Matthew 2
2
1ဟေရုဒ်ဘုရင်လက်ထက်မှာ ကိုယ်တော်ယေရှုဟ ယုဒပြည်၊ ဗက်လင်ဗြို့မှာ ဖွားမြင်တော်မူလေရယ်။ အဲနော့ နက္ခတ်ပညာရှင်ချို့ဟ ရှေ့ရပ်ဟနေ ဂျေရုဆလင်ဗြို့ဝို ရော့လာဂေ့လေရယ်။ 2သူ့နို့ဟ "ဂျူး လူမျိုးဒွေရဲ့ဘုရင်အဖြစ် မွီးဖွားလာဝို သားဂန်းရားဟ ဟယ်မှာနူး။ သူ့ဂျော့န ရှေ့ရပ်မှာ ပေါ်ထွန်းလာဝိုကြယ်ဝို ကျနော်ဒို့ ဗြင်ရရိတွက်ကြော့ သူ့ဝိုဖူးမျှော်ဝို့ လာဂေ့ဇာဖြစ်ရယ်" ဆိုပီး ပြောဆိုဂေ့လေရယ်။ 3အဲမိုကြောဝို ကြားသိခါမှာ ဟေရုဒ်ဘုရင်န ဂျေရုဆလင်ဗြို့လုံးဟလူဒွေဟ ကြော့ရွံ့တူလှုဂေ့လေရယ်။ 4အဲခါ ဟေရုဒ်ဘုရင်ဟ ပုရောဟိတ်ကြီးကဲဒွေန ကျမ်းတတ်ဆရာဒွေဂူလုံးဝို ခေါ်ယူပီး "ခရစ်တော် ဟ ဟယ်ရပ်မှာ မွီးဖွားနူး။" ဆိုပီး မေးလေရယ်။ 5သူ့နို့ဟ "ယုဒပြည်၊ ဗက်လင်ဗြို့မှာဖြစ်ပါရယ်။ ဟဲဂျော့နူးဆိုဝါ 6'အို ယုဒပြည် ဗက်လင်ဗြို့၊ သင်ဟ ယုဒပြည်ဝိုအုပ်ချုပ်နေဝိုဗြို့ဒွေမှာ သေးသီဆုံး မုဝ။ ဟဲဂျော့ဆိုဝါ ငါ့အစ္စရေးလူမျိုးဒွေဝို အုပ်ထီးဝို့ ခေါ်ဆော်တစ်ဦးဟ သင့်ဆီဟနေပေါ်ထွန်းလာမှာဖြစ်ရိတွက်ဂျော့ဖြစ်ရယ်' ဆိုပီး ပရောဖက်ဟ ရေးသားရစ်ရိတွက်ဂျော့ဖြစ်ရယ်" ဆိုပီး ရှော့တံဂေ့လေရယ်။ 7အဲနော့ ဟေရုဒ်ဟ နက္ခတ်ပညာရှင်ဒွေဝို တိတဆိခေါ်ပီး ကြယ်ပေါ်ထွန်းဝို့ ခီကာလတိကလာ့ဝို မေးမြန်းလေရယ်။ 8အဲနော့ သူ့နို့ဝို ဗက်လင်ဗြို့ဝိုသွားခိုင်းပီး "သွားပီး သားဂန်းရားဝို သေချာရှာဂေ့လော့။ နန်းနို့ရှာတွီ့ဝိုခါမှာ ငါကိုယ်တိုင် သွားရော့ဖူးမျှော်နိုင်ဝို့ ငါ့ဝို့ဒန်းပေးဂေ့လော့" ဆိုပီး မိကြားလေရယ်။ 9အဲမိုလူဒွေဟလဲ ဘုရင်ရဲ့ မိကြားချင့်တိုင်း ထွက်လာဂေ့ရာ ရှေ့ရပ်မှာ သူ့နို့တွီ့ရစ်ဝိုကြယ်ဟ သူ့နို့ရှေ့ဟသွားပီး လမ်းပြပီး သားဂန်းရားရှေ့ဝို နေရာပေါ်မှာ ရပ်ရားလေရယ်။ 10သူ့နို့ဟ အဲမိုကြယ်ဝို ဗြင်ဂေ့ဝိုခါမှာ ရားဒိုင်းဝမ်းမြော့ဝမ်းသာဖြစ်ဂေ့လေရယ်။ 11သူ့နို့ဟ အီထဲဝို ဝမ်ကေ့ဝိုခါမှာ မိခင်ဖြစ်သူမာရိ န သားဂန်းရားဝို ဖူးတွီ့ရလေရယ်။ သူ့နို့ဟ ဒူးထော့ရှေ့ခိုးဂေ့ပြီး ရွှေ၊ လောဗန်န မုရန်ဒို့ဝို ပူဇော်ဆစ်သဂေ့လေရယ်။ 12အဲနော့ ဘုရားရှင်ဟ သူ့နို့ဝို ဟေရုဒ်ဆီဝို ပလန်မသွားဝို့ အိမက်ပေးရိတွက် သူ့နို့ဟ ခြားလမ်းန သူ့နို့တိုင်းပြည်ဝို ပလန်ဂေ့လေရယ်။ 13အဲမို ပညာရှေ့ဒွေ ထွက်ခွာပြီးနော့ ဘုရားရှင်ရဲ့နတ်ဒေဝါတစ်ဘားဟ ယောသပ်ဝို "ထလော့။ သားဂန်းရားန