Jenesis 42
42
Olketa brata blong Josef i kam long Ijip fo baem kaikai
1Long taem ya, Jekob an olketa wetem hem i stap kam longwe long Kenan, an taem hemi herem dat olketa salem wit long Ijip, hemi tok olsem long olketa pikinini blong hem, “?Waswe nao yufala no duim enisamting? 2Mi bin herem dat olketa salem wit long Ijip. So yufala mas go an baem kam samfala kaikai fo yumi, nogud yumi dae long hanggre.” 3Nao tenfala brata blong Josef i lusim Kenan an go long Ijip fo baem kaikai fo olketa. 4Bat Jekob hemi no save letem Benjamin hu hemi barava brata blong Josef fo go wetem olketa, bikos hemi fraet nogud samfala trabol maet kasem hem long rod. 5Olketa pikinini blong Jekob i wakabaot go wetem olketa narafala pipol long Kenan, wea olketa go long Ijip fo baem kaikai, bikos hadtaem an hanggre hemi kasem ples blong olketa nao.
6Long taem ya, Josef nao hemi gohed fo lukaftarem kantri ya, an hemi gohed fo salem kaikai long olketa pipol blong olketa narafala kantri long wol. Nao olketa brata blong hem olketa kam an baodaon long frant blong hem, go-go fes blong olketa hemi godaon kasem graon. 7Nao taem hemi lukim olketa, hemi luksave dat olketa ya i brata blong hem nomoa, bat hemi gohed fo toktok long langguis blong Ijip an olowe hemi garem wanfala man fo tanem toktok blong hem, mekem olketa no luksave long hem. Nao hemi tokraf long olketa olsem, “Yufala kam from wea?”
An olketa ansa olsem, “Mifala from Kenan ya, an mifala kam fo baem kaikai fo mifala ya.”
8Josef hemi luksave nomoa long olketa brata blong hem ya, bat olketa nating luksave long hem. 9Nao hemi tingim tufala drim blong hem ya wea hemi bin lukim bifoa, wea olketa bin baodaon long hem. Nao hemi toktok strong long olketa olsem, “Ating yufala kam nomoa fo luksave long ples blong mifala ya. Yufala laek fo faendaot nomoa abaotem mifala, sei mifala strong o nomoa, mekem yufala save kam an mekem faet wetem mifala ya.” 10Bat olketa tok olsem, “Nomoa ya masta, hemi no olsem ya. Mifala kam olsem olketa wakaman blong yu nomoa ya. Mifala kam nomoa fo baem kaikai fo mifala. 11Mifala evriwan i brata ya, an mifala garem wanfala dadi nomoa. Mifala no kam fo luksave long ples. !Mifala kam long stretfala wei nomoa ya!”
12Nao hemi tok olsem moa long olketa, “!Nomoa! !Yufala kam fo faendaot nomoa abaotem mifala ya!”
13Nao olketa tok olsem, “Masta, mifala ya olketa pikinini blong wanfala man nomoa wea mifala stap long Kenan. Fastaem mifala tuelfala ya, bat wanfala brata blong mifala hemi lus, an lasbon blong mifala hemi stap kam wetem dadi blong mifala long hom.”
14Bat hemi tok olsem, “!Mi talem finis nao! !Yufala kam nomoa fo luksave long ples ya! 15!Mi mas faendaot wea yufala toktru! Oraet, hemi tru long nem blong king, wea mi talem tru samting long yufala. Sapos lasbon blong yufala hemi no kam long ples ya, bae yufala no save goaot moa nao ya. 16!Wanfala long yufala mas go an tekem hem kam! Yufala olketa narawan, bae yufala stap long prisin go-go mifala faendemaot wea toktok blong yufala hemi tru o nomoa. Sapos nomoa, mi talem tru samting long yufala nao, bae mifala savegud nao dat yufala kam nomoa fo luksave long ples nomoa ya.” 17An hemi putum olketa long prisin fo trifala de.
