ỊJỌN Ọdawụlẹ
Ọdawụlẹ
Ẹrụ ọnyịịla ọlẹ ka ịJọn da ya iJisọsị nyị ri omyi-ẹla nya Ohe Oluhye. Omyi-ẹla ọọwa juwa hịhị gboyị myị oyi. “Omyi-ẹla ọọwa yẹ ka ka ri ọngịnyị ehe lẹ, ọ kụ tahị lẹlẹ.” Jaabwọ ka ụpwụ ọle ayịdang ya, ị da ẹrụ ọnyịịla ọlẹ chajị ka angị ka wọọ ka myị nyori iJisọsị ọnyị nya Ohe Oluhye nyị ri ọngọ ka chị angịnyị da bwu ẹpwụ nya ang onyobyi ọhọhọ ọlẹ ka Ohe Oluhye myị ọnụ nyị juwa wari. Bwula ọmyịmyị ọlala nyaa ị ka la ọhịhị ẹ-ẹga nyamwụ (20:31). Ụpwụ nya ịJọn ọlẹ mẹjẹ jaabwọ ka ịJọn ọngọ hụ enyi-ohe ya ọwẹwẹ nya iJisọsị da odehe. Ọ yẹkẹẹ, “Anụ chẹhị kele kaka yẹ ọnyị-ọkpịlọ nya Ohe Oluhye ọlẹ kọ wẹẹ ka ye ibyi nya alodehe wuu kpa rụ kọ lalẹẹ warị mẹ oo.” (1:29). Ụka ka iFilipu yẹ iJisọsị, ọ jẹ iJisọsị nyaa wẹ lẹ. Ọọwa ọ yẹkẹẹ, “Ahị yẹ ọlẹng ọlẹ ka iMosisi bala alọmwụ nya Ohe Oluhye inyogo da ụpwụ ya ẹla rụ lẹ” (1:45).
Ẹ-ẹpwụ nya ẹrụ ọnyịịla ọlẹ ka ịJọn da, ahị jẹ ang lụmẹ-lụmẹ u-uhye nya ụma nya ọngọlẹ ka iJisọsị ri bwula o-wo ẹla ịlẹ kọ ya bala ang ịlẹ kọ họ ụka kọ jam odehe. Ịhyẹ ẹ-ẹpwụ nyaa ri ọ wule ịLasarọsị oligu nyamwụ eji bwu iworu, bala ọnyang ọla ịSameriya ọlẹ kọ ye enyi nya ọhịhị ọlẹ ka IJisọsị ya họọ tụ ọnyang ọlẹ kị woo ẹ-ẹpwụ nya ụya ọhọhọ. IJisọsi wụrụ ịlọmwụ ịkaa nya ọhịhị. Ọ ya ọwa nyaa ri ahịgboo nya odehe bala ọngọgbikpịlọ ọnyịịla bala ọmwụ nya okoji nya alakọnụ le. iJisọsị họ ụkụrwọ ẹbyẹbyị lụmẹ. Ọọwa du ka iru nya angịnyị myị lọọ bala ọ-dịrọọ ka ẹga dati-dati. Ụkụrwọ ịlẹbyẹbyị ịịwa ri ang-ẹjẹẹ nyori ọwa anyịdang nyị ri ọnyị nya Ohe Oluhye. IJisọsị mẹjẹ ọwa nyị lala Ohe Oluhye adamwụ ọlẹ kọọ họ ụkụrwọ ịlẹbyẹbyị ụka myị ụka.
ỊJọn ja oja nya iJisọsị datị hi erụ ọnyịịla ịta ịkịla. Ọ ya ela chẹta eji u-uhye nya ang-ahị nya ọhịhị o-gbe oyi myị oyi ọlẹ ka iJisọsị hu ha. IJisọsị mẹ ang jẹ ya ọwa nyaa ri ụgbẹyị bala ẹla nya ịlẹhị bala ọhịhị lẹ.
Ẹla ohyẹẹkpẹ ụ-ụpwu nya ịJọn ọle ri owuwu nya iJisọsị bala eje ọ-lọọ la bala iloo o-gwoo gu bala o-wuleji bwu iworu nyamwụ tụ ịlọmwụ ọ-chị ehe mẹjẹ angịjugbẹyị nyamwụ ụka kọ wuleji bwu iworu.
Ẹla Ịlụpwụ Ọlẹ
Ẹla nya ọgbanyẹ ịlụpwụ ọlẹ 1:1-18
Ẹrụ ọnyịịla oyaya nya ịJọn ọngọ hụ enyi-ohe bala angịjụgbẹyị nya ọgbanyẹ nya iJisọsị 1:19-15
Ẹrụ ọnyịịla oyaya u-ugbọdọda nya IJisọsị 2:1—12:50
Ẹnụtụrụ ihyẹẹkpẹ nya iJisọsị i-iJerusalẹm bala epweji ị-ba iJerusalẹm ba 13:1—19:42
IJisọsị wuleji bwu iworu, ọ chị ịlọmwụ ehe mẹjẹ angịnyị 20:1-31
IJisọsị chị ịlọmwụ ehe mẹjẹ angịjụgbẹyị nyamwụ 20:11—21:25
Sélection en cours:
ỊJỌN Ọdawụlẹ: IBNO
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Igede Bible © The Bible Society of Nigeria, 2019.