Awˬ hkuiˉ puiˍ ve li‸ 16
16
Haˍgaˍraˆ leh Iˉshaˍmeˍlaˆ
1Aˍbranˍ miˇ ma Saˍrehˇ lehˬ, yaˇ teˇ gʼaˇ ka‸ maˇ cawˬ. Yawˇ geh lo Haˍgaˍraˆ meh ve Eˇjiˇ tu‸ chaw awˬ ceˬ ma teˇ gʼaˇ cawˬ ve yoˬ. 2Hkʼe te leh Saˍrehˇ lehˬ, yawˇ ve awˬ hpawˇAˍbranˍ geh laˬ leh, Ngaˬ lehˬ yaˇ hu yaˇ paw tuˬ, Gʼuiˬsha a hkaw-anˬ maˇ pe‸ laˇ. Chi hta‸ pa taw, ngaˬ ve awˬ ceˬ ma chi hta‸ nawˬ heuˆ loˬ. Yawˇ geh lo ngaˬ ve awˬ ceuˬ awˬ hkʼaˇ cawˬ la tuˬ naˍ maˇ shiˍ, teh‸ kʼoˆ piˇ ve yoˬ. Aˍbranˍ htawˇ Saˍrehˇ kʼoˆ ve hta‸ nyi ma cawˇ ve yoˬ. 3Hkʼe te leh, Saˍrehˇ lehˬ Haˍgaˍraˆ hta‸ yawˇ ve awˬ miˇ ma i te tcuh ve yoˬ. (Chi hkʼe hpeh‸ la ve awˬ yanˇ lehˬ, Aˍbranˍ yawˇ Hkaˍnanˍ mvuhˇmiˬ hkʼaw chehˇ taˍ ve teˇ chi hkʼaw‸ gaˬ htaˇ yoˬ.) 4Aˍbranˍ lehˬ, Haˍgaˍraˆ geh zuh‸ ve pa taw, yaˇ miˇ chi yaˇ hu la ve yoˬ. Haˍgaˍraˆ lehˬ yawˇ yaˇ hu la peuˬ ve hta‸ gʼa shiˍ ve teˇ yanˇ, Saˍrehˇ hta‸ maˇ shawˍ maˇ caˆ te ve yoˬ.
5Oˇ htaˇ, Saˍrehˇ Aˍbranˍ hta‸ kʼoˆ piˇ ve, Haˍgaˍraˆ ngaˬ hta‸ maˇ shawˍ maˇ caˆ te laˇ ve lehˬ, nawˬ hta‸ pa taw yoˬ. Yawˇ hta‸ nawˬ ve la‸ sheh hkʼaw ngaˬ chiˇ a‸ laˇ taˍ ve yoˬ. Ya‸ hkʼaˇ, yawˇ yaˇ hu la ve hta‸ shiˍ la ve teˇ nyi hta‸ te leh ngaˬ hta‸ maˇ shawˍ maˇ caˆ te laˇ ve yoˬ. Ngaˬ huiˉ maˬ a shu teˇ gʼaˇ cawˇ ve hta‸ Gʼuiˬsha suhˉ jehˬ laˇ piˇ-oˆ, teh‸ kʼoˆ piˇ ve yoˬ.
6Aˍbranˍ kʼaw‸ kʼoˆ ve, nawˬ ve awˬ ceˬ ma lehˬ, nawˬ ve la‸ sheh hkʼaw cawˬ ve yoˬ. Yawˇ hta‸ nawˬ te gaˇ ve hkʼe te-o, teh‸ kʼaw‸ kʼoˆ piˇ ve yoˬ. Chi hta‸ pa taw, Saˍrehˇ lehˬ awˬ ceˬ ma chi hta‸ fawˉ mehˍ piˇ leh yaˇ miˇ chi hpaw kʼai ve yoˬ.
7Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ lehˬ, Shuˇraˆ venˇ lo kʼai ve ya‸ kʼaw hpuiˇ lo cawˬ ve iˉ kaˆ tawˆ kuiˬ teˇ kaˬ lo, Haˍgaˍraˆ hta‸ gʼa mawˬ ve yoˬ. 8Yawˇ yaˇ miˇ chi hta‸ mawˬ htaˇ, Saˍrehˇ ve awˬ ceˬ ma Haˍgaˍraˆ-oˬ, nawˬ hkʼaˬ lo laˬ leh hkʼaˬ lo kʼai toˇ ve le, teh‸ na nyi ve yoˬ.
