Luka 22
22
Nhwalo gwa kumpuki Yesu
(Matayo 26:1-5; Maluko 14:1-2; Yohana 11:45-53)
1Mpapala gwa mikate janga jeligwa kimela, ogukemigwa Pasaka, ukiba ubandakile. 2Akakung'i akolongwa na akaboli ba Malagilo ga Musa bapalanga ndela ja kunkoma Yesu, nambu bajogopanga bandu.
Yuda ajeketela kunng'aluka Yesu
(Matayo 26:14-16; Maluko 14:10-11)
3Lichetani ngilinnyingi Yuda ojwakemigwa Isikalioti, jumwe jwa baba achandundame komi na abena. 4Yuda ngajenda, ngapangana na akakung'i akolongwa na akalenda ba Nyumba ja Nnoongo kube apapa kunng'aluka Yesu kwabe. 5Angweto ngabaalalila nu kulagana nakwe kunnepa uloi. 6Yuda ngajeketela, ngabe akapala ndela jambone ju kunkamuya kwabe pangamanya bandu ajingi.
Kupanganakia chakulya cha Angwana mpapala gwa Pasaka
(Matayo 26:17-25; Maluko 14:12-21; Yohana 13:21-30)
7Lichoba lya mikate janga jeligwa kimela ngiliika. Lyenie nga lichoba lya mwana limbelele jwa lilumbo lya Pasaka. 8Penia Yesu ngabakinga Petulo na Yohana, ngabalenge, “Nnyendange makatupanganakie mpapala ili tupate kulye Pasaka.”
9Angweto ngabankonya, “Mpala tupangania ko chakulya?”
10Ngabalengela, “Mpenikiange! Apampakube makajenda kunnyini, mankongana na munulome ojwapotwi kibega cha mache. Mankengamange mpaka munyumba ejapakujingila. 11Mannengela nkola nyumba, ‘Aboli bankonya, kibikole chumbi echimbakulele mpapala gwa Pasaka pamwe na akinapunji bango?’ 12Jwombe mannangilage chumbi kikolongwa kugolofa chombe kipanganigwe. Mpangania mwenio.”
13Ngabajendanga, ngibikikolanga kila kilebe tela andi Yesu apabalengalinge, ngabapangania mpapala gwa Pasaka.
Chakulya cha Angwana
(Matayo 26:26-30; Maluko 14:22-26; 1 Akakolinto 11:23-25)
14Kingobu apachalenganila, Yesu ngatama kulye chakulya pamwe na achandundame bakwe. 15Ngabalengelanga, “Mbaile muno kulye Pasaka jenje pamwe namangweto tango nu kupotekigwa. 16Gambu nannengelanga, ndyeje kabele mpaka apipakulenganila Pasaka mu Kingwana cha Nnoongo.”
17Penia Yesu ngatola kikombe cha divai, ngannumba Nnoongo, ngalenga, “Mpokelange, mmaganange. 18Magambu nannengelanga, nyweje kabele divai ja zabibu mpaka Kingwana cha Nnoongo apikipakuika.”
19Kabe ngatola nkate, ngalumba, ngaumetula, ngabapaganga ngalenga, “Gongo nga mmele gwango oguboigwa kamagambu ginu. Ntendange nyenie kukungombokela.” 20Ngatenda uyo na kikombe kuboka pukulye, akalenga, “Kikombe chenje nga cha myai jango, ejijitika kwa magambu ginu kupala kulenganakia lilagano liyono. Gongo nga mmele. Ejijitika kwinu, Gange majandiko gakwetije aya jenje.
21“Nambu, nnolange! Jwajo ojwambakung'aluka abi nane upamba pamecha. 22Kweli Mwana jwa Mundu ajenda ukomigwa anda apipangigwe, nambu kulaga kwakwe mundu ojwanng'aluka.”
23Penia ngabatumbu konyana nga meneke kati jito ojwapakamu nhwalo gwenio.
