Mak 2
2
Yesu oloto sida tunipekipeki vaivaina i wai yawasani
(Metiu 9:1-8; Luk 5:17-26)
1Laḡan visa a kovi mulinemo Yesu i munaḡa tava Kapeniammo. Lava a vaiye te Yesu i tava munaḡa vanuwemo. 2Kamaina bi lava wapewapedi a tava ḡome bi vanuwa nopona bi mataetina ai wanavu. Yesu Maimaituwa giuna i giugiuwedi. 3Bi olooloto 4 edi tau tuni pekipekina latilatina a avali tavaite. 4Tedi mote ḡemoḡemotina te maso a valageta Yesu lisinemo, lava mataeta ai wanavu. Taunana aubaina a kaisaḡa vanuwa dabanemo. Bi Yesu i moimoitona dabanemo bwada a koiyavusi. Kamaina bi edi tau latilatina ai dawe yovoḡe Yesu matanemo. 5Yesu olooloto edi sumaḡa i kita bi oloto tunipekipekina i giuwe, “Natugu, em gebogebo ya noḡonoḡoti kamaḡe.”
6Ḡome waiḡake tauwailovelovena mai a kitakitana, tedi nuwedimo ai nuwanoḡonoḡotana gado, 7“Maimaituwa taunaḡa gebogebo taunoḡoti kamaḡedi, bai aubaina niga lavana mai ya giugiu? Tana maso Maimaituwa vaitena ḡemoḡemotidi, ee?”
8Tedi mai a wai nuwaḡonoḡota ba, Yesu ma ḡemota nopodi i sibe. Bi i giuwedina gado, “Bai aubaina niga noḡotidi nopomimo sa saḡasaḡa? 9Bamo taunana i tekateka? Oloto tunipekipekina yea giuwe, ku moito em kebana kwa avali bi kwa nawa, ee em gebogebo e noḡoti kamaḡe? 10Niganana kaka yai lovemi bi ko sibe te Tana Taunana Natuna#Deniel 7:13-14 waibadana i vai te dobumo gebogebo ya noḡoti kamaḡedi.” Ḡome Yesu oloto tunipekipekina i giuwena gado, 11“Kwa moito em kebana kwa avali bi kwa nawa em vanuwemo.” 12Lava matabudi a kitakita, bi ma ḡemota i kena moito, ena kebana i vai bi i nawa. Tedi ḡome a sove bi Maimaituwa a ka saḡesaḡena gado, “Tama niga kauwina mote bamo mainana ka kita.”
Yesu Livai i yoge
13Yesu Kapeniam i gose bi i munaḡa topa dianaḡa i nawanawa. Bi lava kumna a tava lisinemo bi i wai lovelovedi. 14Bi i nawanawa te Alupias natuna Livai i kita. Tana takis anilai tupana vanuwinemo i miyamiya. Kamaina bi Yesu i giuwena gado, “Ku kaiwatagu!” Livai i miya moito bi Yesu i kaiwata.
15Mba aubiganemo Livai ena vanuwemo Yesu bi ena tauwaikaiwatana, takis taulaitupa bi gebogebo lavedi wapewapedi vaitedi a kanikani. #2:15 Mousis waiḡake i kulidi bi Palisi mba waiḡakedi matabudi a kaikaiwata kauwedi. Bi kota Diu edi vaivai bi vaivai ḡesaudi ai tubudi bi a kaikaiwatedi. Tedi a giu te mabai niga waiḡakedi mote a kaikaiwatedi ba tedi lava gebogebodi. 16Waiḡake tauwailovelovena tedi taunana Palisi, a kita te takis taulaitupa bi gebogebo lavedi Yesu vaitena a kanikani. Taunana aubaina Palisi Yesu ena tauwaikaiwatana a giuwedi, “Bai aubaina tana niga lavedi vaitedi sa kanikani?” 17Yesu i vaiyedi bi edi giu i waimune, “Lava yawayawasanidi mote doketa sima ḡoyeḡoye, bi lava sidesidedi doketa sa ḡoyeḡoye. Tagu e yovona mote didimana lavedi aubaidi bi gebogebo lavedi aubaidi.”
Udi ena waitala
18Laḡan ḡemota Diyoni taukabulu ena tauwaikaiwatana bi kota Palisi a udiudi. Lava ḡesaudi a tava Yesu lisinemo bi ai talayena gado, “Bai aubaina Diyoni tauwaibulu ena tauwaikaiwatana bi Palisi edi tauwaikaiwatana sa udiudi, bi tam em tauwaikaiwatana geḡa?” 19Yesu i giuwedina gado, “Bainewa te lawelawena ena tauliso sa udi? Tedi mote sima udi banina lawelawena yaḡolo tedi vaitedi. 20Bi laḡan yaḡolo ya natonatona lawelawena ena ḡaviya sa kaikamaḡe mulinemo kaka ena tauliso sa udi.”
21Lava mote ḡemoḡemotina te gala puselina valivaliuna ima vai bi gala wadubona vaitena ima popo ḡemotidi. Bai aubaina, galana valivaliuna male gala wadubona ya lisi wai didigi.#2:21 Tagu yawasana valivaliuna e natome. Bi temi emi vaivai wadubona vaitena tai ḡemotina mote ima kena kauwa. Mote aiyai gala puselina valivaliuna ima vai bi gala wadubona vaitena ima popo ḡemoti. Bamo te mai i kauwena, ba sa koḡakoḡana sauginemo gala valivaliuna ya ḡoḡosi bi gala wadubona ya lisi waididigi. 22Aiyai mote waen valivaliuna ima vai bi kwagi wadubonemo ima ḡini yovoḡe. Bamoda mai i voiyena ba waen kwagina wadubona ya tili te kwagi bi waen sa gebogebo. Geḡa te tana maso waen valivaliuna i vai bi kwagi valivaliunemo i ḡini.#2:22 Diu edi kwagi ba ḡamoḡamo kwapidi. Laḡannemo ḡamoḡamo kwapina i wadubona, ba pulopulo sa saḡa te kwagi ya suve sali.
waiyawasi laḡanna Waitalana
23Waiyawasi laḡannemo Yesu bi ena tauwaikaiwatana vaitedi witi daibinaḡa a nawanawa bi witi banidi a tanodi bi a kanikanidi. 24Taunana aubaina Palisi Yesu a giuwena ḡado, “Ei! Mba tama ema waiḡake te em tauwaikaiwatana mote maso mai a voiye waiyawasi laḡannemo.” 25Yesu giu i wai munena gado, “Temi Deivida bai i voivoiyena mote bamo ko ievi? Sauginemo tana bi ena lava vaitedi kani a peki bi a ḡoye te maso bai a kani. 26Kamaina bi i nawa Maimaituwa ena vanuwemo bi buledi Maimaituwa vitevitena i vai bi ena lava vaitedi a kani. Niga kauiwina pilisi saḡasaḡa guletina Abiyata enawai bada sauginemo i tubuḡa. Waiḡake ena luvamo mba buledina pilisi taudiḡa sa kanikani. Bi geḡa te Deivid i vai bi ena lava vaitedi a kani. 27Yesu giu i wai kena, “Waiyawasi laḡanina ba lava aubaidi. Bi mba laḡanina mote lava imai badae.” 28Niganana kona kita, Tana Taunana Natuna, tana waiyawasi laḡanina badana.
Sélection en cours:
Mak 2: kqf
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2009, Wycliffe Bible Translators, Inc. All rights reserved.