Versets bibliques populaires de ရှင်လုကာ 3

Partager

ထိုသို့ ထောင်သွင်းအကျဉ်းချမခံရမီတွင် ယောဟန်သည် လူများစွာတို့ကို ရေနှစ်မင်္ဂလာပြုပေးခဲ့၏။ ကိုယ်တော်ယေရှုသည်လည်း ရေနှစ်မင်္ဂလာခံယူ၍ ဆုတောင်းနေစဉ်တွင် ကောင်းကင်သည် ဟင်းလင်းပွင့်၍ ဉာဏ်အလင်းတော်သည် ချိုးငှက်အသွင်ဖြင့် ကိုယ်တော်အပေါ်သို့ ဆင်းသက်လာလေသည်။ ကောင်းကင်မှအသံတော်သည်လည်း ‌“သင်သည် ငါချစ်မြတ်နိုးတော်မူသော ငါ၏သားဖြစ်သည်။ ငါသည် သင့်အား လွန်စွာနှစ်သက်အားရတော်မူ၏” ဟူ၍ထွက်ပေါ်လေ၏။

ထို့ကြောင့် ယောဟန်က သူတို့အား “ငါသည် လူတို့ကို ရေဖြင့် နှစ်ခြင်းမင်္ဂလာပေးသည်မှာမှန်၏။ သို့သော် ငါ့ထက် မြင့်မြတ်သောသူသည် လာနေပြီဖြစ်၏။ ငါသည် သူ၏ဖိနပ်ကြိုးကိုပင် ဖြေပေးရန် မထိုက်တန်ပေ။ သူသည် သင်တို့အား ဉာဏ်အလင်းတော်အားဖြင့်လည်းကောင်း၊ မီးအားဖြင့်လည်းကောင်း နှစ်ခြင်းမင်္ဂလာပြုပေးလိမ့်မည်။

ထို့ကြောင့် သင်တို့၏အပြစ်ဒုစရိုက်များမှ နောင်တသံဝေဂရပြီဆိုသည်ကို အလုပ်အားဖြင့် သက်သေပြကြလော့။ သင်တို့ကိုယ်သင်တို့ အာဗြဟံ၏မျိုးဆက်ဖြစ်သည်ဟူ၍ မဆိုကြနှင့်။ အကြောင်းမူကား၊ ဘုရားရှင်သည် သင်တို့နေရာ၌ အစားထိုးရန် ဤကျောက်ခဲများကိုပင် အာဗြဟံ၏မျိုးဆက်များအဖြစ် ဖန်ဆင်းလိုက်နိုင်သည်ဟု သင်တို့အား ငါဆိုမည်။

ယခုအချိန်မှာပင် ဘုရားရှင်သည် နောင်တသံဝေဂမရသောသူများကို ပြစ်တင်ရှုံ့ချပြီး ပြင်းထန်စွာအပြစ်ဒဏ်ပေးဖို့ အသင့်ရှိနေ၏။ ထို့ကြောင့် နောင်တသံဝေဂမရကြဘဲ ကောင်းသောအမှုအရာများကို မပြုလုပ်သူတို့သည် ဘုရားရှင်၏ပြစ်တင်ရှုံ့ချမှုကို ခံရပြီး မီးထဲကို ပစ်ချခံရလိမ့်မည်” ဟုဆိုလေ၏။

အရိယာသူတော်စင်ဟေရှာယက သူ၏ကျမ်းတွင် ယောဟန်အကြောင်းကို ကြိုတင်နိမိတ်ဖတ်ရေးသားထားခဲ့သည်မှာ “တောကန္တာရထဲတွင် တစ်စုံတစ်ဦးက ကျယ်လောင်စွာအော်ဟစ်ကြွေးကြော်မည်ကား၊ ‘အရှင်သခင် ကြွလာမည့်လမ်းကို ပြင်ဆင်ကြလော့။ သူ၏လမ်းကို ဖြောင့်ဖြူးစေကြလော့။ တောင်ကြားချိုင့်ဝှမ်းတိုင်းကို မြေဖို့၍ တောင်ကုန်း၊ တောင်တန်းများကို ညီညာစေကြလော့။ ကွေးကောက်သောလမ်းများကို ဖြောင့်တန်းစေပြီး ကြမ်းတမ်းသောလမ်းများကို ချောမွေ့ပြေပြစ်စေကြလော့။ ထိုနောက်တွင် ဘုရားရှင်စေလွှတ်တော်မူသော ကယ်တင်ရှင်ကို လူတိုင်းတွေ့မြင်ရကြလိမ့်မည်’” ဟူ၍ဖြစ်၏။