Awˬ hkuiˉ puiˍ ve li‸ 18
18
Yaˇ paˍ teˇ gʼaˇ paw la tuˬ ka ti‸ te piˇ ve
1Teˇ nyi htaˇ, Gʼuiˬsha lehˬ Maˍreˍ ve da‸ kehˬ ve suhˆ cehˬ cawˬ kuiˬ lo chehˇ taˍ ve Aˍbraˍhanˍ geh laˬ ve yoˬ. Aˍbraˍhanˍ lehˬ, mvuhˇ cha chiˆ jaˇ leh yawˇ ve aˉ po kʼo hkʼaw mui chehˇ ve teˇ yanˇ, 2chaw shehˆ gʼaˇ yawˇ mehˆ gʼuˇ suhˍ lo huˉ chehˇ ve hta‸ yawˇ gʼa mawˬ ve yoˬ. Teˇ cawˬ haˉ yawˇ hui geh gʼuiˇ kʼai leh, yawˇ hui mehˆ gʼuˇ suhˍ boˆ taˍ ve yoˬ. 3Yawˇ kʼoˆ ve, Ngaˬ geh maˇ jehˇ taˉ leh awˬ gʼuˇ suhˍ taˇ kʼai laˇ sheˬ. Ngaˬ nawˬ hui hta‸ ga laˇ tuˬ choˬ kaˬ lo chehˇ taˍ ve yoˬ. 4Nawˬ hui suhˆ ceh chi awˬ hawˉ lo gʼaˇ jehˇ taˍ sheˬ. Nawˬ hui hkui sheh tsuhˇ tuˬ ve iˉ kaˆ hta‸ ngaˬ ca yuˬ shaˍ. 5Chi hkʼoˆ ka‸, nawˬ hui awˬ pon caˇ tuˬ dawˬ tuˬ hta‸ ka‸ ngaˬ ca yuˬ veu laˇ shaˍ. Gʼaˇ jehˇ leh caˇ peuˬ dawˬ peuˬ hkʼaw‸ nawˉ, nawˬ hui awˬ gʼuˇ suhˍ lo kʼaw‸ caˉ kʼai hpeh‸ ve yoˬ, teh‸ kʼoˆ piˇ ve yoˬ.
6Aˍbraˍhanˍ lehˬ, yawˇ ve aˉ po kʼo hkʼaw gʼuiˇ kʼo‸-e leh, yawˇ miˇ ma hta‸ hkaoˍmonˇ haˆ haˆ te tcuh ve yoˬ. 7Peuˬ hkʼaw‸ nawˉ, yawˇ nuˇ hkawˆ hkʼaw lo‸-e leh chu jaˇ da‸ jaˇ ve nuˇ paˍ ehˉ teˇ hkeh hta‸ yuˬ leh, awˍ chiˇ te tuˬ yawˇ ve awˬ ceˬ paˍ teˇ gʼaˇ hta‸ chiˇ a‸ piˇ ve yoˬ. 8Hkaoˍmonˇ, nuˇ cuˉ gʼuiˬ leh nuˇ shaˍ awˍ chiˇ te taˍ ve hta‸ yuˬ leh, yawˇ hui mehˆ gʼuˇ suhˍ lo ca teh piˇ ve yoˬ. Yawˇ hui caˇ chehˇ htaˇ, yawˇ lehˬ awˬ paˇ lo huˉ taˍ ve yoˬ.
9Yawˇ hui yawˇ hta‸, Nawˬ ve awˬ miˇ ma Saˍraˇ hkʼaˬ lo chehˇ le, teh‸ na nyi htaˇ, Yawˇ lehˬ aˉ po kʼo hkʼaw chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.