Kutaukana mene nkolongwa
24Ngukupitila kutaukana kati ja akinapunji benia nhwalo gwa mene kati jabe ojwapakube nkolongwa kupeta bange. 25Yesu ngabalengela, “Akangwana banga Akayahudi kalongolea bandu babe kwa makakala, na angweto ukemigwa akaganja ba bandu. 26Nambu ikabe yeneje kati jinu, ibe, jwajo ojwabi nkolongwa panakati jinu nga mpaka abe nchokochoko jwa boa, na ojwabi kilongoi mpaka abe anda mmanda. 27Gambu mana, nga meneke ojwabi nkolongwa? Jwajo ojwatama pamecha kulye chakulya. Nambu nenga mbile panakati jinu anda mmanda.
28“Mangweto makiba nanenga mangobu goa gu kulondoigwa kwango, 29na andi Awabango apabangamwiye Kingwana, uyo nanenga nankamuyanga mangweto kingwana. 30Manniaganga nu kunywe pamecha jango mu Kingwana chango nu kutama muitebu yi kingwana kugahukumula makabi komi na mabena gi kilambo cha Kuisilaeli.
Yesu alondola kube Petulo apa kunkana
(Matayo 26:31-35; Maluko 14:27-31; Yohana 13:36-38)
31“Simoni, Simoni! Mpenikie! Lichetani lipala lijeketeligwe kuntega mangweto, kuambugana gambone kube mabaja, andi mundu apaeba ngano. 32Nambu nenga nannyopile ibe imani jinu jakaobaje. Na mwenga apampakumujila, balimbe mojo akanunabinu.”
33Petulo ngannyanga, “Angwana, nenga mbi laachi kujenda pamwe na mwenga kukipungo, na ata kuwe.”
34Yesu ngannyanga, “Na nnenge mwe Mapetulo, tango nkokoloko kubekaje leleno mpakungana patatu.”
Kingobu chu kujogoya
35Kubokapenia Yesu ngabakonya akinapunji bakwe, kingobu panankingangita pangapotola uloi na nhuku na ilatu maka pungukigwa na nikilebe chachoa?
Ngabajanga, “Kileje.”
36Yesu ngalenga, “Nambu ngoe jwajwoa juna nhuku guloi mpaka apotole, na jwajwoa jwangakola lipanga mpaka auche likoti na aemele lyene. 37Magambu nannengelanga Majandiko Gachwapi galenga, ‘Akabekigwa kikuta chimwe na akabaja,’ mpaka galenganile, magambu kila eliandikigwe kunenga nenga liba kweli.”
38Akinapunji ngabalenga, “Angwana!” Nnole pamba gabi mapanga mabena,
“Jwombe ngalenga, bai!”
Yesu agongalela panani pa Kitombi cha Mizeituni
(Matayo 26:36-46; Maluko 14:32-42)
39Yesu ngaboka pikilambo chenie andi pulukiba lukobo lyakwe ngajenda kukitombi cha Mizeituni, akinapunji bakwe ngabankengama. 40Paika kwenio ngabalengela, “Nng'ongalele kupala makalondoigwaje.”
41Kuboka penia ngabaleka ngajenda kutaali pukuoto kuleke mundu liganga, ngakilakatila ngagongalela, 42ngalenga “Awawa, andampaile kikombe chenje chukupotekigwa kimbete kutaali na nenga. Andampaile mwenga ngiti pambai neje.” 43Mpakachi kuboka Kumbengu ngampitila kummeka alimbe mojo. 44Kiti abi ni nu kuechuka muno, ngagongalela ku kwaja liyuke ngilimpita andi matondogolo ga myai ngagatola pae.
45Kuboka pukugongalela ngabajendele akinapunji bakwe ngabakolela bagochile, gambu bakate kuechuka. 46Ngabalengela, “Mbone nng'ochelanga? Nnyimukange nng'ongalele, kupala makalondoigwaje.”
Yesu bammeka mumakakala
(Matayo 26:47-56; Maluko 14:43-50; Yohana 18:3-11)
47Yesu apakiba tango akalongelaga na nkengeni gwa bandu nguika, akulongalea Yuda, jumwe jwa akinapunji bakwe. Yuda ngajenda kumpata abali Yesu kwa kunkumbatila. 48Nambu Yesu ngannenge, “Yuda! Bo, munng'aluka Mwana jwa Mundu kukunkumbatila?”
