Awˬ hkuiˉ puiˍ ve li‸ 22
22
Iˉcaˆ hta‸ tuˉ tanˇ ve
1Teˇ nyi htaˇ, Gʼuiˬsha Aˍbraˍhanˍ hta‸ lawˇ nyi tuˬ yawˇ geh laˬ leh, Aˍbraˍ hanˍ-oˬ, teh‸ kuˬ ve yoˬ. Aˍbraˍhanˍ htawˇ, Ngaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.
2Gʼuiˬsha yawˇ hta‸ kʼoˆ piˇ ve, Nawˬ geh teˇ gʼaˇ tiˉ cawˬ leh nawˬ ha‸ jaˇ ve yaˇ paˍ Iˉcaˆ hta‸ shiˍ veu leh Mawˇriˆ mvuhˇmiˬ lo kʼai-o. Oˇ kaˬ ngaˬ maˍ laˇ tuˬ ve hkʼaw pui teˇ shiˍ hkʼoˆ lo nawˬ ve yaˇ paˍ ngaˬ hta‸ tuˉ tanˇ laˇ-oˆ, teh‸ kʼoˆ piˇ ve yoˬ.
3Aˍbraˍhanˍ lehˬ, mvuhˇ shawˉ teˇ na‸ piˉ laˬ hkʼoˆ suhˆ tsuh‸ taˆ piˇ peuˬ hkʼaw‸ nawˉ, yawˇ ve awˬ ceˬ paˍ nyiˇ gʼaˇ leh yawˇ ve yaˇ paˍ Iˉcaˆ hta‸ shiˍ veuˬ leh Gʼuiˬsha kʼoˆ piˇ taˍ ve chehˇ kuiˬ lo kʼai ve yoˬ. 4Shehˆ nyi teˇ nyi gaˬ htaˇ, Gʼuiˬsha kʼoˆ piˇ taˍ ve hkʼaw hta‸ vuiˇ kuiˬ lo gʼa mawˬ ve yoˬ. 5Oˇ htaˇ yawˇ lehˬ, Nawˬ huiˉ maˬ piˉ laˬ hta‸ sheh leh choˬ kaˬ lo chehˇ taˍ-o‸. Ngaˬ yaˇ paˍ ngaˬ huiˉ maˬ hkʼaw hkʼoˆ lo taˆ-e shaˍ. Oˇ kaˬ lo ngaˬ huiˉ maˬ Gʼuiˬsha hta‸ oˉ kʼoˍ pui taˉ peuˬ kʼo, nawˬ huiˉ maˬ geh kʼaw‸ ya‸ la tuˬ yoˬ, teh‸ yawˇ ve awˬ ceˬ paˍ nyiˇ gʼaˇ hta‸ kʼoˆ piˇ ve yoˬ.
6Aˍbraˍhanˍ lehˬ, tuˉ tanˇ tuˬ yuˬ veu laˇ ve suhˆ hta‸ yuˬ leh yawˇ yaˇ paˍ hta‸ taˆ tcuh ve yoˬ. Yawˇ lehˬ aˬ miˍ leh aˉ hte‸ hta‸ yuˬ leh awˬ gʼuˇ suhˍ kʼaw‸ kʼai ve yoˬ. 7Oˇ htaˇ Iˉcaˆ kʼoˆ ve,
A pa-oˬ,
ngaˬ huiˉ maˬ geh suhˆ leh aˬ miˍ cawˬ taˍ ve yoˬ. Ya‸ hkʼaˇ, Gʼuiˬsha hta‸ tuˉ tanˇ piˇ tuˬ ve yawˬ ehˉ hkʼaˬ lo le, teh‸ na nyi ve yoˬ.
8Oˇ htaˇ Aˍbraˍhanˍ kʼoˆ ve, Ngaˬ yaˇ paˍ-oˬ, Gʼuiˬsha gu taˍ laˇ tuˬ yoˬ, teh‸ kʼaw‸ yaw hkʼaw‸ piˇ ve yoˬ.
9Yawˇ huiˉ maˬ awˬ gʼuˇ suhˍ kʼaw‸ kʼai leh Gʼuiˬsha kʼoˆ piˇ taˍ ve chehˇ kuiˬ lo gaˬ ve teˇ yanˇ, Aˍbraˍhanˍ lehˬ Gʼuiˬsha hta‸ tuˉ tanˇ kuiˬ te leh suhˆ teˇ hpaˍ yuˬ hpoˆ taˍ ve yoˬ. 10Peuˬ hkʼaw‸ nawˉ, yawˇ ve yaˇ paˍ Iˉcaˆ hta‸ hpeh tsuh‸ leh suhˆ hpoˆ taˍ ve awˬ hkʼoˆ lo chiˇ teh ve yoˬ. 11Yawˇ ve aˉ hte‸ hta‸ gʼawˬ tawˆ leh yawˇ ve yaˇ paˍ hta‸ juˆ-a teh‸ te ve teˇ yanˇ, Gʼuiˬsha ve mvuhˇ naw tcuh yaˇ teˇ gʼaˇ mvuhˇ naw hkʼoˆ chehˇ taˍ leh, Aˍbraˍ hanˍ-oˬ, Aˍbraˍhanˍ-oˬ, teh‸ kʼoˆ ve yoˬ.