18Nao long mektri de, hemi tok olsem long olketa, “Mi man fo tinghae long God ya, an sapos yufala duim olsem wea mi talem, bae mi save letem yufala laef. 19Sapos yufala wande somaot dat yufala toktru, oraet, wanfala long yufala mas stap long prisin ya. Nao yufala olketa narawan, yufala save tekem olketa kaikai ya wea yufala baem, an save gobaek fo givim long olketa pikinini blong yufala wea olketa gohed fo hanggre distaem. 20Bat yufala mas tekem kam lasbon brata blong yufala ya fo kam long mi, mekem mi lukim hem. Long wei ya, bae yufala save somaot dat toktok blong yufala ya hemi tru, nao bae mi no kilim yufala dae.”
Nao olketa brata ya i agri long toktok blong hem, 21an olketa gohed fo tok olsem long olketa seleva, “!Ei! Distaem yumi gohed fo garem panis nao from trabol ya wea yumi bin mekem long brata blong yumi ya bifoa. !Yumi lukim finis olketa trabol wea yumi mekem long hem, bat taem hemi krae long yumi mekem yumi helpem hem, yumi no herem toktok blong hem! !Dastawe nao bikfala trabol ya hemi kasem yumi distaem!”
22Nao Ruben hemi tok olsem long olketa, “Long taem ya, mi bin talem finis long yufala, ‘Hemi yangfala nomoa ya. Yufala no spoelem hem,’ bat yufala no save herem toktok blong mi. !Distaem yumi gohed fo garem panis nao from dae blong hem!” 23Josef hemi heresave long evri toktok blong olketa ya, bat olketa no save nomoa dat hem nao hemi brata blong olketa, bikos evritaem olketa gohed fo toktok wetem hem, narafala man nao hemi gohed fo tanem toktok blong olketa ya fo hem. 24Nao hemi goaot from olketa fo krae, an taem hemi filgud moa, hemi kambaek. Hemi tekem Simion an taemapem hem long ae blong olketa.
Olketa brata blong Josef i gobaek long Kenan
25Nao Josef hemi tok olsem long olketa wakaman blong hem, “Yufala fulumap olketa kaikai ya long olketa baeg blong olketa man ya. Olketa baem olketa kaikai ya finis, bat seleni wea evri man long olketa hemi pei long hem, hemi mas gobaek long baeg blong hem, wetem kaikai blong hem. An yufala mas givim kaikai long olketa fo kaikaim long rod.” An olketa wakaman blong hem i duim olsem nao. 26So olketa brata blong hem ya i putum olketa baeg kaikai ya long olketa dongki blong olketa, an goaot nao. 27Long naet, taem olketa res, wanfala long olketa hemi openem baeg blong hem fo givim kaikai long dongki blong hem, nao hemi sek long seleni blong hem wea hemi stap nomoa long baeg wetem olketa kaikai ya. 28Nao hemi tok olsem long olketa, “!Ei, olketa! !Olketa givimbaek nomoa seleni blong mi ya! Hemi stap nomoa wetem olketa kaikai ya insaet long baeg blong mi.” Tingting blong olketa i nogud nao, bikos olketa fraet fogud. So olketa gohed fo askem olketa seleva olsem, “?Wanem nao God hemi gohed fo duim long yumi ya?”
29Nao taem olketa kambaek moa long dadi blong olketa long Kenan, olketa talemaot long hem evrisamting wea i kasem olketa. 30Olketa tok olsem, “Man ya hu hemi gohed fo lukaftarem olketa ples long Ijip, hemi gohed fo tokraf tumas long mifala. Hemi tingse mifala go nomoa long kantri blong hem fo luksave long ples blong hem. 31Mifala tok olsem long hem, ‘Mifala no kam fo luksave long ples blong yu ya. Mifala kam nomoa fo baem kaikai. 32Mifala ya olketa pikinini blong wanfala dadi nomoa ya. Fastaem, mifala tuelfala ya, bat wanfala brata blong mifala hemi lus, an lasbon blong mifala hemi stap yet wetem dadi blong mifala long Kenan.’ 33Nao man ya hemi tok olsem, ‘Hem nao wanfala wei fo mi faendemaot wea yufala toktru o nomoa. Wanfala long yufala bae hemi mas stap wetem mi long hia. An yufala olketa narawan, bae yufala mas gobaek an tekem olketa kaikai ya fo olketa pikinini blong yufala wea olketa gohed fo hanggre kam long hom. 34Bat yufala mas tekem kam lasbon brata blong yufala ya long hia mekem mi lukim hem. Long wei ya nao, bae mi save dat yufala i no man fo luksave long ples, an toktok blong yufala hemi tru. Sapos olsem, bae mi jes letem brata blong yufala ya fo gobaek an stap wetem yufala, an bae yufala save go nomoa eniples long kantri ya wea yufala laekem.’”
