: Nansi incekukazi yami uBiliha, ithathe ukuze angizalele abantwana, babekwe emathangazini ami. 4Wamnika incekukazi yakhe uBiliha abe ngumkakhe; uJakobe walala laye. 5UBiliha wathatha isisu, wamzalela uJakobe indodana. 6URaheli wasesithi: UNkulunkulu ungahlulele, njalo uzwile ilizwi lami, wanginika indodana. Ngakho wayitha ibizo wathi nguDani. 7UBiliha incekukazi kaRaheli wabuya wathatha isisu, wamzalela uJakobe indodana yesibili. 8URaheli wathi: Ngibindene kakhulu lodadewethu ngamehlula; ngakho wayitha ibizo wathi nguNafitali.
9Kwathi uLeya esebonile ukuthi usemi ukuzala, wamthatha uZilipa incekukazi yakhe, wamnika uJakobe abe ngumkakhe. 10UZilipa incekukazi kaLeya wamzalela uJakobe indodana. 11ULeya wasesithi: Nansi inhlanhla yami. Wayitha ibizo wathi nguGadi. 12UZilipa incekukazi kaLeya wamzalela uJakobe indodana yesibili. 13ULeya wasesithi: Nansi intokozo yami, ngoba intombi zizakuthi ngilentokozo. Wayitha ibizo wathi nguAsheri.
14Ngesikhathi sokuvuna uRubeni waya ensimini, wafumana khona izithelo zamandrake waziletha kunina uLeya. URaheli wasesithi kuLeya: Ngipha lami izithelo zamandrake endodana yakho. 15Wathi kuye: Kuyinto encinyane yini ukuthi uthethe indoda yami na? Usuzathatha lezithelo zamandrake zendodana yami na? URaheli wathi: Ngakho uJakobe uzalala lawe ngalobobusuku kube ngumvuzo wezithelo zamandrake endodana yakho. 16Kwathi kusihlwa uJakobe esebuya evela emmangweni, uLeya waphuma ukumhlangabeza, wathi: Ngena ngakimi, ngoba impela ngikuqatshile ngezithelo zamandrake endodana yami. Walala laye ngalobobusuku. 17UNkulunkulu wamuzwa uLeya; wathatha isisu, wamzalela uJakobe indodana yesihlanu. 18ULeya wasesithi: UNkulunkulu unginikile umvuzo wami, ngoba ngayinika indoda yami incekukazi yami; wayitha ibizo wathi nguIsakari. 19ULeya waphinda wathatha isisu, wamzalela uJakobe indodana yesithupha. 20ULeya wathi: UNkulunkulu unginikile isipho esilungileyo; khathesi indoda yami izakuhlala lami, ngoba ngiyizalele amadodana ayisithupha; wayitha ibizo wathi nguZebuluni.
21Emva kwalokhu wazala indodakazi, wayibiza ngokuthi nguDina. 22UNkulunkulu wasemkhumbula uRaheli, wavula isizalo sakhe. 23Wathatha isisu, wazala indodana, wathi: UNkulunkulu ususile ihlazo kimi. 24Wayitha ibizo wathi nguJosefa, wathi: INkosi kayinginike lenye indodana.
Inotho kaJakobe
25Kwathi uRaheli esemzele uJosefa, uJakobe wathi kuLabani: Ngivumela ukuba ngibuyele endaweni yakithi laselizweni lakithi. 26Ngiphe omkami engibasebenzele kuwe labantwana bami ngihambe, ngoba uyazi umsebenzi wami engikwenzele wona. 27ULabani wathi kuye: Uba ngifumene umusa kuwe, ungahambi; ngoba sengibonile ngezibonakaliso ukuthi iNkosi ingibusisile ngenxa yakho. 28Wathi futhi: Biza umvuzo wakho, ngizakupha. 29Wathi kuye: Uyazi ukuthi ngikusebenzele kanjani lokuthi inkomo zakho bezinjani. 30Ngoba okwakho kwakuyingcosana ngingakafiki, kodwa kwandile, sekukunengi; iNkosi ikubusisile kukho konke engikwenzileyo; phoke, ngizakusebenzela nini eyami indlu na? 31Wathi: Ngizakukuphani? UJakobe wathi: Kawuzukunginika lutho; kodwa ngizabuya ngeluse izimvu zakho ngizilinde uba ungenzela lokhu. 32Ngizadabula phakathi kwawo wonke umhlambi wakho lamuhla, ngikhethe kuwo zonke izimvu ezilamabala lezimnyama, lezimbuzi ezilamabala, zibe ngumvuzo wami. 33Emva kwalokho uzakubona ubuqotho bami lapho ufika ukuhlola umvuzo wami; uba ufumana phakathi kwemihlambi yami imbuzi ezingelamabala lezimvu ezingemnyama, ungatshoke ukuba zebiwe. 34ULabani wasesithi: Kulungile, kakube njengokutsho kwakho. 35Mhlalokho wakhupha imbuzi ezingamaqamule lezilamabala lezibhuzikazi ezilamabala, zonke ezilokumhlophe, lezimvu zonke ezimnyama, wazinika amadodana akhe. 36Wawaqhuba kwaze kwaba ngummango wohambo lwensuku ezintathu phakathi kwawo laye. UJakobe welusa imihlambi eseleyo kaLabani.
37UJakobe wasethatha ingatsha ezimanzi zezihlahla zomkhaya omhlophe lealimondi lomangwe, wazebula kwaze kwabonakala okumhlophe kwazo. 38Wazifaka ingatsha abezebulile emikolweni yamanzi phambi kwemihlambi, lapho imihlambi inatha khona; yamitha ekufikeni kwayo ukuzanatha. 39Imihlambi yamitha phambi kwezingatsha, yazala ezilamabala lezifekethileyo. 40UJakobe wahlukanisa amazinyane; wabeka imihlambi ikhangelene lezingamaqamule lezimnyama zomhlambi kaLabani; wabeka amaqembu akhe abe wodwa, engawafaki emhlambini kaLabani. 41Kwathi lapho eziqinileyo zomhlambi sezimitha, uJakobe wafaka izingatsha emkolweni phambi kwazo ukuba zimithele phakathi kwezingatsha. 42Kodwa nxa umhlambi ububuthakathaka kazifakanga; ngalokhu imihlambi ebuthakathaka yaba ngekaLabani, leqinileyo yaba ngekaJakobe. 43UJakobe waba mkhulu kakhulu, waba lemihlambi emikhulu lezincekukazi lezinceku lamakamela labobabhemi.
Tällä hetkellä valittuna:
Gen 30: BE1978
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Bible Society of Zimbabwe 1978