Aˍbraˍhanˍ kʼaw‸ yaw hkʼaw‸ leh, Ngaˬ chehˇ taˍ ve yoˬ, teh‸ kʼoˆ piˇ ve teˇ yanˇ, 12mvuhˇ naw tcuh yaˇ kʼoˆ ve, Yaˇ paˍ chi hta‸ nawˬ te‸ chiˉ taˇ te. Nawˬ lehˬ yaˇ teˇ gʼaˇ tiˉ cawˬ ve htawˇ, maˇ sheˉ lai leh Gʼuiˬsha ve tawˇ hta‸ na yuˬ puiˉ ve chaw hpeh‸ ve hta‸ chi beu‸ ngaˬ gʼa shiˍ peuˬ, teh‸ kʼoˆ piˇ ve yoˬ.
13Aˍbraˍhanˍ chiˇ nyi leh, yawˬ ehˉ teˇ hkeh awˬ puiˍ taˆ hkʼaw hkanˉ taˍ ve hta‸ gʼa mawˬ ve yoˬ. Hkʼe te leh, yawˬ ehˉ oˇ ve hta‸ ca yuˬ leh yawˇ yaˇ paˍ awˬ tan Gʼuiˬsha hta‸ tuˉ tanˇ piˇ ve yoˬ. 14Aˍbraˍhanˍ lehˬ, chehˇ kuiˬ oˇ ve hta‸ Gʼuiˬsha gu taˍ ve, teh‸ meh piˇ ve yoˬ. Chi hta‸ pa taw, Hkʼaw hkʼoˆ lo Gʼuiˬsha gu taˍ laˇ tuˬ yoˬ, teh‸ chaw yaˇ teˇ hpaˍ ya‸ nyi hkʼa gaˬ kʼoˆ chehˇ taˍ ve yoˬ.
15Oˇ ve hkʼaw‸ nawˉ, mvuhˇ naw tcuh yaˇ Aˍbraˍhanˍ hta‸ nyiˇ pawˆ teˇ pawˆ tawˇ kʼaw‸ yaw piˇ leh kʼoˆ ve, 16Nawˬ lehˬ yaˇ paˍ teˇ gʼaˇ tiˉ cawˬ ve htawˇ, maˇ sheˉ lai leh ngaˬ kʼoˆ ve hkʼe te ve pa taw, ngaˬ nawˬ hta‸ awˬ bon maˇ maˇ na‸ laˇ tuˬ yoˬ. 17Ngaˬ lehˬ, nawˬ ve awˬ ceuˬ awˬ hkʼaˇ teˇ hpaˍ hta‸ mvuhˇ naw hkoˆ cawˬ ve meu‸ keu shiˍ leh laˇ tsuhˇ gʼuiˬ pfuhˍ lo cawˬ ve shehˇ shiˍ hkʼa shuˍ maˇ la piˇ tuˬ yoˬ. Nawˬ ve awˬ ceuˬ awˬ hkʼaˇ teˇ hpaˍ lehˬ, yawˇ hui ve canˇ paˍ teˇ hpaˍ hta‸ bawˆ gʼaˇ tuˬ yoˬ. 18Nawˬ ve awˬ ceuˬ awˬ hkʼaˇ hta‸ pa taw, miˬguiˬ chaw ceuˬ hkʼa peu-eˬ awˬ bon gʼa tuˬ yoˬ. Chi hkʼe hpeh‸ ve lehˬ, nawˬ ngaˬ ve tawˇ hkawˇ hta‸ na yuˬ ve pa taw yoˬ, teh‸ kʼoˆ piˇ ve yoˬ. 19Oˇ ve hkʼaw‸ nawˉ, Aˍbraˍhanˍ lehˬ yawˇ ve awˬ ceˬ paˍ teˇ hpaˍ geh ya‸-e leh, yawˇ hui hkʼa peu-eˬ Beˍraˍsheˍbaˆ lo kʼaw‸ kʼo‸-e ve yoˬ.
Naˍhkawˍ ve awˬ ceuˬ awˬ hkʼaˇ teˇ hpaˍ
20Oˇ ve hkʼaw‸ nawˉ, Miˆlaˍhkaˍ lehˬ yawˇ ve awˬ nyi paˍ Naˍhkawˍ awˬ pon yaˇ paˍ hiˉ gʼaˇ paw la piˇ taˍ peuˬ ve awˬ hkawˇ hta‸ Aˍbraˍhanˍ gʼa kaˇ ve yoˬ. 21Yawˇ hui lehˬ Uˇ yaˆ, Buˇ yaˆ, Aˍranˍ ve awˬ pa Keˍmo-eˍlaˆ, 22Keˍsehˆ, Haˍzawˇ, Piˇlaˍdaˍshaˆ, Yiˆdaˍlaˆ leh Reˍbehˆka‸ ve awˬ pa Beˍtuˍlaˆ hui hpeh‸ ve yoˬ. 23Yaˇ paˍ chi ve hiˉ gʼaˇ hta‸ Miˆlaˍhkaˍ lehˬ, Aˍbraˍhanˍ ve awˬ nyi paˍ Naˍhkawˍ awˬ pon paw la piˇ taˍ ve yoˬ. 24Chi hkʼoˆ ka‸, Naˍhkawˍ ve awˬ miˇ ma i Ruˇmaˍ htawˇ, Naˍhkawˍ awˬ pon yaˇ paˍ Teˍbaˆ, Gaˍhanˍ, Taˍhaˍshaˆ leh Maˍhkaˍ hui hta‸ paw la piˇ taˍ ve yoˬ.
Tällä hetkellä valittuna:
Awˬ hkuiˉ puiˍ ve li‸ 22: LHBE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Lahu Bible Edited © Thailand Bible Society and Bible Society of Myanmar, 2010, 2020.