49Akinapunji bakwe bala apabalola genia ngabalenga, “Angwana, tutumia mapanga gito?” 50Na jumwe kati ja akinapunji ngamputa upanga mmanda jwa akung'i akolongwa, nganhweketa lichikilo lyakwe lya kalelo. 51Nambu Yesu ngalenga, “Nkotoke! Bai.” Ngalikunyula lichikilo lya mundu jwenio, ngalilamia.
52Penia Yesu ngabalenge akakung'i akolongwa, akananhota ba akalenda ba nyumba ngolongwa ja Nnoongo na akananhota abaikanga kunkamula, “Bo, nhwikangite na mapanga na imbonga kumbukila kube nenga na poki? 53Panakiba na mangweto kila lichoba ku Nyumba ja Nnoongo mambukije. Nambu, chenje ngi kingobu chinu ni kinala chulubendu.”
Petulo ankana Yesu
(Matayo 26:57-58; Maluko 14:53-54,66-72; Yohana 18:12-18,25-27)
54Penia ngabampukila, ngabantola nu kujenda nakwe ku nyumba ja Nkung'i Nkolongwa. Petulo akiba akakengama unyuma kutaali. 55Mwoto bakakungana mu uwa, na Petulo akiba pamwe na abatamangite kujota mwoto gwenio. 56Kingobu munkege jumwe kati ja akabanda apammona Petulo atamite penia papipi na mwoto, nga nnolokeya kipola nu kulenga, “Mundu ojo uyo akiba pamwe na Yesu!”
57Nambu Petulo ngakana, ngalenga, “Mwe! Ne nummanyije.” 58Kingobu kachoko, jonge mundu ngammona Petulo, ngalenga, “Mwenga mmi pamwe nabo.”
Nambu Petulo ngajanga, “Mwe, neje!”
59Kingobu kachoko mundu jonge ngalenga uyo, “Kweli ojo abonekana akiba pamwe nabo, aboka kukilambo cha ku Galilaya!”
60Nambu Petulo ngajanga, “Angwana ne mbi kumanyaje channongela!” Na kingobucho, ogwakiba tango akalongela, nkokoloko ngabeka. 61Angwana ngabatendebuka ngabannolakeya Petulo na Petulo ngakombakela gaga gabalenga Angwana, “Lele tango nkokoloko nukubekaje mpakungana patatu kutenda ne umanyije.” 62Penia ngapita panja ngaguta muno.
Yesu abekigwa nhwenyo nu kuputigwa
(Matayo 26:67-68; Maluko 14:65)
63Bandu abanchunga Yesu ngabamputanga nu kummeka nhwenyo. 64Angweto ngabamputanga kongo bunhwekele kumio ngabankonya, “Bamputite beneke? Nnondole!” 65Na angweto ngabannongela malobe majingi ga kuntukano.
Yesu bampeleka nnongi ja Libalacha
(Matayo 26:59-66; Maluko 14:55-64; Yohana 18:19-24)
66“Pukuchaga, akinanhota na akakung'i akolongwa na akaboli ba Malagilo ga Musa ngabakongana pamwe andi mahakimu, na Yesu ngabanneta nu kummeka nnongi ja Libalacha lyenie.” 67Ngabalenga, “Mutulengele mwe Kilisto ojwapambuligwe na Nnoongo?”
Yesu ngajanga, “Anda nannengile unhwaminije, 68na anda nankonyite lichwali, nnyangangaje. 69Nambu kuboka ngoe Mwana jwa Mundu abakutama kingonu cha kalelo ja Nnoongo juna Makakala.” 70Angweto boa ngabalenga, “Ikonda mwe ma Mwana ba Nnoongo?”
Jwombe ngajanga, “Mangweto nnengite, nenga nga jwenio.”
71Angweto ngabalenga, “Bo tupala uchaili gonge? Tubene tujoine palenga!”
Sélection en cours:
Luka 22: NNQNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Ngindo New Testament © The Word For The World, 2015.