Génesis 44
44
Josépa väsunta Benjamínpa costalninchö tarinqan
1Tsëpitanam Joséqa mayor sirwiqninta kënö mandarqan: <<Kë nunakunapa costalninman trïguta tinku winarkur pagayäshunqëki qellëtapis costalninkunapa shiminman winarkunki. 2Tutu kaqpa costalninmanna qellëpita väsüta y trïgupita pagashunqëki qellëta winarkapunki>>.
José ninqannöllam tsë sirwiqnin llapantapis rurarqan.
3Patsa waräramuptinnam wawqinkunata José despacharqan y ashnunkunaman cargapakurkurmi jeqariyarqan. 4Manaraq karupäyaptinnam Joséqa mayor kaq sirwiqninta kënö nir kacharqan: <<Ëwë tsë trïgu rantiq nunakunapa qepanta. Taripëkur ninki: <Patronnï qamkunawan alli këkaptin ¿imanirtaq qellëpita cöpanta suwakayämurqunki? 5Tsë cöpaqa patronnï upukunanmi y imatapis adivinäkunanmi. Tsëta suwamur mana allitam rurayarqunki> >>.
6Tsënö niptinnam ëwar pëkunata taripëkur patronnin ninqannölla nirqan. 7Pëkunanam niyarqan: <<¿Imanirtaq tsënö tumpayämanki? Tsëtaqa manachi rurëkulläyämantsu. 8Costalnïkunapa shiminchö tariyanqä qellëtapis Canaán markapita patsataq kutitsiyämurqä. Tsënö këkar ¿imanöpataq patronnikipa wayinpitaraq qellëninta y qorinta suwakayämüman? 9Mëqäkunapa costalnïchöpis tsë cöpata tariptikiqa wanutsun. Y wakinnïpis patronnikipa sirwiqninmi kayäshaq>>.
10Tsë sirwiqnam nirqan: <<Niyanqëkinö katsun. Mëqanpis cöpata tsararaq kaqllam sirwimaqnï kananpaq quedanqa. Wakinnikiqa markëkikunatam kutikuyanki>>.
11Tsënö niptinnam tsë höra cargankunata paskapakur costalninkunata kichapakuyarqan. 12Wamaqshu kaqpa costalninpita qallëkur tutu kaqpa costalninyaq ashirmi Benjamínpa costalninchö cöpata tarïkurqan. 13Tsënam mantsakëwan ratashninkunatapis rachir ushayarqan. Tsë höram ashnunkunaman cargakurkur kutikuyarqan José këkanqan markaman. 14Wawqinkunawan Judá kutirmi Joséta wayinllachöraq tarir alläpa mantsakashqa nöpanman lätakïkuyarqan.
15Josénam nirqan: <<¿Imanirtaq suwakuyarqunki? ¿Manaku musyayarqunki adivïnu kar imatapis musyanqäta?>>
16Tsënam Judá nirqan: <<Teyta, ¡këqa imanöchi kakullanpis! Manam ima nitapis puëdilläyaqtsu. Jutsata rurayanqätam#44.16 Josépa cöpanta mana suwashqa karpis Judá reconocirqan wawqinta unë tiempu rantikuyanqanpita jutsayuq kayanqantam. Tsëmi jutsata rurayanqätam Teyta Dios rikäyämashqa nirqan. Tsëpita masta musyanëkipaq leyinki Gén. 42.21-22. Teyta Dios rikäyämashqa. Kananqa cöpëkita tsararaqwan llapäkunachi sirwishuqniki kalläyäshaq>>.
17Tsënö niptinnam José nirqan: <<Llapëkiqa manam sirwimaqnï kayankimantsu. Cöpäta suwaq kaqllam sirwimaqnïqa kanqa. Wakinnikiqa tëtëkikuna kaqman yamë kutikuyë>>.
Benjamínta kacharinanpaq Judá rowakunqan
18Tsënö niptinnam Josépa nöpanman witïkur Judá nirqan: <<Teyta, qamqa këchö këkanki kikin Faraónnömi. Tsëmi rowakuptiq mana piñakushpa wiyëkallämë. 19Nöpata shayämuptïmi tapuyämarqëki tëtäkuna kawanqanta o maspis wawqïkuna kanqanta. 20Tsënö tapuyämaptikim willayarqaq tëtäkuna kawanqanta y awkinyëninchö tsurin jövinllaraq kanqanta, pëpa wawqin wanushqanta, pëkuna juk mamallapita kayashqanta y pëllana tsë mamapita kawaptin tëtä alläpa kuyanqanta. 21Tsënö willayaptiqmi niyämarqëki reqinëkipaq tsë tutu wawqïkunata pushayämunäpaq. 22Tsëmi niyarqaq: <Tsë tsurinta apayämuptïqa llakikïllawanchi tëtäkuna wanukïkunman> nir. 23Tsënö willayaptiqmi kënö niyämarqëki: <Pëta mana pushayämuptikiqa manam chaskiyashqëkitsu>.
24<<Tsëmi tëtäkunaman kutïkur llapan niyämanqëkita willayarqä. 25Tsëpitanam tëtäkuna niyämarqan yapë trïgu rantiq kutiyämunäpaq. 26Tsënam niyarqä: <Manam kutiyämantsu tutu kaq wawqïta mana pusharqa. Pëta mana pushayaptïqa tsë mandakuq manam chaskiyämanqatsu> nir. 27Tsëmi niyämarqan: <Musyayankim tsë mamapita ishkëlla tsurï kayanqanta. 28Juk kaqtaqa wayïpita yarqunqanpita patsa manam rikänatsu. Rasunpam mikukuq animalkuna mikushqa kanqa. 29Tutu kaqta pushëkäyaptiki imapis pasaptinqa qamkunam jutsayuq kayanki llakikïwan wanuptïpis> >>.
30Tsënö nirirnam Judá nirqan: <<Kë tsurinta tëtä alläpam kuyan. Pëta mana kutitsiyaptïqa 31llakikïwanmi wanunqa. Tsënö wanuptinqa noqakunam jutsayuq kayäshaq. 32Noqam tëtäta änirqä imëkanöpapis pëta kutitsinäpaq. Jina nirqämi mana kutitsirqa imëyaqpis jutsayuq kanäpaq kanqanta. 33Teyta, tsëmi rowakuq pëpa rantin sirwinaqpaq noqa quedakushaq. Pëqa wawqïkunawan tëtäman kutikutsun. 34Pë mana kutiptinqa ¿ima cäräwanraq tëtäman kutishaq? Manam munätsu tëtäta mas llakitsita>>.
Tällä hetkellä valittuna:
Génesis 44: qwhB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.