Jenesis 33
33
Jekob hemi mitim brata blong hem Iso
1Jekob hemi luk go nao hemi lukim brata blong hem Iso wetem olketa 400 man blong hem ya olketa ka-kam, so hemi divaedem olketa pikinini blong hem fo go stap wetem olketa mami blong olketa. 2Nao hemi laenem olketa evriwan, wea faswan, tufala slev woman ya wetem olketa pikinini blong tufala, nao bihaen Lea wetem olketa pikinini blong hem, an bihaen moa, Resel wetem pikinini blong hem Josef. 3Nao hemi wakabaot fastaem long olketa fo go mitim brata blong hem, an taem hemi kolsap kasem hem, hemi baodaon sevenfala taem long graon go-go fes blong hem hemi kasem graon. 4Bat Iso hemi ran kam fo mitim hem, hemi suingim han blong hem raonem brata blong hem, nao hemi holem hem strong an hemi kisim hem. An tufala ya i gohed fo krae nao. 5Taem Iso hemi lukim olketa woman ya wetem olketa pikinini, wea olketa stap wetem hem, hemi askem hem olsem, “?Olketa woman ya hu i stap wetem yu, an olketa pikinini ya i blong hu ya?” Nao Jekob hemi ansa olsem, “Bos, God hemi bin gud tumas long mi. Hem nao hemi givim olketa pikinini ya long mi.” 6Nao tufala slev woman ya wetem olketa pikinini blong tufala olketa kam kolsap an baodaon long Iso. 7An Lea wetem olketa pikinini blong hem tu olketa kam an baodaon long hem, an bihaen, Resel an Josef, tufala kam an baodaon tu long hem.
8Nao Iso hemi askem hem olsem, “?Bat olketa faefala grup long animol ya wea mi mitim long rod, olketa fo wanem ya?” An Jekob hemi ansa olsem, “Bos, olketa ya i blong yu, fo mekem yu hapi long mi.”
9Nao Iso hemi tok olsem, “Nomoa brata, mi garem plande samting finis. Yu kipim olketa samting ya.” 10Bat Jekob hemi tok olsem, “Nomoa, plis yu tekem olketa ya. Sapos yu hapi long mi, mi laekem yu fo tekem presen blong mi ya. Distaem mi barava hapi fogud fo lukim fes blong yu moa, hemi olsem wea mi lukim fes blong God. 11Plis yu tekem presen ya wea mi tekem kam fo yu. God hemi bin gud tumas long mi, an mi garem staka samting nao.” Jekob hemi gohed fo askem brata blong hem fo tekem olketa samting ya, go-go hemi tekem presen ya nao. 12Bihaen Iso hemi sei, “Oraet, yumi go. Bae mi go wetem yu.”
13Bat Jekob hemi tok olsem, “Bos, hemi gud nomoa, bat yu save, olketa pikinini blong mi i no strong. An mi mas tingim olketa animol ya tu wea i garem pikinini. Sapos mi mekem olketa fo wakabaot strong fo wanfala ful de nomoa, bae olketa evriwan i dae ya. 14Hemi moabeta yu go fastaem. Bae mifala gohed fo kam bihaen, wea bae mifala no wakabaot strong tumas. Bae mifala gohed fo wakabaot slou-slou kam, olsem wea olketa pikinini ya an olketa animol ya i bin ka-kam, go-go bae mifala joen moa wetem yu long Idom.”
15So Iso hemi tok olsem, “Oraet, olsem bae mi lusim samfala man blong mi fo stap wetem yu.” Bat hemi tok olsem, “Nomoa bos, yu no wari tumas. Hemi gud nomoa. Sapos yu hapi long mi, hemi naf long mi nao.” 16Nao long sem de nomoa wea Iso hemi lusim ples ya, hemi gobaek long Idom. 17Bat Jekob hemi go long ples ya wea olketa kolem Sukot, wea hemi wakem wanfala haos blong hem, an hemi wakem olketa bus haos fo olketa animol blong hem. Dastawe olketa kolem ples ya “Sukot” o “Olketa bus haos”.
18Jekob hemi lusim Mesopotemia, an hemi kamap sef nomoa long kantri ya wea olketa kolem Kenan. Nao hemi kam stap long taon ya wea olketa kolem Sekem, an hemi mekem ples blong hem long wanfala open ples kolsap long taon ya. 19Hemi peimaot graon ya fo 100 pis long silva from olketa pikinini blong Hamoa hu hemi dadi blong Sekem. 20Hemi wakem wanfala olta long ples ya, an hemi kolem hem El-Elohe Israel, wea hemi minim “God hemi God blong Israel.”
Tällä hetkellä valittuna:
Jenesis 33: SIPB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Pijin Catholic Bible © Bible Society of the South Pacific, 2008.