35Nao taem olketa kapsaetem olketa kaikai blong olketa, olketa evriwan i lukim dat olketa baeg seleni blong olketa, i stap nomoa wetem olketa kaikai. An taem olketa lukim olketa seleni ya, olketa fraet fogud, an dadi blong olketa tu hemi fraet fogud. 36Nao hemi tok olsem long olketa, “?Waswe, yufala laekem nomoa fo mi lusim olketa pikinini blong mi ya? !Josef hemi lus finis! !An Simion hemi lus finis tu! ?An distaem, yufala laek fo tekem Benjamin moa? !Evri trabol ya hemi kam fo spoelem mi nomoa!”
37Nao Ruben hemi tok olsem long dadi blong hem, “Dadi, samting gud nomoa yu putum Benjamin long han blong mi, an bae mi tekem hem kambaek long yu moa. Sapos mi no tekem hem kambaek, bae yu save kilim dae tufala pikinini boe blong mi ya.” 38Bat dadi blong olketa hemi tok olsem, “!Nomoa! Mi no save letem pikinini blong mi ya fo go wetem yufala. Barava brata blong hem hemi dae finis nao, an hem seleva nomoa wanfala wea hemi stap hu hemi bon long waef blong mi Resel. Maet wanfala nogud samting bae hemi kasem hem moa long rod. Mi olfala tumas nao, an sapos yu mekem eni nogud samting fo kasem hem, bae mi dae nomoa long sore ya.”
Tällä hetkellä valittuna:
Jenesis 42: SIPB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Pijin Catholic Bible © Bible Society of the South Pacific, 2008.
Jenesis 42
42
Olketa brata blong Josef i kam long Ijip fo baem kaikai
1Long taem ya, Jekob an olketa wetem hem i stap kam longwe long Kenan, an taem hemi herem dat olketa salem wit long Ijip, hemi tok olsem long olketa pikinini blong hem, “?Waswe nao yufala no duim enisamting? 2Mi bin herem dat olketa salem wit long Ijip. So yufala mas go an baem kam samfala kaikai fo yumi, nogud yumi dae long hanggre.” 3Nao tenfala brata blong Josef i lusim Kenan an go long Ijip fo baem kaikai fo olketa. 4Bat Jekob hemi no save letem Benjamin hu hemi barava brata blong Josef fo go wetem olketa, bikos hemi fraet nogud samfala trabol maet kasem hem long rod. 5Olketa pikinini blong Jekob i wakabaot go wetem olketa narafala pipol long Kenan, wea olketa go long Ijip fo baem kaikai, bikos hadtaem an hanggre hemi kasem ples blong olketa nao.
6Long taem ya, Josef nao hemi gohed fo lukaftarem kantri ya, an hemi gohed fo salem kaikai long olketa pipol blong olketa narafala kantri long wol. Nao olketa brata blong hem olketa kam an baodaon long frant blong hem, go-go fes blong olketa hemi godaon kasem graon. 7Nao taem hemi lukim olketa, hemi luksave dat olketa ya i brata blong hem nomoa, bat hemi gohed fo toktok long langguis blong Ijip an olowe hemi garem wanfala man fo tanem toktok blong hem, mekem olketa no luksave long hem. Nao hemi tokraf long olketa olsem, “Yufala kam from wea?”
An olketa ansa olsem, “Mifala from Kenan ya, an mifala kam fo baem kaikai fo mifala ya.”