10Yawˇ hui awˬ hkʼaw lo teˇ gʼaˇ kʼoˆ ve, Nehˉ hkʼaw‸ chi teˇ yanˇ gaˬ kʼo, ngaˬ nawˬ geh teˇ pawˆ kʼaw‸ laˬ tuˬ yoˬ. Oˇ htaˇ, nawˬ miˇ ma Saˍraˇ lehˬ yaˇ paˍ teˇ gʼaˇ cawˬ la tuˬ yoˬ, teh‸ kʼoˆ piˇ ve yoˬ. Saˍraˇ lehˬ yehˬ miˉ awˬ baˬ lo chehˇ taˍ leh, yawˇ hui tawˇ yaw da‸ ve hta‸ na chehˇ ve yoˬ. 11Aˍbraˍhanˍ leh Saˍraˇ yawˇ huiˉ maˬ nyiˇ gʼaˇ gʼaˇ a sha‸ mawˇ jaˇ peuˬ. Saˍraˇ hkʼawˇ gʼuiˬ leh, Ngaˬ lehˬ chi beu‸ yaˇ hu yaˇ paw tuˬ awˬ yanˇ ponˬ kʼai peuˬ. 12Ngaˬ ve awˬ yanˇ ka‸ leh kʼai peuˬ. Ngaˬ ve awˬ hpawˇ htawˇ a sha‸ mawˇ peuˬ, teh‸ yawˇ ve nyi ma hkʼaw dawˇ chehˇ ve yoˬ.
13Gʼuiˬsha Aˍbraˍhanˍ hta‸ kʼoˆ piˇ ve, Aˬ hto‸ ma pa taw Saˍraˇ gʼuiˬ leh, ngaˬ a sha‸ mawˇ peuˬ ve ka‸ awˬ tehˬ awˬ na yaˇ gʼa hu gʼa paw tuˬ laˇ, teh‸ kʼoˆ ve le. 14Gʼuiˬsha maˇ te puiˉ ve teˇ ceuˬ ceuˬ cawˬ leh laˇ. Ngaˬ kʼoˆ taˍ peuˬ ve hkʼe, nehˉ hkʼaw‸ chi teˇ yanˇ gaˬ kʼo, ngaˬ nawˬ geh teˇ pawˆ kʼaw‸ laˬ tuˬ yoˬ. Oˇ htaˇ Saˍraˇ yaˇ paˍ teˇ gʼaˇ cawˬ la tuˬ yoˬ, teh‸ kʼoˆ piˇ ve yoˬ.
15Saˍraˇ lehˬ kawˆ ve pa taw heˍ leh, Ngaˬ maˇ gʼuiˬ, teh‸ kʼoˆ piˇ ve yoˬ. Ya‸ hkʼaˇ Yawˇ lehˬ, Nawˬ gʼuiˬ ve yoˬ, teh‸ kʼaw‸ kʼoˆ piˇ ve yoˬ.
Aˍbraˍhanˍ Sawˉdonˍ venˇ awˬ pon lawˬ hkawˉ ve
16Yawˇ hui tu leh Sawˉdonˍ venˇ lo kʼai ve yoˬ. Aˍbraˍhanˍ htawˇ yawˇ hui geh teˇ tawn gʼa‸ kʼai ve yoˬ. 17Oˇ htaˇ Gʼuiˬsha chi hkʼe dawˇ ve, Ngaˬ te tuˬ dawˇ taˍ ve kanˉ chi, Aˍbraˍhanˍ hta‸ maˇ hto piˇ leh faˉ taˍ maˇ cawˇ. 18Yawˇ ve awˬ ceuˬ awˬ hkʼaˇ teˇ hpaˍ lehˬ, chaw ceuˬ lonˉ teˇ ceuˬ hpeh‸ la tuˬ yoˬ. Yawˇ hta‸ cuˇ leh miˬguiˬ chaw ceuˬ hkʼa peu-eˬ ve hta‸ ngaˬ awˬ bon na‸ piˇ tuˬ yoˬ. 19Yawˇ ve awˬ yaˇ leh yawˇ ve awˬ ceuˬ awˬ hkʼaˇ teˇ hpaˍ, ngaˬ ve tawˇ hta‸ na yuˬ leh hteˇ ve cawˇ ve kanˉ hta‸ ceh tiˉ te tuˬ awˬ pon maˍ piˇ tuˬ, ngaˬ yawˇ hta‸ leuˆ yuˬ taˍ ve yoˬ. Yawˇ hui oˇ hkʼe te ve kʼo, ngaˬ yawˇ hta‸ te piˇ taˍ ve ka ti‸ hkʼa peu-eˬ ve hta‸ ngaˬ te biˇ la piˇ tuˬ yoˬ, teh‸ dawˇ ve yoˬ.
