پیشگُفتار
کِتابِ اعمالِ رسُولا اِدامِه زِندگی نامِه عیسیٰ مسیح دَ مُطابِقِ لُوقا اَسته. مقصدِ اَصلی کِتاب اِی اَسته که لُوقا نِشو بِدیه، چی رقم پَیرَوای اوّلی عیسیٰ مسیح دَ هِدایتِ روح اُلقُدس خوش خبری دَ بارِه عیسیٰ ره از اورُشَلیم دَ تمامِ یهُودیه، سامِره و دَ مَملَکَت های دُنیا رَسَند. فصلِ ۱ آیِه ۸ امزی کِتاب دَ بارِه ازی اَسته که چی رقم مسِیحیَت دَ مینکلِ یهُودیا شُروع مُوشه و بعد ازُو چی رقم دَ تمامِ دُنیا دَ مینکلِ مِلَّت های غَیرِ یهُود تِیت مُوشه.
اِی کِتاب واضِح مُونه که ایماندارای مسیح یگ گروهِ سیاسی بَلدِه سرنِگون کدونِ امپراطوری رُوم نِییه، بَلکِه راه نِجاتِ ره دَ بَین اِنسان ها اِعلان مُونه.
کِتابِ اعمالِ رسُولا ره مُوشه که دَ سِه قِسمَت تقسِیم کُنی:
۱ شُروعِ حَرکتِ ایماندارای مسیح دَ اورُشَلیم بعد از رفتونِ عیسیٰ مسیح دَ عالمِ باله
۲ وَسعت پَیدا کدونِ حَرکتِ ایماندارای مسیح دَ منطقه های یهُودیه و سامِره
۳ پَخش شُدونِ حَرکتِ ایماندارای مسیح دَ منطقه های گِردوبَرِ دریای مدِیترانه و رسِیدون شی تا رُوم
یکی از مَوضوع های مُهِمِ کِتابِ اعمالِ رسُولا نازِل شُدونِ روح اُلقُدس اَسته که دَ روزای عِیدِ پِنجاهُم دَ اورُشَلیم دَ ایماندارای مسیح نازِل شُد و رهبرای ایماندارا دَ هِدایتِ روح اُلقُدس آهِسته آهِسته بُنیادِ جماعتِ ایماندارای مسیح ره ایشت. فصل های آخِرِ امزی کِتاب دَ بارِه دِستگِیر شُدو و محاکِمه شُدونِ پولُس و سَفرِ پولُس دَ رُوم اَسته و اِی که پولُس چی رقم خوشخبری دَ بارِه عیسیٰ مسیح ره دَ رُوم اِعلان کد.
طبقه-بَندی مَوضوع ها
تورای آخِرِ عیسیٰ مسیح پیش از رفتو دَ عالمِ باله (فصلِ ۱)
نازِل شُدونِ روح اُلقُدس (فصلِ ۲)
شاهِدی پِترُس دَ اورُشَلیم و شُروعِ جماعتِ عیسیٰ مسیح (فصلِ ۲-۷)
شاهِدی رسُولای عیسیٰ مسیح دَ منطقه های یهُودیه و سامِره (فصلِ ۸-۱۲)
شاهِدی پولُس دَ مینکلِ مردُمِ غَیرِ یهُود (فصلِ ۱۳-۲۸)
الِف۔ سَفرِ اوّلِ پولُس (فصلِ ۱۳-۱۴)
ب۔ شورای اورُشَلیم (فصلِ ۱۵)
ج۔ سَفرِ دوّمِ پولُس (فصلِ ۱۵-۱۸)
د۔ سَفرِ سوّمِ پولُس (فصلِ ۱۸-۲۱)
بَندی شُدونِ پولُس و دِفاعِ شی دَ اورُشَلیم و قَیصَریه (فصلِ ۲۱-۲۶)
سَفرِ پولُس دَ رُوم و بَندیگری شی دَ اُونجی (فصلِ ۲۸)