8Josef hemi luksave nomoa long olketa brata blong hem ya, bat olketa nating luksave long hem. 9Nao hemi tingim tufala drim blong hem ya wea hemi bin lukim bifoa, wea olketa bin baodaon long hem. Nao hemi toktok strong long olketa olsem, “Ating yufala kam nomoa fo luksave long ples blong mifala ya. Yufala laek fo faendaot nomoa abaotem mifala, sei mifala strong o nomoa, mekem yufala save kam an mekem faet wetem mifala ya.” 10Bat olketa tok olsem, “Nomoa ya masta, hemi no olsem ya. Mifala kam olsem olketa wakaman blong yu nomoa ya. Mifala kam nomoa fo baem kaikai fo mifala. 11Mifala evriwan i brata ya, an mifala garem wanfala dadi nomoa. Mifala no kam fo luksave long ples. !Mifala kam long stretfala wei nomoa ya!”
12Nao hemi tok olsem moa long olketa, “!Nomoa! !Yufala kam fo faendaot nomoa abaotem mifala ya!”
13Nao olketa tok olsem, “Masta, mifala ya olketa pikinini blong wanfala man nomoa wea mifala stap long Kenan. Fastaem mifala tuelfala ya, bat wanfala brata blong mifala hemi lus, an lasbon blong mifala hemi stap kam wetem dadi blong mifala long hom.”
14Bat hemi tok olsem, “!Mi talem finis nao! !Yufala kam nomoa fo luksave long ples ya! 15!Mi mas faendaot wea yufala toktru! Oraet, hemi tru long nem blong king, wea mi talem tru samting long yufala. Sapos lasbon blong yufala hemi no kam long ples ya, bae yufala no save goaot moa nao ya. 16!Wanfala long yufala mas go an tekem hem kam! Yufala olketa narawan, bae yufala stap long prisin go-go mifala faendemaot wea toktok blong yufala hemi tru o nomoa. Sapos nomoa, mi talem tru samting long yufala nao, bae mifala savegud nao dat yufala kam nomoa fo luksave long ples nomoa ya.” 17An hemi putum olketa long prisin fo trifala de.
18Nao long mektri de, hemi tok olsem long olketa, “Mi man fo tinghae long God ya, an sapos yufala duim olsem wea mi talem, bae mi save letem yufala laef. 19Sapos yufala wande somaot dat yufala toktru, oraet, wanfala long yufala mas stap long prisin ya. Nao yufala olketa narawan, yufala save tekem olketa kaikai ya wea yufala baem, an save gobaek fo givim long olketa pikinini blong yufala wea olketa gohed fo hanggre distaem. 20Bat yufala mas tekem kam lasbon brata blong yufala ya fo kam long mi, mekem mi lukim hem. Long wei ya, bae yufala save somaot dat toktok blong yufala ya hemi tru, nao bae mi no kilim yufala dae.”
Nao olketa brata ya i agri long toktok blong hem, 21an olketa gohed fo tok olsem long olketa seleva, “!Ei! Distaem yumi gohed fo garem panis nao from trabol ya wea yumi bin mekem long brata blong yumi ya bifoa. !Yumi lukim finis olketa trabol wea yumi mekem long hem, bat taem hemi krae long yumi mekem yumi helpem hem, yumi no herem toktok blong hem! !Dastawe nao bikfala trabol ya hemi kasem yumi distaem!”
22Nao Ruben hemi tok olsem long olketa, “Long taem ya, mi bin talem finis long yufala, ‘Hemi yangfala nomoa ya. Yufala no spoelem hem,’ bat yufala no save herem toktok blong mi. !Distaem yumi gohed fo garem panis nao from dae blong hem!” 23Josef hemi heresave long evri toktok blong olketa ya, bat olketa no save nomoa dat hem nao hemi brata blong olketa, bikos evritaem olketa gohed fo toktok wetem hem, narafala man nao hemi gohed fo tanem toktok blong olketa ya fo hem. 24Nao hemi goaot from olketa fo krae, an taem hemi filgud moa, hemi kambaek. Hemi tekem Simion an taemapem hem long ae blong olketa.