20Hkʼe te leh, Gʼuiˬsha Aˍbraˍhanˍ hta‸ chi hkʼe kʼoˆ piˇ ve yoˬ. Sawˉdonˍ venˇ leh Gawˇ mawˇra‸ venˇ hta‸ venˇbaˆ taˍ kuiˬ hkʼa biˇ cawˬ ve yoˬ. Yawˇ hui ve venˇbaˆ lehˬ uiˍ jaˇ maˇ jaˇ ve yoˬ. 21Ngaˬ yawˇ hui geh ya‸-e leh, yawˇ hui ve awˬ lawn ngaˬ gʼa kaˇ taˍ ve teˇ hpaˍ awˬ tehˬ awˬ na cawˇ, maˇ cawˇ ve hta‸ ca chaˬ nyi shaˍ, teh‸ kʼoˆ ve yoˬ.
22Oˇ ve hkʼaw‸ nawˉ, mvuhˇ naw tcuh yaˇ nyiˇ gʼaˇ Sawˉdonˍ venˇ lo kʼai ve yoˬ. Ya‸ hkʼaˇ, Gʼuiˬsha Aˍbraˍhanˍ geh chehˇ taˉ ve yoˬ. 23Oˇ htaˇ, Aˍbraˍhanˍ Gʼuiˬsha awˬ paˇ lo jiˆ laˬ leh kʼoˆ ve, Nawˬ lehˬ da‸ ve chaw leh maˇ da‸ ve chaw hta‸ awˬ tehˬ awˬ na teˇ geh te luˬ te sheˆ piˇ tuˬ ve laˇ. 24Venˇ oˇ ve hkʼaw da‸ ve chaw ngaˇ chi gʼaˇ cawˬ ve kʼo, nawˬ te luˬ te sheˆ piˇ tuˬ laˇ. Chaw da‸ ngaˇ chi gʼaˇ hta‸ pa taw, venˇ oˇ ve hta‸ nawˬ ponˬ piˇ maˇ hpeh‸ laˇ. 25Da‸ ve chaw hta‸ maˇ da‸ ve chaw hui geh teˇ geh nawˬ maˇ tiˇ pehˍ taˬ. Nawˬ oˇ hkʼe te ve kʼo, da‸ ve chaw teˇ hpaˍ lehˬ maˇ da‸ ve chaw hui geh teˇ geh ciˍ yanˍ ve hta‸ gʼa hkanˍ tuˬ yoˬ. Oˇ hkʼe te ve lehˬ maˇ cawˇ. Miˬguiˬ hkʼoˆ ve suhˉ jehˬ shehˍ hpaˇ teˇ hpaˍ htawˇ, hteˇ ve cawˇ ve hkʼaw ceh tiˉ suhˉ gʼa jehˬ ve yoˬ, teh‸ kʼoˆ piˇ ve yoˬ.
26Gʼuiˬsha kʼoˆ ve, Sawˉdonˍ venˇ hkʼaw chaw da‸ ngaˇ chi gʼaˇ cawˬ ve hta‸ ngaˬ gʼa mawˬ ve kʼo, yawˇ hui hta‸ pa taw venˇ oˇ ve hta‸ ngaˬ ponˬ piˇ tuˬ yoˬ, teh‸ kʼoˆ ve yoˬ.
27Aˍbraˍhanˍ kʼaw‸ kʼoˆ ve, Ngaˬ hta‸ a ciˉ yeunˇ hkanˍ laˇ sheˬ. Ngaˬ lehˬ chaw yaˇ hpeh‸ leh, nawˬ hta‸ tawˇ kʼaw‸ shanˬ tuˬ te maˇ keunˍ tehˬ ve yoˬ. 28Oˇ kaˬ lo da‸ ve chaw awˇ chi ngaˇ gʼaˇ tiˉ cawˬ ve kʼo, venˇ oˇ ve hta‸ nawˬ te luˬ piˇ tuˬ ve laˇ, teh‸ na nyi ve yoˬ.