Yaˇ miˇ chi kʼaw‸ yaw hkʼaw‸ leh kʼoˆ ve, Ngaˬ lehˬ ngaˬ ve yehˬ shehˍ ma geh lo hpaw tawˆ la ve yoˬ, teh‸ kʼaw‸ kʼoˆ piˇ ve yoˬ.
9Oˇ htaˇ yawˇ kʼoˆ ve, Nawˬ ve yehˬ shehˍ ma geh lo kʼaw‸ kʼo‸-e leh yawˇ ve awˬ ceˬ ca kʼaw‸ te-o. 10Nawˬ ve awˬ ceuˬ awˬ hkʼaˇ teˇ hpaˍ gʼaw maˇ peuˬ htaˇ hkʼa gaˬ maˇ la tuˬ ngaˬ te laˇ tuˬ yoˬ. 11Nawˬ lehˬ yaˇ paˍ teˇ gʼaˇ paw la tuˬ yoˬ. Yawˇ hta‸ Iˉshaˍmeˍlaˆ #16:11 Chi lehˬ Gʼuiˬsha kaˇ peuˬ teh‸ kʼoˆ gaˇ ve yoˬ. teh‸ nawˬ gʼa meh piˇ tuˬ yoˬ. Awˬ lawn kʼo, nawˬ kuˬ hawˬ ve awˬ hkawˇ hta‸ Gʼuiˬsha gʼa kaˇ peuˬ. 12Yawˇ lehˬ, piˉ laˬ awˬ hteunˍ hkʼa shuˍ ve chaw teˇ gʼaˇ hpeh‸ leh shu hta‸ ya‸ da‸ tuˬ yoˬ. Shu htawˇ yawˇ hta‸ kʼaw‸ ya‸ tuˬ yoˬ. Yawˇ lehˬ, yawˇ ve awˬ viˉ awˬ nyi teˇ hpaˍ geh gʼa chehˇ tuˬ ve maˇ heˆ, teh‸ kʼoˆ piˇ ve yoˬ.
13Oˇ htaˇ, yawˇ hta‸ tawˇ yaw laˇ chehˇ ve Gʼuiˬsha chi hta‸, Mawˬ puiˉ ve Gʼuiˬsha, teh‸ meh piˇ ve yoˬ. Awˬ lawn kʼo yawˇ kʼoˆ ve, Ngaˬ awˬ tehˬ awˬ na Gʼuiˬsha hta‸ gʼa mawˬ peuˬ leh, awˬ lawn chi ngaˬ shu hta‸ gʼa kʼoˆ piˇ tuˬ ve laˇ, teh‸ kʼoˆ ve yoˬ. 14Chi hta‸ pa taw, chaw yaˇ teˇ hpaˍ nanˬ bawˍ oˇ ve hta‸, Ngaˬ hta‸ mawˬ shehˍ hpaˇ te‸ chehˇ ve Gʼuiˬsha ve nanˬ bawˍ, teh‸ kʼoˆ ve yoˬ. Nanˬbawˍ chi lehˬ Kaˍdeˍshaˆ venˇ leh Beˍrehˆ venˇ awˬ kaˍ lo cawˬ ve yoˬ.
15Haˍgaˍraˆ lehˬ, Aˍbranˍ awˬ pon yaˇ paˍ teˇ gʼaˇ paw la piˇ leh yawˇ hta‸ Iˉshaˍ meˍlaˆ teh‸ meh piˇ ve yoˬ. 16Oˇ htaˇ, Aˍbranˍ lehˬ a sha‸ 86 hkʼaw‸ gaˬ peuˬ ve yoˬ.
Tällä hetkellä valittuna:
Awˬ hkuiˉ puiˍ ve li‸ 16: LHBE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Lahu Bible Edited © Thailand Bible Society and Bible Society of Myanmar, 2010, 2020.