Olketa brata blong Josef i gobaek long Kenan
25Nao Josef hemi tok olsem long olketa wakaman blong hem, “Yufala fulumap olketa kaikai ya long olketa baeg blong olketa man ya. Olketa baem olketa kaikai ya finis, bat seleni wea evri man long olketa hemi pei long hem, hemi mas gobaek long baeg blong hem, wetem kaikai blong hem. An yufala mas givim kaikai long olketa fo kaikaim long rod.” An olketa wakaman blong hem i duim olsem nao. 26So olketa brata blong hem ya i putum olketa baeg kaikai ya long olketa dongki blong olketa, an goaot nao. 27Long naet, taem olketa res, wanfala long olketa hemi openem baeg blong hem fo givim kaikai long dongki blong hem, nao hemi sek long seleni blong hem wea hemi stap nomoa long baeg wetem olketa kaikai ya. 28Nao hemi tok olsem long olketa, “!Ei, olketa! !Olketa givimbaek nomoa seleni blong mi ya! Hemi stap nomoa wetem olketa kaikai ya insaet long baeg blong mi.” Tingting blong olketa i nogud nao, bikos olketa fraet fogud. So olketa gohed fo askem olketa seleva olsem, “?Wanem nao God hemi gohed fo duim long yumi ya?”
29Nao taem olketa kambaek moa long dadi blong olketa long Kenan, olketa talemaot long hem evrisamting wea i kasem olketa. 30Olketa tok olsem, “Man ya hu hemi gohed fo lukaftarem olketa ples long Ijip, hemi gohed fo tokraf tumas long mifala. Hemi tingse mifala go nomoa long kantri blong hem fo luksave long ples blong hem. 31Mifala tok olsem long hem, ‘Mifala no kam fo luksave long ples blong yu ya. Mifala kam nomoa fo baem kaikai. 32Mifala ya olketa pikinini blong wanfala dadi nomoa ya. Fastaem, mifala tuelfala ya, bat wanfala brata blong mifala hemi lus, an lasbon blong mifala hemi stap yet wetem dadi blong mifala long Kenan.’ 33Nao man ya hemi tok olsem, ‘Hem nao wanfala wei fo mi faendemaot wea yufala toktru o nomoa. Wanfala long yufala bae hemi mas stap wetem mi long hia. An yufala olketa narawan, bae yufala mas gobaek an tekem olketa kaikai ya fo olketa pikinini blong yufala wea olketa gohed fo hanggre kam long hom. 34Bat yufala mas tekem kam lasbon brata blong yufala ya long hia mekem mi lukim hem. Long wei ya nao, bae mi save dat yufala i no man fo luksave long ples, an toktok blong yufala hemi tru. Sapos olsem, bae mi jes letem brata blong yufala ya fo gobaek an stap wetem yufala, an bae yufala save go nomoa eniples long kantri ya wea yufala laekem.’”
35Nao taem olketa kapsaetem olketa kaikai blong olketa, olketa evriwan i lukim dat olketa baeg seleni blong olketa, i stap nomoa wetem olketa kaikai. An taem olketa lukim olketa seleni ya, olketa fraet fogud, an dadi blong olketa tu hemi fraet fogud. 36Nao hemi tok olsem long olketa, “?Waswe, yufala laekem nomoa fo mi lusim olketa pikinini blong mi ya? !Josef hemi lus finis! !An Simion hemi lus finis tu! ?An distaem, yufala laek fo tekem Benjamin moa? !Evri trabol ya hemi kam fo spoelem mi nomoa!”
37Nao Ruben hemi tok olsem long dadi blong hem, “Dadi, samting gud nomoa yu putum Benjamin long han blong mi, an bae mi tekem hem kambaek long yu moa. Sapos mi no tekem hem kambaek, bae yu save kilim dae tufala pikinini boe blong mi ya.” 38Bat dadi blong olketa hemi tok olsem, “!Nomoa! Mi no save letem pikinini blong mi ya fo go wetem yufala. Barava brata blong hem hemi dae finis nao, an hem seleva nomoa wanfala wea hemi stap hu hemi bon long waef blong mi Resel. Maet wanfala nogud samting bae hemi kasem hem moa long rod. Mi olfala tumas nao, an sapos yu mekem eni nogud samting fo kasem hem, bae mi dae nomoa long sore ya.”
Tällä hetkellä valittuna:
:
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Pijin Catholic Bible © Bible Society of the South Pacific, 2008.