Gʼuiˬsha kʼoˆ ve, Da‸ ve chaw awˇ chi ngaˇ gʼaˇ hta‸ ngaˬ gʼa mawˬ ve kʼo, venˇ oˇ ve hta‸ ngaˬ te luˬ piˇ tuˬ ve maˇ heˆ, teh‸ kʼoˆ piˇ ve yoˬ.
29Aˍbraˍhanˍ kʼaw‸ kʼoˆ ve, Oˇ kaˬ lo awˇ chi gʼaˇ ceh tiˉ cawˬ ve kʼo, hkʼaˬ hkʼe te tuˬ le, teh‸ kʼaw‸ na nyi ve yoˬ.
Gʼuiˬsha kʼoˆ ve, Oˇ kaˬ lo awˇ chi gʼaˇ cawˬ ve kʼo, venˇ oˇ ve hta‸ ngaˬ te luˬ piˇ tuˬ ve maˇ heˆ, teh‸ kʼoˆ ve yoˬ.
30Oˇ htaˇ Aˍbraˍhanˍ kʼoˆ ve, Gʼuiˬsha-oˬ, ngaˬ tawˇ kʼaw‸ yaw ve hta‸ nyi ma a ciˉ taˇ zuhˆ laˇ sheˬ. Oˇ kaˬ lo chaw da‸ shehˆ chi gʼaˇ ceh cawˬ ve kʼo, hkʼaˬ hkʼe te tuˬ le, teh‸ na nyi ve yoˬ.
Chaw da‸ shehˆ chi gʼaˇ cawˬ ve kʼo, venˇ oˇ ve hta‸ ngaˬ maˇ te luˬ piˇ, teh‸ Gʼuiˬsha kʼaw‸ kʼoˆ ve yoˬ.
31Aˍbraˍhanˍ kʼaw‸ kʼoˆ ve, Gʼuiˬsha-oˬ, ngaˬ kʼaw‸ caˉ na nyi laˇ chehˇ ve hta‸ a ciˉ yeunˇ hkanˍ laˇ sheˬ. Chaw da‸ nyiˇ chi gʼaˇ ceh cawˬ ve kʼo, hkʼaˬ hkʼe te tuˬ le, teh‸ na nyi ve yoˬ.
Chaw da‸ nyiˇ chi gʼaˇ cawˬ ve kʼo, venˇ oˇ ve hta‸ ngaˬ maˇ te luˬ piˇ, teh‸ Gʼuiˬsha kʼaw‸ kʼoˆ piˇ ve yoˬ.
32Aˍbraˍhanˍ kʼaw‸ kʼoˆ ve, Gʼuiˬsha-oˬ, a ciˉ yeunˇ hkanˍ laˇ sheˬ. Ngaˬ teˇ pawˆ ceh nawˬ hta‸ tawˇ kʼaw‸ yaw laˇ gaˇ sheˬ ve yoˬ. Awˬ leh meuˇ teˇ chi gʼaˇ ceh tiˉ cawˬ ve kʼo hkʼaˬ hkʼe te tuˬ le, teh‸ na nyi ve yoˬ. Teˇ chi gʼaˇ cawˬ ve kʼo, venˇ oˇ ve hta‸ ngaˬ maˇ te luˬ piˇ, teh‸ Gʼuiˬsha kʼoˆ piˇ ve yoˬ. 33Gʼuiˬsha lehˬ, Aˍbraˍhanˍ hta‸ tawˇ yaw da‸ peuˬ hkʼaw‸ nawˉ tawˆ kʼai ve yoˬ. Aˍbraˍhanˍ htawˇ aˉ hkʼaw lo kʼo‸-e ve yoˬ.
Tällä hetkellä valittuna:
Awˬ hkuiˉ puiˍ ve li‸ 18: LHBE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Lahu Bible Edited © Thailand Bible Society and Bible Society of Myanmar, 2010, 2020.