သူ့မိဝိုခေါ်ပီး အီဂျစ်ပြည်ဝို ထွက်ပလေးဂေ့လော့။ ဟေရုဒ်ဟ သားဂန်းရားဝို ရှာပီးသတ်ဝို့ ကြံရွယ်နေရိတွက်ကြော့ "ပလန်လာပါ" ဆိုပီး ငါမပြောမချင်း အဲနေရာမှာ နေဂေ့လော့။" ဆိုပီး အိမက်ပေးလေရယ်။ 14အဲဂျော့ ယောသပ်ဟလဲ အိယာဟနေ ထပီး သားဂန်းရားနမိခင်ဝို ခေါ်ပီး ညစ်တွမ်းရှင်း အီဂျစ်ပြည်ဝို ထွက်ခွာခဲ့လေရယ်။ 15သူ့နို့ဟ ဟေရုဒ်ဘုရင် သေဆုံးဝိုခီထိ အီဂျစ်ပြည်မှာ နေထိုင်ဂေ့လေရယ်။ အဲဂျော့ရိ "ငါ့သားတော်ဝို အီဂျစ်ပြည်ဟနေ ငါခေါ် ထုခဲ့ရယ်" ဆိုဝို ပရောဖက်အားန ဘုရားရှင်မိတော်မူရစ်ဝို ကြောရာဟ မှန်တဂယ်ဘဲ့ ဖြစ်ပျစ်ခဲ့ပြီဖြစ်ရယ်။ 16အဲနော့ ဟေရုဒ်ဟ နက္ခတ်ပညာရှင်ဒွေ လှည့်စားဝါးဇာဝို သိရခါမှာ ဒေါသဒွေထွက်ပြီး အဲလူဒွေဆီဟနေ လေ့လာစိစစ်ရားဝို ခီကာလအရ ဗက်လင်ဗြို့တွမ်းန ဗြို့ပလန်နီးတစ်ဝိုက်မှာရှေ့ဝို သက်နှေ့နှစ်န နှေ့နှစ်အော့ သားဂန်းရားဂူလုံးဝို သတ်ပစ်ဝို့ မှုထမ်းဒွေဝို မိပေးလေရယ်။ 17 အဲဂျော့ ပရောဖက်ယေရမိဟနေတဆင့် မိမှာရစ်ဝိုဇာဒွေဟ မှန်တဂယ်ဘဲ့ဖြစ်လာခဲ့လေရယ်။ 18ယေရမိဟ "ရာမဗြို့မှာ ကလယ်လော်ဝို ငိုကြွေးသံဒွေန ရှိုက်ငိုသံဒွေဝိုကြားရရယ်။ ရာခေလဟ သားမီးငယ်ဒွေ သေဆုံးဂူရိ သူ့ပူဆွေးသောကဝို ဖြေသိရိမရဖြစ်နေရယ်" ဆိုပီး မိကြားရစ်ဇာဖြစ်ရယ်။ 19အယ်ဘေမဲ့ ဟေရုဒ်ဘုရင်ကွယ်လွန်ပြီးနော့ အီဂျစ်ပြည်မှာရှေ့ဝို ယောသပ်ဝို ဘုရားရှင်ရဲ့နတ်ဒေဝါဟ အိမက်ပေးပီး 20"ထလော့။ သားဂန်းရားဝို သတ်ဝို့ ရှာဖွီနေဝိုသူဒွေ သေဆုံးဂေ့ပီဖြစ်ရိတွက် သားဂန်းရားန မိခင်ဒို့ဝိုခေါ်ပီး အစ္စရေးပြည်ဝိုပလန်ဂေ့လော့" ဆိုပီး မိကြားလေရယ်။ 21အဲဂျော့ ယောသပ်ဟလဲထပီး သားဂန်းရားနမိခင်ဝို ခေါ်ပီး အစ္စရေးပြည်ဝို ပလန်လာခဲ့ဂေ့လေရယ်။ 22အယ်ဘေမဲ့ အာခေလဟ ဖဖြစ်သူဟေရုဒ်မန်းရဲ့ထီးနန်းဝို ဆစ်ခံပြီး ယုဒပြည်နယ်ဝို အုပ်ချုပ်နေကြော ယောသပ်ကြားသိရဝိုခါမှာ အဲမိုပြည်နယ်ဝို သွားဝို့ကြော့ရွံ့နေလေရယ်။ အဲနော့ အီမက်ထဲမှာလဲ အဲဝိုမသွားဝို့ ဒိပေးဇာခံရရိတွက် သူဟဂါလိလဲပြည်နယ်ဝိုထွက်ခွာလာပြီး 23နာဇရက်ဆိုပီးခေါ် ဝို ဗြို့ဝိုသွားရော့ပီး နေထိုင်လေရယ်။ အဲဂျော့ရိ "ကိုယ်တော်ဟ 'နာဇရက်ဗြို့သား' ဆိုပီး ခေါ်ခံရလိမယ်။" ဆိုဝို ပရောဖက်ရဲ့ မိဆိုချင့်ဟ မှန်ကန်ပလဲ့ဇုံရားလေရယ်။
Tällä hetkellä valittuna:
Matthew 2: ttpv-rv
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
